Le Faaipoipoga Uigaese a Poasa ma Ruta

UA tele galuega i le mea e sasa ai saito e latalata ane i Peteleema. Ua alu le aso o galulue. O le sasala o le manogi o saito tao, ua faailoa atu ai i le ʻaufaigaluega ua oo i le taimi e fai ai la latou taumafataga o le aoauli. E taumafa lava le tagata ia ma le fiafia i fua o ana galuega.

O Poasa o se tagata mauʻoa o lē e ana fanua, o loo taumafa ma inu, ua fiafia lona loto ma o loo mālōlō i luga o se faaputuga saito. Ua oo i le taimi e uma ai galuega o le aso, ma ua saʻili lava e le tagata ia le mea lelei e mālōlō ai. Ua fiafia Poasa ma ua ia ufiufi iā te ia ma moe loa.

Se Feiloaʻiga Faalilolilo

Ua oo i le tulua o pō, ua nofo ifo i luga Poasa i le malūlū ma le fefe tele. Auoi, ua leai sona ʻie afu, ma o loo taoto se tagata i ona talaane! Ona o le pogisa tele ua lē iloaina ai po o ai, ua ia fesili atu: “O ai ea oe?” Ua tali atu se leo fafine: “O aʻu o Ruta lau auauna fafine; faaʻafu mai ia lou pito ofu i lau auauna fafine, aua o iā te oe le tausi tama.”—Ruta 3:1-9.

O loo talanoa i laʻua i le pogisa. E lē masani ona iai se tamaʻitaʻi i se taimi faapea i le mea e sasa ai saito. (Ruta 3:14) E ui lava o lea ua ofo atu Poasa, ae sa taoto pea Ruta seʻia oo ina valuapō ma tulaʻi loa o ia ma alu ese, ina ia ʻalofia ai ni faitioga lē saʻo.

Pe e faaosonaunau ea lenei feiloaʻiga? Pe sa faatosina ea lenei tamāloa mauʻoa matua e Ruta—o se teine talavou mativa ua oti lana tane e sau mai se atunuu faapaupau? Pe sa faaaogā ea e Poasa le avanoa lea e tusa ai ma le tulaga tuua toʻatasi o Ruta sa iai i lea pō? O le tali i na fesili e mafai ona iloa ai le faamaoni ma le alofa i le Atua. Ma e faagaeeina ai foʻi lagona i mea moni e faatatau i ai.

Ae o ai Ruta? O le ā lona faanaunauga? O ai lenei tamāloa mauʻoa o Poasa?

“O le Fafine Amio Lelei”

I tausaga muamua atu a o leʻi tupu lenei mea, sa pagatia ai le aai o Iuta i se oge. Sa faimalaga atu se aiga Isaraelu e toʻafā—o Elimeleka, o lana avā o Naomi, ma la la fanau tama e toʻalua o Maalona ma Kiliona i laufanua olaola o Moapi. Sa faaipoipo atu nei tama e toʻalua i ni fafine Moapi, o Ruta ma Orepa. Ina ua mavae le maliliu o tane e toʻatolu i Moapi, na logotala ai fafine nei e toʻatolu i le tulaga lelei ua oo i ai Isaraelu. Ua avea nei Naomi o se fafine ua oti lana tane ma o loo faanoanoa i le leai o se fanau po o se fanau a lana fanau, o lea ua ia filifili ai loa e toe foʻi atu i lona nuu.—Ruta 1:1-14.

A o agaʻi atu i Isaraelu, na augani atu ai Naomi iā Orepa ina ia toe foʻi atu i ona tagata. O lea na faapea atu ai foʻi Naomi iā Ruta: “Faauta, ua foʻi le avā a le uso o lau tane i lona nuu ma ona atua, inā e mulimuli atu i le avā a le uso  o lau tane. A ua fai atu Ruta, Aua e te finau iā te aʻu ina ia ou tuulafoaʻi iā te oe, . . . auā o le mea e te alu i ai, ou te alu ai foʻi . . . e fai lou nuu moʻu nuu; e fai lou Atua moʻu Atua; o le mea e te oti ai, ou te oti ai, e tanu ai foi aʻu.” (Ruta 1:15-17) O lea na toe foʻi atu ai nei fafine matitiva i Peteleema. O inā na faafiafiaina ai tagata i le alofa ma le tausiga a Ruta i le tinā o lana tane, o lea na latou faapea ai “ua lelei o ia iā [Naomi] e sili i tama tane e toʻafitu.” O nisi ua latou taʻua o ia o se “fafine amio lelei.”—Ruta 3:11; 4:15.

I le vaitaimi e selesele ai karite i Peteleema, na faapea atu ai Ruta iā Naomi: “Soʻu alu i se fanua, ma ao ai ni fua o le karite, o mulimuli i sē alofa mai iā te aʻu.”—Ruta 2:2.

Ua faafuaseʻi lava ona ia alu i le fanua o Poasa, o se tauaiga a le tamā o lana tane o Elimeleka. Ua ia fesili atu i le tagata o loo vaaia le fanua mo se faatagaga e ao ai. Sa mataʻina lona aoina o karite ma o lea sa taʻu atu ai e lē o loo vaaia le fanau ia ana galuega iā Poasa.—Ruta 1:22–2:7.

O Sē e Puipui ma Agalelei iā te Ia

O Poasa o se tagata tapuaʻi faamaoni a Ieova. O taeao taʻitasi lava e faamanuia atu ai Poasa i lana ʻaufaigaluega i upu nei: “Ia iā te outou Ieova!” Ma e latou te tali atu foʻi iā te ia, “Ia faamanuia oe e Ieova.” (Ruta 2:4) Ina ua māeʻa ona ia molimauina le galue malosi a Ruta ma lona faamaoni iā Naomi, na faia ai e Poasa se faatulagaga faapitoa mo ia e galue ai. Sa ia fai atu iā te ia i se auala faaaloalo e faapea: “Aua e te alu e ao i se tasi fanua ese, aua foʻi e te tuuna le mea nei, a ia e tumau iinei ma aʻu auauna fafine; e te vaai atu i le fanua latou te selesele ai, e te mulimuli atu iā te i latou; ua ou lē poloaʻi ea i tauleleʻa, aua latou te agaleaga iā te oe? a e fia inu, alu ia oe i vai ma inu ai i mea ua utu e tauleleʻa.”—Ruta 2:8, 9.

Ua punou ifo i lalo Ruta ma faapea atu: “Se ā le mea ua e alofa mai ai iā te aʻu, ma e silasila mai ai iā te aʻu, o aʻu foʻi le tagata ese?” Ua tali atu Poasa: “Ua uma ona faaali mai iā te aʻu mea uma ua e faia i le tinā o lau tane talu ina oti o lau tane; ma ua e tuulafoaʻi i lou tamā, ma lou tinā, ma le nuu na fanau ai oe, a ua e sau i le nuu e te leʻi iloa anamua; ia totogi Ieova i lau galuega, ia tuuina mai iā te oe se taui tele mai iā Ieova.”—Ruta 2:10-12.

E lē o taumafai Poasa e manumalo i faalogona o Ruta. O loo ia tautala atu iā te ia i se auala faaaloalo ma le lē tau faaoleole. O le lotomaulalo o Ruta ua ia faafetai atu ai iā Poasa mo ana upu faamalosiau. I lona iloaina faapea, o se mea e lē tatau ona ia mauaina ma ia faaauau pea ona galue malosi. Mulimuli ane ua oo i le taimi o le taumafataga i le afiafi ua valaau atu Poasa iā Ruta: “E te faalatalata mai iinei, ma ʻai ni areto, ma fufui āu mea e ʻai i le vineta.” Ua ʻai o ia ma ua maona sa ia faatotoe foʻi ni meaʻai mo Naomi.—Ruta 2:14.

I le faaiʻuga o le aso sa aoina ai e Ruta ia le aofaʻiga pe a ma le 22 lita o karite. Ua ia aveina faatasi ma meaʻai na totoe i le fale mo Naomi. (Ruta 2:15-18) I le faafiafiaina i le tele o mea ua maua, na fesili atu ai Naomi: “Po o fea na e ao ai mea i le asō? . . . ia manuia o ia na alofa mai iā te oe.” Ina ua faalogo o ia o Poasa, ona faapea  atu lea o Naomi: “Ia faamanuia o ia e Ieova, auā ua lē uma lona alofa i ē ola ma ē ua oti. . . . Ua tatou aiga ma ia, o ia foʻi o so latou e i ai le tausi tama.”—Ruta 2:15-20.

Mauaina o se “Mapusaga”

I le faanaunau mo le mauaina o se “mapusaga” po o se aiga mo le avā a lana tama, na faaaogā ai e Naomi le avanoa lea e talosaga ai mo se tausi tama, e tusa ai ma le tulafono a le Atua. (Levitiko 25:25; Teuteronome 25:5, 6) Ua aʻoaʻo e Naomi Ruta i se fuafuaga e sili ona lelei, ma ni gaoioiga e faaoso ai le naunau fiafia—se auala e faatosina mai ai le loto o Poasa. Ua oo i le pō, ua uma ona sauni ma faatonu lelei, ua alu foʻi Ruta i le mea e sasa ai saito e patino iā Poasa. Ua iloa o loo moe o ia, ua ia aveese i le ufiufi o ona vae ma faatali seʻia nofo aʻe i luga.—Ruta 3:1-7.

Ina ua nofo aʻe i luga Poasa, o gaoioiga faapitoa a Ruta sa fesoasoani lea iā te ia e malamalama ai i le tāua o lana ʻaiʻoi ina ia ‘faaʻafu mai ia lona pito ofu i lana auauna fafine.’ O gaoioiga a Ruta sa fesoasoani lea i lenei Iutaia matua ina ia iloa ai lana matafaioi o le avea ma se tausi tama, aua o ia o se tauaiga o le tane a Ruta, o Maalona.—Ruta 3:9.

O le asiasiga a Ruta i le pō sa o se mea e leʻi faatalitalia. Peitaʻi o le auala na tali ai Poasa sa faailoa atu ai faapea o le augani a Ruta mo se tausi tama sa lē o se mea na matua faateʻia ai. Sa lotomalie Poasa e gaoioi e tusa ai ma le ʻaiʻoi a Ruta.

Atonu sa taʻu atu i le leo o Ruta lona popole tele, i le uunaia o Poasa ina ia faamautinoa atu iā te ia: “O lenei, loʻu afafine, aua e te fefe; o mea uma ua e fai mai ai ou te faia lava mo oe; auā ua iloa e le aai uma o loʻu nuu, o le fafine amio lelei lava oe.”—Ruta 3:11.

Sa faamaonia e Poasa le saʻo o gaoioiga a Ruta e ala i upu na ia fai atu ai: “Loʻu afafine e, ia faamanuia Ieova iā te oe; ua faasilisili lou alofa mulimuli nei i lē na muamua.” (Ruta 3:10) I le taimi muamua, sa faaalia ai e Ruta lona alofa mo Naomi. Ae mulimuli ane ua ia faaali atu ai o ia iā Poasa o se tane matua, o ia o se tausi tama. Ua ia lotomalie e tausia aʻe se fanau mo lana tane ua maliu, o Maalona faapea foʻi ma Naomi.

Faafiti le Tagata o Lona Aiga

I le taeao na sosoo ai na faailoa atu ai e Poasa i ona tagata, o loo faasino atu i “tagata o lo latou aiga,” o lē e sili atu ona vavalalata iā Naomi na i lo o Poasa. Ua faapea atu Poasa i luma o tagata o le nuu ma toeaina o le nuu: ‘Ou te taʻu atu iā te oe, lou aiā e faatau ai mai iā Naomi le fasi fanua a lana tane o Elimeleka, auā e tatau ona ia faataua.’ Ua toe faaauau Poasa e faapea: ‘E te faatau ea iai? Afai e leai, o le a ou faatauina.’ O lea na faapea atu ai le tagata o lo latou aiga o le a ia faatauina.—Ruta 4:1-4.

Ae sa faateʻia le tagata o lo latou aiga! Ua taʻutino atu e Poasa i luma o tagata molimau e faapea: “O le aso e te faatau ai le fanua nai le lima  o Naomi, e te faatau foʻi nai iā Ruta le fafine Moapi, le avā a lē ua oti; e faatumau ai le igoa o lē ua oti i lona tofi.” Ona o le popole ina neʻi faalēaogāina lona tofi, na faalēaogā ai e le tagata o lona aiga lana aiā e faatauina ai i lona faapea mai: “Ou te lē mafai ona faataulia.”—Ruta 4:5, 6.

E tusa ai ma le tū a Isaraelu, o le tagata e faafiti i le faatauina e tatau ona ia tatala ona seevae ma tuu atu i le isi tagata o lona aiga. O lea ina ua fai atu le tagata o le aiga iā Poasa, “Faatau ia mo oe,” ona ia tatala ai lea o ona seevae. Ona faapea atu lea o Poasa i toeaina ma le nuu uma: “O molimau outou i lenei aso, ua ou faatau mea uma sa iā Elimeleka, ma mea uma sa ia Kiliona ma Maalona nai le lima o Naomi; o Ruta foʻi le fafine Moapi, le avā a Maalona, ua ou faatau iā te ia e fai maʻu avā, e faatumau ai le igoa o lē ua oti i lona tofi, . . . o molimau i ai outou i lenei aso.”—Ruta 4:7-10.

Sa faapea uma atu tagata sa i le faitotoʻa iā Poasa: “Ia avea e Ieova lenei fafine, o le a alu i lou aiga, pei o Rasela ma Lea sa la ati aʻe le aiga o Isaraelu; ia e malosi i Efarata, ma ia viia oe i Peteleema.”—Ruta 4:11, 12.

O le faamanuiaga a tagata, na aveina ai e Poasa Ruta e fai ma ana avā. Sa ia fanaua iā te ia se atalii e igoa iā Opeta, ma na avea ai loa Ruta ma Poasa o le tupuaga o le tupu o Tavita ma mulimuli ane ai o Iesu Keriso.—Ruta 4:13-17; Mataio 1:5, 6, 16.

“Se Taui Tele”

I le tala atoa, mai i lana faamālō agalelei muamua atu i le ʻaufaigaluega seʻia oo mai i lona talia o le tiute tauave o le faatumauina o le igoa o le aiga o Elimeleka, sa faamaonia ai le avea o Poasa o se tane lelei—e iloa gaoioi ma faatinoina lana pule. I lenā foʻi taimi, o ia o se tane e na te pulea lelei o ia lava, faatuatua ma faamaoni. Sa faaalia foʻi e Poasa le limafoaʻi, agalelei, amio mamā ma sa ia usiusitai atoatoa i faatonuga a Ieova.

Sa mataʻina foʻi Ruta i lona alofa mo Ieova, o lona alofa faamaoni iā Naomi, o lona maelega ma lona lotomaulalo. E lētioa lava vāai tagata iā te ia o se “fafine amio lelei.” E leʻi ʻai o ia i “meaʻai a le paiē,” ma o lona galue malosi ua mafai ai ona ia mauaina se mea e avatu mo le tinā mativa o si ana tane. (Faataoto 31:27, 31) I le faatinoina o lona tiute tauave mo Naomi, atonu sa fiafia Ruta i iʻuga ua ia mauaina mai i le foaʻi atu.—Galuega 20:35; 1 Timoteo 5:4, 8.

Maʻeu ni faaaʻoaʻoga lelei ua tatou mauaina i le tusi o Ruta! O loo manatuina e Ieova Naomi. Ua maua e Ruta se “taui tele” i le avea ai o se tupuaga o Iesu Keriso. Ua faamanuiaina Poasa i le mauaina o se “fafine amio lelei.” Ae mo i tatou taʻitoʻatasi ua tatou mauaina se faaaʻoaʻoga tāua o le faatuatua.

[Pusa i le itulau 26]

Le Auala e Maua ai le Faatuatua

Afai e te iloaina o loo e soifua i taimi e leai se fiafia o maua ai, e mafai e le tala iā Ruta ona saunia se faamoemoe mo oe. E mataʻina i lona avea o se iʻuga tāua mo le tusi o Faamasino. O loo taʻuina mai e le tusi o Ruta le auala e faaaogāina ai e Ieova le fafine lotomaulalo ua oti lana tane mai le nuu o Moapi mo le fanauina o se tupu mo o latou tagata. E ese mai le faatulagaina o le tusi o Faamasino, ua avea ai le faatuatua o Ruta e pei o se malamalama o loo susulu i lenā vaitaimi. O le faitauina o le tala iā Ruta o le a mafai ai ona e mauaina se faamautinoaga e faapea, po o le ā lava le faigatā o taimi o loo iai, ae o loo manatu mai pea le Atua i ona tagata ma faataunuuina ana fuafuaga.