O le Foaʻi e Fiafia i ai le Atua

SA OLIOLI Iesu ma ona soo i se taumafataga susua i Petania ma nisi o uō mamae, e aofia ai Maria, Mareta ma Lasalo lea na seʻi faatoʻā faatūina mai. Ina ua tago Maria i le pauna o se fagu suāuu taugatā ma uu ai vae o Iesu, na tigā Iuta le Sekara ma faapea atu: “Pe se ā le mea na lē faatau ai lenā uu manogi i tenari e tolu selau [e tutusa ma le totogi o le tausaga], ma avatu ai i ē matitiva?” Sa vave foʻi ona faitio mai faapena isi.—Ioane 12:1-6; Mareko 14:3-5.

Ae peitaʻi, na tali atu Iesu: “Tuupea ia iā te ia; . . . Auā tou te nonofo pea ma ē matitiva, o aso uma foʻi tou te loto i ai ua outou mafaia ona agalelei atu iā te i latou; a o aʻu nei, tatou te lē nonofo pea ma outou.” (Mareko 14:6-9) Sa aʻoaʻo e taʻitaʻi lotu Iutaia e faapea, o le foaʻi atu o meaalofa, e lē gata o se mea e sili ona lelei e fai, ae e mafai foʻi ona faamagaloina ai agasala. Ae i le isi itu, sa faamanino atu e Iesu e faapea, e lē na o le foaʻi atu o meaalofa i tagata matitiva e fiafia i ai le Atua.

O le talanoaina puupuu o le auala na faia ai foaʻi i le faapotopotoga Kerisiano o le uluaʻi senituri, o le a faamatilatila ai nisi o auala aogā e mafai ona faaalia ai lo tatou manatu mamafa, ma faafiafia ai le Atua i foaʻi tatou te faia. O le a faailoaina ai foʻi i lea le ituaiga faapitoa o foaʻi e sili ona lelei.

‘Avatu Meaalofa’

I nisi o taimi na faalaeiau ai e Iesu ona soo ina ia ‘avatu meaalofa.’ (Luka 12:33) Ae peitaʻi, na lapataʻi atu Iesu faasaga i le faia o meaalofa ma le faalialia vale ina ia viia ai lē na foaʻiina atu, na i lo o le Atua. Na fetalai o ia: “A e avatu ai ni mea alofa, aua neʻi e ilia le pu i ou luma, pei ona faia e tagata faafiaamiotonu i sunako ma ala, ina ia viia o i latou e tagata.” (Mataio 6:1-4) I le faatatauina o lenei apoapoaʻiga, na ʻalofia ai e uluaʻi Kerisiano le faalialia vale, fia mamalu o taʻitaʻi lotu o o latou aso, ma filifili e fesoasoani i ē matitiva i lo latou auauna atu iā i latou, pe i le foaʻi atu foʻi o ni a latou lava meaalofa iā i latou.

O se faaaʻoaʻoga, i le Luka 8:1-3, ua faailoa mai ai iā i tatou e faapea, na faaaogā e Maria le Makatala, Ioana, Susana, ma isi, “a latou mea” e auauna atu ai ma le lē faalialia vale iā Iesu ma ona aposetolo. E ui lava sa lē matitiva nei tagata, ae na tuua a latou galuega na maua ai a latou tupe, ae taulaʻi atoatoa atu a latou taumafaiga  i le faiva. (Mataio 4:18-22; Luka 5:27, 28) E ala i le fesoasoani atu iā i latou ina ia faataunuuina lo latou tofiga mai le Atua, o le iʻuga, na vivii atu ai nei fafine i le Atua. Na faaalia foʻi e le Atua lona fiafia e ala i le faasaoina o se faamaumauga i le Tusi Paia e uiga i lo latou alofa mutimutivale ma le limafoaʻi ina ia mafai ona faitau ai tupulaga fai mai uma i le lumanaʻi.—Faataoto 19:17; Eperu 6:10.

O se tasi fafine agalelei, o Toreka, o lē na “tele ana galuega lelei ma mea alofa na ia faia.” Sa ia faia ofu mo fafine matitiva ua oti a latou tane i lana aai o Iopa. Tatou te lē iloa pe na faatauina e ia lava ia ʻie, pe sa na ona ia ofoina atu lana auaunaga. Ae ui i lea, o ana galuega lelei na pele ai o ia iā i latou sa auauna i ai, atoa foʻi ma le Atua o lē na tauia ma le alofa mutimutivale ana galuega agalelei.—Galuega 9:36-41.

E Tāua le Uunaʻiga Saʻo

O le ā na uunaʻia ai nei tagata e faia ni foaʻi? Sa lē uunaʻia i latou i faalogona ootia faafuaseʻi ona o se talosaga na fai atu mo se fesoasoani. Sa latou lagona o se mea saʻo lea e ao ona faia i aso taʻitasi, e fesoasoani ai iā i latou o ē ua matitiva, puapuagatia, mamaʻi, po o isi lava ua iai i tulaga faigatā. (Faataoto 3:27, 28; Iakopo 2:15, 16) O nei ituaiga o foaʻi e finagalo malie i ai le Atua. O le māfuaaga autū e ala ai ona foaʻi ona o le alofa loloto mo le Atua, ma ia naunau e faataʻitaʻi i lona uiga o le alofa mutimutivale ma le limafoaʻi.—Mataio 5:44, 45; Iakopo 1:17.

Na faamatilatila mai e le aposetolo o Ioane lenei vala tāua o le foaʻi ina ua ia fesili atu: “O sē ua i ai le ʻoa a le lalolagi nei, pe a iloa atu e ia lona uso ua mativa, a e punitia lona loto alofa iā te ia, pe faapefea ona tumau o le alofa i le Atua i lea tagata?” (1 Ioane 3:17) E manino lava le tali. O le alofa i le Atua ua uunaʻia ai tagata e foaʻi atu meaalofa. E sili ona alofa le Atua ma na tauia i latou o ē e pei o ia, i le faaalia o le agaga limafoaʻi. (Faataoto 22:9; 2 Korinito 9:6-11) Po o tatou vaaia lenei agaga limafoaʻi i aso nei? Seʻi manatu i se mea na tupu talu ai nei i se faapotopotoga o Molimau a Ieova.

Sa matuā manaʻomia lava ona toe faaleleia le fale o se tinā matua Kerisiano. Sa nofo na o ia ma e leai sona ʻauaiga e fesoasoani iā te ia. I le faagasologa o tausaga, sa faaavanoa pea lava lona fale e faia ai sauniga faa-Kerisiano, ma sa masani ona ia fai taumafataga ma so o se tasi e taliaina lana valaaulia. (Galuega 16:14, 15, 40) I le vaai atu i le tulaga lē lelei ua oo iā te ia, na lolofi atu sui o le faapotopotoga e fesoasoani. O isi sa faia ni foaʻi tau tupe, a o isi o la latou auaunaga. I ni nai faaiʻuga o le vaiaso, na mafai ai e le ʻaufaigaluega tauofo ona ato le fale i ʻapa fou, fai se fale taʻele fou, faalamolemole ma vali atoa le fogāfale muamua, ma fausia ni kapoti fou i le umukuka. O la latou foaʻi sa lē gata ina faamalieina ai le manaʻoga o le tuafafine, ae sa mafai foʻi ona mafuta vavalalata ai le faapotopotoga. Sa maofa ai foʻi tuaoi ona  o se faaaʻoaʻoga o le foaʻi faa-Kerisiano moni.

E matuā tele lava auala e mafai ona avatu ai a tatou lava fesoasoani i isi. Pe mafai ona tatou faaaluina se taimi ma se tama po o se teine ua aumatuā? Pe e mafai ona tatou faia ni faatauga pe faia ni suʻisuʻiga mo se tinā matua ua oti lana tane o tatou iloa? Pe e mafai ona tatou kukaina se meataumafa pe avatu se fesoasoani tau tupe i se tagata ua lē lava lana faasoa? E lē seʻiloga e tele ni a tatou mea ona mafai lea ona tatou fesoasoani atu. Na tusi le aposetolo o Paulo: “Auā afai ua i ai le loto fiafia, e talileleia lea, e tusa ma mea ua iā te ia, a e lē tusa ma mea e lē o iā te ia.” (2 Korinito 8:12) O lea la, pe e na o foaʻi totino tuusaʻo o le a faamanuia e le Atua? E leai.

Ae Faapefea Fesoasoani ua Faamaopoopoina?

I nisi taimi, e lē lava ai na o au lava taumafaiga. E moni, na teuina e Iesu ma ona aposetolo tupe o meaalofa faitele mo ē matitiva, ma sa latou talia ia foaʻi faameaalofa mai tagata sa alolofa ane na latou feiloaʻi i la latou galuega. (Ioane 12:6; 13:29) Sa faapena foʻi ona aoina e faapotopotoga i le uluaʻi senituri ia meaalofa pe a tulaʻi mai se manaʻoga, ma faamaopoopoina ni fesoasoani tetele.—Galuega 2:44, 45; 6:1-3; 1 Timoteo 5:9, 10.

Sa iai se mea faapena na tupu i le tusa o le 55 T.A. Sa oo le mativa i faapotopotoga i Iutaia, atonu ona o le oge tele na tupu talu ai. (Galuega 11:27-30) Sa manatu mamafa pea le aposetolo o Paulo i tagata matitiva, ma talosagaina ai le fesoasoani mai faapotopotoga e aofia ai ma nofoaga mamao e pei o Maketonia. Na faamaopoopoina e ia lava le aoina o meaalofa ma faaaogā tane ua taʻuleleia latou te tufatufaina atu. (1 Korinito 16:1-4; Kalatia 2:10) E leʻi totogia o ia po o isi na aafia ai i le galuega na latou faia.—2 Korinito 8:20, 21.

E vave foʻi ona gaoioi Molimau a Ieova i aso nei e fesoasoani atu pe a oo mai ni mala. O se faataʻitaʻiga, i le taumāfanafana o le 2001, na oo ai ni lologa tetele i Houston i Texas, Amerika, ona o afā ma timuga tetele. I se tuufaatasiga, e 723 fale o Molimau na afāina ma sa faaleagaina ai le tele o na fale. Na faatūina loa se komiti o fesoasoani mo mala na faia aʻe i toeaina Kerisiano agavaa e fuafuaina manaʻoga o tagata taʻitoʻatasi ma tufatufaina atu fesoasoani i Molimau ina ia mafai ai ona latou fesagaʻia le tulaga, ma toe faaleleia o latou fale. O le ʻaufaigaluega tauofo mai isi faapotopotoga tuaoi na faia nei galuega uma. Sa matuā lotofaafetai le tasi Molimau i le fesoasoani, o lea, ina ua maua tupe mai lana kamupani inisiua e toe faaleleia ai lona fale, sa ia foaʻi atu loa lenā tupe i ē o loo faasoaina meaalofa tautupe ina ia fesoasoani ai foʻi i isi o loo iai le manaʻoga.

E faatatau la i le foaʻi atu i faalapotopotoga o loo faamaopoopoina meaalofa, e manaʻomia  ona tatou faaeteete a o tatou fuafuaina lelei le tele o talosaga ua tuuina mai. E matuā tetele totogi o pulega po o suʻegātupe a nisi faalapotopotoga, ua tuua ai na o se tupe itiiti mai tupe na foaʻi atu mo le fuafuaga na faia ai. Ua faapea mai le Faataoto 14:15: “O lē ua faigofie [lē lava lona iloa], e talia e ia upu uma; a o lē ua mafaufau, ua faautauta o ia i lona ala.” O lea, o se auala atamai le iloilo totoʻa o mea moni uma.

Le Foaʻi e Sili Ona Aogā

E iai le foaʻi e sili atu ona tāua na i lo o foaʻiina o tupe ma mea faitino. Na taʻua e Iesu lenei mea ina ua fesili atu se tasi pule talavou mauʻoa po o le ā se mea na te faia ina ia maua ai le ola e faavavau. Na taʻu atu e Iesu iā te ia: “Ia e alu ma e faatau atu au mea, i le e avatu ai i ē matitiva; ona iā te oe lea o le faulaʻigaoloa i le lagi, i le e sau ma mulimuli mai iā te aʻu.” (Mataio 19:16-22) Ia mātau, e leʻi na ona fai atu Iesu, ‘Avatu au mea i ē matitiva ona e maua lea o le ola.’ Na i lo o lea, na ia faaopoopo atu, “I le e sau ma mulimuli mai iā te aʻu.” I se isi faaupuga, e ui ina lelei ma aogā le faia o foaʻi faameaalofa, ae e tele atu mea e aofia ai i le avea ma se soo Kerisiano.

O le faanaunauga sili o Iesu, o le avatu o le fesoasoani faaleagaga i isi. I se taimi a o toeitiiti lava maliu, na ia taʻu atu iā Pilato e faapea: “O le mea lenei na fanau mai ai aʻu, o le mea foʻi lenei na ou sau ai i le lalolagi, ina ia ou molimau i le upu moni.” (Ioane 18:37) A o tausolomua ona ia fesoasoani atu i ē matitiva, faamālōlō maʻi, ma fafaga ē ua fia aai, sa muamua lava ona toleni e Iesu ona soo ina ia talaʻi. (Mataio 10:7, 8) O le mea moni, o ana faatonuga faamavae iā i latou na aofia ai ma se poloaʻiga: “O lenei, ia outou ō atu e fai nuu uma lava ma soo.”—Mataio 28:19, 20.

E moni, o le a lē foʻia e le talaʻiga faafitauli uma o le lalolagi. Peitaʻi, o le talaʻi atu o le tala lelei o le Malo o le Atua i tagata uma lava, e viia ai le Atua auā o le talaʻiga ua faataunuuina ai le finagalo o le Atua, ma maua ai aogā e faavavau e i latou ua talia le feʻau mai le Atua. (Ioane 17:3; 1 Timoteo 2:3, 4) Aiseā e lē faalogo ai i mea e fai mai ai Molimau a Ieova i se isi taimi e latou te asiasi atu ai? O loo ō mai i latou ma se meaalofa faaleagaga. Ma ua latou iloa o le auala aupito sili lenei e mafai ona latou foaʻi atu ai se meaalofa iā te oe.

[Ata i le itulau 6]

E tele auala e faaalia ai lo tatou manatu mamafa

[Ata i le itulau 7]

O lo tatou talaʻia o le tala lelei e fiafia ai le Atua ma maua ai aogā e faavavau