Fesili Mai le ʻAufaitau

Pe sesē le faamutaina o le ola o se fagafao ua matuā matua lava ma maʻi?

O le toʻatele o tagata e alolofa ma fiafia i meaola. Ua avea nisi manu lalata ma ni fagafao o ni uō lelei. Mo se faaaʻoaʻoga, ua lauiloa taʻifau i le matuā usiusitai ma alolofa i o latou matai. O lea, e faigofie ona malamalama i le fiafia tele o tagata i na fagafao, aemaise lava pe afai e tele ni tausaga na latou tausia ai.

Ae peitaʻi, e lē umi tele ola o le tele o fagafao. O taʻifau atonu e ola mo le 10 i le 15 tausaga pe sili atu foʻi, e faapena foʻi pusi, e faalagolago lava i le ituaiga. Pe a oo ina matutua, e ono maua ai fagafao i ni faamaʻi ma avea ai ma mafatiaga i o latou matai o ē o loo manatua pea le taimi na laiti ai ma sili atu ona tiotio. Po o se mea sesē la le taofia o mafatiaga o nei manu e ala i le faamutaina o o latou ola?

O le a manaʻo se Kerisiano e gaoioi e ōgatusa ma le finagalo o le Atua i le feagai ai ma manu. O le faasauā i manu o le mea moni, e faasagatau i le finagalo o le Atua, auā ua faapea mai lana Afioga: “Ua faapelepele le tagata amiotonu i lana manu.” (Faataoto 12:10) Ae peitaʻi, e lē o le uiga o lenei mea e faapea, ua tutusa ai le silasila a le Atua i manu e pei ona ia silasila ai i tagata. Ina ua foafoaina e le Atua tagata, sa ia faaalia e iai se eseesega manino i le va o i latou ma manu. Mo se faaaʻoaʻoga, sa ia tuuina atu i tagata le faamoemoe o le ola e faavavau, ae lē faapena manu. (Roma 6:23; 2 Peteru 2:12) Ona o Lē na Foafoaina Mea, e iā te ia le pule e fuafuaina ai se faiā talafeagai i le va o tagata ma manu.

Ua faailoa mai e le Kenese 1:28 iā i tatou po o le ā lenā faiā. Na fetalai le Atua i le uluaʻi tagata: “Ia pule i iʻa i le sami, ma manu felelei, atoa ma mea ola uma e fetolofi i le eleele.” E faapena foʻi le Salamo 8:6-8: “Ua e [le Atua] tuuina mea uma i lalo o ona [le tagata] vae; o lafu mamoe ma povi uma lava, atoa ma manu vaefa o le vao; o manu felelei, ma iʻa o le sami.”

Sa faamanino mai e le Atua e faapea, e mafai ona faaaogā tatau manu ma fasimatea e le tagata. O se faataʻitaʻiga, e mafai ona faaaogā o latou paʻu e fai ai ofu. Ina ua mavae le Lolo, sa faatagaina foʻi e le Atua tagata ina ia aai i aano o manu, e faaopoopo i laau ʻaina ia na tuuina atu iā i latou i le amataga.—Kenese 3:21; 4:4; 9:3.

E lē faatagaina ai i lenei mea le fasimatea o manu e aunoa ma se māfuaaga tatau ona o ni taaloga. I le Kenese 10:9, ua faamatalaina ai e le Tusi Paia Nimarota o “lē malosi i tuli manu.” Ae ua faapea mai foʻi le fuaiupu lava lenā, o “lē tetee atu ai iā Ieova” (NW).

O lea, a o tuuina atu i le tagata le pule i manu, e lē tatau ona ia faaaogāina sesē lenā pule, ae ia ōgatusa ma mataupu silisili o le Afioga a le Atua. E aofia ai i lenei mea le aua neʻi tuuina se fagafao e mafatia ona ua matuā matua tele, manuʻa leaga, po ua maʻi tigāina. I se tulaga faapea, o le tiute tauave o se Kerisiano le filifili o le mea e tatau ona fai. Afai ua na iloa o le faiga alofa le aua le tuuina o le meaola e mafatia e aunoa ma se faamoemoe e mafai ona toe malosi, e tatau la ona ia filifili e faamuta le ola o le fagafao.