“Aua le Fefefe, Aua Foʻi le Matataʻu”

“Aua le fefefe, aua foʻi le matataʻu. . . . e iā te outou foʻi o Ieova.”—2 NOFOAIGA A TUPU 20:17.

1. O le ā le aafiaga o faiga faatupu faalavelave i tagata ma aiseā ua malamalama ai i lo latou tulaga fefefe o loo iai?

FAIGA faatupu faalavelave! O lea faaupuga e oo mai ai le fefe, e lagona ai le leai o se saogalemu ma le lē mafesoasoania. E faaosofia ai lagona lē mautonu o le fefe, le faanoanoa ma le ita. O se faaupuga ua faamatalaina ai le tulaga o loo popole ai le toʻatele, o le a pagatia ai tagata mo le tele o tausaga i le lumanaʻi. O le mea moni na tau nisi o atunuu i le tele o tausaga, faasaga i le tele o ituaiga o faiga faatupu faalavelave ae na lē taulau ona latou aveesea atoatoa ituaiga eseese o faiga faatupu faalavelave ma o le māfuaaga lea ua fefefe ai tagata.

2. Ua faapefea ona vaai Molimau a Ieova i le faafitauli o faiga faatupu faalavelave ma ua taʻitaʻiina atu ai i ā fesili?

² Ae ui i lea, o loo iai se māfuaaga moni mo se faamoemoe. O Molimau a Ieova, o loo maelega e talaʻi i atunuu e 234 ma oganuu o le lalolagi, ua iā i latou se vaaiga e matuā mautinoa lava. Na i lo le fefefe faapea o le a lē mafai ona aveesea faiga faatupu faalavelave, ua latou mautinoa o le  a aveesea ma ua toe nei o se aga ona faataunuuina lea. Pe e talafeagai ona iā i tatou lea lava vaaiga mautinoa? O ai o le a taulau manuia i le faasaʻolotoina o le lalolagi mai i lenei faafitauli, ma e faapefea ona tupu lenei mea? Talu ai ua aafia i tatou uma i nisi ituaiga o faiga sauā, o se mea lelei la le iloiloina o le faavae mo lenā vaaiga mautinoa.

3. O ā māfuaaga o le fefe ma o le ā ua valoia e tusa ma o tatou taimi?

³ I aso nei, e eseese māfuaaga ua fefefe ma matataʻu ai tagata. Mafaufau i le toʻatele ua lē mafai ona toe tausia i latou lava ona o le tulaga matua, o tagata taʻitoʻatasi ua fāi atu le malosi ona o ni gasegase ua lē matogafitia ma aiga o loo tauivi i tulaga tau tamaoaiga ina ia saʻilia mea e manaʻomia o le olaga. O lea, manatu i le tulaga lē mailoa o le olaga lava ia! O le maliu faafuaseʻi ona o se faalavelave po o se mala lea e foliga mai e mafai ona tupu i so o se taimi, lea e faaumatia ai mea uma e pele iā i tatou. O lenā fefe ma le popole, faatasi ai ma tulaga lē mautonu o le tagata lava ia ma le lē fiafia, ua talafeagai tonu ai ona avea o tatou taimi e pei ona faamatalaina e le aposetolo o Paulo e faapea: “Ia e iloa e oe lenei mea, o ona aso e gata ai e oo mai ai aso faigatā. Auā e avea tagata ma ē alolofa i latou iā i latou, . . . o ē lē lotoaiga, o ē lē mafaaleleia, o ē faatuaupua, o ē lē taofi manaʻo o le tino, o ē faasauā, o ē inoino i le amio lelei.”—2 Timoteo 3:1-3.

4. O le ā se vaaiga mautinoa o loo iai i tulaga faalētonu na o loo faaalia mai i le 2 Timoteo 3:1-3?

⁴ E ui lava ua faaalia mai e lenei mau le tulaga faalētonu ua iai, ae o loo faasino atu i se faamoemoe. Mātau mai o taimi faigatā e tatau ona iai i “aso e gata ai” o lenei faiga amioleaga o mea a Satani. O lona uiga ua latalata ona tatou mauaina lea o le mapusaga, ma ua toe nei o se aga ona suia lea o lenei faiga amioleaga o mea a le lalolagi i le pulega lelei atoatoa o le Malo o le Atua, lea na aʻoaʻoina e Iesu ona soo e tatalo i ai. (Mataio 6:9, 10) O lenā Malo, o le malo faalelagi o le Atua lea e pei ona fai mai ai le perofeta o Tanielu: “E lē faaumatia e faavavau, . . . na te tuʻimomomoina ma faaumatia ia malo [faaletagata] uma lava, a o ia e tumau lava e faavavau.”—Tanielu 2:44.

Eseesega o le Solitū Faa-Kerisiano ma Faiga Faatupu Faalavelave

5. Na faapefea ona tali atu talu ai nei atunuu i le faamataʻu o faiga faatupu faalavelave?

⁵ Mo le faitau sefulu o tausaga, ua maliliu ai le faitau afe o tagata i faiga faatupu faalavelave. Ua matuā faatuputeleina le mataalia o tagata o le lalolagi atoa i nei tulaga lamatia o faiga faatupu faalavelave, ina ua mavae le osofaʻiga i le Aai o Niu Ioka ma Washington, D.C., iā Setema 11, 2001. O le matuā faateleina o faiga faatupu faalavelave i le lalolagi atoa, ua aufaatasi ai atunuu o le lalolagi e faafetaiaʻia nei faiga faatupu faalavelave. O se faaaʻoaʻoga, e tusa ai ma se lipoti na faasalalauina iā Tesema 4, 2001 e faapea, “e 55 minisita mai le atu Europa, Amerika i Mātū ma atunuu i Asia Tutotonu na lotomalilie uma e faagaoioi le fuafuaga” e galulue faatasi ai faasaga i faiga faatupu faalavelave. Na viiviia e se tagata maualuga i le Iunaite Setete lenei gaoioiga e pei ua tuuina atu se “malosi faaopoopo” e tetee atu ai i le ʻau faatupu faalavelave. Ae na faafuaseʻi ona aafia le faitau selau miliona o tagata i le mea o loo taʻua e le New York Times Magazine o “le amataga o se taua tele.” O le a iloa i se taimi i le lumanaʻi pe aogā nei taumafaiga pe leai. Ae peitaʻi, o iʻuga o na taua faasaga i le taufaamataʻu, na māfua ai lagona o le fefe ma le popole i le toʻatele, ae e lē o faalogona na o i latou e faatuatua iā Ieova.

6. (a) Aiseā atonu e faigatā ai i nisi taimi e nisi ona taliaina le tulaga solitū faa-Kerisiano o loo faia e Molimau a Ieova? (e) O le ā le faaaʻoaʻoga e faatatau i gaoioiga faapolotiki na faataatia e Iesu mo ona soo?

 ⁶ Ua lauiloa Molimau a Ieova i lo latou solitū i faiga faapolotiki. O le tele o tagata atonu latou te loto malilie e taliaina lenei tulaga solitū i taimi e filemu ai, ae pe a tulaʻi mai tulaga e lē masani ai ona tau lē fetālaʻi loa lea o o latou mafaufau. E masani lava, o le fefe ma le lē mautonu e māfua mai i taua, e tutupu aʻe ai lagona malolosi o le lotonuu. Atonu e faigatā ai i lenei mea ona malamalama ai nisi i le māfuaaga e lē fia lagolago ai e se tasi taumafaiga a atunuu. Ae peitaʻi, o Kerisiano moni, latou te iloa e tatau ona latou usiusitai i le faatonuga a Iesu “e lē ni o le lalolagi” i latou. (Ioane 15:19; 17:14-16; 18:36; Iakopo 4:4) E manaʻomia ai la lo latou tumau i le solitū i faiga faapolotiki ma mataupu tau vafealoaʻi. Na faataatia e Iesu lava ia se faaaʻoaʻoga talafeagai. Mafaufau i lona atamai lelei atoatoa ma le matilatila o ona tomai na iai, lea e na te ono faaaogā e faia ai sona sao lelei i mataupufai faaletagata i ona aso. Peitaʻi, na ia musu e aafia i faiga faapolotiki. I le amataga o lana faiva, na ia matuā teena ai le ofo a Satani e pule i malo uma o le lalolagi. Mulimuli ane, na ia maumauaʻi e ʻalofia le filifilia o ia e aunoa ma le lotomalie i ai i tofiga faalemalo.—Mataio 4:8-10; Ioane 6:14, 15.

7, 8. (a) O le ā e lē o uiga i ai le solitū o loo faaalia e Molimau a Ieova e tusa ai ma faiga faapolotiki ma aiseā? (e) E faapefea e le Roma 13:1, 2 ona taofia ai le auai i gaoioiga sauā faasaga i malo?

⁷ O le tulaga solitū o loo faia e Molimau a Ieova, e lē tatau ona manatu i ai i le uiga faapea o loo latou lagolagoina pe manatu māmā i gaoioiga sauā. Iā i latou, o le faia faapea ua feteenaʻi lea ma lo latou faapea mai o auauna i latou a le “Atua e ona le alofa ma le manuia.” (2 Korinito 13:11) Ua latou aʻoaʻoina lagona o Ieova e tusa ai ma faiga sauā. Na tusi le faisalamo e faapea: “E tofotofo e Ieova i lē ua amiotonu; a ua inosia e lona finagalo lē fai amio leaga, ma lē fiafia i le faasauā.” (Salamo 11:5) Ua latou malamalama foʻi i le mea na fetalai atu ai Iesu i le aposetolo o Peteru e faapea: “Inā toe sulu ia o lau pelu i lona faamoega; auā o i latou uma o ē tago i le pelu, e oti i latou i le pelu.”—Mataio 26:52.

⁸ E ui lava o loo faaalia manino mai i talafaasolopito faapea e masani ona faaaogā e Kerisiano sesē “le pelu,” peitaʻi e lē moni lenā manatu e faatatau i Molimau a Ieova. Ua lē auai i latou i na gaoioiga uma. Ua usiusitai ma le faamaoni Molimau i le faatonuga o loo i le Roma 13:1, 2 e faapea: “Ia usiusitai tagata uma i faipule silisili; [pule faalemalo] auā e leai se pule pe a lē mai le Atua; o pule uma lava o loo fai nei, ua faatūina e le Atua. O lenei, o lē na te tetee i le pule, ua tetee e ia i le sauniga a le Atua; o ē tetee foʻi e sala lava i latou.”

9. O ā auala e lua ua tetee atu ai Molimau a Ieova i faiga faatupu faalavelave?

⁹ Talu ai le matuā leaga o faiga faatupu faalavelave, pe e lē tatau ea la i Molimau a Ieova ona faia se gaoioiga e fesoasoani e tetee atu ai? Ioe e tatau ma o loo latou faia. Muamua lava, e latou te lē auai i so o se gaoioiga faatupu faalavelave. Lona lua, ua latou aʻoaʻoina tagata i mataupu silisili faa-Kerisiano lea pe a latou mulimuli i ai, o le a aveesea ai so o se ituaiga o faiga sauā.  * I le tausaga ua mavae, na faaaluina ai e Molimau itula e 1,202,381,302 e fesoasoani ai i tagata ina ia aʻoaʻoina lenei auala faa-Kerisiano. E lē o alu lē aogā nei taimi, auā o le iʻuga o lenei gaoioiga, e 265,469 tagata na papatisoina ai e avea o ni Molimau a Ieova, ua faaalia ai i le lautele lo latou teena atoatoa o faiga sauā.

10. O ā faamoemoega o le aveesea o faiga sauā i le lalolagi i aso nei?

¹⁰ E le gata i lea, ua iloa e Molimau a Ieova e lē mafai e i latou lava ona aveesea le amioleaga mai le lalolagi. O le māfuaaga lenā ua latou tuu atoatoa atu ai lo latou faatuatua i lē na te mafaia ona faia faapea, o Ieova le Atua. (Salamo 83:18) E ui lava i taumafaiga faamaoni, ae ua lē mafai e tagata ona faamutaina faiga sauā. Ua muaʻi lapataʻia i tatou e le tusitala faagaeeina o le Tusi Paia e faatatau i o tatou taimi, o “aso e gata ai” ma ua  faapea mai: “O tagata amio leaga ma ē taupelopelo, e alualu pea lava lo latou leaga, o loo faasesē atu, ua faasesēina foʻi i latou.” (2 Timoteo 3:1, 13) O le vaai mai la i lenei vaaiga, o le faamoemoe lea e i tagata e manumalo i le taua faasaga i le leaga e foliga mai e lē taulau. Ae i le isi itu, tatou te faamoemoe iā Ieova na te aveesea atoatoa faiga sauā e faavavau.—Salamo 37:1, 2, 9-11; Faataoto 24:19, 20; Isaia 60:18.

Lē Fefefe e ui i le Faaloloʻi Mai o Osofaʻiga

11. O ā laasaga ua uma ona uia e Ieova e aveesea ai faiga sauā?

¹¹ Talu ai o le Atua o le filemu e inoino i faiga sauā, ua tatou malamalama la i le māfuaaga ua ia muaʻi amataina ai laasaga e faaumatia ai lē na māfua ai, o Satani le Tiapolo. O le mea moni, ua uma ona Ia faapogaia Satani e oo i se toʻilalo popo i aao o le agelu sili o Mikaele, o le tupu fou a le Atua ua faanofotupuina o Iesu Keriso. Ua faamatalaina faapenei e le Tusi Paia: “Ua tau foʻi le taua i le lagi; o Mikaele ma ana agelu ua latou tau ma le tarako, ua ʻau foʻi le tarako ma ana agelu e tau ai le taua, a ua latou lē manumalo, e lē toe maua foʻi i le lagi se mea latou te nonofo ai. Ua lafo foʻi le tarako tele, o le gata tuai lea, ua igoa i le tiapolo, i le ma Satani, o lē faasesē i le lalolagi uma; ua lafo ifo i le lalolagi, ua lafo foʻi ana agelu faatasi ma ia.”—Faaaliga 12:7-9.

12, 13. (a) O le ā ua mataʻina ai le tausaga e 1914? (e) O le ā ua valoia e le valoaga a Esekielu mo i latou o ē e lagolagoina le Malo o le Atua?

¹² E ioeina e faasologa o mea na tutupu o loo i le Tusi Paia ma mea na tutupu i le lalolagi, le faasino atu i le tausaga e 1914 o le taimi lea na faia ai lenā taua i le lagi. Talu mai lenā taimi, ua faateleina le leaga o tulaga o mea i le lalolagi. Ua faamatalaina e le Faaaliga 12:12 le māfuaaga e faapea: “O le mea lea ia outou olioli ai, le lagi e atoa ma ē ua nonofo ai! Oi talofa iā te oulua le fanua ma le sami, aua ua alu ifo iā te oulua le tiapolo ua lotoa tele, auā ua na iloa ua saasaa ona pō.”

¹³ E manino la, ua taulaʻi atu le ita o le Tiapolo faasaga i tagata tapuaʻi faauuina a le Atua ma a latou aumea o “isi mamoe.” (Ioane 10:16; Faaaliga 12:17) O lenei teteega ua latalata i lona ooooga, pe a oo ina amata e le Tiapolo se osofaʻiga ogaoga faasaga iā i latou uma, o ē e lagolagoina le Malo ua faavaeina o le Atua, ma ua tuu atu i ai lo latou faatuatua. O lenei osofaʻiga mataʻutia o loo faasino atu e le Esekielu mataupu e 38 o le osofaʻiga a “Koku, o le nuu o Makoku.”

14. O ā taumafaiga mo le puipuiga na olioli ai Molimau a Ieova i aso ua mavae ma pe o le a iai pea lava lenā tulaga?

¹⁴ Talu mai le lafoeseina o Satani mai le lagi, ua puipuia i nisi taimi ia tagata o le Atua mai i osofaʻiga a Satani e ala i taumafaiga a nisi o faalapotopotoga faapolotiki, lea o loo faamatalaina faafaatusa e le Faaaliga 12:15, 16. I sona faaeseesega, ua faaalia mai e le Tusi Paia faapea i le osofaʻiga faaiʻu a Satani, o le a leai se faalapotopotoga faaletagata e puipuia i latou o ē e tuu atu lo latou faatuatua iā Ieova. Po o se māfuaaga ea lea e fefefe pe matataʻu ai Kerisiano? E matuā leai lava!

15, 16. (a) O upu faamautinoa a Ieova i ona tagata i aso o Iosefatu ua faaalia ai le ā le māfuaaga o le i ai o se vaaiga mautinoa o Kerisiano i aso nei? (e) O le ā le faaaʻoaʻoga na saunia e Iosefatu ma tagata mo auauna a le Atua i aso nei?

¹⁵ O le a lagolagoina e le Atua ona tagata e pei  lava ona ia lagolagoina lona nuu i aso o le tupu o Iosefatu. Ua tatou faitau ai e faapea: “O outou Iuta uma, ma ē ua nonofo i Ierusalema, ma oe le tupu o Iosefatu, inā faafogafoga mai ia outou, o loo faapea ona fetalai mai o Ieova iā te outou, Aua neʻi fefefe, aua foʻi neʻi matataʻu outou, ona o lenei vao tagata e toʻatele; auā e lē o lo outou taua lenei, a o lo le Atua. . . . E lē tau outou i lenei taua; tutū ia outou, ma ia outou tumau, ma outou vāai atu i le olataga mai iā Ieova o loo iā te outou; Iuta ma Ierusalema e, aua le fefefe, aua foʻi le matataʻu; ia ō atu taeao iā te i latou; e iā te outou foʻi o Ieova.”—2 Nofoaiga a Tupu 20:15-17.

¹⁶ Na faamautinoa atu i tagata o Iuta o le a lē manaʻomia ona latou tau. E faapena foʻi pe a osofaʻia e Koku o Makoku tagata o le Atua, o le a latou lē faaaogāina mea tau e puipuia ai i latou. Na i lo lea, o le a latou ‘tutū ma vāai i le olataga mai iā Ieova’ mo i latou. O le mea moni, o le tutū e lē faapea e uiga atu i le lē toe gaoioi, auā e oo lava i tagata o le Atua i aso o Iosefatu e lē faapea na matuā lē toe gaoioi lava. Ua tatou faitau ai e faapea: “Ona punou lea o Iosefatu i lalo i le eleele; ua faapaʻū foʻi Iuta uma ma ē ua nonofo i Ierusalema i luma o Ieova, ua ifo atu iā Ieova. . . . Ua ia [Iosefatu] filifili ma le nuu, ona tofia lea e ia o ē pepese iā Ieova, ma ē vivii atu ua iā i latou teuga paia, i lo latou ō atu i luma o ʻau, ma latou fai atu, Ia faamanū atu iā Ieova, auā e faavavau lona alofa.” (2 Nofoaiga a Tupu 20:18-21) Ioe, e oo lava i le fesagaʻi ma osofaʻiga mai fili, na faaauau pea e tagata ona tiotio i le viiaina o Ieova. Ua saunia ai se faaaʻoaʻoga mo Molimau a Ieova e mulimuli ai pe a amata e Koku lana osofaʻiga faasaga iā i latou.

17, 18. (a) O le ā le vaaiga saʻo o loo i Molimau a Ieova i aso nei e tusa ai ma osofaʻiga a Koku? (e) O le ā le faamanatuga e leʻi mamao ona tuuina atu i talavou Kerisiano?

¹⁷ Seʻia oo atu i lenā taimi ma pe a mavae ona amata le osofaʻiga a Koku, o le a faaauau pea ona lagolagoina e Molimau a Ieova le Malo o le Atua. O le a latou maua pea le malosi ma le puipuiga i le aufaatasi atu i le silia i le 94,600 faapotopotoga i le lalolagi aoao. (Isaia 26:20) Maʻeu se taimi e sili ona lelei e vivii atu ai ma le lototele iā Ieova! Ioe, o le soifua ma le iloa ua lalata mai tele le osofaʻiga a Koku e lē faapogaia ai i latou e solomuli ona o le fefefe. Na i lo lea, ua faamalosia ai i latou e faateleina la latou taulaga o viiga i le tele latou te mafai ai.—Salamo 146:2.

¹⁸ O lenei uiga saʻo ua faaalia ma le talafeagai e le faitau afe o talavou i le lalolagi atoa ua auai i  le faiva faataimi atoa. Ina ia faamatilatila le filifilia o lenā ala e sili atu ona lelei o le olaga, na tatalaina ai le sāvali Talavou e, O le a Faapefea Ona Faaaogā o Outou Olaga? i le tauaofiaga itumalo o le 2002. O Kerisiano, o ē matutua ma talavou, ua lotofaafetai mo na faamanatuga talafeagai.—Salamo 119:14, 24, 99, 119, 129, 146.

19, 20. (a) Aiseā ua leai ai se māfuaaga e fefefe pe matataʻu ai Kerisiano? (e) O le ā o le a faia e le isi mataupu o loo sosoo mai?

¹⁹ E ui lava i tulaga o le lalolagi o loo iai, e lē manaʻomia ona fefefe pe matataʻu ai Kerisiano. Ua latou iloa ua toe nei o se aga ona aveesea lea e le Malo o Ieova faiga sauā uma e faavavau. Ua latou mauaina foʻi le faamāfanafanaga i le iloaina faapea o le toetū, o le a toe faafoʻisia ai soifua na leiloloa o le toʻatele ona o faiga sauā. O lea, o le toetū o le a avatu ai i nisi le avanoa e aʻoaʻo ai e uiga iā Ieova, ae o le a mafai ai e isi ona faaauau ona tuuina atu le auaunaga iā te ia.—Galuega 24:15.

²⁰ O le avea ma Kerisiano moni, tatou te talisapaia ai le manaʻoga o le tumau i le solitū faa-Kerisiano ma naunau e faia faapea. Tatou te mananaʻo e taofimau i le faamoemoe matagofie o le ‘tutū ma vaai atu i le olataga mai iā Ieova.’ O le mataupu o loo sosoo mai o le a faamalosia ai lo tatou faatuatua, e ala i le faailoa mai iā i tatou o mea o loo tutupu i le taimi nei lea o loo aumaia atili ai le malamalama i le faataunuuga o valoaga o le Tusi Paia.

[Faamatalaga pito i lalo]

E Mafai Ona E Faamatala?

• Aiseā ua toʻatele ai tagata i aso nei ua lē mautonu?

• Aiseā ua maua ai e Molimau a Ieova se vaaiga mautinoa e uiga i le lumanaʻi?

• O le ā ua uma ona faia e Ieova e faatatau i le māfuaaga o faiga sauā uma?

• Aiseā ua leai ai se māfuaaga tatou te fefefe ai i le osofaʻiga a Koku?

[Fesili mo le Suʻesuʻega]

[Ata i le itulau 13]

Na faataatia e Iesu se faaaʻoaʻoga talafeagai o le solitū faa-Kerisiano

[Ata i le itulau 16]

Faitau afe o talavou Molimau ua olioli e auai i le faiva faataimi atoa

[Faamatalaga i Ata i le itulau 12]

UN PHOTO 186226/M. Grafman