E Taʻitasi ma Nofo i Lalo o Lona Mati

E FAIGATĀ lava ona maua se paolo i le vevela o le tau māfanafana o nuu i Sasaʻe Tutotonu. So o se laau lava e malutia ai i le lā, e matuā manaʻomia lava, aemaise pe a ola i tafatafa ane o se fale. O ona lau lapopoʻa ma le lautetele, ma lālā mafalā, ua sili ai ona paolo le mati na i lo o se isi lava laau i Sasaʻe Tutotonu.

E tusa ai ma le tusi faa-Peretania, O Laau i le Tusi Paia, “fai mai e sili atu ona mālū le paolo [o se mati], na i lo o se faleʻie.” O mati sa ola i autafa o tovine i Isaraelu anamua, na avea ma nofoaga lelei e mapu i ai le ʻaufaigaluega i le fanua.

Pe a oo i le afiafi o se aso mugalā, ona tau fai nonofo ai lea o se aiga i lalo o lo latou mati ma fiafia faatasi ai. E fuaina atu foʻi e le laau i lona matai le tele o fua e lelei i le taumafa. E afua mai la i aso o Solomona, o le nofo o le tagata i lalo o lona lava mati, na faaata mai ai le nofo filemu, tamaoaiga, ma le mauʻoa.—1 Tupu 4:24, 25.

E silia ma le 400 tausaga muamua atu, na faamatalaina ai e le perofeta o Mose le Nuu Folafolaina, ‘o le nuu o mati.’ (Teuteronome 8:8) Na aumaia e sipai e toʻa sefululua fua o mati ma isi fualaau ʻaina i le vaipanoa na tolauapi ai Isaraelu, o se faamaoniga o lona fua tele mai. (Numera 13:21-23) I le senituri lona 19, na faamatala ai e se alii faimalaga i nofoaga o le Tusi Paia le laau lenei o le mati, o se tasi o laau e taatele i lea nofoaga. E lētioa foʻi ona taʻua soo mati ma laau o mati i le Tusi Paia!

Se Laau e Selesele Faalua i le Tausaga

E ola le laau o le mati i le tele o ituaiga palapala, ma o ona aa felefele ua mafai ai ona ola umi i se tau mugalā i Sasaʻe Tutotonu. E uigaese lenei laau, ona e seleseleina mai ona uluaʻi fua i le amataga o Iuni, a o le masina o Aokuso ma faasolo atu ai, e faatoʻā fua mai ai ona fua masani. (Isaia 28:4) E masani lava ona taumafa mata e Isaraelu fua muamua o le seleselega. E latou te faamamagoina le seleselega  mulimuli auā le faaaogāina a o faagasolo le tausaga. E mafai ona lomi ma fai ai potoi keke i mati mamago nei, a o nisi taimi e faaopoopo iai ma sekati. O nei keke mati, e masani lava ona aogā, e lelei mo le soifua mālōlōina, ma manaia tele i le taumafa.

Na avatu e le fafine mafaufau o Apikaila iā Tavita potoi keke o mati e 200, e lē taumatea sa manatu i ai o se meaʻai e fetaui mo tagata sulufaʻi. (1 Samuelu 25:18, 27) E fai ai foʻi vai faafomaʻi i potoi mati. O se vai na palu mai i potoi o mati ua faamamagoina, sa togafitia ai le maʻisua o Esekia lea na tau faalētonu ai lona soifua, e ui na mulimuli ane malosi ona o le faalaa mai a le Atua. *—2 Tupu 20:4-7.

Sa faatāuaina i le vaipanoa atoa o le Metitirani i aso anamua fua o mati ua uma ona faamamagoina. Na faalālā atu e se alii maualuga e igoa iā Cato se mati e faatalitonuina ai le Senate Roma ina ia auai ai i le taua lona tolu a tagata Roma faasaga iā Carthage. O mati mamago e sili ona lelei i Roma, e sau mai Caria i Asia Itiiti. Na mulimuli ane avea le upu o le carica ma igoa Latina mo mati mago. E faapena foʻi le vaipanoa ua igoa o Take i aso nei, o loo gaosia ai pea mati mamago e sili ona lelei.

E masani ona totō e faifaatoʻaga Isaraelu laau o le mati i o latou tovine, peitaʻi o mati e lē fua mai, latou te faalaloina. E lē maʻimauina se eleele lelei e ola ai laau e lē fua mai. I le faataʻitaʻiga a Iesu e faatatau i le laau o le mati, na faapea atu ai le faifaatoʻaga i le galue vine: “Faauta, ua ou sau i ia tausaga ua tolu e saʻili ni fua i lenei mati, a ou te leʻi maua lava; inā tuu ia i lalo; se ā foʻi le mea e faalēaogā ai le fanua?” (Luka 13:6, 7) Talu ai sa faatulaga ni lafoga mo laau o le mati i taimi o Iesu, so o se mati lava la e lē fua mai, o se popolega foʻi lea i tupe faaalu.

E tāua tele mati i taumafataga masani a tagata Isaraelu. O lea la, o se seleselega o mati leaga—atonu e fesootaʻi atu ma le sala faafaamasinoga mai le Atua—e avea o se mala. (Hosea 2:12; Amosa 4:9) Na faapea mai le perofeta o Sapakuka: “E ui lava ina lē fuga mai le mati, e leai foʻi ni fua i vine, e iʻu vale le fua o le olive, e lē tupu mai foʻi ni mea e ʻai i le fanua . . . a e peitaʻi aʻu, ou te olioli lava iā Ieova, ou te fiafia lava i le Atua o loʻu faaolataga.”—Sapakuka 3:17, 18.

Faailoga o se Nuu Lē Faatuatua

E faaaogā faafaatusa e le Tusi Paia mati po o laau o mati i nisi o taimi. O se faataʻitaʻiga, na faatusaina e Ieremia tagata faaaunuua faamaoni o Iuta i ato mati lelei, o fua amata o mati ia e masani ona taumafa mata. Peitaʻi, o tagata faaaunuua lē faamaoni, sa faatusaina i latou i mati leaga, e lē mafai ona taumafaina, ma e ao ona faalēaogāina.—Ieremia 24:2, 5, 8, 10.

Na faaalia e Iesu i lana talafaatusa i le mati e lē fua mai, le faapalepale o le Atua i le nuu o Iutaia. E pei ona taʻua muamua, sa tulei atu o ia i le tamāloa sa iai sana laau o le mati i lana tovine. E leʻi fua mai le laau mo le tolu tausaga, ona manatu ai lea o lē e ona le tovine e tatuʻu i lalo. Ae na  faapea mai le galue vine: “Le alii e, tuu pea ia i lenei tausaga foʻi, seʻia ou eli faataaliolio i ai, ma avane i ai otaota. Afai foʻi e fua mai i lea tausaga, e lelei; pe afai e leai, ona e tuu ai lea i lalo.”—Luka 13:8, 9.

E avatu e Iesu lana tala faatusa lenei, ua uma lana talaʻiga mo le tolu tausaga, i le taumafai malosi e faatupuina le faatuatua o tagata Iutaia. Na faateleina e Iesu lana galuega, i le “tapuʻeina” o le mati faafaatusa—le nuu o Iutaia—ma tuu iai le avanoa e fua mai ai. Peitaʻi, i le vaiaso a o leʻi maliu Iesu, na faamaonia ai le teena e le nuu atoa o le Mesia.—Mataio 23:37, 38.

Ua toe faaaogā foʻi e Iesu le laau o le mati e faataʻitaʻia ai le tulaga leaga faaleagaga o le nuu. A o malaga Iesu mai Petania agaʻi i Ierusalema i le toe fā aso oo i lona maliu, na ia vaaia ai le laau o le mati ua tele ona lau, ae leai lava ni fua. Talu ai e tatau ona fotu faatasi mai fua amata o le mati ma ona lau—o nisi foʻi o taimi e muamua mai ai fua a o leʻi tupu ona lau—o le lē fua mai o le laau, na faaalia ai lona lē aogā.—Mareko 11:13, 14. *

E faapei o le mati ola lelei e lē fua mai, na faapena le faafoliga lelei mai o le nuu o Iutaia. Peitaʻi latou te leʻi faaalia ni uiga e fiafia i ai le Atua, ma iʻu ai ina latou teena le Alo o Ieova lava ia. Na fetuuina e Iesu le mati e lē fua mai, ma o le aso na sosoo ai, na iloa ai e le ʻausoo ua mago le laau. Na faaata mai e lenei laau mago le teena e le Atua o tagata Iutaia e avea ma ona tagata filifilia.—Mareko 11:20, 21.

‘Ia Outou Mātau le Faataoto i le Mati’

Na faaaogā foʻi e Iesu le laau o le mati e aʻoaʻoina ai se lesona tāua e uiga i lona faatasi mai. Na ia tulei mai: “Ia outou mātaulia le faataoto i le mati; pe a faatoʻā tutupu ona tātupu, ma matala mai ona lau, tou te iloa ai ua latalata le tausaga vevela. E faapea foʻi outou, pe a outou iloa ia mea uma, tou te iloa ai, ua latalata ia, ua i faitotoʻa lava.” (Mataio 24:32, 33) O lau fou faatoʻā tutupu o le laau o le mati, o se faailoga moni lea e iloa ai ua oo i le tau māfanafana. Ua faapena foʻi ona aumaia ma le manino e le valoaga a Iesu o loo faamauina i le Mataio mataupu e 24, Mareko mataupu e 13, ma le Luka mataupu e 21, faamaoniga o lona faatasi ai nei i le mana o le Malo.—Luka 21:29-31.

E manaʻomia lava ona tatou mātauina se aʻoaʻoga tāua mai le laau o le mati, ona e talu ai o loo tatou ola i se vaitaimi sili ona tāua. Pe a tatou faatatauina lea fautuaga ma mataala faaleagaga, ona tatou faatalitalia ai lea o le faataunuuga o le folafolaga sili lenei: “A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai; auā ua faapea ona tulei mai ai le siʻufofoga o Ieova o ʻau.”—Mika 4:4.

[Faamatalaga pito i lalo]