Ua Fetalai Keriso i Faapotopotoga
Ua Fetalai Keriso i Faapotopotoga
“O mea nei ua fai mai ai lē ʻuʻu i fetu e fitu i lona lima taumatau.”—FAAALIGA 2:1.
1, 2. Aiseā e tatau ai ona tatou naunau i mea na fetalai atu ai Keriso i faapotopotoga e fitu i Asia Itiiti?
O LE Alo pele e toʻatasi o Ieova, o Iesu Keriso, o ia o le Ulu o le faapotopotoga Kerisiano. Ina ia lē mataʻuleagaina le faapotopotoga o ona soo faauuina, ua faatinoina ai e Keriso lona tulaga ulu e ala i le avatu i ai o le faamālō ma le faasaʻoina o i latou. (Efeso 5:21-27) O loo maua faaaʻoaʻoga o lenei mea i le Faaaliga mataupu e 2 ma le 3, o i inā tatou te maua ai feʻau malolosi ma le alofa a Iesu na auina atu i faapotopotoga e fitu i Asia Itiiti.
2 A o leʻi faalogo le aposetolo o Ioane i upu a Iesu i faapotopotoga e fitu, na ia maua se faaaliga o “le aso o le Alii.” (Faaaliga 1:10) Na amata lenā “aso” ina ua faavaeina le Malo faa-Mesia i le 1914. O mea sa fetalai atu ai Iesu i faapotopotoga e matuā tāua lava i nei aso e gata ai. O ana faalaeiauga ma fautuaga e fesoasoani iā i tatou e fesagaʻi ai ma nei aso faigatā.—2 Timoteo 3:1-5.
3. O ā uiga faafaatusa o “fetu,” “agelu,” ma “tuugāmolī auro” lea na vaaia e le aposetolo o Ioane?
3 Na vaaia e Ioane Iesu Keriso faamamaluina, o lē “ʻuʻu i fetu e fitu i lona lima taumatau” ma o lē “savali i totonu o tuugāmolī auro e fitu,” po o faapotopotoga. O “fetu” o “agelu ia a ekalesia [faapotopotoga] e fitu.” (Faaaliga 1:20; 2:1) O fetu i nisi taimi o loo faaataina mai ai foafoaga agaga o agelu, peitaʻi e lē faaaogāina e Iesu se tagata na te faamaumauina faamatalaga mo ni foafoaga agaga. O lea la, o nei “fetu” ua talafeagai ona faaataina ai ovasia faauuina e le agaga, po o le ʻautoeaina. O le faaupuga “agelu” e fesootaʻi atu i la latou matafaioi o ni avefeʻau. Talu ai ua faatuputeleina le faalapotopotoga a le Atua, ua tofia ai e le “auauna e pule” tane agavaa, o “isi mamoe” a Iesu e fai ma ovasia.—Luka 12:42-44; Ioane 10:16.
4. Ua faapefea ona maua e toeaina aogā i le uaʻi atu i mea o loo fetalai atu ai Keriso i faapotopotoga?
4 O “fetu” o loo i le aao taumatau o Iesu, ua iai lona mana, pule, finagalo malie ma le puipuiga. O lea la, e tatau ona latou tali atu iā te ia. O le utagiaina o ana fetalaiga i faapotopotoga taʻitasi e fitu, ua mafai ai e toeaina i aso nei ona iloa le auala e taulimaina ai tulaga faapena. O le mea moni, e manaʻomia e Kerisiano uma ona latou faalogo atu i le Alo o le Atua. (Mareko 9:7) O lea la, o le ā ua tatou aʻoaʻoina e ala i le uaʻi atu a o fetalai Iesu i faapotopotoga?
I le Agelu i Efeso
5. O le ā le ituaiga o aai sa iai Efeso?
5 Sa faamālō atu Iesu ma aʻoaʻia le faapotopotoga i Efeso. (Faitau le Faaaliga 2:1-7.) Na faatūina le malumalu telē o le atua fafine o Tiana i lenei aai e tamaoaiga i faiga faapisinisi ma o le taulaʻiga o faiga faaletapuaʻiga i le talafatai i sisifo o Asia Itiiti. E ui lava sa faatumuina lenā aai i amioga lē mamā, lotu sesē ma faiga faamaneta ae sa faamanuia le Atua i le faiva a le aposetolo o Paulo ma isi i Efeso.—Galuega, mataupu e 19.
6. E faapefea ona pei Kerisiano faamaoni i aso nei o i latou i Efeso anamua?
6 Na faamālō atu Keriso i le faapotopotoga i Efeso i lona faapea atu: “Ua ou iloa i au galuega, ma lou tigā, ma lou onosai, ina ua e lē lavātia i ē ua leaga; ua e tofotofo foʻi i ē ua fai mai o aposetolo i latou, a e leai lava, ua e iloa foʻi o tagata pepelo i latou.” I aso nei, ua faapena foʻi i faapotopotoga o soo moni o Iesu ona iai ni faamaumauga o a latou galuega lelei, galuega mamafa ma lo latou onosai. Sa latou leʻi taliaina uso pepelo o ē na mananaʻo e vāai iā i latou o ni aposetolo. (2 Korinito 11:13, 26) I le pei o i latou i Efeso, o Kerisiano faamaoni foʻi i aso nei e “lē lavātia i ē ua leaga.” Ina ia tumau le mamā o le tapuaʻiga a Ieova ma puipuia le faapotopotoga, latou te lē aumea atu ai i tagata ua lafoaʻia ala o le upu moni ma ua lē salamō.—Kalatia 2:4, 5; 2 Ioane 8-11.
7, 8. O le ā le faafitauli tugā na iai i le faapotopotoga i Efeso, ma e faapefea ona tatou feagai ma se tulaga faapena?
7 Ae peitaʻi, na iai se faafitauli tugā o Kerisiano i Efeso. “A ua ou iloa se mea iā te oe, ona ua e tuua o lou uluaʻi alofa.” Sa manaʻomia e sui o le faapotopotoga ona toe faaolaola lo latou uluaʻi alofa mo Ieova. (Mareko 12:28-30; Efeso 2:4; 5:1, 2) E tatau iā i tatou uma lava ona puipui neʻi mou atu lo tatou uluaʻi alofa mo le Atua. (3 Ioane 3) Ae peitaʻi, e faapefea pe afai o mea e pei o le faanaunau mo le tamaoaiga faaletino po o le saʻilia o faafiafiaga ua faaautū i ai o tatou olaga? (1 Timoteo 4:8; 6:9, 10) O lea, e tatau ona tatou tatalo faatauanau mo le fesoasoani a le Atua ina ia suia na faanaunauga i le alofa loloto mo Ieova ma lotofaafetai mo mea uma ua la faia ma lona Alo mo i tatou.—1 Ioane 4:10, 16.
8 Na faalaeiau Keriso i tagata Efeso e faapea: “Ia e manatua le mea na e paʻū mai ai, ma ia e salamō, ma e faia au uluaʻi galuega.” Ae faapefea pe afai latou te lē faia lenei mea? Na fetalai Iesu e faapea: “Afai e leai, ona ou vave alu atu lea iā te oe, ou te aveesea lau tuugāmolī i le mea e tuu ai.” Pe afai o le a mou atu le uluaʻi alofa o mamoe uma lava, o le a lē toe iai foʻi la se “tuugāmolī” po o se faapotopotoga. I le avea ai o ni Kerisiano maelega, seʻi o tatou galulue mamafa, ina ia tausia ai le susulu atu faaleagaga o le faapotopotoga.—Mataio 5:14-16.
9. E faapefea ona manatu i vaega faalotu?
9 O se mea lelei ona faamālō i tagata Efeso ona na inoino i “galuega a le ʻau Nikalaitai.” E ese mai le mea o loo fai mai ai le Faaaliga, e leai se mea moni e iloa e uiga i le amataga, o aʻoaʻoga ma faiga a lenei vaega faalotu. Talu ai sa taʻusalaina e Iesu le mulimuli atu i tagata, o lea, tatou te moomia ai ona faaauau ona inoino i vaega faalotu, e pei ona sa faia e Kerisiano i Efeso.—Mataio 23:10.
10. O le ā o le a oo iā i latou o ē e utagia le mea o fai mai ai le agaga?
10 Na fetalai Keriso e faapea: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia.” A o iai i le lalolagi, na fetalai Iesu i lalo o le taaʻiga a le agaga o le Atua. (Isaia 61:1; Luka 4:16-21) O lea la, e tatau ona tatou uaʻi atu i le mea o fetalai mai ai le Atua iā Iesu e ala mai le agaga paia. I lalo o le taʻitaʻiga a le agaga, na folafola mai e Iesu e faapea: “O lē manumalo, ou te avatua iā te ia e ʻai i le laau o le ola o i totonu o le parataiso o le Atua.” Mo le ʻaufaauuina, o ē ua utagiaina le mea o fai mai ai le agaga, o le a uiga i lo latou mauaina o le ola faalelagi e lē oo iai le oti i le “parataiso o le Atua” po o le mea o loo afio ai Ieova. O le “motu o tagata e toʻatele,” o ē ua faalogo atu foʻi i le mea o fai mai ai le agaga, o le a olioli i se parataiso faalelalolagi, o i inā o le a latou feinu ai mai le “vaitafe manino o le vai o le ola” ma o le a faamālōlōina mai ‘lau o le laau’ o loo i autafa o le vaitafe.—Faaaliga 7:9; 22:1, 2; Luka 23:43.
11. E faapefea ona tatou faateleina le alofa iā Ieova?
11 Na mou atu le uluaʻi alofa o tagata Efeso, peitaʻi o le a faapefea pe a fai e aliaʻe lenā lava tulaga i se faapotopotoga i aso nei? Seʻi o tatou faateleina lo tatou alofa mo Ieova e ala i le talanoa e uiga i ona ala alofa e faia ai mea. E tatou te faaalia lo tatou lotofaafetai mo le alofa o le Atua, ua ia saunia ai le togiola e ala i lona Alo pele. (Ioane 3:16; Roma 5:8) Pe a talafeagai ai, e mafai ona tatou taʻua le alofa o le Atua i a tatou tali ma vaega o polokalame i sauniga. E tatou te faaalia lo tatou lava alofa iā Ieova e ala i le viiaina o lona suafa i le faiva faa-Kerisiano. (Salamo 145:10-13) O le mea moni, atonu e tele se mea e mafai ona fai e a tatou upu ma gaoioiga e toe faaolaola pe toe faamalosia ai le uluaʻi alofa o le faapotopotoga.
I le Agelu i Semurana
12. O le ā ua faaalia e talafaasolopito e tusa ai o Semurana ma faiga faalotu i inā?
12 Na avatu le faamālō a Keriso i le faapotopotoga i Semurana i lona faapea atu: O “lē muamua ma lē mulimuli o lē na oti, a ua ola mai” e ala i le toetū. (Faitau le Faaaliga 2:8-11.) O Semurana (lea ua avea nei o Izmir i Take) sa i le talafatai i sisifo o Asia Itiiti. Sa nofoia e tagata Eleni le aai, peitaʻi na faaumatiaina e tagata Lydia pe tusa o le 580 T.L.M. Na toe fausia e ē na suitulaga iā Alesana le Sili ia Semurana i se vaaiga fou. Na avea ma vaega o Roma i le itumalo o Asia ma o le nofoaga autū e olaola ai faiga faapisinisi, ma sa lauiloa i ona fale tetele matagofie na iai. O le malumalu o Tiperio Kaisara na avea ma ogatotonu o le tapuaʻiga i le emeperoa. E tatau i tagata tapuaʻi ona faamūina sina mea manogi ma faapea atu, “o Kaisara le Alii.” Sa leʻi lolo atu i ai Kerisiano auā iā i latou o “Iesu o le Alii.” O lea, na mafatia ai i latou i puapuaga.—Roma 10:9.
13. E ui ina matitiva faaletino, ae o le ā na mauʻoa ai Kerisiano i Semurana?
13 E ese mai i puapuaga, sa onosaia foʻi e Kerisiano i Semurana le tulaga mativa ma atonu sa mafatia i tulaga faigatā tau tamaoaiga, ona sa leʻi auai i latou i le tapuaʻiga i le emeperoa. E lē sao mai ai foʻi auauna a Ieova i aso nei i tofotofoga faapena. (Faaaliga 13:16, 17) E ui lava ina matitiva faaletino, ae o i latou e pei o Kerisiano i Semurana e mauʻoa i le itu faaleagaga, ma o le mea aupito i tāua lenā!—Faataoto 10:22; 3 Ioane 2.
14, 15. O le ā le faamāfanafanaga ua maua e ē faauuina mai le Faaaliga 2:10?
14 O le toʻatele o tagata Iutaia i Semurana o “le sunako o Satani i latou” talu ai sa latou faia tū e lē faale-Tusi Paia, na latou teena le Alo o le Atua, ma upuleaga i soo faauuina o Iesu. (Roma 2:28, 29) Ae maʻeu le faamāfanafanaina o ē faauuina mai upu a Keriso o loo sosoo ai! Ua ia fetalai mai e faapea: “Aua lava e te fefe i mea o le a e tigā ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e pō agafulu foʻi e puapuagatia ai outou. Ia e faamaoni seʻia oo i le oti, ona ou avatu ai lea iā te oe o le pale o le ola.”—Faaaliga 2:10.
15 E leʻi fefe Iesu e maliu mo le faamaonia o le pule silisili ese a Ieova. (Filipi 2:5-8) E ui lava o loo tau Satani faasaga i le vaega totoe faauuina, ae latou te lē fefefe i mea e tatau ona latou mafatia ai o se vaega, e pei o puapuaga, faafalepuipuiina po o le oti i faiga sauā. (Faaaliga 12:17) O le a manumalo i latou i le lalolagi. Na i lo le mauaina o se pale o fugālaau e mamae lea e faapaleina ai ē na manumalo i taaloga faapaupau, ua folafola e Keriso i le vaega faauuina ua toe faatutūina i le lagi “le pale o le ola” o ni foafoaga e lē mafai ona oti. Maʻeu se meaalofa tautele!
16. Pe afai e tatou te auaumea faatasi ma se faapotopotoga e pei o Semurana anamua, o le ā le finauga e tatau ona tatou uaʻi atu i ai?
16 E tusa lava po o lo tatou faamoemoe e faalelagi pe faalelalolagi, ae o le a faapefea pe afai e tatou te auaumea atu i se faapotopotoga e pei o lenā sa i Semurana anamua? O lea, seʻi o tatou fesoasoani atu i uso talitonu, ina ia taulaʻi atu i le māfuaaga autū ua faataga ai e le Atua sauāga ma le finauga i le pule silisili ese aoao. Ua faamaonia e Molimau faamaoni taʻitoʻatasi uma a Ieova le pepelo o Satani ma faaalia ai faapea, e oo lava i se tagata e sauāina e mafai ona tumau pea o sē e lagolagoina le aiā a le Atua e pule ai o le Pule Silisili Ese Aoao. (Faataoto 27:11) O lea, seʻi o tatou faalaeiau i isi Kerisiano ina ia onosaia sauāga ma o le iʻuga, e faaauau ai pea ona “tatou . . . lē fefefe ai, a e auauna iā te ia [Ieova] ma le paia ma le amiotonu i ona luma i aso uma o lo tatou ola,” e oo lava i le faavavau.—Luka 1:68, 69, 74, 75.
I le Agelu i Perekamo
17, 18. Na avea Perekamo ma nofoaga autū o ā ituaiga o tapuaʻiga, ma o le ā e ono iʻu i ai mai le teena o le auai i na ituaiga ifoga i tupua?
17 Sa avatu le faamalō ma le faasaʻoga i le faapotopotoga i Perekamo. (Faitau Faaaliga 2:12-17.) O Perekamo o se aai sa matuā aafia i lotu faapaupau ma e tū i le pe tusa o le 50 maila (80 kilomita) i le itu i mātū o Semurana. E foliga mai o le ʻaumakoi Kaletaia (o ē saʻili faailoga i fetu) sa latou sosola atu i inā mai i Papelonia. Na lolofi atu tagata mamaʻi i le malumalu taʻutaʻua o le atua sesē o faamālōlōga ma vailaau faafomaʻi o Asclepius i Perekamo. O Perekamo ma ona malumalu sa faia ai tapuaʻiga iā Kaisara Aokuso, ua taʻua o “le taulaʻiga autū o vaega faalotu a le emeperoa i lalo o le taʻitaʻiga a le emepaea muamua.”—Encyclopædia Britannica, 1959, Tusi 17, itulau 507.
18 Sa iai se fata faitaulaga i Perekamo na faia ai tapuaʻiga iā Seu. Sa avea foʻi le aai ma taulaʻiga autū o le tapuaʻia o tagata lea e faagaeeina e le tiapolo. E lē o se mea e faateʻia ai le faapea mai o le faapotopotoga i inā sa tū i le mea o iai le “nofoālii o Satani”! O le teena o le tapuaʻi atu i le emeperoa, e ono iʻu atu ai i le oti o se tasi na te sapasapaia le pule silisili ese a Ieova. O loo nofo toʻilalo pea le lalolagi i le mana o le Tiapolo, ma o faailoga faaleatunuu ua avea nei ma atua. (1 Ioane 5:19) Mai i le uluaʻi senituri seʻia oo mai i aso nei, e toʻatele Kerisiano faamaoni na faamaturoina, e pei o lē na taʻua e Iesu o “Anetipa o laʻu molimau o lē na faamaoni, sa fasiotia o ia na iā te outou.” E mautinoa o loo manatua pea e Ieova le Atua ma Iesu Keriso na auauna faamaoni.—1 Ioane 5:21.
19. O le ā na faia e Palaamo, ma o le ā e tatau i Kerisiano uma ona leoleo faasaga i ai?
19 Na fetalai foʻi Keriso e faatatau i “aʻoaʻoga a Palaamo.” O le matapeʻapeʻa i le mauaina o mea faitino, na taumafai ai le perofeta pepelo o Palaamo e fetuu Isaraelu. Ina ua liliu e le Atua lana fetuu e avea ma faamanuiaga, na galulue faatasi Palaamo ma le tupu o Moapi o Palako e maileia le tele o tagata Isaraelu i faiga ifo i tupua ma feusuaʻiga lē mamā faaleituaiga. E manaʻomia e toeaina Kerisiano ona maumauaʻi i le faia o le mea ua tonu e pei o Fineaso, o lē na tetee faasaga i gaoioiga a Palaamo. (Numera 22:1–25:15; 2 Peteru 2:15, 16; Iuta 11) O le mea moni e tatau i Kerisiano uma ona leoleo faasaga i ifoga i tupua ma le aumaia i totonu o le faapotopotoga o amioga lē mamā faaleituaiga.—Iuta 3, 4.
20. Pe afai e amata ona mafaufau se Kerisiano i manatu o i latou ua lafoaʻia aʻoaʻoga a le upu moni, o le ā e tatau ona ia faia?
20 Sa matuā lamatia le faapotopotoga i Perekamo talu ai le faatagaina o i latou e auaumea faatasi atu iā i latou “o ē ua taofi i le aʻoaʻoga a le ʻau Nikalaitai.” Na fetalai atu Keriso i le faapotopotoga e faapea: “Inā e salamō ia. Afai e leai, ona ou vave alu atu lea iā te oe, ou te tau foʻi ma i latou i le pelu ai loʻu gutu.” E mananaʻo vaega faalotu e faaleagaina faaleagaga Kerisiano, ma o i latou na mafuli atu i le faatupuina o fevaevaeaʻiga ma vaega faalotu, e lē fai mo latou tofi le malo o le Atua. (Roma 16:17, 18; 1 Korinito 1:10; Kalatia 5:19-21) Pe afai ua amata ona mafaufau se Kerisiano i manatu o i latou ua lafoaʻia aʻoaʻoga o le upu moni ma manaʻo e faasalalau atu, e tatau ona ia utagia se lapataʻiga mai iā Keriso! Ina ia puipuia o ia mai tulaga faigatā, e tatau ona salamō ma saʻili le fesoasoani faaleagaga a toeaina o le faapotopotoga. (Iakopo 5:13-18) E tāua tele ona faanatinati ona faia ni gaoioiga, auā e vave ona afio mai Iesu e faaoo mai le sala faafaamasinoga.
21, 22. O ai e aai i le “manai lilo,” ma o le ā o loo faaataina ai?
21 E lē manaʻomia ona matataʻu fua Kerisiano faauuina faatuatua ma a latou aumea faamaoni i le faamasinoga o loo sau. Ua faatalitalia faamanuiaga mo i latou uma e utagia fautuaga a Iesu e ala mai i le taʻitaʻiga a le agaga paia o le Atua. O se faaaʻoaʻoga, o le a valaaulia i latou o ē faauuina ua manumalo mai i le lalolagi e aai i “le manai lilo” ma o le a avatu iai “le maa sinasina” ua tusia ai “le igoa fou.”
22 Na saunia e le Atua le manai e tausia ai tagata Isaraelu a o latou savalia le vaomatua mo le 40 tausaga. O nisi o na “manai” sa tuu i le ipu auro faaofuofu i totonu o le ato laau o le feagaiga ma sa natia i le mea e Aupito Sili ona Paia o le fale fetafaʻi, o i inā o loo iai se malamalama faavavega o loo faaatagia le afio ai o Ieova. (Esoto 16:14, 15, 23, 26, 33; 26:34; Eperu 9:3, 4) Sa leʻi faatagaina se tasi e ʻaina lenā manai lilo. I lo latou fatutūina aʻe, e mauaina ai e soo o Iesu le ola e lē mafai ona oti, lea e faaataina i le ʻaina o “le manai lilo.”—1 Korinito 15:53-57.
23. O le ā le uiga o “maa sinasina” ma le “igoa fou”?
23 O le maa uliuli e aumaia ai le taʻusalaina i faamasinoga a Roma, ae o le maa sinasina o lona uiga o le taʻumamāina. O le tuuina atu e Iesu o “le maa sinasina” i Kerisiano faauuina ua manumalo, e faaalia ai lona manatu iā i latou e taʻumamāina, e lē ponā ma e leʻi faaleagaina. Talu ai na faaaogāina foʻi e Roma maa e ulufale ai i ni mea tāua e tutupu, atonu la e faaataina e “maa sinasina” ē faauuina ua ulufale atu i le lagi i le tausamaaga a le Tamaʻi Mamoe. (Faaaliga 19:7-9) O le mea moni, o le “igoa fou” ua faailogaina ai le faaeaga o le aufaatasi ma Iesu o ni suli i le Malo faale-lagi. Maʻeu le faalaeiauina ai o ē faauuina faapea a latou aumea i le auaunaga iā Ieova, o ē faamoemoe e soifua i luga o le lalolagi parataiso!
24. O le ā le tulaga e tatau ona tatou tutū ai e tusa ma gaoioiga a tagata ua lafoaʻia le tapuaʻiga moni?
24 E atamai le manatuaina e faapea na lamatia le faapotopotoga i Perekamo i tagata na lafoaʻia le tapuaiga moni. Pe afai o le tulaga lenā o loo faamataʻuina ai le tulaga faaleagaga o le faapotopotoga o loo tatou auaufaatasi atu i ai, o lea seʻi o tatou matuā teena atoatoa gaoioiga a tagata ua lafoaʻia le tapuaʻiga moni ma faaauau ona sāvavali i le upu moni. (Ioane 8:32, 44; 3 Ioane 4) Talu ai e mafai ona faaleagaina le faapotopotoga atoa i gaoioiga tetee a aʻoaʻo pepelo po o tagata taʻitoʻatasi, e tatau ai la ona tatou tumau ma le mausalī e tetee i na faiga, ma ia aua lava neʻi faatagaina na taaʻiga leaga e taofia ai i tatou mai le usitai i le upu moni.—Kalatia 5:7-12; 2 Ioane 8-11.
25. O ā faapotopotoga o le a avatu i ai feʻau a Keriso, o le a talanoaina i le mataupu o loo sosoo mai?
25 Maʻeu le faatupu manatu o upu faamālō ma aʻoaʻiga na fetalai atu ai Iesu Keriso faamamaluina i faapotopotoga e tolu mai faapotopotoga e fitu i Asia Itiiti lea ua tatou iloiloina! Ae peitaʻi, e pei ona taʻitaʻia e le agaga paia, e tele foʻi isi mea o le a ia fetalai atu ai i faapotopotoga e fā o loo totoe. O le a talanoaina i le mataupu o loo sosoo mai nei feʻau, e faasino atu iā Tuatira, Sarataisa, Filatelefaia ma Laotikaia.
O le a Faapefea Ona E Tali?
• Aiseā e tatau ai ona tatou uaʻi atu i mea o fetalai mai ai Keriso i faapotopotoga?
• E faapefea ona tatou fesoasoani e toe faaolaola le uluaʻi alofa o se faapotopotoga?
• Aiseā e faapea atu ai o Kerisiano matitiva faaletino i Semurana anamua na matuā mauʻoa i latou?
• Pe a manatunatu i le tulaga o le faapotopotoga i Perekamo, e faapefea ona tatou vāai i manatu o ē ua lafoaʻia le tapuaʻiga moni?
[Fesili mo le Suʻesuʻega]
[Faafanua i le itulau 10]
(Tagaʻi i le lomiga mo le ata atoa)
ELENI
ASIA ITIITI
Efeso
Semurana
Perekamo
Tuatira
Sarataisa
Filatelefaia
Laotikaia
[Ata i le itulau 12]
O le a olioli le “motu o tagata e toʻatele” i le lalolagi parataiso
[Ata i le itulau 13]
O Kerisiano na sauāina ua manumalo mai i le lalolagi