Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• E faapefea ona tatou mauaina aogā i le iloaina o Safana ma lona aiga?

Sa avea Safana o se failautusi ma se tusiupu i le tupu o Iuta o Iosia. O se tagata sa sili ona aloaʻia i le malo. Sa lagolagoina e Safana le tauiviga a le tupu ina ia toe faafoʻisia le tapuaiga moni. E toʻalua se fanau a Safana na faaalia lo la faamaoni i le perofeta o Ieremia. Ma o le isi atalii ma atalii e toʻalua a ona atalii sa faaaogāina o latou tulaga maualuga e lagolagoina ai le tapuaiga moni. I se tulaga tutusa, e tatau foʻi ona faaaogāina a tatou alāmanuia ma o tatou tulaga maualuga e lagolagoina ai le tapuaiga moni.—12/15, itulau 19-22.

• Na faapefea ona foʻia e Irene Hochstenbach se tulaga lē atoatoa o le malosi o le tino ma mafai ai ona auauna iā Ieova?

Ina ua fitu ona tausaga sa ia lē toe lagonaina ai se mea. E ui i le tulaga logonoa, ae sa aʻoaʻoina o ia e talanoa atu i isi ma ua mafai nei ona faimalaga faatasi ma lana tane (o se ovasia femalagaaʻi) a o ia auauna ai i faapotopotoga i Holani.—1/1, itulau 23-26.

• O ā isi tusi fou e lua e fesoasoani mo suʻesuʻega lea na tatalaina aloaʻia i le Tauaofiaga Itumalo “O Ē Maelega e Faalauiloa le Malo”?

Na faaalia e Kerisiano i le lalolagi aoao le olioli ina ua latou mauaina le tusi Ia Tapuaʻi i le Atua Moni e Toʻatasi, lea ua saunia e amata ai suʻesuʻega ma i latou o ē fou ua māeʻa ona suʻesuʻeina le tusi o Le Poto e Taʻitaʻia ai i le Ola e Faavavau; o le isi tusi fou o le Faalatalata Atu iā Ieova, o loo taulaʻi atu i uiga o Ieova ma ana feutagaʻiga. O loo faaalia ai foʻi le auala tatou te faaaʻoaʻo ai iā te ia i le faaalia o ona uiga.—1/15, itulau 23, 24.

• O le ā o loo faatatau i ai le Faataoto 12:5: “O mafaufauga a ē amiotonu, ua tonu ia”?

E oo lava i mafaufauga o tagata amio lelei e mamā ma e taʻitaʻiina atu ai i le mea saʻo ma le amiotonu. Talu ai e uunaʻia ē amiotonu e le alofa mo le Atua ma o latou uso a tagata, o o latou faanaunauga la e lelei.—1/15, itulau 30.

• O le ā e mafai ona fesoasoani i se tasi ina ia atiina aʻe ai se vaaiga paleni i galuega?

E aogā tele le aʻoaʻoina a o laʻitiiti ina ia faatāuaina galuega. Ua apoapoaʻia i tatou e le Tusi Paia ina ia atiina aʻe se faanaunauga lelei e faia galuega ma ʻalofia le paiē. (Faataoto 20:4) O loo faalaeiauina foʻi Kerisiano ina ia aua neʻi faaalu uma lo latou taimi i galuega. E tatau ona tatou amanaʻiaina e faapea o le auaunaga i le Atua e ao ona faamuamua i o tatou olaga. (1 Korinito 7:29-31) E lē gata i lenā e mautinoa e Kerisiano moni e faapea e lē tuulafoaʻia i latou e le Atua.—2/1, itulau 4-6.

• O fea o le Tusi Paia o loo taʻua ai le fatafaitaulaga muamua lava?

O loo i le Kenese 8:20, lea e faasino atu i le fatafaitaulaga na fausia e Noa ina ua ia tuua le vaa ina ua mavae le Lolo. Atonu, sa faaaogā foʻi e Kaino ma Apelu ia fatafaitaulaga e ofo ai a la taulaga. (Kenese 4:3, 4)—2/15, itulau 28.

• Na faapefea ona faaaogā tatau e nisi Kerisiano ia fesuiaʻiga o tulaga o le olaga?

O nisi ua latou talia—pe faamuamua foʻi—suiga i a latou galuega lea e tele le taimi e mafai ona latou faaaluina ai i le faiva. O isi ua latou faateleina lo latou taimi ma faaeaga i le auaunaga iā Ieova pe a faaitiitia tiute tauave i o latou aiga, e pei o le avea o tamaiti ma tagata matutua ma oo ina faaipoipo.—3/1, itulau 19-22.

• E faapefea ona fesoasoani le faataʻitaʻiga a Iona ma le aposetolo o Peteru iā i tatou e vaai ai i isi e pei ona silasila i ai Ieova?

Sa tutusa uma Peteru ma Iona i ni mea sesē sa lauiloa ai i laʻua ma le auala sa la tali atu ai i le tofotofoina o lo la usiusitai ma le faamaoni. Ae ui i lea, sa silasila Ieova i o la uiga lelei ma faaauau pea ona faaaogā i laʻua i lana auaunaga. Pe a faaalia e isi tagata le lē faaaloalo ma faaita mai i tatou, e mafai ona tatou uaʻi atu i o latou uiga lelei lea na tatou tosina i ai i le taimi ua teʻa ma o latou uiga lelei o loo silasila i ai le Atua.—3/15, itulau 16-19.

• Aiseā e lē tutusa ai numera o le tusi o Salamo i faaliliuga eseese o le Tusi Paia?

E iai le eseesega o numera o le tusi i le faaliliuga faa-Eperu ma lona faaliliuga i le Septuagint faa-Eleni. Atonu o le māfuaaga lea ua eseese ai le tele o faaliliuga o loo iai i le taimi nei, ona e faalagolago i le po o latou faaaogāina le faaliliuga faa-Eperu po o le tusitusiga Septuagint.—4/1, itulau 31.