Auauna i se Vaega e Ese la Latou Gagana i Korea

SA FAAPOTOPOTO se vaega matuā fiafia ae toʻafilemu mo se tauaofiaga itumalo a Molimau a Ieova i le taumāfanafana o le 1997. O se uluaʻi fonotaga faapenei lea ua faia i Korea a i latou e logonoa ma ē faalēlelei le faalogo. Sa iai se tumutumuga o le aofia na auai e 1,174. O le polokalame atoa lava, e aofia ai ia lauga, faatalanoaga, ma se tala faale-Tusi Paia, sa faia uma i le gagana e faaaogā ai tāga a Korea, ma sa faaali i luga o se laupapa telē sa mafai ona iloa atu i le Maota Fono atoa. O le tumutumuga lenā o le galuega fitā na faia e le toʻatele o ē na tauofo.

I le lalolagi parataiso, o le a iai se taimi o le a “faapupulaina ai . . . mata o ē tauaso, e faalogoa foʻi taliga o ē tutuli.” (Isaia 35:5) Ina ia tofo i le olaga i lenā Parataiso, e tatau i tagata uma e aofia ai ma ē logonoa ona ulu muamua atu i le parataiso faaleagaga, le tulaga olaola faaleagaga o tagata o le Atua ua faamanuiaina. E tatau ona avea i latou ma Molimau a Ieova ua tuuina atu ma papatisoina, o tagata ua ia aʻoaʻoina.—Mika 4:1-4.

Amataga Faatauvaa

E ui lava sa faia se talaʻiga i tagata logonoa i tausaga o le 1960, ae i tausaga o le 1970, na faatoʻā amata ai ona auai nisi o i latou i sauniga a Molimau a Ieova i Seoul, le laumua o Korea. Sa faaaogā e se uso Kerisiano sa vave lana tusitusi se laupapa e tusi ai ia manatu tāua o lauga, e aofia ai ma mau o le Tusi Paia sa faaaogā.

I le 1971 i le aai o Taejon, na amata ai e se Molimau e iai sona alo e logonoa ona aʻoaʻo o ia ma ana uō logonoa i le feʻau o le Malo. E mai i lenei vaega, ua maua mai ai nisi o tagata maelega o ē o lagolagosua malosi i le oganuu e iai tagata e faaaogāina le gagana e faaaogā ai tāga.—Sakaria 4:10.

Ofo Atu e Talavou i Latou ma le Loto

Afai e manaʻomia e tagata logonoa ona ave i fale le poto e uiga iā Ieova ma Iesu ma maua ai le ala i le ola, e tele lava la ni taumafaiga malolosi e tatau ona faia e isi tagata tauofo. (Ioane 17:3) I lea itu, ua aʻoaʻo ai e nisi o Molimau a  Ieova le gagana e faaaogā ai tāga, ma ua tauia ai i latou i mea mananaia na tutupu.

Sa avea ma sini o le tama talavou e 15 tausaga, o Park In-sun le aʻoaʻoina o le gagana e faaaogā ai tāga. Ina ia faia faapea, sa faigaluega o ia i se falegaosimea sa faigaluega ai se vaega e toʻa 20 o tagata logonoa. E valu masina sa galulue vavalalata ai o ia ma i latou ina ia mafai ona aʻoaʻoina ai le gagana ma mafaufauga o tagata logonoa. I le tausaga na sosoo ai, na avea ai o ia ma faifeʻau paeonia faataimi atoa, ma galulue ma se vaega o tagata logonoa o ē na faaalia le fiafia i upu moni o le Tusi Paia. Sa vave lava ona faatuputeleina lenei vaega, ma e leʻi pine ae auai le sili atu i le 35 tagata i sauniga i le Aso Sa.—Salamo 110:3.

Mulimuli ane, na fuafuaina ai e faia sauniga faa-Kerisiano uma i le gagana e faaaogā ai tāga mo le uluaʻi taimi i Seoul. Sa auauna le uso o Park In-sun o se paeonia faapito i lenei vaega ua faatoʻateleina. Ua matuā atamai lava o ia i le taimi nei i le gagana e faaaogā ai tāga. I le faagasologa o ni nai masina, na ia faia ai ni suʻesuʻega faale-Tusi Paia se 28 i aiga ma tagata logonoa. Sa agaʻigaʻi i luma le toʻatele o i latou nei ma avea o ni Molimau a Ieova.

O le iʻuga o lenei galuega tauofo tiotio, na faavaeina ai i Seoul iā Oketopa 1976 le faapotopotoga muamua i le gagana e faaaogā ai tāga, e 40 le ʻautalaʻi ma paeonia sauatoa e toʻalua. O lenei mea na faavave ai ona faia gaoioiga i isi aai o Korea. Sa galala le toʻatele o tagata logonoa mo le tala lelei ma sa faatalitali mo nisi e asiasi atu iā i latou.

Galulue Faatasi ma Ē Logonoa

Atonu e te tau manatu pe na faapefea ona maua tagata logonoa. O le tele lava na faia e ala i le faafeiloaʻi atu e le tasi tagata se tagata i le isi. Sa fesili atu foʻi i ē ona faleoloa e faatau mai ai le araisa, ma latou taʻuina mai ai igoa ma tuatusi o tagata logonoa. Sa fesoasoani foʻi nisi ofisa o le malo i le tuuina mai o na faamatalaga. O le galueaʻiina ma le maelega o le oganuu e nonofo ai tagata logonoa, sa matuā taulau lava, auā na oo ina faavaeina ai ni faapotopotoga se fā e faaaogāina le gagana e faaaogā ai tāga. E toʻatele talavou Kerisiano ua faalaeiauina e aʻoaʻoina le gagana e faaaogā ai tāga.

O faifeʻau paeonia faapito na aʻoaʻoina le gagana e faaaogā ai tāga, sa tofia e le ofisa o le lālā o Molimau a Ieova e galulue ma na faapotopotoga. Talu ai nei lava, na faamalosia ai faaleagaga na faapotopotoga na tofia atu i ai i latou na faauu mai i le Aʻoga mo Toleniga i le Faiva.

E iai foʻi mea faigatā e manaʻomia ona foʻia. O le auauna ai i nei oganuu e tatau ai ona faia ni taumafaiga ina ia malamalama i aga a tagata logonoa. O nei tagata, e fai saʻo mai lava o latou manatu ma gaoioiga. I nisi taimi, e faateʻia ai tagata i nei uiga, ma tupu ai ni lē femalamalamaaʻi. E lē gata i lea, pe a faia e Molimau suʻesuʻega faale-Tusi Paia i le aiga ma tagata logonoa, e manaʻomia ona fesoasoani iā i latou ina ia popoto i la latou lava gagana ma faalaeiau i latou ina ia faalautele la latou polokalame o le faitau ma le suʻesuʻe.

I a latou gaoioiga i aso faisoo, e fesagaʻi ai tagata logonoa ma faigatā ia e matuā lē iloa lava e isi. O faafitauli sili lava e masani ona latou fesagaʻi, o fesootaʻiga ma tagata i ofisa o le malo ma falemaʻi, faapea foʻi i le faia o feʻau masani e pei o le totogiina o pili. Talu ai ua ofoina mai e  Molimau i faapotopotoga tuaoi le fesoasoani alofa, ua tofo ai tagata logonoa i le alofa moni faaleuso i le faapotopotoga.—Ioane 13:34, 35.

Maua Iʻuga Lelei i Talaʻiga Lē Fuafuaina

I Pusan, le uafu autū i saute o Korea, na teʻi ai lava ua feiloaʻi se Molimau ma ni tagata logonoa se toʻalua o ē na la tusia i se fasipepa ia upu nei: “E ma te fiafia i le Parataiso. E ma te fia iloa le mau lea e taʻu mai ai e uiga i le ola e faavavau.” Na tusi i lalo e le uso lo la tuatusi ma fuafua e asiasi atu iā i laʻua. Ina ua asiasi atu, sa ia iloa ai se potu ua faatumulia i tagata logonoa o loo faatali e fia faalogo i le feʻau o le Malo. O lenei mea na uunaʻia ai o ia e aʻoaʻoina le gagana e faaaogā ai tāga. E leʻi pine ae faatuina loa i Pusan se faapotopotoga e faaaogāina le gagana e faaaogā ai tāga.

Na mātauina e se uso mai lenā faapotopotoga ni tagata logonoa se toʻalua o talanoa e faaaogā ai tāga ma ia faalatalata atu loa iā i laʻua. Ina ua iloa o lea faatoʻā la auai i se sauniga faalelotu, sa ia valaaulia loa i laʻua i le Maota o le Malo i le lua i le afiafi o lenā lava aso. Sa la ō mai ma na amataina ai se suʻesuʻega faale-Tusi Paia. E leʻi leva lava mulimuli ane, sa auai loa le toʻalua lea i le tauaofiaga itumalo faatasi ma a la uō logonoa e toʻa 20. E mai lenā vaega, e iai nisi ua tuuina atu o latou ola iā Ieova. E toʻalua ua avea ma toeaina o le faapotopotoga, ae toʻatasi ua avea ma auauna o le faiva i faapotopotoga e faaaogāina le gagana e faaaogā ai tāga.

 Ua Tauia le Maumauaʻi

Talu ai e fai si mamao o nofoaga o isi tagata logonoa mai faapotopotoga e faaaogāina le gagana e faaaogā ai tāga, e masani lava ona faia ai ni taumafaiga sili ma le maumauaʻi, ina ia maua ai e lē aunoa e i latou meaʻai faaleagaga e faafouina ai mai le Tusi Paia. O se faaaʻoaʻoga, sa maua e se tamāloa e 31 tausaga mea e ola ai e ala i le alu e fagota i se isi motu. Sa faalogo o ia i le feʻau o le Tusi Paia mai lona uso laʻitiiti, lea sa feiloaʻi ma Molimau a Ieova. I le taumafai e faamalieina lona galala faaleagaga, na malaga atu ai lea faifaiva logonoa i se vaa mo le 10 maila (16 kilomita) i le aai o Tongyoung, i le talafatai i saute o Korea. Na faia nei mea uma ina ia mafai ai ona feiloaʻi ma se paeonia faapito mai le faapotopotoga e faaaogāina le gagana e faaaogā ai tāga i le aai o Masan. O Aso Gafua uma lava, e faimalaga atu ai lenei paeonia faapito mo le 40 maila (65 kilomita) i le tau lava ina faia o le suʻesuʻega faale-Tusi Paia ma le faifaiva logonoa.

Ina ia auai i le sauniga i le aai o Masan i le Aso Sa, e malaga atu ai mo le 10 maila (16 kilomita) i se vaa lenei tagata suʻesuʻe o le Tusi Paia e logonoa, ma toe malaga atu i le pasi mo le isi 40 maila (65 kilomita). Na tauia lona maumauaʻi. I ni nai masina, na ia faaleleia ai lana gagana e faaaogā ai tāga, ma aʻoaʻoina isi mataʻitusi o le gagana a Korea, ma o le mea e sili ona tāua, o le aʻoaʻoina o le auala e tasi e maua ai se faiā ma Ieova. I le iloaina o le tāua o sauniga ma le molimau atu e lē aunoa, na siitia atu ai o ia i le oganuu e iai le faapotopotoga e faaaogāina le gagana e faaaogā ai tāga. Pe sa faigofie lenā mea? E leai. Sa tatau ona taofia lana fagotaga lea sa ia maua ai e oo atu i le $3,800 Amerika i le masina, ae na tauia lona maumauaʻi. Ina ua agaʻigaʻi i luma i le upu moni, na papatisoina o ia ma ua auauna fiafia nei faatasi ma lona aiga iā Ieova.

Faia Faaliliuga mo Tagata Logonoa

E masani lava ona faailoa atu le tala lelei o le Malo e ala i le talanoa atu i tagata. Ae peitaʻi, ina ia matuā saʻo le avatuina o le feʻau o le Afioga a le Atua, e tatau ai ona faailoa atu aʻoaʻoga a le Tusi Paia i se tulaga tumau. I lea, i le uluaʻi senituri, sa tusia ai ia tusi e tane matutua ua lava le poto masani. (Galuega 15:22-31; Efeso 3:4; Kolose 1:2; 4:16) I o tatou aso, ua saunia ai le anoanoaʻi o meaʻai faaleagaga e ala i tusi ma isi lomiga faa-Kerisiano. Ua faaliliuina nei lomiga i le faitau selau o gagana, e aofia ai ma le tele o gagana eseese e faaaogā ai tāga. Ina ia faia lenei mea i le gagana e faaaogā ai tāga a Korea, ua faatuina ai e le ofisa o le lālā se matagaluega e faaliliu ai le gagana e faaaogā ai tāga. O se matagaluega e saunia ai vitiō mo le gagana e faaaogā ai tāga. Ua saunia ai i lenei fuafuaga meaʻai faaleagaga mo tagata logonoa o ē folafola le tala lelei faapea ma ē loto fiafia i faapotopotoga i Korea atoa.

E ui lava e toʻatele ua atamamai i le gagana e faaaogā ai tāga ma fesoasoani i le saunia o vitiō, ae o le mea moni, o le ʻaufaaliliu e sili ona lelei, o fanau a mātua e logonoa. Sa latou aʻoaʻoina le gagana e faaaogā ai tāga mai lava a o laiti. E lē gata e saʻo lelei tāga a i latou nei, ae avatu ai foʻi se uiga o lagona loloto ma faatāuaina ai le feʻau e ala i tāga ma uiga o o latou foliga, ma pāʻia ai i lea le loto ma le mafaufau.

E pei ona mātauina, ua faia nei e lē aunoa i Korea ia tauaofiaga ma fonotaga i le gagana e faaaogā ai tāga. E tele galuega, tupe, ma taumafaiga e manaʻomia ina ia faatino ai lenei manaʻoga. Ae peitaʻi, ua talisapaia e i latou na auai lenei fuafuaga. Ina ua faaiʻuina nei faatasitasiga, e toʻatele e feofeoaʻi ai lava ona o le mananaʻo ia faaauau pea lenei aufaatasiga mamā, ma talatalanoa i taumafa lelei faaleagaga na saunia ai. E mautinoa lava le lē faigofie o le auauna ai i lenei vaega e ese mai, ae ua aogā ona o faamanuiaga faaleagaga.

[Ata i le itulau 10]

O vitiō e faaaogā ai tāga ua saunia i Korea: “O le ā e Manaomia e le Atua Mai ia i Tatou?,” “Talisapaia lo Tatou Tofi Faaleagaga,” “Faaaʻoaʻoga Lapataʻi mo o Tatou Aso” ma “Ia Faaaloalo i le Pule a Ieova”

[Ata i le itulau 10]

Le ata o i lalo: o vitiō e faaaogā ai tāga ua saunia i le lālā i Korea. Ata i le itu taumatau i le pito i luga: (1) saunia o tāga mo faaupuga faatiokarate (2) le ʻaufaaliliu o le gagana e faaaogā ai tāga. Le ata i le itu taumatau i le pito i lalo: fesoasoani i tāga a le uso a o puʻeina le vitiō