Aʻoga o Kiliata 60 Tausaga o Aʻoaʻoina ai Misionare

“ONA o le loloto o a matou suʻesuʻega o le Tusi Paia, na atili ai ona matou māfana atu iā Ieova ma tele ai mea ua matou aʻoaʻoina e uiga i lana faalapotopotoga. O aʻoaʻoga na, na sauniunia ai i matou e auauna i atunuu mamao.” O le faamatalaga lenā a se tuafafine e faatatau i le uluaʻi vasega o le Aʻoga Faale-Tusi Paia a le Olomatamata o Kiliata, lea na faauu ai o ia. Ua auina atu e le Aʻoga o Kiliata misionare talu ona faavaeina i le 60 tausaga ua teʻa. Na faia le faauuga o le vasega lona 114 i le aso 8 o Mati, 2003 i le Nofoaga Tau Aʻoaʻoga a le Olomatamata i Patterson, i Niu Ioka. E toʻa 6,404 ē na tauaofia i le maota pe na maimoa foʻi e ala i le televise, ma na latou faalogologo ma le lē gasē i le polokalame lea na aofia ai lauga, faatalanoaga ma talanoaga o se vaega.

Na avea Theodore Jaracz ma taʻitaʻifono, o ia foʻi o se sui o le Vaega Pule. Na faailoa mai e le taʻitaʻifono i le amataga o lana lauga, le eseese o atunuu e ō mai ai ē o tauaofia e aofia ai atunuu o Asia, le Karipiane, o Amerika Tutonu ma Saute faapea ai ma Europa. Na faaaogā e le uso le mau o loo i le 2 Timoteo 4:5, ma faapea mai o le galuega autū a le ʻaumisionare na aʻoaʻoina i Kiliata—o le “fai le galuega a lē folafola le tala lelei.” E molimau atu le ʻaumisionare i le upu moni e ala i le aʻoaʻoina o le Tusi Paia i tagata.

Mauaina e Tagata Aʻoga Faatonuga Mulimuli

O le failauga amata o lauga pupuu na sosoo mai ai, o le uso o John Larson o se sui o le Komiti o le Lālā i le Iunaite Setete o Amerika ma na talanoa o ia i le mataupu faagaeeloto, “Afai ua ʻAu ma i Tatou le Atua, o ai Sē Faasaga Tau Mai iā i Tatou?” (Roma 8:31) Na faamatala mai e le failauga le māfuaaga faale-Tusi Paia e ala ai ona talitonu aʻiaʻi tagata aʻoga i le mana o Ieova e fesoasoani iā i latou, e foʻia ai so o se toʻatugā latou te fetaiaʻia i a latou tofiga. Na faaaogā e le failauga le Roma 8:38, 39, ma na faamalosiau atu i tagata aʻoga e faapea: “Ia fai ma tōmanatu i le mana o le Atua lea e fesoasoani atu iā te oe, ma ia manatua e lē taitai taofia le manatu mamafa mai o Ieova iā te oe.”

O le failauga na sosoo ai, o le uso o Guy Pierce o se sui o le Vaega Pule. O le matua o lana lauga “Ia Fiafia Pea Ou Fofoga!” (Luka 10:23) Na faapea mai o ia, o le fiafia moni e aofia ai le iloaina o Ieova, ia malamalama i lona finagalo e faavavau atoa ma le vaaia o faataunuuga o valoaga o le Tusi Paia. Po o fea lava e iai, e mafai ona olioli pea tagata aʻoga e ala i le faaalia pea o o latou laufofoga fiafia. Na faamalosiau atu le uso o Pierce i le ʻaufaauu ina ia manatunatu loloto i le agalelei o Ieova ma ia taulaʻi atu o latou loto ma mafaufau i le faia o Lona finagalo. (Salamo 77:12) E ala i le iai pea o se uiga mautinoa, e mafai ai e le ʻaufaauu ona foʻia so o se faafitauli latou te fesagaʻia.

Ona sosoo ai lea ma upu faamavae faalaeiau a ni faiaʻoga se toʻalua na aʻoaʻoina i latou i aso taʻitasi. Na fai e Lawrence Bowen le fesili, “Po o E Saʻilia ea le Faamamaluina?” ma o le matua foʻi lenā o lana lauga. E  masani ona manatu tagata e faapea o le faamamaluina o le mauaina lea o le viiga ma se tulaga aloaʻia. Ae na iloa e le faisalamo o Asafo le mea tonu e taʻua o le faamamaluina—o le mauaina o le ʻoa tautele, o le mafuta vavalalata ma Ieova. (Salamo 73:24, 25) Na faalaeiauina le ʻaufaauu ina ia tausia pea lo latou faiā lelei ma Ieova e ala i le toʻaʻaga e matuā suʻesuʻe i le Tusi Paia. O loo “fia matamata” le ʻauagelu i le faataunuuina o fuafuaga a Ieova e ala mai iā Keriso. (1 Peteru 1:12) Latou te naunau e aʻoaʻoina le tele o mea e uiga i lo latou Tamā ina ia mafai ona latou faaatagia atu ai lona mamalu. Ona timaʻi atu lea o le failauga i tagata aʻoga ina ia faamamaluina Ieova i o latou tofiga faamisionare e ala i le fesoasoani atu i isi ina ia maua le ʻoa e sili ona tautele.

Na faaiʻuina e le lesitala o le aʻoga o Wallace Liverance, le vaega muamua o le polokalame i le lauga “Ia Tautala Atu i le Poto o le Atua i se Mealilo Paia.” (1 Korinito 2:7, NW ) O le ā le poto o le Atua lea na taʻua e le aposetolo o Paulo a o avea o ia ma misionare? O le auala poto ma le mamana a Ieova e aumai ai le filemu ma le autasi i le lagi ma le lalolagi aoao. O lenā poto, e faaautū atu iā Iesu. Na i lo le talaʻi atu o se vaifofō mo faafitauli o tagata lautele, na fesoasoani Paulo i tagata ina ia latou iloa le auala o le a aveese ai e le Atua āuga o le agasala a Atamu. (Efeso 3:8, 9) Na pulunaunau atu le failauga i le aofia:  “Ia faaaogā lo outou faaeaga o le auaunaga e pei o Paulo, lea na tagaʻi i lana tofiga faamisionare o se avanoa e fesoasoani ai i tagata ina ia iloa le auala o le a faatino ai e Ieova lana fuafuaga.”

Ona sosoo lea ma se talanoaga aasa na taʻimua ai se tasi o faiaʻoga o Kiliata o Mark Noumair, lea na latou talanoa ai ma nisi o tagata aʻoga. O le matua e faapea “Maelega o ni Faifeʻau Ona o le Suʻesuʻeina o le Afioga a le Atua,” na faamatilatila ai upu a Paulo o loo i le Roma 10:10. Na faamatalaina e le vasega mea na tutupu i le faiva i le fanua, lea na latou olioli ai a o auai i le aʻoga. Ua faaalia mai i tulaga o le ʻauaʻoʻoga e faapea, afai tatou te suʻesuʻe ma mafaufau loloto i le Afioga a le Atua, o le a faatumulia ai o tatou loto i mea lelei e uiga iā Ieova le Atua ma lona malo, ma faapea ona tatou talanoa atu ai i isi. I masina e lima ia na latou faamautū ai i le Nofoaga Tau Aʻoaʻoga a le Olomatamata, na amata ai e tagata aʻoga ni suʻesuʻega faale-Tusi Paia e sili atu i le 30 ma tagata fiafia i le oganuu e galueaʻiina soo e faapotopotoga lata ane.

Fautuaga Lelei a Ē Taʻumatuaina

A o faagasolo la latou aʻoga, na maua ai e le ʻauaʻoʻoga le avanoa lelei e auaumea faatasi ai ma le aiga Peteli i le Iunaite Setete. Na faatalanoa e ni uso se toʻalua o le lālā e suafa iā Robert Ciranko ma Robert P. Johnson ē ua loa ona auauna faamaoni iā Ieova, ni ovasia femalagaaʻi o loo auai i le taimi lenā i aʻoaʻoga faapitoa i le Nofoaga Tau Aʻoaʻoga a le Olomatamata. O i latou uma na faatalanoaina, o ē na faauu mai i Kiliata ma na auauna foʻi o ni misionare i se taimi muamua. O se faamalosiauga i tagata aʻoga, o o latou aiga ma uō le faalogologo atu i fautuaga lelei mai nei tane faaleagaga ua loa lo latou silafia.

O nisi nei o a latou fautuaga: “Ia matuā pisi i le faiva ma i totonu o le faapotopotoga.” “Aua le soona manatu iā te oe lava. Ia manatua pea le māfuaaga ua avea ai oe ma misionare, ma ia vaai i lou tofiga o se mea e matuā pele iā te oe.” Na faailoa mai foʻi e isi faamatalaga lelei le auala ua saunia ai e le aʻoga o Kiliata, se tasi ina ia avea ma faifeʻau mo galuega lelei po o fea lava e tofia i ai. O nisi nei o faamatalaga: “Na matou aʻoaʻoina le auala e galulue soosootauau ai.” “Na fesoasoani le aʻoga iā i matou ina ia matou faamasani atu i aganuu fou.” “Na aʻoaʻoina i matou e faaaogā le Tusi Paia i se auala e sili atu.”

Na tauaaoina e John E. Barr o lē ua leva ona iai i le Vaega Pule, le lauga autū o le polokalame. O le matua o lana lauga lea na faavae aʻe i le mau o le Tusi Paia, “Ua Oo lo Latou Leo i le Lalolagi Uma Lava.” (Roma 10:18) Na faatūina e le failauga se fesili e faapea, Pe e mafai ea ona faatinoina e tagata o le Atua lenei tofiga faigatā i aso nei? Ioe, e mafai! I se tasi o mekasini faa-Peretania o le Olomatamata i tuā i le 1881, na iai se fesili e faapea: “Po o e talaʻi?” Ona toe faamanatu atu lea e le failauga i ē uma na tauaofia, le talosaga tāua na faia i le tauaofiaga o le 1922 i Cedar Point i Ohio i le Iunaite Setete e faapea: “Ia Faalauiloa le Tupu ma lona Malo!” A o faagasolo le taimi, ona o lo latou maelega na faaauau ona ō atu auauna faamaoni a le Atua e taʻutaʻu atu upu moni ofoofogia o le Malo i nuu uma. E ala i lomiga ma le talanoa atu i isi, ua oo ai le feʻau o le tala lelei i tuluʻiga uma o le lalolagi, lea e faamamaluina ma viia ai Ieova. Na timaʻi atu le uso o Barr i le ʻaufaauu i le faaiʻuga o lana lauga, ina ia talisapaia faamanuiaga ua latou mauaina, e ala i le faapea atu: “A o e iai i lou tofiga ma e tatalo atu iā Ieova i aso taʻitasi, ia faafetai atu iā te ia mai lou loto mo le faaeaga o le faia o sau vaega i le faataunuuina o le mau, ‘Ua oo lo latou leo i le lalolagi uma lava.’”

Ina ua māeʻa le lauga faaiʻu, ona faitauina lea o alofaaga ma tufatufaina atu e le taʻitaʻifono, faailoga o le ʻaufaauu. Ua fefiloi nei faalogona o le olioli ma le faanoanoa ona o le a tuua lo latou aʻoga na matuā fiafia i ai. O le taimi lenā na faitauina ai loa e se tasi o tagata aʻoga le iʻugāfono faagaeeloto na tusiaina mo le Vaega Pule ma le aiga Peteli, e faailoa ai le naunautaʻiga o le ʻaufaauu ina ia faamamaluina Ieova “e afua mai nei lava, a e oo i le faavavau.”—Salamo 115:18.

Tatou te tatalo o le a faamasani atu le ʻaufaauu i o latou tofiga fou ma saosaolaumea atu i le agaʻigaʻi i luma o le galuega talaʻi i le lalolagi aoao, e pei ona faatinoina e le ʻaumisionare na muamua atu iā i latou, a o faagasolo le 60 tausaga ua mavae.

[Ata i le itulau 23]

FAAMAUMAUGA O LE VASEGA

Aofaʻi o atunuu o loo iai o latou sui: 12

Aofaʻi o atunuu ua tofia i ai: 16

Aofaʻi o tagata aʻoga: 48

Faatatauga o tausaga: 34.4

Faatatauga o tausaga i le upu moni: 17.6

Faatatauga o tausaga i le faiva faataimi atoa: 13.5

[Ata i le itulau 24]

Vasega Faauu Lona 114 o le Aʻoga Faale-Tusi Paia a le Olomatamata o Kiliata

I le lisi i lalo, e amata mai laina i luma ma faasolo i tua, ma o igoa e lisi mai i le itu agavale e agaʻi atu i le taumatau.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.