E Moomia e i Tatou Uma le Alofa

E FAANAUNAU tagata uma i le alofa po o le ā lava lona matua, lana gagana ma po o fea foʻi le atunuu e aumau ai. E lē mafai ona fiafia se tagata seʻi vaganā ua faamalieina lenā faanaunauga. Na tusi mai se alii e suʻesuʻe i mataupu faafomaʻi: “O le alofa ma faiā lelei ma isi, o māfuaaga na tatou te mamaʻi ma malolosi ai, faanoanoa ma fiafia ai, mafatia ma mālōlōina ai. Ana iai se fualaau fou e faapena ona aafiaga, semanū o le fualaau tonu lenā e tusi e fomaʻi uma mo a latou tagata mamaʻi. O le solitulafono le lē tusiaina o lenā fualaau.”

Peitaʻi, o tagata i aso nei aemaise le ʻaufaasalalau ma ē taʻutaʻua, e foliga mai ua tāua atu iā i latou le tamaoaiga, le pule, le lauiloa ma feusuaʻiga. Ua manatu māmā i latou i le faanaunauga masani o le tagata mo ni faiā lelei ma le māfana. Ua faamatilatila e faiaʻoga sini ma galuega i le lalolagi, ma o mea na ua latou fua i ai le manuia o olaga o tagata. E moni e tāua aʻoaʻoga ma le faaleleia o tomai o se tagata, ae pe e talafeagai ea le tausinio e ausia tulaga na ma lē maua ai se taimi e faatasi ai ma aiga ma uō? I aso anamua, na faatusa ai e se tusitala na silafia lelei uiga masani o tagata, se tasi e iai lona tomai ae e leai sona alofa e faapea o se “ʻapa memea taalili, po o se sumepalo tagitagi.” (1 Korinito 13:1) Atonu e oo ina mauʻoa ma taʻutaʻua lenā tagata, ae e lē maua e ia le fiafiaga moni.

Na faasilisili i aʻoaʻoga a Iesu Keriso le alofa i le Atua ma tuaoi, ma na alofa o ia i tagata ma silafia lelei foʻi i latou. Na ia fetalai: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. . . . E te alofa atu i lē lua te tuaoi, ia pei o oe lava iā te oe.” (Mataio 22:37-39) Na o i latou e mulimuli i na fetalaiga, e avea ma soo moni o Iesu. O le māfuaaga lenā na fetalai ai o ia: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

E faapefea la ona atiina aʻe e se tagata le alofa i aso nei? E faapefea foʻi ona aʻoaʻoina e mātua le alofa iā latou fanau? E maua tali i fesili na, i le mataupu o sosoo mai.

[Ata i le itulau 3]

O se luʻi le atiina aʻe o le alofa i lenei lalolagi matapeʻapeʻa