Se Tusi Mataʻina o Faamaumauga

E MAI le 1928 e oo i le 1956, na faia ai e le tagata suʻesuʻe o Richard E. Byrd ni malaga suʻesuʻe se lima i le Anetatika. I le tausia o sana lava api e faamaumau ai mea tutupu i lona soifuaga ma se api sa faamaumau ai ma le saʻo ia malaga atoa a se vaa, na mafai ai e ia ma lana ʻausuʻesuʻe ona iloa ala o matagi, le sauniunia o faafanua, ma maua ai le anoanoaʻi o faamatalaga e uiga i le konetineta o le Anetatika.

Ua faataʻitaʻia mai i malaga suʻesuʻe a Richard le tāua o le tausia o se api o faamaumauga saʻo. E tusia uma lava i se api o faamaumauga ia faamatalaga auiliili o se faigāmalaga a se vaa po o se vaalele. O nei faamatalaga, e mafai ona faaaogā mulimuli ane e toe iloiloina ai mea na tutupu pe e tilofaʻia ai foʻi faamatalaga e mafai ona aogā mo nisi faigāmalaga i le lumanaʻi.

Ua saunia e le Tusi Paia se tala faatupu manatu e uiga i le Lolo i aso o Noa. E sili atu i le tausaga talu ona iai lenā Lolo i le lalolagi. I le sauniuni atu mo le Lolo, na faaalu ai e Noa, o lana avā, ma la laʻua fanau tama e toʻatolu ma a latou avā le 50 i le 60 tausaga e fausia ai le vaa —o se vaa telē lava, o lona fua e tusa ma le 1,400,000 futu kupita [40,000 mita kupita]. Aiseā na faia ai? Ina ia faasaoina ai ni tagata ma manu mai le Lolo.—Kenese 7:1-3.

O lona uiga la, o loo iai i le tusi o le Tusi Paia o Kenese le mea lea ua faaigoaina o le tusi o faamaumauga a Noa i mea na tutupu talu mai le amataga o le Lolo, seʻia oo i le taimi na tuua ai e ia ma lona aiga le vaa. Po o iai i lenā tusi se mea tāua e aogā mo i tatou i aso nei?