O Mea ua Aʻoaʻo Mai i Manulele

“IA OUTOU vaavaai i manu felelei; latou te lē lūlū saito, pe selesele, pe faaputu i fale saito, a e fagaina i latou e lo outou Tamā o i le lagi. E lē sili ea lo outou lelei i lo latou?” (Mataio 6:26) Na fetalai Iesu Keriso i upu nei i se lauga taʻutaʻua na faia i luga o se auvae mauga e latalata ane i le Sami o Kalilaia. Sa lē na o ona soo lana ʻaufaalogologo. Sa auai se motu o tagata e toʻatele mai vaega uma o le atunuu o ē sa ono avea ma ona soo mulimuli ane. O le toʻatele o i latou o tagata matitiva o ē na ō mai ma tagata mamaʻi iā Iesu ina ia faamālōlōina.—Mataio 4:23–5:2; Luka 6:17-20.

Ina ua uma ona faamālōlōina ia tagata mamaʻi uma, ona uaʻi atu loa lea o Iesu i manaʻoga faaleagaga e sili ona tāua. I lesona na ia aʻoaʻo atu, sa aofia ai ma lea e taʻua i luga.

Ua leva lava ona iai manu felelei. O nisi o i latou e aai i iniseti, o isi o fua ma fatu o laau. Afai ua saunia e le Atua le tele o na meaʻai mo manu felelei, e mautinoa lava la le mafaia ona ia fesoasoani i ana auauna ina ia maua a latou meaʻai i aso taʻitasi. E na te faia lenei mea e ala i le fesoasoani atu iā i latou e maua ni galuega ina ia maua ai ni tupe mo meaʻai. Po o lona faamanuiaina foʻi o i latou i le totōina o a latou lava meaʻai. E pei o taimi o faalavelave faafuaseʻi, e mafai ona uunaʻia e le Atua loto o tuaoi ma uō agalelei e faasoa atu i tagata matitiva po o ā lava ni meaʻai latou te maua.

E tele lava mea e mafai ona tatou aʻoaʻoina e ala i le mātauina lelei o olaga o manu felelei. Na foafoaina e le Atua ia manulele ma ni tomai ofoofogia e faia ai o latou lava faamoega ina ia mafai ai ona tausia a latou tama. Seʻi mātau ia ni faamoega eseese se lua. O le ata i le itu agavale, o le faamoega o se manulele e taʻua o le African rock martin. E fai i luga o se papa po o le puipui o se fale. O le taualuga o na faamoega o se papa e faamalumalu ifo po o le faatautau o se fale e pei ona faaalia i le ata. O le fola o le faamoega e faia i potopotoi palapala ua pipii faatasi e foliga i se ipu tī. E galulue faatasi le manu tane ma le fafine e aoao mai ia potopotoi palapala ma e ono alu ai se masina e faia ai le faamoega. Ia ona ufiufi lea i vaovao ma fulu o manu. E tofu sao foʻi i laʻua i le fafagaina o tamaʻi manulele. I le pito i lalo, o le faamoega o le manu tane o le masked weaver. E fausia e lenei manulele tōʻaga mai Aferika lona faamoega i lau o vao po o saega o vaovao. E mafai ona ia faaumaina le faamoega i le aso e tasi ma ono mafai ona lalaga e sili atu i le 30 nisi faamoega i se vaitaimi e tasi!

O le ā se lesona? Afai ua saunia e le Atua ia manulele ma tomai faapea ma le anoanoaʻi o mea e faia ai o latou faamoega, e mautinoa foʻi e mafai ona ia fesoasoani i ana auauna ina ia maua fale e manaʻomia. Ae peitaʻi na faaalia e Iesu e faapea, e iai se isi mea e tatau ona fai pe afai e tatou te mananaʻo e fesoasoani mai Ieova le Atua iā i tatou ia maua mea faaletino e manaʻomia. Na folafola mai e Iesu e faapea: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou.” (Mataio 6:33) Atonu e te tau mānatu e faapea, ‘O ā mea e aafia ai i le muaʻi saʻilia o le Malo o le Atua?’ O le a fiafia Molimau a Ieova ia e tufaina atu lenei mekasini, e taliina lenā fesili.