Talaaga o le Soifuaga

E Lē Mafaatusaina le Olioli!

FAAMATALAINA E REGINALD WALLWORK

“E leai se mea i lenei lalolagi e faatusa i ai lo ma olioli i le auaunaga faataimi atoa iā Ieova i le avea o ni misionare!” O lenei faamatalaga tusitusia na ou maua i pepa a laʻu avā i se taimi e leʻi leva talu lona maliu iā Me i le 1994.

A O OU manatunatu i upu a Irene, ua ou manatua ai le 37 tausaga na ma auauna fiafia faatasi ai ma le faamalieina, o ni misionare i Peru. Talu mai lava ona ma faaipoipo iā Tesema 1942, sa ma olioli ai e galulue faatasi o se paga fiafia faa-Kerisiano, ma o se vaega talafeagai lea e amata ai laʻu tala.

Na ola aʻe Irene o se tasi o Molimau a Ieova i Liverpool i Egelani. O se tasi o le fanau teine e toʻatolu, na maliu lona tamā i le taimi o le Taua Muamua a le Lalolagi. Na faaipoipo mulimuli ane lona tinā iā Winton Fraser, ma e tasi la laʻua tama tama, o Sidney. A o leʻi pa le Taua Lona Lua a le Lalolagi, na ō atu ai le aiga i Bangor, i Uelese i Mātū, o i inā na papatisoina ai Irene i le 1939. I le tausaga muamua atu, na papatisoina ai Sidney, o lea na la galulue faatasi ai ma Irene o ni paeonia, po o faievagelia faataimi atoa, i le talafatai i mātū o Uelese, mai Bangor e oo atu i Caernarvon, e aofia ai le motu o Anglesey.

I lenā taimi, sa ou auauna ai o se ovasia taʻimua i le faapotopotoga i Runcorn, e tusa ma le 13 maila [20 kilomita] i saute sasaʻe o Liverpool. Na sau Irene iā te aʻu i se fonotaga matagaluega ma fesili mai i se oganuu e mafai ona ia talaʻi ai, ona o lea o le a la nonofo i Runcorn ma lona uso matua ua faaipoipo, o Vera. Sa manaia lava la ma aufaatasiga ma Irene i le lua vaiaso lea na iai iā i matou, ma sa tele foʻi ina ou asiasi atu mulimuli ane iā te ia i Bangor. Maʻeu loʻu fiafia ina ua oo i le faaiʻuga o le tasi  vaiaso na talia ai e Irene laʻu faamalamalamaga e ma te faaipoipo!

Ina ua ou foʻi atu i le aiga i le Aso Sa, sa faia loa lava aʻu fuafuaga mo la ma faaipoipoga, ae i le Aso Lua, na ou maua ai se feʻau faauaealesi. Ua faapea mai, “E faamalie atu, ona o le a e tigā i lenei feʻau. Ua ou soloia la ta faaipoipoga. Ae o loo avatu se tusi e faamatala atu ai.” Na ou matuā teʻi lava. Po o le ā se mea ua sesē?

Na taunuu mai le tusi a Irene i le aso na sosoo ai. Na ia faailoa mai iā te aʻu, o le a alu o ia i Horsforth, i Yorkshire e paeonia ai ma Hilda Padgett. * Na ia faamatala mai e faapea, i le 12 masina muamua atu, na malie ai o ia e auauna i le mea o loo manaʻomia tele ai le fesoasoani pe afai e talosagaina o ia e faia faapea. Na ia tusi mai: “O lenei mea, sa pei o se tautōga na ou faia iā Ieova, ma o loʻu lagona lenā talu ai na ou faia lenā folafolaga iā Ieova muamua ae ta te leʻi feiloaʻi, ma e tatau ona ou faataunuuina.” E ui sa ou matuā faanoanoa lava, ae sa ou matuā viiviia lona faamaoni ma auina atu se feʻau faauaealesi e tali ai: “Alu. O le a ou faatali mo oe.”

A o iai i Yorkshire, na faasalaina ai Irene i le tolu masina i le falepuipui ona o le lē lagolagoina o taumafaiga o le taua ona e lē ōgatusa ma lona lotofuatiaifo. Ae i le 18 masina mulimuli ane, na ma faaipoipo ai iā Tesema 1942.

Loʻu Olaga a o Oʻu Laʻitiiti

I le 1919, na faatau ai e loʻu tinā se seti o tusi, Studies in the Scriptures. * E ui lava e saʻo le tala a loʻu tamā i lenā taimi, e leʻi faitauina muamua lava e loʻu tinā se tusi, ae na filifili Tinā e suʻesuʻeina ma le faaeteete nei tusi faatasi ma lana Tusi Paia. Sa ia faia faapea ma na papatisoina o ia i le 1920.

Sa faigofie lava loʻu tamā ma na te leʻi taofia loʻu tinā mai le faia o le mea sa ia manaʻo e fai, e aofia ai le aʻoaʻoina o la laʻua fanau e toʻafā, o oʻu tuafāfine e toʻalua o Gwen ma Ivy; o loʻu uso o Alec; ma aʻu, i le ala o le upu moni. Sa faimalaga atu Stanley Rogers ma isi Molimau faamaoni i Liverpool e fofoga atu lauga faale-Tusi Paia i Runcorn, lea e leʻi pine lava ae faavaeina ai se faapotopotoga fou. Sa tupu olaola faaleagaga lo matou aiga faatasi ma le faapotopotoga.

Sa aʻoga Gwen i lesona a le Lotu Egelani ina ia mafai ona avea o ia ma se sui o le lotu, ae na taofia ina ua la suʻesuʻeina faatasi ma tinā le Tusi Paia. Ina ua asiasi mai le faifeʻau a le lotu i le fia iloa pe aiseā ua lē toe alu atu ai o ia i lana aʻoga, na fetaiaʻi o ia ma le anoanoaʻi o fesili e leʻi sauniuni e tali. Sa fesili i ai Gwen e uiga i le Tatalo a le Alii, ma na iʻu ina faamatalaina atu e Gwen i le faifeʻau le uiga! Sa ia faaiʻu atu i le sii mai o le 1 Korinito 10:21, ma faamanino atu e faapea, e lē mafai ona faaauau pea ona ia ‘ʻai i laʻoʻai e lua.’ Ina ua ia tuua lo matou fale, na faapea mai le faifeʻau, o le a ia tatalo mo Gwen ma toe foʻi mai e tali ana fesili, ae e leʻi toe foʻi mai lava. Ina ua uma ona papatisoina o ia, na avea loa Gwen ma faievagelia faataimi atoa.

Sa mataʻiina le manatu mamafa na tuuina atu i tamaiti o la matou faapotopotoga. Ou te manatua le faalogologo atu i se lauga na faia e se toeaina na asiasi mai i la matou faapotopotoga ina ua fitu oʻu tausaga. Mulimuli ane, na sau o ia ma talanoa mai iā te aʻu. Na ou fai atu iā te ia, sa ou faitau i le tala e uiga iā Aperaamo ma lana taumafaiga e ofo atu lona atalii o Isaako e osi ai le taulaga. Na ia faapea mai iā te aʻu: “Alu i le tulimanu le la o le pulelaa ma faamatala mai mea uma iā te aʻu.” Maʻeu loʻu fiafia ina ua ou tū i luga i inā ma fai atu laʻu uluaʻi “lauga lautele”!

Ina ua ou papatiso i le 1931 i le 15 o oʻu tausaga, o le tausaga foʻi lenā na maliu ai loʻu tinā, ma ou tuua ai foʻi le aʻoga, ae faigaluega ma toleni o se faieletise. I le 1936, sa tāina ai i luma o le lautele i laau pese po o fonokalafi ia lauga pupuu faale-Tusi Paia na puʻeina. Sa faalaeiauina i maʻua ma loʻu uso e se tuafafine matua ina ia tōʻaaga i le galuega i le fanua. O lea, na ma ō atu ai ma Alec i Liverpool e faatau mai se uila ma se taavale toso e aveina la ma masini. Sa faapipii i tua o le taavale toso se mea faaleotele leo i luga o se paipa e ono futu (2 mita) le maualuga e mafai ona faapuupuu. Na faapea mai le inisinia iā i maʻua, e na te leʻi faia lava se mea faapea muamua, ae sa aogā lelei! Sa ma galueaʻiina ma le aasa la ma oganuu, ma faafetai i le faalaeiauga  a le tuafafine matua faapea faaeaga ua tuuina mai iā i maʻua.

Taua Lona Lua a le Lalolagi —O se Taimi o Tofotofoga

A o latalata lava ina pa le taua, na ma pisi ai lava ma Stanley Rogers i le faalauiloaina o le lauga lautele faa-Peretania e faapea, “Ia Faafesagaʻia Mea Moni” lea na faia i le maota na taʻua o le Royal Albert i Lonetona iā Setema 11, 1938. Mulimuli ane, na faia foʻi soʻu sao i le tufatufaina atu o tamaʻitusi sa tusia ai lenei lauga, faatasi ma se isi foʻi lauga faa-Peretania e taʻua o le Puleaga Fai Faamalosi po o le Saʻolotoga, lea na lomia i le tausaga na sosoo ai. Na faaalialia e nei tusi uma ia pulega faasausili faatautalatasi a Hitila i Siamani. I le taimi lea, sa lauiloa ai aʻu i Runcorn i laʻu faiva i le lautele ma sa faaaloalogia ai aʻu. O le mea moni, o loʻu iai pea i le muaʻau o le galuega faatiokarate, na ou maua ai se tulaga aogā.

O le kamupani lea na ou faigaluega ai, sa latou faia se konekalate e uaeaina se fale gaosimea fou i le faatausiʻusiʻuga o le taulaga. Ina ua ou iloa o le fale lea o le a gaosia ai mea tau o le taua, sa ou faamanino atu iā i latou e lē mafai ona ou faigaluega ai i lea fale. E ui lava sa lē fiafia oʻu pule, ae sa talanoa atu i ai loʻu fomeni, ma na tuuina mai ai iā te aʻu se isi galuega. Sa ou iloa mulimuli ane e faapea, e iai le tauaiga o loʻu fomeni e Molimau a Ieova.

Sa matuā faalaeiauina aʻu e se tasi na ma faigaluega faatasi e faapea: “Reg, e matou te lē o faatalitalia se isi mea e te faia, talu ai ua tele tausaga o e auai i lenā galuega faale-Tusi Paia.” Ae peitaʻi, sa tatau ona ou mataalia, talu ai e toʻatele tagata matou te faigaluega faatasi sa mananaʻo e faatupu ni faalavelave mo aʻu.

Na talia e le faamasinoga i Liverpool iā Iuni 1940 le lesitalaina o aʻu e avea o se tasi e lē auai i le vaegāʻau ona e lē ōgatusa ma loʻu lotofuatiaifo ae na iai se tuutuuga, ina ia ou tumau pea i laʻu galuega lea e faia i le taimi nei, o le faieletise. O le mea moni, na mafai i lenei mea ona ou faaauau pea i laʻu faiva faa-Kerisiano.

I le Auaunaga Faataimi Atoa

A o latalata ina faaiʻuina le taua, sa ou filifili ai loa e tuua laʻu galuega ae aufaatasi atu ma Irene i le faiva faataimi atoa. I le 1946, na ou fausia ai se taavale toso e 18 futu (5 mita) le umi lea na avea ma o ma fale, ma i le tausaga na sosoo ai, na talosagaina ai i maʻua ma te ō atu i Alveston, o se nuu i Gloucestershire. Mulimuli ane, na ma paeonia ai i le aai anamua o Cirencester ma le aai o Bath. I le 1951, na valaauina ai aʻu e avea ma ovasia femalagaaʻi ou te asiasia faapotopotoga i saute o Uelese, ae e leʻi atoa se lua tausaga mulimuli ane, na ma ō atu ai i le  Aʻoga a le Olomatamata o Kiliata lea e toleni ai misionare.

Sa faia le vasega lona 21 o le aʻoga i South Lansing, i le vaega i luga o Niu Ioka, ma na faauuina ai i maʻua i le 1953 i le fonotaga o le New World Society, lea na faia i le aai o Niu Ioka. Ma te leʻi iloa ma Irene po o fea o le a tofia i ai i maʻua seʻia oo i le aso o le faauuga. Maʻeu lo ma fiafia ina ua ma iloa o lo ma tofiga o Peru. Aiseā? Auā o loo iai le tuagane o Irene e eseese o la tamā, o Sidney Fraser ma lana avā o Margaret. Ua sili atu nei i le tausaga talu ona auauna i laʻua i le ofisa o le lālā i Lima ina ua uma ona faauu mai i le vasega lona 19 o Kiliata!

A o faatali mo o ma pemita, sa ma faaaluina se taimi puupuu e galulue ai i le Peteli i Brooklyn, e leʻi pine ae ma ō atu loa i Lima. O le uluaʻi tofiga o o ma tofiga faamisionare e sefulu, o Callao, o le uafu autū i Peru, e i le itu i sisifo o Lima. E ui lava sa ma aʻoaʻoina ia nisi o upu masani o le gagana Sepania, ae leai se isi o i maʻua ma Irene na mafai ona faia se talanoaga i lea gagana. O le a faapefea ona faia la ma galuega?

Faafitauli ma Aogā o le Talaʻiga

I Kiliata, na faailoa mai ai iā i matou e faapea, e lē aʻoaʻoina e se tinā se gagana i lana pepe. Na i lo o lea, e aʻoaʻo e le pepe mai i le tautala atu a lona tinā. O lea, o le fautuaga na tuuina mai iā i matou: “Ia ō atu loa lava i le galuega talaʻi, ma aʻoaʻo le gagana mai tagata lautele. O le a latou fesoasoani atu iā te oe.” A o ou taumafai e malamalama i lenei gagana fou, seʻi manatu i le lagona na oo iā te aʻu ina ua faatoʻā lua vaiaso talu ona ma taunuu atu, ae tofia loa aʻu e avea ma ovasia taʻimua i le faapotopotoga i Callao! Sa ou alu e vaai Sidney Fraser, ae sa tutusa lana fautuaga ma lea na fai mai i Kiliata, ia miomiō faatasi ma le faapotopotoga ma tagata i lau oganuu. Sa ou maumauaʻi e mulimuli i lenā fautuaga.

I le taeao o se tasi Aso Toonai, na ma feiloaʻi ai ma se alii kamuta i lona fale kamuta. Na ia faapea mai: “O lea e fia faaauau laʻu galuega, ae faamolemole, nofo i lalo ma talanoa mai iā te aʻu.” Sa ou fai atu i ai o le a ou faia le mea lea e fai mai ai, pe a ia faia le mea e tasi lea ou te manaʻo ai: “Faamolemole, ia faasaʻo mai aʻu pe a sesē saʻu tala. Ou te lē ita ai i lenā mea.” Sa ʻata o ia ma ioe mai i laʻu talosaga. Sa faalua i le vaiaso ona ou asiasi i ai, ma ou iloa ai o se auala lelei tele lea ou te faamasani ai i le gagana fou lea e pei lava ona taʻu mai iā te aʻu.

E faapena foʻi se mea na tupu i lo ma tofiga faamisionare lona lua. I le aai o Ica, na ou fetaui ai foʻi i se alii kamuta ma faamatala atu iā te ia le fuafuaga lea na faia i Callao. Sa malie o ia e fesoasoani mai faapena iā te aʻu, o lea, sa faaauau ai pea ona matuā faaleleia laʻu tautala i le gagana Sepania e ui lava na atoa le tolu tausaga faatoʻā ou iloa lelei tautala i le gagana. Sa pisi pea lenei tamāloa, ae sa mafai lava ona faia sa ma suʻesuʻega faale-Tusi Paia e ala i le faitauina o mau, ona faamatala atu lea iā te ia o le uiga. I se tasi vaiaso ina ua ou alu atu e vaai o ia, na fai mai lona pule ua alu o ia i Lima mo se isi galuega fou. I se taimi mulimuli ane ina ua ma ō atu ma Irene i Lima i se tauaofiaga, na ma toe feiloaʻi ai ma lenei tamāloa. Maʻeu loʻu fiafia ina ua ou iloa sa ia faafesootaʻia Molimau i inā ma toe faaauau lana suʻesuʻega, ma o lea ua avea uma o ia ma lona aiga o ni auauna tuuina atu a Ieova!

I se tasi faapotopotoga, na ma iloa ai se ulugalii talavou e leʻi faaipoipo, ae ua papatiso i laʻua. A o matou talanoaina ma i laʻua se mataupu silisili faale-Tusi Paia o loo aafia ai, sa la filifili loa e faatulafonoina la laʻua faatasiga, lea o le a mafai ai ona avea i laʻua o ni Molimau papatisoina. O lea, na ou fuafuaina ai e ave i laʻua i le fale o le malo i le taulaga ina ia lesitalaina la la faaipoipoga. Ae na iai se faafitauli, talu ai e toʻafā la laʻua fanau ae leʻi lesitalaina foʻi tamaiti, ma o se mea lenei e manaʻomia e tusa ai ma le tulafono. Sa matou taumānatu po o le ā se gaoioiga o le a faia e le pulenuu. Na faapea mai o ia: “Talu ai o a oulua uō Molimau a Ieova o ni tagata lelei, ma ua latou fuafuaina ina ia lua faaipoipo e tusa ma le tulafono, o lea o le a ou lē tuuina atu ai se poloaʻiga faafaamasinoga e pei ona tatau ona faia mo tamaiti taʻitoʻatasi, ae o le a tusia tamaiti, ua uma ona lesitalaina ma e faia e aunoa ma se totogi.” Maʻeu lo ma lotofaafetai talu ai, o se aiga matitiva lenei ma o le tuuina mai o se sala tupe, semanū e avea ma avega mamafa mo i latou!

Ina ua asiasi mai mulimuli ane Albert D. Schroeder mai le ofisa ulu o Molimau a Ieova i Brooklyn iā i matou, na ia fautuaina e faapea e faatuina i se isi vaega o Lima se fale fou mo misionare. O lea na matou siitia atu loa i le itumalo o San Borja, o i maʻua ma Irene faatasi ma isi tuafāfine e toʻalua mai le Iunaite Setete, o Frances ma Elizabeth Good,  ma se ulugalii mai Kanata. I le lua po o le tolu tausaga, na toe faamanuiaina ai foʻi i matou i se isi faapotopotoga olaola.

A o auauna ai i luga o fanua laugatasi maualuluga e sili atu ma le 10,000 futu [3,000 mita] i Huancayo, sa matou auaufaatasi ai ma le faapotopotoga o Molimau e toʻa 80. Sa faia ai foʻi soʻu sao i inā i le fausiaina o le Maota o le Malo lona lua i le atunuu. Sa tofia aʻu e avea ma sui faaletulafono a Molimau a Ieova, talu ai sa tatau ona matou ō atu faatolu i le faamasinoga, ina ia matou mauaina ai aiā faaletulafono i le fanua lea na matou faatauina. O na gaoioiga faatasi ma le galuega tele o le faia o soo lea na faia e le toʻatele o misionare faamaoni i na tausaga, ua faataatia ai se faavae lelei mo le faatelega sili ua matou vaaia nei i Peru, e mai le 283 Molimau i le 1953 i le sili atu i le 83,000 i aso nei.

Se Faamavaega Faanoanoa

Sa ma olioli i se aufaatasiga manaia ma uso misionare i o matou aiga uma o misionare, o i inā sa ou maua ai se faaeaga e avea o se ovasia o le fale. I taeao o Aso Gafua uma lava, e matou te faapotopoto faatasi ai e talanoaina a matou galuega mo le vaiaso o i luma, ma tofia tiute i le tausia o lo matou aiga. Ua matou iloa uma lava le galuega autū, o le talaʻiga, ma i lea itu, sa galulue felagolagomaʻi faatasi ai tagata uma. Ou te fiafia lava e manatua e faapea, e leʻi iai lava ni a matou feeseeseaʻiga tetele i se tasi o na aiga o misionare.

O lo ma tofiga mulimuli, o Breña, o se isi foʻi pitonuu o Lima. Na vave lava ona tupu aʻe se faapotopotoga manaia mai le toʻa 70 Molimau i le sili atu i le 100, ae ua faavaeina foʻi le isi faapotopotoga i Palominia. O le taimi lea, na maʻi ai Irene. O le mea muamua na ou mātauina i nisi taimi, sa lē mafai ona ia manatuaina ana tala na fai mai, ma sa lē mafai foʻi i nisi taimi ona ia manatua le auala e sau ai i le fale. E ui lava sa lelei ona vaaia e fomaʻi, ae sa faasolosolo mālie lava ona lē lelei lona tulaga.

E faanoanoa ai ona i le 1990, na ou faia ai se fuafuaga e ma te toe foʻi atu i Egelani, o i inā na talia fiafia ai i maʻua e si oʻu tuafafine o Ivy i lona fale. I le fā tausaga mulimuli ane ina ua 81 tausaga o Irene, na maliu ai o ia. O loo ou faaauau pea i le faiva faataimi atoa, o loo auauna o se toeaina i se tasi o faapotopotoga e tolu i loʻu nuu. I nisi taimi, ou te malaga ai foʻi i Manchester e faamalosiau i le vaega e tautala i le gagana Sepania i inā.

Talu ai nei lava, na oo ai iā te aʻu se mea faamāfanafana loto na tupu talu mai le tele o tausaga ua mavae, pe a ou tāina i laʻu fonokalafi se lauga puupuu e lima minute i se tagata e ona le fale. Ou te manatua lelei ai lava se teineitiiti aʻoga sa tū i tua o lona tinā i le faitotoʻa o le fale, ma faalogologo i le feʻau.

Na malaga mulimuli atu lenei teineitiiti i Kanata, ma sa fetusiaʻi pea o ia ma sana uō lea o loo nofo pea i Runcorn lea ua avea nei ma Molimau. Na tusi mai talu ai nei le teine ma faapea mai, sa asiasi atu ni Molimau se toʻalua iā te ia ma faaaogā ia faaupuga ia na teʻi ai lava ua ia toe manatuaina mea na faalogo ai i lenā lauga e lima minute na tāina. I le iloaina o le upu moni lea, ua avea nei o ia ma auauna tuuina atu a Ieova, ma talosaga mai ina ia momoli mai lana faafetai i le tama talavou lea na asiasi atu i le fale o lona tinā, i le sili atu ma le 60 tausaga ua mavae! E moni, e tatou te lē iloa lava le auala e maua ai le fatu o le upu moni ma tupu aʻe ai.—Failauga 11:6.

Ioe, ua ou toe tepa i tua ma loʻu matuā lotofaafetai i le taimi o loʻu olaga lea na faaalu i le auaunaga tāua a Ieova. Talu mai lava loʻu tuuina atu i le 1931, ou te leʻi misia lava se fonotaga a tagata o Ieova. E ui e leai sa ma fanau ma Irene, ae ua ou fiafia e mauaina ni atalii ma ni afafine faaleagaga e sili atu i le 150, o loo auauna uma i latou iā Ieova lo tatou Tamā faalelagi. E pei lava ona taʻua ai e si aʻu avā pele, e leai se mea e faatusaina i ai lo ma olioli i o ma faaeaga.

[Faamatalaga pito i lalo]

[Ata i le itulau 24]

O tinā i vaitausaga e amata mai le 1900

[Ata i le itulau 25]

Luga: I maʻua ma Irene i luma o le taavale toso na avea ma o ma fale

[Ata i le itulau 25]

Agavale: O Hilda Padgett, o aʻu, Irene ma Joyce Rowley i Leeds i Egelani, i le 1940

[Ata i le itulau 27]

Faalauiloaina o se lauga lautele i Cardiff i Uelese i le 1952