Ia Tutū ma Vaai Atu i le Olataga Mai iā Ieova!
Ia Tutū ma Vaai Atu i le Olataga Mai iā Ieova!
“Tutū ia outou, ma ia outou tumau, ma outou vaai atu i le olataga mai iā Ieova o loo iā te outou.”—2 NOFOAIGA A TUPU 20:17.
1, 2. Aiseā e sili atu ai aafiaga leaga o le osofaʻiga a “Koku, o le nuu o Makoku” lea ua lata mai, na i lo le faamataʻu o faiga faatupu faalavelave i le lalolagi atoa?
UA FAAMATALAINA faiga faatupu faalavelave e nisi o se osofaʻiga i le lalolagi atoa, ma tagata uma o loo nonofo ai. E manino la, o na faamataʻuga e tatau ona tagaʻi totoʻa atu i ai. I le isi itu, e iai se isi osofaʻiga o le a sili atu ni ona aafiaga leaga o le a iai, lea e lē o manatu mamafa iai tagata o le lalolagi. O le ā lenā osofaʻiga?
2 O le osofaʻiga a “Koku, o le nuu o Makoku,” lea o loo tautala i ai le Tusi Paia i le Esekielu mataupu e 38. Pe lē o se tala ea ua soona faatelē le faapea mai o le a sili atu ni aafiaga leaga o lenei osofaʻiga na i lo faamataʻuga o faiga faatupu faalavelave i le lalolagi atoa? E matuā leai lava, talu ai, o osofaʻiga a Koku e sili atu na i lo le osofaʻia o malo faaletagata. O loo tau faasaga i le malo faalelagi a le Atua! Ae peitaʻi, e lē pei o tagata, o ē atonu e tapulaa lo latou taulau manuia i le faafetaiaʻia o osofaʻiga i a latou lava taumafaiga, ae o Lē na Foafoaina Mea ua agavaa atoatoa o ia i le taulimaina o osofaʻiga e sili ona mataʻutia a Koku.
Se Osofaʻiga i le Malo o le Atua
3. O le ā na valaauliaina ai pule o le lalolagi e fai talu mai le 1914, ma ua faapefea ona latou tali mai?
3 O le feteenaʻiga i le va o le tupu o loo pule nei a le Atua ma le faiga amioleaga o mea a Satani, o loo faaauau pea talu mai ona faavaeina le Malo o le Atua i le lagi i le 1914. I lenā taimi, na faailoa atu ai i pule faaletagata ina ia gauaʻi i le Pule ua filifilia a le Atua. Peitaʻi na latou mumusu e faia faapea, e pei ona valoia mai: “Ua tutū mai tupu o le lalolagi, ua pulega faatasi foʻi alii, e tetee atu iā Ieova ma lē na ia faauuina, ‘Seʻi tatou motusi ese a laʻua noataga, ma lafoaʻieseina a laʻua maea iā te i tatou.’” (Salamo 2:1-3) O le tetee i le pule o le Malo o le a manino mai le oo atu i lona ooooga i le taimi o le osofaʻiga a Koku o Makoku.
4, 5. E faapefea ona tau tagata faasaga i le malo lē vaaia faalelagi o le Atua?
4 Atonu tatou te tōmanatu pe faapefea e tagata ona tau faasaga i se malo lē vaaia faalelagi. Ua faaalia e le Tusi Paia, o lenei malo, o loo faia aʻe i le “selau afe ma afe e fā sefulu ma le fā o afe o ē ua faatauina nai le lalolagi,” faatasi ma “le Tamaʻi mamoe,” o Iesu Keriso. (Faaaliga 14:1, 3; Ioane 1:29) Talu ai o le malo fou e i le lagi, o loo tautala ai la iā i latou o le “lagi fou,” a o ona tagatānuu faalelalolagi ua talafeagai ona taʻua o “le lalolagi fou.” (Isaia 65:17; 2 Peteru 3:13) O le toʻatele o le 144,000 o ē pule faatasi ma Keriso ua iʻu o latou olaga faamaoni i le lalolagi. Ua faamaonia lo latou agavaa e faatino lo latou tofiga fou o le auaunaga i le lagi.
5 Ae peitaʻi, e toʻaitiiti le vaega totoe o le 144,000 o loo iai pea i le lalolagi. E sili atu i le 15,000,000 ē na auai i le faamanatuga o le Talisuaga Afiafi a le Alii i le 2002, ae na o le 8,760 ē na faaalia lo latou faamoemoe o le filifilia o i latou mo le tofiga faalelagi. O so o se tasi lava na te osofaʻia suli o loo totoe o le a avea ma sui o le Malo, ua mautinoa ua ia matuā faasagatau i le Malo o le Atua.—Faaaliga 12:17.
O le a Manumalo Pea le Tupu
6. E faapefea ona silasila Ieova ma Keriso i teteega o loo taulaʻi atu i tagata o le Atua?
6 Na valoia le tali atu a Ieova i teteega i lona Malo ua faavaeina e faapea: “E soisoi lē o afio i le lagi; e tauemu le Alii iā te i latou. Ona fetalai atu ai lea o ia iā te i latou i lona toʻasa, na te faaatuatuvaleina foʻi i latou i lona toʻasa tele. A o aʻu, ua ou faauuina laʻu Tupu i luga o Siona loʻu mauga paia.” (Salamo 2:4-6) Ua oo mai le taimi mo Keriso, i lalo o le taʻitaʻiga a Ieova, ‘e manumalo ai pea o ia.’ (Faaaliga 6:2) Ua faapefea ona silasila Ieova i teteega e taulaʻi atu i ona tagata i le taimi o le manumalo mulimuli? Ua silasila Ieova e pei ua taulaʻi atu faasaga iā te ia ma lana Tupu o loo pule. Ua fetalai mai Ieova e faapea: “O lē paʻi atu iā te outou, ua pāʻia e ia le tamatamaʻi mata o lona fofoga.” (Sakaria 2:8) Na matuā faamamafa mai e Iesu e faapea o le mea e sili ona tāua iā te ia o mea o loo faia pe lē faia foʻi e tagata i ona uso faauuina e pei lava o loo latou faia pe lē faia foʻi iā te ia.—Mataio 25:40, 45.
7. O ā mafuaaga e pei ona faamatalaina i le Faaaliga 7:9 o le a lagonaina ai e i latou o le “motu o tagata e toʻatele” le maʻemaʻeā o Koku?
7 O le mea moni, o i latou o ē lagolagoina le vaega totoe faauuina o le a lagonaina le maʻemaʻeā o Koku. O nei tagatānuu o le a iai o le “lalolagi fou” a le Atua o “le motu o tagata e toʻatele” e “mai atu nuu uma, ma aiga, ma nuu ma gagana eseese.” (Faaaliga 7:9) O loo tautala iā i latou faapea o loo ‘tutū i luma o le nofoālii ma luma o le Tamaʻi Mamoe, ua oofu i ofu sisina.’ Ua latou iai i se tulaga faamaonia i luma o le Atua ma Iesu Keriso. O loo uu “lau pama i o latou lima” ma vivii iā Ieova le Pule Silisili Ese o le vateatea aoao, o lana pulega ua faataunuuina e ala i le nofoaiga a lana Tupu ua faanofotupuina, o Iesu Keriso, “le Tamaʻi mamoe a le Atua.”—Ioane 1:29, 36.
8. O le osofaʻiga a Koku o le a faapogaia ai Keriso e faia le ā, faatasi ai ma ā iʻuga?
8 O le osofaʻiga a Koku, o le a faapogaia ai le Tupu ua faanofotupuina a le Atua e gaoioi ma tau ai loa le taua iā Amaketo. (Faaaliga 16:14, 16) O i latou o ē mumusu e iloa le silisili ese o Ieova o le a faaumatia. Ae i le isi itu, o i latou o ē na onosaia puapuaga ona o lo latou faamaoni i le Malo o le Atua, o le a maua le mapusaga e faavavau. E tusa ai ma lenei mea, na tusi le aposetolo o Paulo e faapea: “O le faailoga lea o le faamasinoga tonu a le Atua, ina ia taʻuaogāina outou i le malo o le Atua, o le mea lea e tigāina ai outou. Auā ua tonu i le Atua e taui atu le puapuaga i ē ua faapuapuagaina ai outou; e iā te outou foʻi o ē puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mūmū, na te taui ma sui i ē ua lē iloa le Atua, ma ua lē anaana i le tala lelei a lo tatou Alii o Iesu.”—2 Tesalonia 1:5-8.
9, 10. (a) Na faapefea ona avatu e Ieova le manumalo iā Iuta i ona fili mataʻutia? (e) O le ā e tatau ona faaauau ona faia e Kerisiano i aso nei?
9 I le taimi o le puapuaga tele o loo fotuaʻi mai, lea o le a taualuga iā Amaketo o le a tau ai Keriso faasaga i mea leaga uma. Peitaʻi e leai se māfuaaga o le a tau ai ona soo, e pei lava ona leʻi manaʻomia lenei mea mo i latou na aināina ituaiga e lua o le malo o Iuta i le faitau afe o tausaga ua mavae. O Ieova e ana le taua ma o ia e na te avatua le manumalo. E faitauina faapea le tala: “Ona tuu atu lea e Ieova o ʻau ua tanu e tau ma le fanauga a Amoni, ma Moapi, ma le mauga o Seira, na ō mai e tau ma Iuta; ua fasia i latou. Aua na tulaʻi le fanauga a Amoni ma Moapi e tau ma ē nonofo i le mauga o Seira, e matuā fasioti ma faaumatia ai i latou; ua uma ona latou fasia o ē nonofo i Seira, ona fefasiaʻi ai lea o i latou. Ua oo atu Iuta i le ʻolo e leoleo ai ua i le vao, ona latou vaavaai atu ai lea i le vao tagata, faauta, o i latou o tagata oti, ua taatitia i latou i le eleele, ua leai sē sao.”—2 Nofoaiga a Tupu 20:22-24.
10 Na taunuu e tusa ma le mea na valoia e Ieova e faapea: “E lē tau outou i lenei taua.” (2 Nofoaiga a Tupu 20:17) Ua faataatia ai se faaaʻoaʻoga mo Kerisiano e mulimuli ai pe a gaoioi Iesu Keriso ina ia ‘manumalo pea o ia.’ Ae i le taimi nei, o loo faaauau ona latou tau faasaga i mea leaga, e lē faaaogāina ai ni auupega faaletino, ae o meatau faaleagaga. O lea la, latou te “faatoʻilaloina le leaga i le lelei.”—Roma 6:13; 12:17-21; 13:12; 2 Korinito 10:3-5.
O Ai o le a Taʻitaʻia le Osofaʻiga a Koku?
11. (a) O ā faalapotopotoga o le a faaaogā e Koku e faataunuuina ai lana osofaʻiga? (e) O le ā e aofia ai i le mataala faaleagaga?
11 O Koku o Makoku ua faailoa mai o Satani le Tiapolo i lona tulaga paʻū maulalo talu mai le 1914. Ona o ia o se foafoaga agaga, e lē mafai ai la ona ia faia lana osofaʻiga tuusaʻo, peitaʻi o le a ia faaaogā faalapotopotoga faaletagata e faataunuu ai ana gaoioiga. O ai la nei faalapotopotoga faaletagata? E lē o aumaia iā i tatou e le Tusi Paia faamatalaga auiliili uma, peitaʻi, ua taʻu mai iā i tatou nisi o faailoaga e fesoasoani iā i tatou e iloa ai po o ai i latou. A o faaalia i mea tutupu i le lalolagi faataunuuga o valoaga o le Tusi Paia, o le a faasolosolo ai ona manino mai iā i tatou. E ʻalofia e tagata o Ieova le taumatemate peitaʻi latou te tumau i le mataala faaleagaga, ma latou te iloa lelei mea o loo tutupu i faiga faapolotiki ma faiga tau tapuaʻiga lea ua fetaui lelei i le faataunuuga o valoaga o le Tusi Paia.
12, 13. Na faapefea ona valoia e le perofeta o Tanielu le osofaʻiga mulimuli i tagata o le Atua?
12 Ua faailoa mai e le perofeta o Tanielu nisi faamatalaga atili e faatatau i le osofaʻiga mulimuli faasaga i tagata o le Atua e faapea: “Ona alu atu ai lea o ia [le tupu o le itu i mātū] ma le ita tele ia faaumatia ma fasiotia tagata e toʻatele. Na te faatuina fale ie o lona maota i le va o sami, i le mauga matagofie ma le paia.”—Tanielu 11:44, 45.
13 I taimi o le Tusi Paia “o sami”, o le Sami Tele lea, po o le Metitirani, a o ‘le mauga paia’ o Siona, lea pei ona fetalai ai Ieova e faapea: “A o aʻu, ua ou faauuina laʻu Tupu i luga o Siona loʻu mauga paia.” (Salamo 2:6; Iosua 1:4) O lea, i se uiga faaleagaga, o le nuu ‘i le va o le sami ma le mauga paia’ e faaataina ai le nofoaga o gaoioiga olaola faaleagaga a Kerisiano faauuina. Ua lē o toe faailoa mai i latou faatasi ma le sami o tagata ua vavaeese mai i le Atua, ae ua latou tepa taulaʻi atu e pule faatasi ma Iesu Keriso i le Malo faalelagi. E manino mai, o auauna faauuina a le Atua, ma a latou aumea faamaoni o le motu o tagata e toʻatele, o le a avea ma taulaʻiga a le tupu o le itu i mātū pe a amata lana osofaʻiga mataʻutia i le faataunuuga o le valoaga a Tanielu.—Isaia 57:20; Eperu 12:22; Faaaliga 14:1.
O le a Faapefea Ona Gaoioi Auauna a le Atua?
14. O ā mea e tolu o le a faia e tagata o le Atua pe a osofaʻia i latou?
14 O le ā e faatalitalia auauna a le Atua e fai pe a osofaʻia i latou? O le gaoioiga a le nuu o le Atua i aso o Iosefatu ua faataatia ai se faaaʻoaʻoga. Mātau, o nei tagatānuu na faatonuina ia faia nei mea e tolu: (1) ia latou tutū, (2) ia tumau ma (3) vaai atu i le olataga mai iā Ieova. O le a faapefea e tagata o le Atua i aso nei ona gaoioi e ōgatusa ma nei upu?—2 Nofoaiga a Tupu 20:17.
15. O le ā e uiga i ai mo tagata o Ieova faapea ia latou tutū?
15 Ia latou tutū: E aunoa ma le maluelue, o le a faaauau ai pea e tagata o le Atua ona tumau i lo latou tulaga o le lagolagoina ma le tiotio o le Malo o le Atua. O le a faaauau ona tumau lo latou tulaga o le solitū faa-Kerisiano. O le a latou “tumau, ma le lē faagaeetia” i la latou auaunaga faamaoni iā Ieova ma o le a faaauau ona viia Ieova ona o lona alofa agalelei. (1 Korinito 15:58; Salamo 118:28, 29) O le a lē mafai e omiga i le taimi nei ma omiga i le lumanaʻi ona latou lafoaʻia ai lenei tulaga faamaonia e le Atua.
16. O le ā le auala o le a tumau ai auauna a Ieova?
16 Ia tumau: O le a lē taumafai auauna a Ieova e faasaoina i latou peitaʻi, o le a tuu atu lo latou faatuatuaga atoa iā Ieova. Ua na o ia e mafai ona faasaoina ana auauna mai tulaga fenuminumiaʻi o le lalolagi o loo iai, ma ua ia folafola mai o le a ia faia faapea. (Isaia 43:10, 11; 54:15; Auega 3:26) O le faatuatua iā Ieova o le a aofia ai le faatuatua i lana auala vaaia faaonapōnei, lea na ia faaaogāina mo le silia i le selau o tausaga, e faataunuuina ai ana fuafuaga. E leʻi faapea muamua, ona manaʻomia e Kerisiano moni ona tuu lo latou faatuatuaga i o latou uso tapuaʻi ua tofia e Ieova ma lana Tupu o loo pule ina ia taʻimua. O nei tane faatuatua o le a taʻitaʻia tagata o le Atua. O le lē amanaia o la latou taʻitaʻiga e mafai ona iʻu ai i mala.—Mataio 24:45-47; Eperu 13:7, 17.
17. Aiseā o le a vaai ai auauna faamaoni a le Atua i le olataga mai iā Ieova?
17 Vaai atu i le olataga mai iā Ieova: O le olataga o le taui lea mo i latou uma o ē tumau i lo latou tulaga faamaoni faa-Kerisiano ma faatuatua iā Ieova mo le faaolataga. Seʻia oo i le toe taimi, ma le tele e mafai ona oo i ai, ona latou faailoa mai loa lea o le oo mai o le aso o le faamasinoga a Ieova. E tatau i foafoaga uma ona iloa o Ieova o le Atua moni ma o loo iai ana auauna faamaoni i luga o le lalolagi. O le a lē toe faapea ona iai ni feteenaʻiga mo se taimi umi e uiga i le tonu aʻiaʻi o le pule silisili ese a Ieova.—Esekielu 33:33; 36:23.
18, 19. (a) E faapefea i le pese o le manumalo o loo i le Esoto mataupu e 15 ona atagia mai ai faalogona o i latou o le a faasaoina mai i le osofaʻiga a Koku? (e) O le ā ua talafeagai mo tagata o le Atua ona faia nei loa?
18 O le iai o se malosi faafouina, o le a ulu atu ai tagata o le Atua i le lalolagi fou, ua naunau e usuina le pese o le manumalo, e pei ona sa faia e Isaraelu anamua ina ua mavae le faasaoina o i latou mai le Sami Ulaula. Ia matuā faafetai iā Ieova mo lana puipuiga, e lē gata i tagata taʻitoʻatasi ae faapea foʻi o se vaega, o le a latou faaleo atu upu na tusia i aso ua mavae e faapea: “Ou te pese iā Ieova, auā ua matuā manumalo o ia. . . . O Ieova, o le toa lava ia, o Ieova o lona suafa lea. . . . Ieova e, o lou aao taumatau ua nutipalaina ai lē ua ita mai. O le tele o lou malosi ua e lepetia ai ē na tulaʻi mai iā te oe; ua e tuuina atu lou toʻasa, ua ʻaina ai i latou pei o le tagutugutu o saito. . . . O lou alofa ua e taʻitaʻiina mai ai lenei nuu, ua e togiolaina ai lava; o lou malosi ua e taʻitaʻiina ai i latou i lou afioaga paia. . . . E te faaoo atu, ma e totōina i latou i le mauga o lou tofi, Ieova e, o le mea ua e saunia, e te afio ai; o le mea paia, le Alii e, ua e faatumauina i ou aao. E fai Ieova ma tupu e faavavau faavavau lava.”—Esoto 15:1-19.
19 I le taimi nei a o faasolo ina manino atili mai le faamoemoe i le ola e faavavau, o le taimi tonu lenei mo auauna a le Atua e faaalia ai lo latou tuutoina iā Ieova ma toe faafouina lo latou naunautaʻi e auauna iā te ia o lo latou Tupu e faavavau!—1 Nofoaiga a Tupu 29:11-13.
E Mafai Ona E Faamatala?
• Aiseā o le a taulaʻi atu ai osofaʻiga a Koku i le vaega faauuina ma isi mamoe?
• O le a faapefea ona tutū tagata o le Atua?
• O le ā e uiga i ai le tumau?
• O le a faapefea ona vaai tagata o le Atua i le olataga mai iā Ieova?
[Fesili mo le Suʻesuʻega]
[Ata i le itulau 18]
Na foaʻi e Ieova iā Iosefatu ma ona tagata le manumalo, lea sa lē manaʻomia ai e i latou ona tau
[Ata i le itulau 20]
O le vaega faauuina ma isi mamoe o loo faia se sao i le sapasapaia o le pule silisili ese a Ieova
[Ata i le itulau 22]
I le pei o Isaraelu anamua, ua toe o se aga ona pese lea e tagata o le Atua le pese o le manumalo