Ia Filifili le Ola e Faavavau

O LE toʻatele o tagata e leʻi faia muamua lava ni filifiliga se tele. O se faataʻitaʻiga, o ofu tatou te oofu ai, o meaʻai tatou te aai ai, o galuega e faigaluega ai ma mea e nonofo ai o ni mea e masani ona faia i ai filifiliga. I le tele o vaega o le lalolagi, o le filifiliina o se paaga a se tasi o se tū e masani ai. Peitaʻi, ua faaali mai e le Tusi Paia se filifiliga e sili atu i filifiliga uma—lea e avanoa mo tagata uma.

Ua faapea mai le Tusi Paia: “E pei ona iʻu o le amiotonu i le ola, e faapea foʻi lē ua tausisi i le leaga, e iʻu lea i lona lava oti.” (Faataoto 11:19) Ua folafola mai e Iesu Keriso e faapea: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”—Ioane 17:3.

Ioe, ua tatala mai le avanoa e Lē na Foafoaina i tatou e filifilia ai le ala e maua ai le ola e faavavau! O le ā e tatau ona tatou faia ina ia maua ai le ola e faavavau?

O loo taʻua e le Tusi Paia e faapea, “o le ala o le amiotonu, o i ai le ola.” (Faataoto 12:28) E mafai ona tatou faatasi ma tagata amiotonu o loo savavali i le ala o le ola e faavavau. E faapefea? E ala i le faamautinoa o loo ōgatusa o tatou olaga ma le finagalo o le Atua ma ana tulafono. (Mataio 7:13, 14) O lea tau ina ia tatou faia le filifiliga saʻo ma maua le meaalofa a le Atua o le ola e faavavau.—Roma 6:23.