Fesili Mai le ʻAufaitau

Pe e iai se tomai o Satani e iloa ai mea o mafaufau i ai le tagata?

E ui lava e tatou te lē o mautinoa lelei, ae e foliga mai e lē o iai se tomai o Satani po o ana temoni e iloa ai mea o i o tatou mafaufau.

Seʻi manatu i igoa ua faaigoaina ai Satani. Ua taʻua o ia o Satani (O Lē Tetee), Tiapolo (O Lē Taufaaleaga), o le Gata (e tutusa ma Lē Taufaasesē), O Lē Faaosooso, ma Lē Pepelo. (Iopu 1:6; Mataio 4:3; Ioane 8:44; 2 Korinito 11:3; Faaaliga 12:9) E leai lava se igoa o nei igoa o faailoa mai ai e iai iā Satani se tomai na te iloa ai mea o i o tatou mafaufau.

Ae peitaʻi, i se faaeseesega, ua faamatalaina Ieova le Atua e faapea, “na te tofotofoina [“suʻesuʻeina,” NW] loto.” (Faataoto 17:3; 1 Samuelu 16:7; 1 Nofoaiga a Tupu 29:17) Ua faalauiloa mai foʻi i le Eperu 4:13 e faapea: “E lē lilo foʻi se tasi mea na faia i ona [Ieova] luma, a ua taatia fua ma ua aliali mai o mea uma lava i lana silafaga, tatou te taʻu atu iā te ia a tatou amio.” E lē o se mea e ofo ai ona ua tuuina atu e Ieova i lona Alo o Iesu le tomai e suʻesuʻe ai loto. Ua faalauiloa mai e Iesu na toe faatuina e faapea: “O aʻu lava o lē suʻesuʻe i manatu ma loto; ou te avatua foʻi iā te outou taʻitoʻatasi e tusa ma a outou galuega.”—Faaaliga 2:23.

E lē o fai mai le Tusi Paia e mafai e Satani ona suʻesuʻe loto ma mafaufau o tagata. Ua iloa tino lava le moni o lenei mea e pei ona faamautinoa mai e le aposetolo o Paulo iā i tatou e faapea, o Kerisiano, “e lē vālea i ana [Satani] togafiti.” (2 Korinito 2:11) E lē tatau la ona tatou fefefe e faapea, e iai se tomai e sili atu o Satani e tatou te lē o iloaina.

Ae peitaʻi, e lē faapea ai ua lē iloa e lo tatou Fili mea uma tatou te vaivai ai. Ua loa tausaga o mataʻituina pea e Satani amioga a tagata. E lē tau manaʻomia ona ia iloaina mea o i o tatou mafaufau ina ia iloa ai po o ā ituaiga o amioga o tatou faia, ae o le mātauina po o ā faafiafiaga e masani ona tatou fiafia i ai, pe faalogologo foʻi i mea o tatou talanoa iai, ma isi mea faapena. O foliga o o tatou mata ma auala e tatou te gaoioi ai e mafai foʻi ona iloa ai po o ā mea o tatou mafaufau i ai po o o tatou faalogona.

E masani lava, e faaaogā e Satani auala ia na ia faaaogāina i le faatoʻaga o Etena, o pepelo, o le taufaasesē, ma le faia o faamatalaga sesē. (Kenese 3:1-5) Talu ai e lē manaʻomia ona fefefe ia Kerisiano ina neʻi iloa mai e Satani mea o i o latou mafaufau, ona latou popole ai lea e uiga i ni manatu atonu o le a taumafai Satani e tuu i o latou mafaufau. E manaʻo o ia ina ia “faaleagaina ma aveesea le upu moni” mai mafaufau o Kerisiano. (1 Timoteo 6:5, NW ) E lētioa ona faamatuu atu e le lalolagi a Satani le anoanoaʻi o faamatalaga faapiʻopiʻo ma faafiafiaga iʻuvale. Ina ia tetee atu i lenei osofaʻiga mataʻutia, e tatau i Kerisiano ona puipuia o latou mafaufau e ala i le pulouina o le “puloutau o le faaolataga.” (Efeso 6:17) E latou te faia lenei mea e ala i le faatumuina o o latou mafaufau i upu moni o le Tusi Paia ma ʻalofia ia fesootaʻiga lē tatau ma taaʻiga paʻū maulalo a le lalolagi a Satani.

O Satani o se fili mataʻutia. Ae e lē tatau ona tatou soona fefevavale iā te ia ma ana temoni. Ua faamautinoa mai e le Iakopo 4:7 iā i tatou e faapea: “Ia outou tetee atu i le tiapolo, ona sola ese ai lea o ia iā te outou.” Afai e tatou te mulimuli i lenei fautuaga, o le a mafai ai ona tatou fai atu e pei o Iesu, e lē maua e Satani se mea iā i tatou.—Ioane 14:30.