O le Agamalu o se Uiga Tāua Faa-Kerisiano
O le Agamalu o se Uiga Tāua Faa-Kerisiano
“Ia oofu outou i le . . . agamalu.”—KOLOSE 3:12.
1. O le ā ua avea ai le agamalu o se uiga mataʻina?
O SE tagata e agamalu, tatou te fiafia e faatasitasi ma ia. Na tusi le tupu poto o Solomona e faapea: “O le laulaufaiva filemu e gau ai le ivi.” (Faataoto 25:15) O le agamalu o se uiga mataʻina lea e aofia faatasi ai uiga tauagafau ma le malosi.
2, 3. O le ā le fesootaʻiga a le agamalu ma le agaga paia, ma o le ā o le a tatou iloiloina i lenei mataupu?
2 Na faaaofia e le aposetolo o Paulo le agamalu i lana lisi o “fua o le agaga,” o loo maua i le Kalatia 5:22, 23. O le upu Eleni o loo faaliliu i le “agamalu” i le fuaiupu e 23 o le New World Translation e masani ona faaliliu i le “agavaivai” po o le “lē gaoiā” i isi faaliliuga o le Tusi Paia. O le mea moni, e faigatā ona maua se upu e tutusa lelei ma le upu Eleni i isi gagana talu ai le uluaʻi upu o loo faamatalaina ai, e lē o uiga faaalia i fafo o le lē gaoiā po o le agavaivai, peitaʻi o le agamalu ma le agalelei magafagafa i totonu; e lē o le auala e amioaʻi ai se tasi, a o le tulaga o le mafaufau ma le loto.
3 Seʻi o tatou iloiloina ni faaaʻoaʻoga faale-Tusi Paia se fā ina ia fesoasoani iā i tatou e matuā talisapaia ai le uiga ma le tāua o le agamalu. (Roma 15:4) O le faia faapea, e lē gata o le a tatou aʻoaʻoina ai po o le ā lea uiga, ae pe o le a faapefea foʻi ona tatou maua ma faaalia i a tatou feutagaʻiga.
‘E Tautele i Luma o le Atua’
4. E faapefea ona tatou iloa e faatāuaina e Ieova le agamalu?
4 Talu ai o le agamalu o se vaega o fua o le agaga o le Atua, e talafeagai la ona tatou manatu e ao ona fesootaʻi vavalalata le uiga lea ma uiga mataʻina o le Atua. Na tusi le aposetolo o Peteru e faapea, “o le loto agamalu ma le filemu, o le mea tau tele lava lea i luma o le Atua.” (1 Peteru 3:4) O le mea moni, o le agamalu o se uiga faaleatua; e faatāuaina e Ieova. E mautinoa lava la, ua lava ma totoe lea māfuaaga mo auauna a Ieova e atiina aʻe ai le agamalu. E faapefea i le Atua Silisili ese, o le pule silisili o le vateatea aoao, ona faaalia le agamalu?
5. O le ā le faamoemoe ua tatou maua ona o le agamalu o Ieova?
5 Sa agasala ma le loto i ai le uluaʻi ulugalii, o Atamu ma Eva, i le faatonuga tuusaʻo a le Atua ina ia aua neʻi aai i le laau e iloa ai le lelei ma le leaga. (Kenese 2:16, 17) O le iʻuga o lenā gaoioiga lē usitai ma le loto i ai o le agasala, oti ma le faaesea mai o i laʻua ma a la fanau mai i le Atua. (Roma 5:12) E ui lava e tonu aʻiaʻi le faamasinoga na tuuina atu e Ieova, ae na te leʻi matuā lafoaʻia le aiga faaletagata e pei ua matuā leaga lava e lē mafai ona toe faafoʻisia mai. (Salamo 130:3) Na i lo lenā, ona o lona agalelei magafagafa ma lona finagalo malie, ua ia faaalia mai ai lona agamalu e ala i le saunia o se auala e faalatalata atu ai tagata agasala iā te ia ma maua ai lona finagalo malie. Ioe, e ala i le meaalofa o le taulaga togiola a lona Alo, o Iesu Keriso, ua mafai ai ona tatou faalatalata atu i lona nofoālii mamalu e aunoa ma le fefe pe mataʻu. —Roma 6:23; Eperu 4:14-16; 1 Ioane 4:9,10, 18.
6. Na faapefea ona faaalia le agamalu i feutagaʻiga a le Atua ma Kaino?
6 A o leʻi taitai lava afio mai Iesu i le lalolagi, sa faaalia ai le agamalu o Ieova ina ua ofoina atu e atalii o Atamu, o Kaino ma Apelu, a la taulaga i le Atua. I le silafiaina o le tulaga o o la loto, sa teena ai e Ieova le taulaga a Kaino ae “ua ia silasila” iā Apelu ma lana taulaga. O le silasila alofa a le Atua iā Apelu ma lana taulaga, sa uunaʻia ai Kaino e faia se gaoioiga leaga. Ua faapea mai le Tusi Paia: “Ona ita tele ai lea o Kaino, ua faaūū lava ona mata.” Na faapefea ona tali mai Ieova? Pe sa toʻasa ea o ia ona o le amio leaga a Kaino? Leai. Sa ia fesili atu ma le agamalu iā Kaino pe aiseā ua ita ai. Sa faamatala atu foʻi e Ieova le mea e tatau ona faia e Kaino ina ia maua ai “le fiafia.” (Kenese 4:3-7) O le mea moni, o Ieova o le faailoaga atoatoa o le agamalu. —Esoto 34:6.
E Tosina Mai ma Faafouina ai i le Agamalu
7, 8. (a) E mafai faapefea ona tatou malamalama i le agamalu o Ieova? (e) O le ā ua faaalia mai e le Mataio 11:27-29 e uiga iā Ieova ma Iesu?
7 O se tasi o auala sili e malamalama ai i uiga lē mafaatusalia o Ieova, o le suʻesuʻeina lea o le soifuaga ma le faiva a Iesu Keriso. (Ioane 1:18; 14:6-9) A o iai o ia i Kalilaia i le tausaga lona lua o lana galuega talaʻi, sa faia ai e Iesu ni galuega mamana i Koasini, Petesaita, Kapanaumi, ma nuu latalata ane. Peitaʻi, e toʻatele tagata sa faamaualuluga ma lē fiafia, ma na latou mumusu ai e talitonu. Sa faapefea ona tali atu Iesu? A o ia maumauaʻi e faamanatu atu iā te i latou āuga o lo latou lē faamaoni, na uunaʻia o ia e lona alofa ona o le tulaga pagatia faaleagaga o tagata lautele (ʽam ha·ʼaʹrets), o ē maulalo ma lē taualoa sa iai faatasi ma i latou.—Mataio 9: 35, 36; 11:20-24.
8 O gaoioiga mulimuli ane a Iesu na faaalia ai sa ia “iloa lelei le tamā” ma faaaʻoaʻo iā te ia. Sa faalautele atu le valaaulia a Iesu i tagata lautele e faapea: “Ia outou ō mai iā te aʻu, o outou uma o ē tigāina ma mafatia i avega, o aʻu foʻi e mālōlō ai outou. Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma lē loto maulalo; ona maua lea e outou o le mālōlōga mo outou agaga.” Maʻeu le faamāfanafanaina ma faafouina ai o i latou o ē na mafatia! E faapena foʻi ona faamāfanafanaina ma faafouina ai i tatou i aso nei. Pe afai e faaofuina atoatoa i tatou i le agamalu, o le a tatou iai faatasi ma i latou ‘o ē ua loto le Atalii e faaali atu i ai’ lona Tamā.—Mataio 11:27-29.
9. O le ā le uiga e fesootaʻi atu i le agamalu, ma e faapefea ona avea Iesu ma faaaʻoaʻoga lelei i lenei tulaga?
9 E fesootaʻi vavalalata le agamalu ma le “loto maulalo.” I le isi itu, o le faamaualuga e taʻitaʻia ai se tasi e faasilisilia o ia lava ma faapogaia ai le soona faia o isi ma lē popole ai i o latou faalogona. (Faataoto 16:18, 19) Na faaalia e Iesu le loto maulalo i lana faiva i le lalolagi. Ina ua tiʻetiʻe atu o ia i se asini i Ierusalema pe tusa ua toe ono aso a o lumanaʻi lona maliu, na alalaga mai tagata o ia o le Tupu o tagata Iutaia, sa matuā ese lava Iesu mai taʻitaʻi o le lalolagi. Sa ia faataunuuina le valoaga faa-Mesia a Sakaria e faapea: “Faauta! O loo afio mai iā te oe lou Tupu, ua agamalu o ia, o loo tiʻetiʻe i le asini, o le tamaʻi asini foʻi.” (Mataio 21:5; Sakaria 9:9) Na iloa e le perofeta faamaoni o Tanielu se faaaliga lea na tuuina atu ai e Ieova le pule i lona Alo. Peitaʻi, i le valoaga na muamua atu sa ia faamatalaina ai Iesu o se “tagata ua aupito faatauvaa.” E vaavaalua le agamalu ma le loto maulalo. —Tanielu 4:17; 7:13, 14.
10. Aiseā e lē uiga atu ai le agamalu faa-Kerisiano i le vaivai?
10 O le agamalu mataʻina lea o loo faaalia e Ieova ma Iesu e fesoasoani iā i tatou e faalatalata atu ai iā i laʻua. (Iakopo 4:8) O le mea moni, o le agamalu e lē uiga atu i le vaivai. E lē o le uiga lenā! E faaalia e Ieova, le Atua Silisili ese, le tele o lona malosi ma lona mana. O lona toʻasa e pei o se afi mumū faasaga i ē amiolētonu. (Isaia 30:27; 40:26) Sa maumauaʻi foʻi Iesu ina ia aua neʻi lolo atu i osofaʻiga mai iā Satani le Tiapolo. Sa leʻi taliaina e Iesu faiga lē saʻo faapisinisi a taʻitaʻi lotu i ona aso. (Mataio 4:1-11; 21:12, 13; Ioane 2:13-17) Peitaʻi, sa tumau lona agamalu a o feagai ai ma sesē o ona soo, ma onosaia o latou vaivaiga. (Mataio 20:20-28) Na faamatalaina ma le tonu e se tagata aʻoga o le Tusi Paia le agamalu e faapenei: “I tua atu o le agamaulalo o loo iai le malosi e pei o le uʻamea.” Seʻi o tatou faaalia lenei uiga o Keriso o le agamalu.
Sa Sili Ona Agamalu i Ona Aso
11, 12. O le ā e mataʻina ai le agamalu o Mose, e tusa ai ma le auala na tausia aʻe ai o ia?
11 O le faaaʻoaʻoga lona tolu o le a tatou iloiloina o Mose. O loo faamatalaina o ia e le Tusi Paia o sē e “matuā agamalu lava . . . e sili lava i tagata uma o i le lalolagi.” (Numera 12:3) Sa tusia lenei faamatalaga i lalo o le faagaeega tauatua. O le mataʻina o le agamalu o Mose na avea ai o ia ma se tasi e usitai i taʻitaʻiga a Ieova.
12 Sa tulaga ese le auala na tausia aʻe ai Mose. Na faamautinoa e Ieova ua faasaoina lenei alo o ni mātua faatuatua Eperu i le vaitaimi o sauāga ma fasiotiga tagata. Sa tausia Mose a o laʻitiiti e lona tinā, o lē sa aʻoaʻoina o ia e uiga i le Atua moni, o Ieova. Mulimuli ane, na aveesea Mose mai i lona aiga ma ola ai i se siʻomaga matuā ese lava. Na taʻua e se uluaʻi Kerisiano sa faamaturoina o Setefano e faapea: “Na aʻoaʻoina foʻi Mose i le poto uma lava o Aikupito; ua malosi [Mose] i ana upu ma ana mea na faia.” (Galuega 7:22) Na faaalia lona faatuatua ina ua ia mātauina faiga lē tonu a taʻitaʻi o pologa a Farao i ona uso. Sa tatau ona sola ese Mose mai Aikupito ma alu atu i Mitiana, ona talu ai sa ia fasiotia se tagata Aikupito o lē na fasia se tagata Eperu.—Esoto 1:15, 16; 2:1-15; Eperu 11:24, 25.
13. O ā ni aafiaga na oo iā Mose a o aumau o ia i Mitiana mo le 40 tausaga?
13 Ua 40 tausaga o Mose i le taimi lea, ua mafai lava la ona ia tausia ia lava i le vaomatua. Ina ua taunuu i Mitiana, sa latou feiloaʻi ai ma afafine e toʻafitu o Reuelu ma fesoasoani iā i latou e faainu lafu manu a lo latou tamā. Ina ua toe foʻi atu i le fale, na faamatala ma le fiafia e teine iā Reuelu le “tagata Aikupito” na laveaʻi iā i latou mai leoleo mamoe na faapogaia iā i latou ni faalavelave. Sa valaaulia e Reuelu Mose latou te nonofo faatasi i lo latou aiga. O puapuaga sa ia mafatia ai, sa lē iā te ia se agaga ita; pe taofia ai foʻi o ia mai le faia o ni suiga i lona olaga e tusa ma lona siʻomaga fou lea ua iai. O lona faanaunauga e faia le finagalo o Ieova e leʻi maluelue. A o ia tausia le lafu mamoe a Reuelu mo le 40 tausaga, sa ia faaipoipo atu iā Sepora, ma tausia aʻe ona atalii, na ia atiina aʻe ma faaleleia ai le uiga lea na iʻu ina mātaulia ai o ia. Ioe, na aʻoaʻoina e Mose le agamalu a o iai i tulaga faigatā. —Esoto 2:16-22; Galuega 7:29, 30.
14. Ia faamatala se mea na tupu sa faaalia ai le agamalu o Mose a o ia taʻitaʻia le nuu o Isaraelu.
14 Ina ua tofia o ia e Ieova na te ta’ita’ia le nuu o Isaraelu, na faaalia pea le uiga agamalu o Mose. Na ta‘u atu e se tauleʻaleʻa iā Mose e faapea, o Elitato ma Metato o loo perofeta ane i laʻua i le toagalauapi, ae e leʻi iai i laʻua i le taimi na liligi ifo ai e Ieova lona agaga paia i tane e toʻa 70, o ē o le a auauna o ni fesoasoani iā Mose. Na faailoa mai e Iosua e faapea: “Le alii e, Mose, ia e vavao iā te i laʻua.” Na tali atu ma le agamalu Mose e faapea: “Ua e matauʻa ea ona o aʻu? ou te manaʻo lava ia fai ma perofeta le nuu uma o Ieova, ma ia foaʻiina atu e Ieova lona Agaga iā te i latou.” (Numera 11:26-29) Sa fesoasoani le agamalu e faafaigofie ai le tulaga faigatā na iai.
15. E ui ina e lē lelei atoatoa Mose, ae aiseā e lelei ai le mulimuli i lana faaaʻoaʻoga?
15 I se tasi mea na tupu na foliga mai ai ua lē lava le agamalu o Mose. I Meripa e latalata ane i Tasesa, sa lē taulau ai ona avatu e Mose le viiga iā Ieova, o le Fai Vavega. (Numera 20:1, 9-13) E ui ina e lē lelei atoatoa Mose, ae o lona faatuatua lē maluelue i lona soifuaga, ma le mataʻina o lona agamalu ua faagaeetia ai tatou i aso nei. —Eperu 11:23-28.
Le Eseesega o le Finauvale ma le Agamalu
16, 17. O le ā le lapataʻiga tatou te maua mai i le mea na tupu iā Napalu ma Apikaila?
16 Na iai se faaaʻoaʻoga lapataʻi mai le taimi o Tavita, a o leʻi leva lava ona mavae le maliu o le perofeta a le Atua o Samuelu. Sa aafia ai se ulugalii faaipoipo, o Napalu ma lana avā, o Apikaila. Pagā se eseesega o i laʻua nei e toʻalua! O Apikaila o se avā “mafaufau lelei” a o lana tane e “finauvale ia ma le leaga i ana mea e fai.” Na teena ma le lē mafaufau e Napalu le talosaga a Tavita ma ana tauleleʻa, o ē na fesoasoani i le leoleoina o ana lafu manu mai tagata gaoi. Na tonu le toʻatamaʻi o Tavita, o lea na latou fusi ai loa a latou pelu o ia ma ana tauleleʻa ma ō atu e tau ma Napalu. —1 Samuelu 25: 2-13.
17 Ina ua oo atu le tala o le mea na tupu iā Apikaila, sa faataalise loa ona ia saunia o areto, uaina, o meaʻai, o fuifui vine mago ma potopotogāmati ma alu atu e faafetaiaʻi iā Tavita. Sa ia augani atu iā Tavita e faapea: “Le alii e, ia iā te aʻu lenei agasala; o aʻu nei lau auauna fafine, seʻi oʻu fai atu i ou fofoga, ma e faafofoga mai i upu a lau auauna fafine.” Na faatoʻafilemuina le loto o Tavita i le talosaga ma le loto agamalu a Apikaila. Ina ua uma ona faalogologo atu i le faamatalaga a Apikaila, sa faailoa atu e Tavita e faapea: “Faafetai iā Ieova le Atua o Isaraelu, o lē na auina mai oe i le aso nei e faafetaiaʻi iā te aʻu! Faafetai foʻi i lou mafaufau, ma faafetai iā te oe, ina ua e taofi iā te aʻu i lenei aso, ina neʻi oʻu alu e sasaa le toto.” (1 Samuelu 25:18, 24, 32, 33) O le finauvale o Napalu na iʻu atu ai i lona maliu. O uiga lelei o Apikaila na iʻu ai ina faafiafiaina o ia i le avea ma avā a Tavita. O lona agamalu ua faataatia ai se faaaʻoaʻoga mo ē o loo auauna iā Ieova i aso nei. —1 Samuelu 25:36-42.
Saʻili le Agamalu
18, 19. (a) O ā suiga e manino lelei mai a o tatou oofu i le agamalu? (e) O le ā e fesoasoani iā i tatou e suʻesuʻeina ai ma le uigā i tatou lava?
18 E matuā tāua tele le uiga lenei o le agamalu. E sili atu na i lo le uiga tauagafau; o se uiga moni e tatau ona faaalia e faafouina ai isi. I taimi ua mavae, atonu na tatou tautatala finauvale ai ma gaoioi i se auala lē agalelei. Ae peitaʻi, ina ua tatou aʻoaʻoina le upu moni o le Tusi Paia, ua suia ai o tatou olaga ma avea o ni tagata e faigofie ona faafesagaʻia. Na taʻua e Paulo lenei suiga ina ua ia timaʻi atu i uso Kerisiano e faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Sa faatusaina e le Tusi Paia lenei liliuga i le suia mai i se manu feʻai e pei o luko, nameri, leona, urosa ma le gata e avea ma manu lalata e pei o mamoe, tamaʻi oti, ma le tamaʻi povi. (Isaia 11:6-9; 65:25) E maofa tagata o loo vaavaai mai ona o le mataʻina o nei suiga o uiga faaletagata. Ae peitaʻi, ua māfua ona tatou faia nei liliuga ona o le agaga o le Atua, auā o le agamalu e aofia ai i ona fua mataʻina.
19 Po o le uiga ea la pe a uma ona tatou faia suiga moomia ma tuuina atu i tatou iā Ieova, ona lē toe manaʻomia loa lea ona tatou galulue ia avea ma ē agamalu? E leai. Mo se faataʻitaʻiga, o laʻei fou e manaʻomia se tausiga faifai pea ina ia foliga mamā ai ma talafeagai. O le tilofaʻia o le Afioga a le Atua ma mafaufau loloto i faaaʻoaʻoga o loo iai, o le a fesoasoani lea iā i tatou ia iai se vaaiga fou ma vaai totoʻa ai iā i tatou lava. O le ā ua taʻu mai e le fāʻata o le Afioga a le Atua e uiga iā te oe?—Iakopo 1:23-25.
20. O le a faapefea ona tatou taulau manuia i le faaalia o le agamalu?
20 I tulaga masani lava, e eseese uiga o tagata taʻitoʻatasi. O nisi auauna a le Atua e faigofie ona latou faaalia le agamalu na i lo isi. Ae peitaʻi, o Kerisiano uma lava e moomia ona latou atiina aʻe fua o le agaga o le Atua, e aofia ai le agamalu. Na apoapoaʻi ma le alofa Paulo iā Timoteo e faapea: “Ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu.” (1 Timoteo 6:11) O le upu “tausisi” ua taʻu mai ai e manaʻomia ni taumafaiga. E faaupuina le apoapoaʻiga lenei e se tasi o faaliliuga o le Tusi Paia e faapea, ia “tuu iai lou loto.” (New Testament in Modern English, a J. B. Phillips) Afai e te faia ni taumafaiga e mafaufau loloto ai i faaaʻoaʻoga lelei mai le Afioga a le Atua, e mafai ona tāmau ai i lou mafaufau ma totō ai i lou loto. O le a suia ma taʻitaʻia ai oe.—Iakopo 1:21.
21. (a) Aiseā e tatau ai ona tatou faaalia le agamalu? (e) O le ā o le a talanoaina i la tatou mataupu o loo sosoo mai?
21 O le auala tatou te amioaʻi ai agaʻi i isi e faaalia ai po o le a le tele o tatou faaalia ai le agamalu. Na fesili le soo o Iakopo e faapea: “O ai ea so outou ua poto ma ua malamalama? Inā faaali mai ia e ia ai le amio lelei o ana lava galuega, i le agamalu o i ai le poto.” (Iakopo 3:13) E faapefea ona tatou faaalia lenei uiga faa-Kerisiano i aiga, le faiva faa-Kerisiano, ma le faapotopotoga? O le a faailoa e le mataupu o loo sosoo mai ia taʻiala aogā.
Ia Autalu
• O le ā na e aʻoaʻoina e uiga i le agamalu mai i faaaʻoaʻoga a
• Ieova?
• Iesu?
• Mose?
• Apikaila?
• Aiseā e manaʻomia ai ona tatou faaalia le agamalu?
[Fesili mo le Suʻesuʻega]
[Ata i le itulau 16]
Aiseā na silasila ai Ieova i le taulaga a Apelu?
[Ata i le itulau 17]
Na faaalia e Iesu e vaavaalua le agamalu ma le lotomaulalo
[Ata i le itulau 18]
Na faataatia e Mose se faaaʻoaʻoga lelei o le agamalu