Se Tū Masani po o se Faiga Faatogafalea?

I NISI o kolisi i Polani, e fai ma masani a tamaiti aʻoga ona saotupe e faatau ai meaalofa mo o latou faiaʻoga, i le faamoemoe o le a maua ai ni maka lelei i a latou suʻega. E lētioa ona fesagaʻi se Kerisiano talavou e igoa iā Katarzyna ma se tulaga faigatā. Sa tau mānatu o ia e faapea: “Pe ou te foaʻi se tupe pe leai?” Sa manatu ana uō i le aʻoga e faapea, “O se tū masani. E lē se mea tele lava, ae e mafai ona e maua ai ni mea se tele, aiseā e te masalosalo ai?”

Ua faailoa mai e Katarzyna e faapea: “Ou te mā e taʻu atu, i loʻu tausaga muamua i le aʻoga, sa faia ai soʻu sao i le saogatupe. Ae faatoʻā ou iloa mulimuli ane, o lea ou te lagolagoina ia faiga faatogafalea ia e taʻusalaina i le Tusi Paia.” Sa ia manatua ia mau e faaalia ai e matuā lē fiafia lava Ieova i faiga faatogafalea. (Teuteronome 10:17; 16:19; 2 Nofoaiga a Tupu 19:7) Ua faapea mai ia Katarzyna: “Ua ou iloa e faigofie lava ona lolo i omiga mai uō. Sa ou toe mafaufau i le mataupu, ma e talu mai lenā taimi e leʻi toe faia ai lava saʻu vaega i lea masaniga.” I le tolu tausaga ua mavae, e ui lava i tauemuga mai isi tamaiti, ae sa mafai ona ia faamatala atu i nisi e faapea, e lē auai o ia i le aoina o nei tupe mo “meaalofa,” ona o ona talitonuga i le Tusi Paia.

Sa faitioina e nisi ia Katarzyna e faapea o lona manatu faapito ma se uiga e fia tau faaese. Fai mai a ia, “i le taimi nei, e matou te lē o faifai mea faatasi ma nisi o i latou. Ae i le isi itu, e toʻatele lava e latou te faaaloalo i oʻu manatu, o se mea ua ou matuā fiafia ai lava.” Ua iloa uma lava ia Katarzyna o se tasi o Molimau a Ieova, o lē na te faatatauina mataupu silisili o le Tusi Paia i lona olaga i aso faisoo.