‘E Le‘i Ofu Solomona e Pei o se Tasi o na Mea’
‘E Leʻi Ofu Solomona e Pei o se Tasi o na Mea’
O FUGĀLAAU e ola solo e pei ona e tagaʻi atu iai i inei, e masani ona vaaia i tafatafāala o Aferika i saute. Ua faaigoaina o cosmos ma e ola i atunuu vevela o Amerika. O na fugālaau matagofie e tatou te manatua ai se lesona na aʻoaʻoina e Iesu. O le toʻatele o tagata o lana ʻaufaalogologo e matitiva, ma sa popole i o latou manaʻoga faaletino, a latou mea taumafa ma lavalava.
Na fesili atu Iesu: “Se ā foʻi le mea tou te popole ai i ofu? Ia outou mafaufau i lautalotalo o le vao, pe faapefea ona tupu; latou te lē galulue, latou te lē milo foʻi; a ou te fai atu iā te outou, o Solomona ma lona matagofie tele na lē ofu o ia pei o le tasi o na mea.”—Mataio 6:28, 29.
E tele lava manatu ua faaalia e uiga i ituaiga faapitoa o fugālaau e ola solo sa i le finagalo o Iesu. Ae peitaʻi, sa faatusatusa e Iesu i fugālaau masani o le fanua, i le faapea atu: “Afai e faapea ona faaofuina e le Atua le vao o le fanua, o ola mai i le asō, a e lafoina a taeao i le ogaumu; e lē sili ea ona faaofuina o outou ē faatuatua itiiti?”—Mataio 6:30.
E ui o le cosmos e lē o ni fugālaau masani i Isaraelu, ae ua mautinoa le faamaonia ai o le lesona na aʻoaʻo e Iesu. Pe vaai mamao pe latalata foʻi i ai, e matuā uiga ese lava lo latou matagofie ma e fiafia tele i ai le ʻaupuʻeata ma le ʻautusiata. O le mea moni, e leʻi faia e Iesu se talausui ina ua ia fetalai mai e faapea, “o Solomona ma lona matagofie tele na lē ofu o ia pei o le tasi o na mea.”
O le ā se lesona mo i tatou i aso nei? E faamautinoa mai ai iā i latou o loo auauna i le Atua e faapea, o le a ia fesoasoani iā te i latou ina ia maua mea e manaʻomia e oo lava i taimi faigatā. Na faamatala e Iesu e faapea: “Ia outou saʻili pea [le] malo [o le Atua], ona faaopoopoina ai lea o ia mea [e pei o meaʻai e manaʻomia ma lavalava] iā te outou.” (Luka 12:31) Ioe, e maua aogā moni pe a saʻili le Malo o le Atua. Ae pe e te silafia o le ā le Malo o le Atua ma o le ā o le a ia faia mo tagata? O le a fiafia Molimau a Ieova e fesoasoani atu iā te oe i le saʻilia o tali mai le Tusi Paia.