Faafofoga Atu i Mea o Fetalai Mai ai le Agaga!

“O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia [faapotopotoga].”—FAAALIGA 3:22.

1, 2. O le ā le fautuaga o loo taʻua pea i le feʻau a Iesu i faapotopotoga e fitu o loo taʻua i le Faaaliga?

E TATAU i auauna a Ieova ona uaʻi atu i fetalaiga faagaeeina a Iesu Keriso i faapotopotoga e fitu ia o loo taʻua i le tusi o le Tusi Paia o Faaaliga. O le mea moni, o nei feʻau taʻitasi o loo iai le fautuaga lenei: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia [faapotopotoga].”—Faaaliga 2:7, 11, 17, 29; 3:6, 13, 22.

² Ua uma ona tatou talanoaina feʻau a Iesu i agelu, po o ovasia i Efeso, Semurana ma Perekamo. E faapefea ona tatou mauaina aogā mai mea na ia fetalai atu ai i isi faapotopotoga e fā e ala i le agaga paia?

I le Agelu i Tuatira

3. O fea e iai Tuatira, ma o le ā le oloa sa matuā lauiloa ai o ia?

³ Ua avatu e le “Atalii o le Atua” le faamālō ma le aʻoaʻiga i le faapotopotoga i Tuatira. (Faitau Faaaliga 2:18-29.) O Tuatira (lea ua avea nei o Akhisar) sa i tafatafa o le alāvai o le vaitafe o Gediz (Hermus anamua) i le itu i sisifo o Aisa Itiiti. Sa lauiloa le aai i le  tele o galuega taulima. O tagata e faia vali, na latou faaaogāina le aa o le laau o le madder lea ua lauiloa ai i latou i le vali mūmū ma le violē. O Litia, “o le faatau ie pāuli [violē] o Tuatira lona nuu” na avea ma Kerisiano i le asiasiga a Paulo i Filipi i Eleni.—Galuega 16:12-15.

4. O le ā le faamālō na avatu i le faapotopotoga i Tuatira?

⁴ Ua avatu e Iesu le faamālō i le faapotopotoga i Tuatira mo ana galuega lelei, le alofa, faatuatua, onosai ma galuega i le faiva. O le mea moni, ‘o a latou galuega, ua sili mea mulimuli i mea na muamua.’ E tusa lava pe e iai so tatou talaaga lelei, ae e lē tatau ai lava ona tatou faatamala i a tatou amioga tatau.

5-7. (a) O ai lenā “fafine o Iesepela,” ma o le ā e tatau ona faia e faatatau i ana taaʻiga? (e) O le feʻau a Keriso i le faapotopotoga i Tuatira ua fesoasoani lea i fafine amioatua e faia le ā?

⁵ Sa faatagaina e le faapotopotoga i Tuatira le tupu aʻe o ifoga i tupua, aʻoaʻoga sesē ma feusuaʻiga lē mamā. Sa iai iā i latou “le fafine o Iesepela”— atonu o loo faasino atu i se vaega o fafine e iai ni o latou uiga e pei o le Masiofo o Iesepela o le ituaiga e sefulu o le Malo o Isaraelu. Ua manatu nisi tagata popoto faapea na taumafai “perofeta fafine” o Tuatira e maileia Kerisiano e tapuaʻi atu i ē pulea faiga tau fefaatauaʻiga e pei o ni atua ma atua fafine ma auai i tausamiga e aofia ai meaʻai ua fasia mo tupua. Ia aua lava neʻi faatagaina se tasi ua ia faia o ia ma perofeta fafine e saʻili ni auala e faasesē ai isi i le faapotopotoga Kerisiano i aso nei!

⁶ O Keriso foʻi o le a ‘lafo iā Iesepela i le moega o tigā, ma faaoo foʻi le puapuaga tele i ē ua mulilulua ma ia, pe afai latou te lē salamō i ana galuega.’ E lē tatau i ovasia ona gauaʻi atu i na aʻoaʻoga leaga ma taaʻiga, ma e lē manaʻomia foʻi e se Kerisiano ona faitaaga faaleagaga pe faaletino po o le auai i ifoga tupua ina ia iloa ai o “mea loloto a Satani” e matuā leaga lava. Pe afai tatou te utagiaina le lapataʻiga a Iesu, ‘o le a tatou taofi mau ai i mea ua iā i tatou,’ ma o le a lē pule ai le agasala iā i tatou. Talu ai lo latou teena o gaoioiga e lē faale-Atua, o tuʻinanauga ma sini, ua mauaina ai e le vaega faauuina ua toe faatutūina le “pule i nuu ese” ma o le a aufaatasi ma Iesu i le nutipalaina o malo uma. Ua iai i faapotopotoga i aso nei fetu faafaatusa, ma o le a avatu i ē faauuina “le fetu ao pupula,” le Faatoʻāfaiavā, o Iesu Keriso, pe a toe faatutūina aʻe i le lagi.—Faaaliga 22:16.

⁷ Na lapataʻia le faapotopotoga i Tuatira ina ia aua neʻi faatagaina taaʻiga leaga o gaoioiga a fafine ua lafoaʻia le tapuaʻiga moni. O le feaʻu a Keriso sa faagaeeina e le agaga i le faapotopotoga, ua fesoasoani lea i fafine amioatua i aso nei, ina ia tausia lo latou tulaga ua tofia i ai e le Atua. E latou te lē taumafai e pulea tane ma maileia so o se uso e faia le faitaaga faaleagaga pe faaletino foʻi. (1 Timoteo 2:12) Na i lo lea, ua faataatia e na fafine se faaaʻoaʻoga i galuega lelei ma le auaunaga e viia ai le Atua. (Salamo 68:11; 1 Peteru 3:1-6) Pe afai e puipuia e le faapotopotoga mea ua iā i latou e pei o aʻoaʻoga mamā, amio ma faatāuaina le auaunaga o le Malo, o le a afio mai Keriso ma faamanuia i latou, ae lē o le faasalaina.

I le Agelu i Sarataisa

8. (a) O fea e iai Sarataisa, ma o ā ni faamatalaga e faatatau i ai? (e) Aiseā na manaʻomia ai e le faapotopotoga i Sarataisa le fesoasoani?

⁸ Na manaʻomia vave lava e le faapotopotoga i Sarataisa le fesoasoani, talu ai ona ua oti faaleagaga. (Faitau Faaaliga 3:1-6.) O Sarataisa o se aai e tamaoaiga ma e tū pe tusa o le 30 maila (50 kilomita) i saute o Tuatira. O fefaatauaʻiga, o fua lelei o faatoʻaga, gaosiga o ie māfanafana ma kapeta māfanafana na fesoasoani lea i le avea o Sarataisa ma aai tamaoaiga, lea e 50,000  tagata na nofoia. E tusa ai ma le tusitala o talafaasolopito o Josephus, sa toʻatele tagata Iutaia i Sarataisa i le uluaʻi senituri T.L.M. O toegamea o le aai na eliina mai i le eleele na maua ai le sunako ma le malumalu o le atua fafine o Tiana i Efeso.

9. O le ā e tatau ona fai pe afai ua tatou faalēano i la tatou auaunaga i le Atua?

⁹ Na fetalai atu Keriso i le agelu i le faapotopotoga i Sarataisa e faapea: “Ua ou iloa au galuega, ua iā te oe le igoa ua e ola, a ua e oti.” Ae faapefea pe afai e iai se tatou talaaga o ni ē mataala faaleagaga ae tatou te faalēano i faaeaga faa-Kerisiano ma ua leai se naunau i la tatou auaunaga ma ua ‘toetoe a mate’ i le itu faaleagaga? O lea, e manaʻomia ona tatou ‘manatu i mea ua tatou maua ma ua tatou faalogo ai’ i le feʻau o le Malo ma e tatau ona toe faaolaola a tatou taumafaiga i le auaunaga paia. E mautinoa ua tatau nei ona tatou amata ona faia se sao ma le loto atoa i sauniga faa-Kerisiano. (Eperu 10:24, 25) Na lapataʻia e Keriso le faapotopotoga i Sarataisa e faapea: “Afai foʻi e te lē mataala, ou te alu atu iā te oe e pei o se gaoi, e te lē iloa foʻi le itu aso ou te alu atu ai iā te oe.” Ae faapefea o tatou aso? Ua toe o se aga ona tatou tala atu lea o se tala.

10. E oo lava i tulaga e pei o lea na iai i Sarataisa, o le ā ua moni e tusa ai ma nisi o Kerisiano?

¹⁰ E oo lava i tulaga e pei o lea na iai i Sarataisa, atonu e iai nisi o ē ‘ua lē faaeleelea o latou ofu, ma o ē sāvavali ma Keriso i ofu sisina, auā ua tatau ai.’ Ua latou tausia le faailoga e iloa ai i latou o Kerisiano, e tumau i le tulaga mamā, e aunoa ma le pisia i amioga ma faiga faalotu a le lalolagi. (Iakopo 1:27) O lea la, ‘o le a lē soloiesea e Iesu o latou igoa i le tusi o le ola, a e o le a ia taʻu atu o latou igoa i luma o lona Tama ma luma o agelu.’ O lo latou taʻuagavaaina e savavali faatasi ma Keriso, o le a oofu ai lana vasega o le faatoʻānofotane ua faauuina, i le ie vavae ua faaataina ai gaoioiga amiotonu a le ʻaupaia a le Atua. (Faaaliga 19:8) O faaeaga matagofie o loo faatalitalia mo i latou i le lagi ua faalaeiauina ai i latou ina ia manumalo i le lalolagi. Ua saunia foʻi faamanuiaga mo i latou e ola e faavavau i le lalolagi. Ua tusia foʻi o latou suafa i le tusi o le ola.

11. O le ā e tatau ona tatou faia pe afai ua tatou momoe faaleagaga?

¹¹ E leai se isi o i tatou e manaʻo e oo i le tulaga faanoanoa faaleagaga lea sa iai le faapotopotoga i Sarataisa. Ae, faapefea pe afai ua tatou iloa ua tatou momoe faaleagaga? E tatau ona tatou gaoioi vave mo lo tatou lava lelei. Seʻi faapea ua amata ona tatou taaʻina atu i ala lē faale-Atua pe ua faatalalē i le auai i sauniga po o la tatou faiva. O lea, seʻi o tatou saʻili atu i le fesoasoani a Ieova e ala i le tatalo faatauanau. (Filipi 4:6, 7, 13) O le faitauina o le Tusi Paia i aso taʻitasi ma le suʻesuʻeina o le Tusi Paia ma lomiga a le “auauna e pule” o le a fesoasoani lea iā i tatou e mataala ai faaleagaga. (Luka 12:42-44) Ona tatou pei ai lea o i latou i Sarataisa o ē na maua le faamaoniga a Keriso ma o le a avea ai i tatou o se faamanuiaga i uso talitonu.

I le Agelu i Filatelefaia

12. O le a faapefea ona e faamatalaina le tulaga tau tapuaʻiga i Filatelefaia anamua?

¹² Sa avatu le faamālō a Iesu i le faapotopotoga i Filatelefaia. (Faitau Faaaliga 3:7-13.) O Filatelefaia (ua avea nei o Alasehir) o le nofoaga autū lea mo le gaosiga o le uaina i le itu i sisifo i Asia Itiiti. O le mea moni, o lona atua sili o Dionysus, o le atua o uaina. E manino mai, o tagata Iutaia i Filatelefaia sa leʻi taulau ona latou uunaʻia Kerisiano Iutaia ina ia tumau i nisi o gaoioiga o le tulafono Faa-Mose pe toe foʻi i ai.

13. Na faapefea ona faaaogā e Keriso “le ki a Tavita”?

¹³ O Keriso “ua i ai le ki a Tavita,” ma ua faatuatuaina atu iā te ia manaʻoga uma o le Malo ma le puleaina o le aiga o le faatuatua. (Isaia 22:22; Luka 1:32) Na faaaogāina e Iesu lenā ki e tatala ai avanoa ma faaeaga o le Malo i Kerisiano i Filatelefaia anamua ma isi vaipanoa. Talu mai le 1919 ua ia saunia ai i le “auauna e pule” “se faitotoʻa lautele” lea e taʻitaʻiina atu ai i le talaʻiga o le Malo lea e leai sē e tetee mai na te mafai ona tapunia. (1 Korinito 16:9; Kolose 4:2-4) O le mea moni, ua tapunia le faitotoʻa o faaeaga o le Malo iā i latou o i “le sunako a Satani” ona e lē o i latou o ni Isaraelu faaleagaga.

14. (a) O le ā na folafola atu e Iesu i le faapotopotoga i Filatelefaia? (e) E faapefea ona puipuia i tatou mai le paʻūʻū i “le itu aso e tofotofoina ai”?

 ¹⁴ Na folafola atu e Iesu i Kerisiano i Filatelefaia anamua e faapea: “Ua e tausia le upu o loʻu onosai, o lea foʻi ou te tausi ai iā te oe i le itu aso e tofotofoina ai, a oo mai i le lalolagi uma.” O le talaʻiga, e manaʻomia ai le onosai lea na faaalia e Iesu. E leʻi lolo atu o ia i fili ae sa faaauau pea ona faia le finagalo o lona Tamā. O lea, na toe faatūina aʻe ai Keriso i le lagi i le ola e lē mafai ona oti. Pe afai tatou te tumau i la tatou filifiliga e tapuaʻi iā Ieova ma lagolagoina le Malo e ala i le talaʻiga o le tala lelei, o le a puipuia ai i tatou mai i le paʻūʻū i le vaitaimi o le tofotofoga, i le “itu aso e tofotofoina ai.” O le a tatou ‘taofi mau ai i le mea ua iā i tatou’ mai iā Keriso e ala i le tauivi e faateleina manaʻoga o le Malo. O le faia faapea o le a iʻu ai i le pale tautele faalelagi mo le vaega faauuina ae o le ola e faavavau i le lalolagi mo a latou aumea faamaoni.

15. O le ā e manaʻomia mai iā i latou o ē o le a avea ma ‘poutū i le malumalu o le Atua’?

¹⁵ Ua faaopoopo mai Keriso e faapea: “O lē manumalo, ou te faia lea ma poutū i le malumalu o loʻu Atua, . . . ou te tusi foʻi i ai le suafa o loʻu Atua, ma le igoa o le aai a loʻu Atua, o Ierusalema fou lea e alu ifo nai le lagi mai loʻu Atua, atoa foʻi ma loʻu igoa fou.” O ovasia faauuina e  tatau ona lagolagoina le tapuaʻiga moni. E tatau ona agavaa pea i le avea ma sui o le “Ierusalema fou” e ala i le talaʻia o le Malo o le Atua ma tausia le mamā faaleagaga. E talafeagai lea tulaga pe afai latou te mananaʻo e avea ma poutū i le malumalu faamamaluina faalelagi ma pe afai e latou te tauaveina le igoa o le aai a le Atua o ona tagatānuu faalelagi ma taʻua ai le suafa o Keriso o lana faatoʻānofotane. Ioe, e tatau ona iai ni o latou taliga e ‘faalogo mai ai i le mea ua fetalai mai ai le Agaga i ekalesia.’

I le Agelu i Laotikaia

16. O ā nisi o mea moni e faatatau iā Laotikaia?

¹⁶ Na aʻoaʻia e Keriso le faapotopotoga i Laotikaia ona o le leai o se manatu mamafa. (Faitau Faaaliga 3:14-22.) I le pe tusa ma le 90 maila (150 kilomita) i le itu i sasae o Efeso ma i le taulaʻiga autū o fefaatauaʻiga i le vanu lafulemu o le vaitafe o Lycus, sa avea ai Laotikaia ma aai tamaoaiga i mea e gaosi ai ma nofoaga autū mo teugātupe. Sa lauiloa foʻi i laʻei e faia mai i le fulufulu uliuli e maua i lea lava vaipanoa. I le avea ma nofoaga autū o le aʻoga faafomaʻi, atonu na gaosia ai i Laotikaia le vaimata e taʻua o le pauta Phrygia. O Asclepius, o le atua o vailaau faafomaʻi, o ia o se tasi o atua sili o le aai. E foliga mai sa toʻatele se aofaʻiga o tagata Iutaia sa i Laotikaia, ma o nisi o i latou sa tamaoaiga.

17. Aiseā na aʻoaʻia ai tagata Laotikaia?

¹⁷ I le talanoa atu i le faapotopotoga i Laotikaia e ala i lana “agelu” ua fetalai atu Iesu o sē e iai le pule o “le molimau moni ma le faamaoni, o le amataga o mea na faia e le Atua.” (Kolose 1:13-16) Na aʻoaʻia tagata Laotikaia ona ‘e lē maalili, e lē vevela foʻi’ faaleagaga. Talu ai lo latou faalēogalua, o le a luai atu ai e Keriso i latou mai i lona fofoga. E lē tatau ona faafaigatā mo i latou ona malamalama i lenā faataʻitaʻiga. I Iarapoli e iai vaipuna vevela a o Kolose e iai vai malūlū. Talu ai e fai si mamao o le mea e taʻi atu ai le vai i Laotikaia, o lea la, e foliga mai e oo atu le vai i le aai ua māfanafana. I le amataga e tafe atu ai le vai e ala i se alāvai. Ae pe a latalata atu i Laotikaia, ona tafe atu lea i se alāvai e faia i maa.

18, 19. E faapefea ona fesoasoani i Kerisiano i aso nei o loo pei o i latou i Laotikaia?

¹⁸ O tagata taʻitoʻatasi i aso nei e pei o i latou i Laotikaia, ua lē vevela e uunaʻia ai e gaoioi, e lē maalili foʻi e faafouina ai. I le pei o vai māfanafana, o le a luai mai ai i latou i fafo! E lē finagalo Iesu e avea i latou ma ana fofoga fetalai, ua faauuina o ‘sāvali e fai ma sui o Keriso.’ (2 Korinito 5:20) O le a latou lē mauaina lo latou faaeaga o ni ē e faalauiloa le Malo, seʻi vaganā ua salamō. Na saʻilia e tagata Laotikaia le ʻoa faalelalolagi ma na latou ‘lē iloa o i latou o le malaia, ma le pagātia, ma le mativa, ma le tauaso, ma le lē lavalavā.’ Ina ia aveesea lo latou matitiva faaleagaga, lo latou tauaso ma lo latou lē lavalavā, so o se tasi lava i aso nei e pei o i latou, e manaʻomia ona faatau mai iā Keriso le “auro ua faamamāina” o le faatuatua ua tofotofoina, o “ofu sisina” o le amiotonu ma le “vaimata” lea ua faaleleia ai le vaaiga faaleagaga. E fiafia ovasia Kerisiano e fesoasoani iā i latou ia manatu mamafa i o latou manaʻoga faaleagaga ina ia “tamaoaiga i latou i le faatuatua.” (Iakopo 2:5; Mataio 5:3) E le gata i lea, e manaʻomia foʻi e ovasia ona fesoasoani iā i latou ina ia faatatauina le “vaimata” faaleagaga, ia taliaina ma ia ōgatusa o latou olaga ma aʻoaʻoga a Iesu, ana fautuaga, faaaʻoaʻoga ma uiga faalemafaufau. O se vaifofō lea e faamālōlōina ai faasaga i “tuʻinanau o le tino, ma le tuʻinanau o mata, ma le faalialia o lenei olaga.”—1 Ioane 2:15-17.

¹⁹ Ua aʻoaʻia ma faasaʻoina e Iesu i latou uma e alofa i ai. E tatau i ovasia o loo i lalo o lana taʻitaʻiga ona faia faapea ma le agamalu. (Galuega 20:28, 29) Na tatau i tagata Laotikaia ona ‘vilivilitaʻi ma salamō’ ma faia ni suiga i le auala e latou te mafaufau ma soifua ai. O lea, pe ua faamasani atu ea nisi o i tatou i le ituaiga olaga lea e faaitiitia ai la tatou auaunaga paia i le Atua ma ua faalētāua ai la tatou matafaioi i le olaga? Seʻi o tatou ‘faatau mai le vaimata mai iā Iesu’ ina ia mafai ai ona tatou iloa le tāua o le muaʻi saʻili ma le maelega o le Malo.—Mataio 6:33.

20, 21. O ai o loo tali lelei atu i le “tuʻituʻi” a Iesu i aso nei, ma o le ā lo latou faamoemoe?

²⁰ Ua fetalai mai Keriso e faapea: “Faauta, ou  te tū atu i le puipui ma tuʻituʻi atu; ai se tasi e faalogo mai i loʻu leo, ma tatala mai le puipui, ou te ulufale atu iā te ia, ma te talisua foʻi ma ia, o ia foʻi ma aʻu.” E masani ona fofoga atu e Iesu aʻoaʻoga faaleagaga a o ia taumafa i se talisuaga. (Luka 5:29-39; 7:36-50; 14:1-24) Ua ia tuʻituʻi nei i le faitotoʻa o le faapotopotoga e pei o le faapotopotoga i Laotikaia. Pe o le a tali mai ea ona sui i lana tuʻituʻi, ma toe faaolaola lo latou alofa mo ia, talilelei o ia iā i latou ma faatagaina o ia e aʻoaʻoina i latou? Afai o lea, o le a taumamafa faatasi Iesu ma i latou i lo latou mauaina o aogā sili faaleagaga.

²¹ O “isi mamoe” i aso nei ua latou faatagaina Iesu i se tulaga faafaatusa, ma o lenā gaoioiga e iʻu atu ai i le ola e faavavau. (Ioane 10:16; Mataio 25:34-40, 46) I ē faauuina ua manumalo, o le a tuuina atu e Keriso le faaeaga o le ‘nonofo faatasi ma ia i lona nofoālii, e pei o ia foʻi ona ia manumalo, ua la nonofo foʻi faatasi ma lona Tamā i lona nofoālii.’ Ioe, o ē faauuina ua manumalo, ua folafola atu e Iesu iā i latou le taui sili o le fai ma tupu faatasi ma ia i le lagi, i le itu taumatau o lona Tamā. Ae o isi mamoe ua manumalo, o loo tepa taulaʻi atu i latou i le nofoaga matagofie i luga o le lalolagi i lalo o le pulega a le Malo.

Lesona mo i Tatou Uma

22, 23. (a) E faapefea ona mauaina e Kerisiano uma aogā mai fetalaiga a Iesu i faapotopotoga e fitu? (e) O le ā e tatau ona avea ma o tatou faanaunauga?

²² E lē taumatea e mafai ona tele aogā e maua e Kerisiano uma mai fetalaiga a Iesu i faapotopotoga e fitu i Asia Itiiti. Ia mātau, na ofoina atu e Keriso le faamālō talafeagai, mo se faaaʻoaʻoga, na uunaia toeaina alolofa Kerisiano e avatu le faamālō i tagata taʻitoʻatasi ma faapotopotoga o loo i se tulaga lelei faaleagaga. E fesoasoani toeaina i uso talitonu i o latou vaivaiga ina ia faatatauina vaifofō faale-Tusi Paia. E mafai e i tatou uma lava ona faaauau ona mauaina aogā mai vala eseese o fautuaga a Keriso na avatu i faapotopotoga e fitu, pe a faatatauina ma tatalo e aunoa ma le faatuai. *

²³ O nei aso e gata ai e lē o se taimi e faifai mālie ai, pe manaʻo tele ai i meafaitino, po o so o se isi lava mea e faapogaia ai i tatou e avatu tau lava o sina auaunaga i le Atua. O lea la, e tatau i faapotopotoga uma ona faaauau ona susulu malosi atu e pei o tuugāmolī ua faatumauina e Iesu i o latou tulaga. I le avea ma ni Kerisiano faamaoni, seʻi o tatou naunau e uaʻi atu i mea o fetalai mai ai Keriso ma faalogo atu i mea ua fai mai ai le agaga. Ona tatou maua ai lea o le olioli tumau o ni ē e faasusulu atu le malamalama o le mamalu o Ieova.

[Faamatalaga pito i lalo]

O le a Faapefea Ona E Tali?

• O ai “le fafine o Iesepela,” ma aiseā e lē faataʻitaʻi atu ai fafine amioatua iā te ia?

• O le ā le tulaga na iai i le faapotopotoga i Sarataisa, ma o le ā e tatau ona tatou faia e ʻalofia ai le pei o le tele o Kerisiano na soifua i inā?

• O le ā le folafolaga na avatu e Iesu i le faapotopotoga i Filatelefaia ma e faapefea ona faatatau mai iā i tatou i aso nei?

• Aiseā na aʻoaʻia ai tagata i Laotikaia ma o ā faamoemoega ua saunia mo Kerisiano maelega?

[Fesili mo le Suʻesuʻega]

[Ata i le itulau 16]

E tatau ona ʻalofia ala leaga a “le fafine o Iesepela”

[Ata i le itulau 18]

Na saunia e Iesu i ona soo le “faitotoʻa lautele” e taʻitaʻiina atu i faaeaga o le Malo

[Ata i le itulau 20]

Pe e te talileleia Iesu ma faalogo atu iā te ia?