Ua Latou Auauna i le ʻAuuso Kerisiano i se Tulaga Faavaomalo

PO UA e faalogo i le faaupuga “auauna faavaomalo” ma le “ʻaufaigaluega tauofo faavaomalo”? O Molimau a Ieova o loo faia aʻe ai nei vaega, ua ofoina atu o latou taimi ma tomai e fesoasoani ai i le fausiaina o fale e lomia ma faasalalau atu ai ia le feʻau o le Malo o loo i le Tusi Paia. E fesoasoani foʻi na ʻaufaigaluega tauofo i le fausiaina o Maota Fono ma Maota o le Malo ia ua avea ma nofoaga autū e aumaia ai aʻoaʻoga faale-Tusi Paia. I le taimi nei, o loo fesoasoani atu ai nei tagata tauofo i polokalame o faugāfale i atunuu eseese e 34, aemaise lava i atunuu e lē lava lo latou tamaoaiga. O ā ni luʻi faapitoa ma ni mea e olioli ai ua tofo i ai na faifeʻau a o latou auauna atu i uso Kerisiano i atunuu eseese? O ā ni o latou lagona e uiga i le “auaunaga paia” o loo latou faia? (Faaaliga 7:9, 15, NW) Ina ia iloaina, seʻi o tatou feiloaʻi atu i nisi o tagata faigaluega tauofo i Mekisikō.

Na uluaʻi taunuu atu le ʻaufaigaluega tauofo mai isi atunuu i Mekisikō iā Me 1992. E leʻi pine, ae faia loa sa latou vaega tele i le faatelēina o le ofisa o le lālā, lea e vaavaaia le galuega a Molimau a Ieova i Mekisikō. O le polokalame o faugāfale, na aofia ai le fausiaina o ni fale fou e 14, e aofia ai ma fale e nonofo ai le ʻaufaigaluega tauofo o loo galulue i le ofisa o le lālā, o se fale lomitusi, ma se fale mo le ofisa.

Ina ia fesoasoani i lenei polokalame o faugāfale, e sili atu i le 730 le ʻaufaigaluega tauofo mai Kanata, Peretania Tele, le Iunaite Setete, ma isi atunuu na auauna soosoo tauʻau ma le faitau selau o tagata tauofo mai itu uma o Mekisikō. E lē gata i lea, e sili atu i le 28,000 Molimau mai le 1,600 faapotopotoga i le vaipanoa lava lea e iai le ofisa o le lālā, sa fesoasoani i galuega o faugāfale i faaiʻuga o vaiaso. Sa auauna i latou uma ma le agaga o le lotomalie ma ofoina atu o latou tomai e aunoa ma se totogi. Sa latou manatu i lenei avanoa faapea o se faaeaga le auauna iā Ieova i lenei auala. A o faagasolo faugāfale, sa latou manatua upu faagaeeina i le Salamo 127:1: “Afai e lē atiina aʻe e Ieova le fale, e galulue fua i latou o ē atiina aʻe.”

Luʻi na Latou Fesagaʻi

O ā luʻi na fesagaʻi ma le ʻaufaigaluega tauofo faavaomalo a o auauna i tofiga i isi atunuu? O nisi nei o mea na latou mātauina.  O Curtis ma Sally, o se ulugalii mai le Iunaite Setete sa fesoasoani i le polokalame o faugāfale i Initia, Mekisikō, Paraguay, Siamani, Senegal, Romania, Rusia, ma Zambia. Ua faamatala mai e Curtis e faapea: “O le luʻi muamua, o le tuua lea o la ma tama teine, o lē sa auauna o se paeonia [faifeʻau faataimi atoa], ma la ma faapotopotoga i Minnesota. E 24 tausaga o ma iai ma laʻu avā i lenā faapotopotoga, ma sa ma lagona le fiafia i inā.”

Ua mātauina e Sally faapea: “O se luʻi le ola i ni tulaga e lē masani ai, ma e sili atu ona faigatā i se fafine na i lo o se tamāloa, ae ua ou iloa e mafai ona faia ni fetuunaʻiga. Sa oo foʻi ina ou aʻoaʻoina e onosaia le anoanoaʻi o iniseti!” Ua ia faapea mai atili: “I se tasi atunuu, e toʻa sefulu i matou le ʻaufaigaluega tauofo sa matou faaaogāina se fale e leai se umukuka ae na o le lua fale taʻele. Na ou aʻoaʻoina ai i inā ina ia ou onosai pea.”

O le isi luʻi, o le aʻoaʻoina o se gagana fou lea sa manaʻomia ai ni taumafaiga ma le lotomaulalo. Ua faapea mai Sharon, o lē sa auauna faatasi ma lana tane i polokalame o faugāfale i atunuu eseese: “O se luʻi le lē malamalama i le gagana a le atunuu o loo e auauna ai. I le amataga lava, sa faigatā ona e mafuta vavalalata atu i ou uso ma tuafāfine faaleagaga pe afai e lē mafai ona e faailoa atu ou lagona. E ono tupu ai le lē fiafia. Ae o uso ia sa matou feiloaʻi i o ma tofiga i isi atunuu, e ese le onosai ma e matuā naunau mo lo ma lelei. E leʻi umi, ae mafai ona matou fesootaʻi i nisi o auala.”

O le Faia o se Sao i le Faiva e Manaʻomia ai le Lototele

A o faia se sao tele o na tagata faigaluega tauofo i le agaʻigaʻi i luma o le galuega o faugāfale, ae ua latou iloa, o le mea muamua ma le sili, o i latou o tagata talaʻi o le tala lelei o le Malo o le Atua. O lea la, e latou te lagolagoina atoatoa ai le galuega talaʻi lea o loo faia e faapotopotoga o loo latou auai atu i ai. Na faapea mai Åke ma Ing-Mari, o se ulugalii sa fesoasoani i le polokalame o faugāfale i Guadeloupe, Malawi,  Mekisikō, ma Nigeria, o le faaaogāina o se isi gagana pe a auai i le faiva i le fanua i se isi atunuu, e manaʻomia ai le lototele.

Ua faamatala mai e Ing-Mari e faapea: “I le taimi muamua, sa lē tele se sao na ma faia talu ai, e matou te ō faatasi pea ma Molimau i le atunuu, ma ona o lo ma matamumuli, e masani ai lava ona tuu atu iā i latou e faia le talanoaga. Ae peitaʻi, i se tasi taeao, sa ma filifili ai e ma te ō na o i maʻua i le auaunaga i le fanua. E ui lava sa ma lagona le popolevale, ae na ma ō lava. Na ma fetaui ai i se tamaʻitaʻi talavou o lē sa faalogo mai i laʻu taulimaga na sauniuni. Sa ou faitauina se mau ma tuu atu i ai ni lomiga. Ona faapea mai lea o le tamaʻitaʻi: ‘Seʻi taʻu mai lava faamolemole. E iai loʻu tauaiga e suʻesuʻe le Tusi Paia ma Molimau a Ieova. E mafai faapefea ona ou maua foʻi se suʻesuʻega?’ Sa matuā faateʻia lava aʻu. Ona ou taumafai lea ia maua le toʻa ma ofo i ai se suʻesuʻega faale-Tusi Paia.”

Ua faaopoopo mai Ing-Mari: “Seʻi manatu i loʻu olioli ma loʻu lotofaafetai iā Ieova ona o le faamanuiaina o la ma uluaʻi taumafaiga ma lo ma naunau e tufa atu le upu moni.” Na lelei le agaʻigaʻi i luma o lenei tamaʻitaʻi ma na papatisoina o se Molimau i se tauaofiaga matagaluega i le Aai o Mekisikō. Na otooto mai e Åke ma Ing-Mari la laʻua faiva e faapenei: “E matuā tāua iā i maʻua lo ma tofiga i polokalame eseese o faugāfale, ae leai lava se mea e sili atu i le olioli ma le lotomalie e maua i le fesoasoani atu i se tagata ina ia maua le upu moni.”

Se Agaga Faataulaga

E moni, e tuua e le ʻaufaigaluega tauofo ia uō ma aiga ae faia ni faataulagaina e auauna ai i o latou uso i isi atunuu, ae e lē ma faatusalia foʻi lo latou olioli e maua ai. O ā na mea?

Ua faamatala mai e Howard, o lē na auauna ma lana avā o Pamela i Angola, Ecuador, El Salvador, Guyana, Mekisikō, Puerto Rico ma Colombia e faapea: “O se faaeaga faapitoa le feiloaʻi atu i uso ma tuafāfine i atunuu eseese ma tofo ai mo le uluaʻi taimi i le fusi o le alofa lea e iai i lo tatou ʻauuso faavaomalo. E masani ona ma faitau e uiga i ai, ae o lou ola ma auauna faatasi ma i latou mai isi atunuu e eseese aganuu ma talaaga, o le a oo ina sili atu ai ona tāua iā te oe lo tatou ʻauuso.”

Na lagona foʻi e Gary, o lē na fesoasoani i polokalame o faugafale i Ecuador, Mekisikō, Colombia, Costa Rica ma Zambia, e faapea, e matuā telē se aogā o lenei polokalame iā te ia. Ua ia faamatala mai: “O toleniga na ou maua i le tele o tausaga ona o le auaufaatasi ma uso taʻumatuaina o loo auauna i lālā i atunuu ia na tofia i ai aʻu, ua fesoasoani e faaauupegaina lelei ai aʻu mo luʻi i oʻu tofiga. Sa faamalosia ai loʻu faatuatua talu ai sa ou maua se avanoa e tofo ai i le autasi lea e iloa ai le faalapotopotoga a Ieova i le lalolagi atoa, le autasi lea ua manumalo i feeseeseaʻiga i gagana, lanu, po o aganuu.”

Ua faamāeʻaina nei galuega o faugāfale i Mekisikō, ma i le tausaga nei, na faapaiaina ai fale o le lālā. I le uunaʻia i lo latou alofa i le Atua, na matuā tele ai se sao na faia e auauna faavaomalo ma le ʻaufaigaluega tauofo faavaomalo i le faateleina o le tapuaʻiga moni i Mekisikō ma isi nofoaga. E matuā talisapaia e Molimau a Ieova i le lalolagi aoao lo latou agaga faataulagaina ma le lotomalie e auauna i o latou uso Kerisiano i isi atunuu.

[Ata i le itulau 25]

Ecuador

[Ata i le itulau 25]

Kolomepia

[Ata i le itulau 25]

Angola

[Ata i le itulau 26]

Le togālaau i le lālā

[Ata i le itulau 26]

Amata galuega i fale fou o le lālā i Mekisikō

[Ata i le itulau 26]

Lalo: Nisi o le Matagaluega o Faugāfale i luma o se vaega o fale fou

[Ata i le itulau 27]

Le ʻautauofo i faugāfale o loo fiafia e lagolagosua i le galuega talaʻi faatasi ma faapotopotoga i lenā atunuu