Ia Tutumau ma Manumalo i le Tausinioga mo le Ola

PE AFAI e te faimalaga i se sami sousou, o le ā le ituaiga o vaa o le a e filifilia? Po o le a e manaʻo i se vaa laʻitiiti e faapaʻole ona fai po o se vaa malosi e lelei ona fausia? O le mea moni, o le a e filifilia le vaa malosi, talu ai e sili atu ona mafai ona faimalaga i le sousou o le sami.

A o tatou sopoʻia atu lenei faiga o mea fesouaʻiina ma tumu i lamatiaga, e tatou te fesagaʻi ai ma luʻi faigatā. O se faataʻitaʻiga, i nisi taimi e lagona ai e talavou le fenuminumiaʻi ma le lē saogalemu, ona o manatu femoumouaʻi ma faiga a lenei lalolagi. O tagata ua faatoʻā amata ona ola i ni olaga faa-Kerisiano, atonu o loo iai pea ni faalogona lē mautinoa. E oo lava i nisi o ē sa tumau ona auauna faamaoni i le Atua mo le tele o tausaga, atonu ua tofotofoina i latou talu ai e leʻi faataunuuina atoatoa mea na latou faatalitalia.

E lē fou na lagona. Sa iai foʻi taimi na lē mautonu ai auauna faamaoni a Ieova e pei o Mose, Iopu ma Tavita. (Numera 11:14, 15; Iopu 3:1-4; Salamo 55:4) Peitaʻi, sa iloga o latou olaga i le tumau ma le tuutoina atu iā Ieova. O a latou faaaʻoaʻoga lelei ua faamalosia ai i tatou ia tumau mausalī, ae ua manaʻo Satani le Tiapolo e tataʻi ese i tatou mai le tausinioga mo le ola e faavavau. (Luka 22:31) O lea la, e mafai faapefea ona tatou tumau “mausalī . . . i le faatuatua”? (1 Peteru 5:9) E mafai faapefea ona tatou faamalosia o tatou uso talitonu?

E Finagalo Ieova Ina ia Tatou Tumau

Afai e tatou te faamaoni iā Ieova, o le a fesoasoani mai o ia ina ia tatou tutumau pea. Na fesagaʻi le faisalamo o Tavita ma le tele o tulaga faigatā, ae sa faamoemoe pea i le Atua ma pese ai o ia e faapea: “Na ia [Ieova] aveina ae aʻu ai le lua e malaia ai, ma le mea matuā palapalā; na faatūina foʻi oʻu vae i luga o le papa, ua faamautūina ai oʻu savali.”—Salamo 40:2.

E faamalosia i tatou e Ieova e tau “le taua lelei i la le faatuatua” ina ia mafai ai ona tatou ‘taofimau i le ola e faavavau.’ (1 Timoteo 6:12) Ua ia saunia foʻi le auala mo i tatou e tumau ai pea ma tatou manumalo ai i la tatou taua faaleagaga. Na uunaʻia e le aposetolo o Paulo ia uso Kerisiano ina ‘ia latou loto tetele i le Alii, ma le malosi o lona mana,’ ma ia ‘oofu i latou i le ofutau atoatoa mai le Atua ina ia mafai ai ona tutumau ma tetee atu faasaga i togafiti a le Tiapolo.’ (Efeso 6:10-17) Ae o le ā se mea e tatou te ono lē tumau ai? E mafai faapefea ona tatou teena na taʻaiga mataʻutia?

Ia Faaeteete i Mea e Pogai ai Ona Lē Tumau

E lelei ona manatua lenei vala e sili ona tāua: O filifiliga tatou te faia e iʻu ina aafia ai lo tatou tulaga mausalī faa-Kerisiano, a lē o le lelei, o le leaga. O loo fesagaʻi talavou ma filifiliga e faatatau i mataupu e pei o galuega, o aʻoaʻoga faaopoopo, ma faaipoipoga. E ono filifili tagata matutua pe e siitia atu i se isi nofoaga, po o le faia o se isi galuega faaopoopo. I aso uma lava,  tatou te faia ai filifiliga e faatatau i le faaaogāina o le taimi ma le tele o isi mataupu. O le ā o le a fesoasoani iā i tatou e faia ai ni filifiliga atamai, na o le a faamalosia ai i tatou ina ia tumau i le avea o ni auauna a le Atua? Na faapea mai se tasi Kerisiano ua loa ona auauna: “Pe a ou faia ni filifiliga, ou te talosaga atu mo le fesoasoani a Ieova. Ou te talitonu i le tāua o le taliaina ma faatatauina fautuaga o loo aumaia i le Tusi Paia, i sauniga faa-Kerisiano, e ala i toeaina, ma i lomiga e faavae i le Tusi Paia.”

Pe a faia ni filifiliga, e sili ona lelei pe a tatou fesili ifo iā i tatou lava: ‘Po o le a ou fiafia po o le a ou faanoanoa i le lima po o le sefulu tausaga o i luma i filifiliga ia ua ou faia nei? Pe ou te taumafai e faamautinoa o le a lē faavaivaia faaleagaga aʻu i aʻu filifiliga ae o le a faaleleia ai loʻu itu faaleagaga?’—Filipi 3:16.

O le lolo atu po o le faatagaina foʻi o tofotofoga, e oo ai ina tatou solia le tulafono a le Atua ma faapogai ai ona ola nisi tagata ua uma ona papatisoina i ni olaga femoumouaʻi. O nisi na faateʻaina mai le faapotopotoga ona o le faia o ni agasala ma le lē salamō, na galulue malosi ina ia toe faaaʻeina i latou, e leʻi umi lava se taimi, ae toe faateʻaina foʻi, ona o le faia o mea sesē lava ia na faateʻaina ai muamua. Pe faamata na māfua ona o lo latou lē tatalo atu mo le fesoasoani a le Atua ina ia latou ‘ʻinoʻino i le leaga, ae pipii i le lelei’? (Roma 12:9; Salamo 97:10) E manaʻomia e i tatou uma lava ona “fai ia o ala laulelei mo o [tatou] vae.” (Eperu 12:13) O lea la, seʻi o tatou iloiloina nisi o manatu e mafai ona fesoasoani iā i tatou ina ia tumau ai pea faaleagaga.

Ia Tumau Pea e Ala i le Galuega Faa-Kerisiano

O le tasi auala e mafai ona tumau ai pea i la tatou tausinioga mo le ola, o le faateleina lea o mea e fai i le galuega talaʻi o le Malo. Ioe, o la tatou faiva faa-Kerisiano, o se fesoasoani tāua e taulaʻi atu ai pea o tatou loto ma mafaufau, i le faia o le finagalo o le Atua ma tāmau ai pea i o tatou mafaufau le taui o le ola e faavavau. Na uunaʻia faamalosi e Paulo ia tagata Korinito e tusa ai ma lenei mea, i le faapea atu: “O lenei, oʻu uso pele e, ia outou tumau, ma le lē faagaeetia, ia alualu lo outou faamalosi i le galuega a le Alii ma le lē aunoa, ina ua outou iloa e lē se mea faalēaogā lo outou tautigā i le Alii.” (1 Korinito 15:58) O le “tumau” o lona uiga ‘ua tāmau i se mea.’ “Ua lē mafai ona toe gaoioi” e mafai ona faailoa ai ‘le lē toe mafai ona matala mai o se tasi mai taofiofiga a se tasi.’ O lea, o le pisi i la tatou faiva, e iʻu ina faamautūina ai o tatou ala faa-Kerisiano. O le fesoasoani i isi tagata ina ia iloa Ieova, ua uigā ai o tatou olaga ma tatou maua ai le fiafia.—Galuega 20:35.

Ua mātauina e Pauline, o se Kerisiano ua sili atu i le 30 tausaga o auauna o se misionare ma auai i isi galuega talaʻi faataimi atoa e faapea: “O lenei faiva o se puipuiga, talu ai, o le molimau atu i isi ua ou mautinoa ai o loo iā te aʻu le upu moni.” E iai foʻi isi iʻuga mautinoa faapena na maua ona o le auai pea i isi gaoioiga faa-Kerisiano e pei o le auai i sauniga mo le tapuaʻiga ma le filigā i le faia o suʻesuʻega totino faale-Tusi Paia.

Faatumauina e Ala i le ʻAuuso Alolofa

E iai se aafiaga malosi e faatumauina ai i tatou i le avea o se vaega o le faalapotopotoga o tagata tapuaʻi faamaoni i le lalolagi aoao. Maʻeu se faamanuiaga i le auaufaatasi ma sea ʻauuso alolofa i le lalolagi! (1 Peteru 2:17) E mafai ai foʻi ona faatumauina o tatou uso talitonu ona o i tatou.

Seʻi manatunatu i gaoioiga aogā a le tagata amiotonu o Iopu. E oo lava i le tagata faamāfanafana pepelo o Elifasa na ia faapea mai: “O au upu sa faamautūina ai lē sa tautevateva, sa e faamalosia foʻi tulivae sa vaivai.” (Iopu 4:4) O faapefea mai i tatou e tusa ai ma lenei itu? E iā i tatou taʻitoʻatasi le avega tauave e fesoasoani ai i o tatou uso ma tuafāfine faaleagaga ina ia tumau i le auaunaga a le Atua. I a tatou feutagaʻiga ma i latou, e mafai ona tatou gaoioi e tusa ai ma le agaga o upu: “Ia outou faamalosi i lima ua gagase, ia outou faamalosi foʻi i tulivae ua vaivai.” (Isaia 35:3) O lea la, aiseā e lē fai ai  ma ou sini le faamalosia ma faalaeiau se uso Kerisiano se toʻatasi pe toʻalua i taimi uma tou te feiloaʻi ai? (Eperu 10:24, 25) O upu faamālō faalaeiau ma le lotofaafetai mo a latou taumafaiga faaauau pea ina ia faafiafia Ieova, e mafai ona matuā fesoasoani iā i latou e tūmausalī ai ma le faamoemoe ina ia manumalo i le tausinioga mo le ola.

E tele mea lelei e mafai ona faia e toeaina Kerisiano e ala i le faalaeiauina o ē fou. E mafaia lenei mea i le ofoina atu o fautuaga ma lapataʻiga aogā mai le Tusi Paia, ma ia galulue faatasi ma i latou i le faiva i le fanua. E faaaogā pea e le aposetolo o Paulo avanoa e faamalosia ai isi. Sa naunau o ia e fia feiloaʻi i Kerisiano i Roma ina ia mafai ona ia fesoasoani ma faamalosiau faaleagaga iā i latou. (Roma 1:11) Sa ia manatu i ona uso ma tuafāfine pele i Filipi o lona ‘fiafia ma lona pale’ ma apoapoaʻi atu iā i latou ina ia “tumau o outou i le Alii.” (Filipi 4:1) Ina ua faalogo i tulaga faigatā ua oo i ona uso i Tesalonia, na auina atu e Paulo ia Timoteo ina ia ‘faatūmauina, ma faamāfanafanaina i latou, ina neʻi [“fesouaʻiina,” NW] se tasi i puapuaga.’—1 Tesalonia 3:1-3.

Sa faailoa atu ma le talisapaia e le aposetolo o Paulo ma Peteru ia taumafaiga faamaoni a o la uso tapuaʻi. (Kolose 2:5; 1 Tesalonia 3:7, 8; 2 Peteru 1:12) Seʻi o tatou mātauina uiga lelei ae lē o vaivaiga o o tatou uso, ma a latou taumafaiga manuia ina ia tutumau mausalī pea ma faamamaluina ai Ieova.

Afai e lē saʻo la tatou vaai pe faitio, atonu o le a tatou faafaigatā ai ona faatumauina pea nisi i le faatuatua. Maʻeu la le talafeagai ona manatua e faapea, ‘ua lailoa ma tuulafoaʻiina’ o tatou uso i lenei faiga o mea! (Mataio 9:36) E tatau ona latou faatalitalia e maua faamāfanafanaga ma maua lagona lelei i le faapotopotoga Kerisiano. O le mea lea, seʻi o tatou faia le mea e sili ona lelei tatou te mafaia, ina ia faamalosia ai uso talitonu ma fesoasoani iā i latou ina ia tumau mausalī.

E iai taimi, atonu e faia mai ai e isi ni mea e ono faavaivaia ai lo tatou tumau. Po o le a avea ea se faamatalaga lē manuia po o se uiga lē alofa e faavaivaia ai i tatou i la tatou auaunaga iā Ieova? Seʻi aua lava neʻi o tatou faatagaina se tasi e taaʻina ese i tatou mai lo tatou tutumau!—2 Peteru 3:17.

Folafolaga a le Atua—E Faatumauina Ai

O le folafolaga a Ieova e uiga i se lumanaʻi ofoofogia i lalo o le pulega a le Malo o le Atua, ua aumaia ai se faamoemoe e fesoasoani iā i tatou ina ia tutumau ai. (Eperu 6:19) O le talitonu ma le mautinoa i le faataunuuina pea e le Atua o ana folafolaga, ua uunaʻia ai i tatou, ‘ia mataala ma tutumau i le faatuatua.’ (1 Korinito 16:13; Eperu 3:6) O ni mea e foliga mai ua faatuai ona faataunuuina o folafolaga a le Atua e ono tofotofoina ai lo tatou faatuatua. E tāua tele la lo tatou leoleo faasaga i le ono faasesēina o i tatou i aʻoaʻoga sesē ma see ese ai mai lo tatou faamoemoe.—Kolose 1:23; Eperu 13:9.

E tatau ona avea o se lapataʻiga mo i tatou le faaaʻoaʻoga leaga a tagata Isaraelu ia na faaumatia i le vao, talu ai sa latou lē faatuatua i folafolaga a Ieova. (Salamo 78:37) Na i lo o le faataʻitaʻi iā i latou, seʻi o tatou tutumau ma auauna i le Atua ma se lagona faanatinati i nei aso  e gata ai. Na faapea mai se tasi toeaina poto masani: “Ou te ola lava i aso uma e pei lava o le a oo mai taeao le aso sili o Ieova.”—Ioelu 1:15.

Ioe, ua lalata mai lava le aso sili o Ieova. Ae peitaʻi, e leai se mea e tatou te fefefe ai, tau lava ina tatou faalatalata atu i le Atua. Afai e tatou te pipiimau atu i ana tapulaa amiotonu ma tutumau pea, e mafai lava ona tatou taulau manuia i le tausinioga mo le ola e faavavau!—Faataoto 11:19; 1 Timoteo 6:12, 17-19.

[Ata i le itulau 23]

Po o e faia mea sili e fesoasoani atu ai i uso Kerisiano ina ia tutumau pea?

[Faamatalaga i Ata i le itulau 21]

The Complete Encyclopedia of Illustration/J. G. Heck