O le ā ua Tupu i le Foaʻi Atu?

INA ua uma osofaʻiga i le aai o Niu Ioka ma Washington, D.C. iā Setema 11, 2001, na matuā mataʻina ai le lagolagosua a tagata lautele i tagata na lavevea fua i le faalavelave. Sa maofa ia faalapotopotoga na aoina foaʻi tau tupe ma isi meaalofa ona o le 2.7 piliona tālā Amerika na foaʻiina atu e fesoasoani ai i le tausia o aiga o tagata na lavevea i le faalavelave. I le faateʻia ona o le tele o mea na faatamaʻia, na mananaʻo ai tagata i so o se mea e fesoasoani atu ai.

Ae peitaʻi, na vave lava ona tigā faalogona o nisi tagata lautele ina ua maua mai tala e faapea, ua lē lelei ona faasoaina e faalapotopotoga tetele na aoina foaʻi ia tupe na maua mai tagata. Sa matuā feita tagata ina ua lipotia mai e faapea, ua fuafuaina e se tasi faalapotopotoga tele e taofia le toetoe lava o le ʻafa o le 546 miliona tālā Amerika na maua e faaaogā mo isi fuafuaga. E ui lava sa toe suia mulimuli ane le faaiʻuga a le faalapotopotoga ma faatoese atu, ae na mātauina e se tasi tamaʻitaʻi e faia lipoti e faapea: “Ua manatu le ʻaufaitio i lenei suiga e faapea, ua fai si tuai ona toe maua le maufaatuatuaina” o le faalapotopotoga sa aoina foaʻi a o leʻi faia ia osofaʻiga. Ae ā oe? Po ua maluelue foʻi lou maufaatuatuaina o faalapotopotoga e aoina foaʻi i aso nei?

Aogā pe e Lē Aogā?

O le faia o foaʻi i faalapotopotoga o loo aoina ia foaʻi, e masani ona manatu o se mea e tatau ona faamālō i ai. Ae peitaʻi, e lē o tagata uma e ioe i lenā manatu. I le sili atu ma le 200 tausaga ua mavae, na tusi ai se tusitala Egelani o Samuel Johnson e faapea: “E sili atu ona e mautinoa ua e faia se mea lelei pe a e totogi atu tupe iā i latou o ē e galulue, o se taui o a latou galuega fitā, na i lo o lou foaʻi faameaalofa atu o tupe.” Ua faatalatū nisi i aso nei e faia ni foaʻi faapena, ma o lipoti e uiga i le valetaulimaina ma le lē lelei ona faasoa e faalapotopotoga o foaʻi tau tupe, ua faaitiitia ai le mautinoa o tagata lautele. Seʻi iloiloina ni faaaʻoaʻoga talu ai nei se lua.

Na faamālōlōina se faatonu o se faalapotopotoga a le lotu i San Francisco mo meaalofa, ina ua ia auina atu i le ofisa o le faalapotopotoga le pili o lona taotoga e faaleleia ai lona tino, ma pili e 500 tālā Amerika i le vaiaso mo ana meaʻai i se faleʻaiga mo se vaitaimi e sili atu ma le lua tausaga. I Peretania, na lagona ai le māsiasi o i latou na faamaopoopoina ia foaʻi mo mea  tutupu i se televise autū, ina ua iloa ane e faapea, e mai le 6.5 miliona pauni (e tusa ma le 10 miliona tālā Amerika), na aauina atu e fesoasoani i le fausiaina o ni fale fou mo tamaiti ua aumatuā i Romania, e na o le 12 lava fale e lē talafeagai na fausiaina, a o le isi faitau selau afe o tālā, e lē iloa po o ā mea na faaaogā i ai. O tala lē manuia faapenei, ua tatau ai i tagata ia e faia foaʻi ona matuā faaeteete i le auala e faia ai a latou foaʻi ma po o ai foʻi e avatu i ai le foaʻi.

Faia pe Lē Faia se Foaʻi

Ae peitaʻi, o se mea e faanoanoa ai, le avea o gaoioiga a ni nai tagata po o nisi o faalapotopotoga ma pogai e taofia ai lo tatou manatu alofa moni ma le tigāalofa mo isi. Ua faapea mai le Tusi Paia: “O lenei lava le amio Atua e lelei ma le faamaoni i luma o le Atua o le Tamā lea, ina ia tauasiasi atu i ē mātua oti ma fafine ua oti a latou tane i o latou tigā.” (Iakopo 1:27, LT ) Ioe, o le faaalia o le manatu mamafa i tagata matitiva ma i latou ua lē tagolima, o se vala tāua lea o le Faa-Kerisiano.

Ae peitaʻi, atonu o le a e taumānatu, ‘Po o le a faaauau pea ona ou foaʻi atu i faalapotopotoga, po o le a na ona ou taumafai e fesoasoani i le foaʻi saʻo atu o meaalofa i tagata taʻitoʻatasi?’ O ā ituaiga o foaʻi o faatalitalia mai e le Atua? O le a talanoaina i le mataupu lea e sosoo mai ia nei fesili.