“Faauta, O Lo Tatou Atua Lenei”

O faamatalaga o loo i suʻesuʻega e lua nei, o loo faavae mai i le tusi Faalatalata Atu iā Ieova, lea na tatalaina i tauaofiaga itumalo o le 2002/2003 i le lalolagi aoao.—Tagaʻi i le mataupu “Na Faamalieina ai Loʻu Loto,” i le itulau e 20.

“Faauta, o lo tatou Atua lenei; sa tatou faatalitali iā te ia, ua ia faaolaina foʻi i tatou; o Ieova lava lenei.”—ISAIA 25:9.

1, 2. (a) O le ā le taʻu a Ieova i le augātamā o Aperaamo, ma o le ā atonu tatou te taumānatu i ai? (e) Ua faapefea ona faamautinoa mai e le Tusi Paia, e mafai moni ona tatou faalatalata atu i le Atua?

‘O LAʻU uō.’ O le fetalaiga lenā a Ieova, o Lē na Foafoaina le lagi ma le lalolagi, e faatatau i le augātamā o Aperaamo. (Isaia 41:8) Seʻi tau ina manatu i lenei tulaga—o le olioli o se tagata faatauvaa i se faauōga ma le Alii Silisili Ese i le lagi ma le lalolagi aoao! Atonu e te taumānatu ‘Faamata e mafai ona ou faalatalata atu faapena i le Atua?’

² Ua faamautinoa mai e le Tusi Paia iā i tatou, e mafai moni lava ona tatou faalatalata atu i le Atua. Na maua e Aperaamo se faiā vavalalata faapena ona ‘na faatuatua i le Atua.’ (Iakopo 2:23) E faapena foʻi i aso nei, ‘e fefaauoaʻi Ieova ma ē ua sao a latou amio.’ (Faataoto 3:32) Ua uunaʻia i tatou e le Tusi Paia i le Iakopo 4:8 e faapea: “Ia outou faalatalata atu i le Atua, ona faalatalata mai lea o ia iā te outou.” Afai la e tatou te uia laasaga ina ia faalatalata atu ai iā Ieova, o le mea moni, o le a faapena foʻi ona ia faalatalata mai. Po o le uiga ea o le faamatalaga lenā a le Tusi Paia, o i tatou o tagata agasala e lē lelei atoatoa, e uia le laasaga muamua? E mautinoa lava e leai. Ua māfua ona tatou mafuta vavalalata ma Ieova ona ua māeʻa ona ia uia muamua ni laasaga tāua se lua.—Salamo 25:14.

3. O ā laasaga e lua ua uia e Ieova ina ia mafai ona tatou olioli ai i se faauōga ma ia?

³ Muamua, sa finagalo Ieova ina ia “foaʻiina atu [e Iesu] lona ola e fai ma togiola e sui aʻi tagata e toʻatele.” (Mataio 20:28) O lenā taulaga togiola ua mafai ai ona tatou faalatalata atu i le Atua. O loo faapea mai le Tusi Paia: “O i tatou, ua tatou alolofa, auā na ia muaʻi alofa mai iā te i tatou.” (1 Ioane 4:19) Ioe, talu ai sa “muaʻi  alofa mai iā te i tatou” le Atua, na ia faia ai le faavae mo i tatou ina ia maua ai se faauōga ma ia. Lona lua, ua Ia faailoaina mai o ia iā i tatou. I so o se faauōga lava tatou te faia, e mafai ona iai se faiā mautū pe a tatou iloa lelei le tagata, ma tatou fiafia ma faatāua ona uiga. Seʻi manatu foʻi i le uiga o le manatu lea. Pe ana faapea o Ieova o se Atua e lē finagalo e faailoa mai o ia, semanū e lē taitai mafai ona tatou faalatalata atu iā te ia. Peitaʻi, e lē faanaunau e natia o ia, ae o loo finagalo Ieova ina ia tatou iloa lelei o ia. (Isaia 45:19) I lana Afioga le Tusi Paia, ua faailoa mai ai e ia o ia lava i ni faaupuga e mafai ona tatou malamalama i ai—o se faamaoniga lenā e lē gata e alofa mai Ieova, ae e finagalo foʻi ina ia tatou iloa ma alolofa atu iā te ia o lo tatou Tamā o i le lagi.

4. O ā ni o tatou faalogona e faatatau iā Ieova a o tatou iloaina atili ona uiga?

⁴ Po ua e vaai i se tamaitiiti a o tusi lona lima e faasino atu lona tamā i ana uō, ona faapea ane lea i sona leo fiafia ma le mitamita, “Vaai, o loʻu tamā lale”? Ua iai i tagata tapuaʻi o le Atua māfuaaga uma e latou te lagonaina ai na faalogona e faatatau iā Ieova. Ua valoia mai e le Tusi Paia le taimi o le a alalaga ai tagata faamaoni e faapea: “Faauta, o lo tatou Atua lenei.” (Isaia 25:8, 9) O le tele lava o lou malamalama i uiga o Ieova, o le atili foʻi lenā ona e lagona lou mauaina o se Tamā e sili ona lelei. Ioe, o le malamalama i uiga o Ieova ua tele ai māfuaaga e tatou te faalatalata atu ai iā te ia. Seʻi o tatou iloiloina la, le auala ua faailoa mai ai e le Tusi Paia uiga autū o Ieova—o le malosi, faamasinotonu, atamai ma le alofa. O le a tatou talanoaina i le mataupu lenei uluaʻi uiga e tolu.

“E Silisili Ese Lona Malosi”

5. Aiseā ua talafeagai ai ona taʻua Ieova o lē “e ou le malosi uma lava,” ma o ā auala ua ia faaaogāina ai lona malosi uma lava?

⁵ O Ieova “e silisili ese lona malosi.” (Iopu 37:23) O loo faapea mai le Ieremia 10:6: “E leai lava sē tusa ma oe, Ieova e; e sili lava oe, ma lou suafa e sili lea ona malosi.” I le lē pei o isi foafoaga, o le malosi o Ieova e lē gata mai. Ona o lenā māfuaaga, ua taʻua ai o ia o lē “e ou le malosi uma lava.” (Faaaliga 15:3) E faaaogā e Ieova lona malosi uma lava po o lona mana uiga ese ina ia foafoa, faaumatia, puipuia ma toe faaleleia ai se mea. Seʻi manatu i ni faaaʻoaʻoga se lua—o lona mana e foafoaina ai mea, ma lona mana e puipuia ai.

6, 7. E faapeʻī le malosi o le lā, ma o le ā le mea moni ua faamaonia mai ai?

⁶ Pe a e tū i fafo i se aso maninoa, o le ā e te lagonaina i lou tino? O le māfanafana o le lā. E ui i lea, o le mea moni, o loo e lagonaina le malosi o Ieova lea na foafoaina ai mea. E faapeʻī le malosi o le lā? O le aasa o le mata o le lā, e tusa lea ma le 27 miliona tikeri Fahrenheit (15 miliona tikeri Celsius). Afai e te aumaia sina vaega o le mata o le lā e pei lona laʻitiiti o le ulu o se pine ma tuu i le lalolagi, e lē mafai ona e faalatalata atu i ai ma le saogalemu i le tusa o le 90 maila  (150 kilomita) mai i lenā puna vevela e sili ona itiiti! I sekone taʻitasi, e faamatuu mai ai e le lā se malosi e talitutusa ma le pāpā o le faitau selau miliona o pomu niukilia. Peitaʻi, o loo faataamilomilo le lalolagi i lenā vevela mataʻutia i se mamao ua talafeagai lelei. Pe ana fai e latalata tele atu, semanū ua liu ausa uma le vai o le lalolagi; pe ana fai foʻi e mamao tele mai, semanū ua liu aisa uma. Po o le ā lava le tulaga o nei mea, ae na semanū e leai se ola e mafai ona iai i lo tatou lalolagi.

⁷ E toʻatele tagata e lē manatu mamafa i le lā, e ui ina o loo faalagolago i ai o latou lava ola. O lea, ua latou lē malamalama ai i le mea e mafai ona aʻoaʻoina ai i tatou mai le lā. Ua faapea mai le Salamo 74:16 e uiga iā Ieova: “O oe . . . na e saunia le malamalama ma le lā.” Ioe, o loo aumaia e le lā le viiga iā Ieova “o lē na faia le lagi atoa ma le lalolagi.” (Salamo 146:6) Ua na o se tasi lea o foafoaga ua mafai ona aʻoaʻoina ai i tatou e uiga i le malosi lē mafaatusalia o Ieova. O le tele lava o mea tatou te aʻoaʻoina e uiga i le malosi o Ieova lea na foafoaina ai mea, o le loloto foʻi lenā o lo tatou faaaloalo iā te ia.

8, 9. (a) O le ā le talafaatusa faagaeeloto e faaalia ai le finagalo malie o Ieova e puipuia ma tausia ona tagata tapuaʻi? (e) Na faapefea ona tausia e le leoleo mamoe ana mamoe i ona pō o le Tusi Paia, ma o le ā ua tatou iloa mai ai e faatatau i lo tatou Leoleo Mamoe Silisili?

⁸ O loo faaaogā foʻi e Ieova lona malosi tele ina ia puipuia ai ana auauna ma tausia ai i latou. Ua faaaogā e le Tusi Paia nisi o tala faatusa manino toe faagaeeloto ina ia faamatala ai folafolaga a Ieova e uiga i lana tausiga alofa. O se faaaʻoaʻoga, ia mātau foʻi le Isaia 40:11. O loo faatusa e Ieova ia lava i se leoleo mamoe, ae faatusa ona tagata i se lafu mamoe. E tatou te faitau ai e faapea: “Na te leoleoina lona lafu e pei o le leoleo mamoe; na te sapaia tamaʻi mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.” Po o e tau mātauina mai le mea o loo faamatala i lenei fuaiupu?

⁹ E itiiti ni manu e manaʻomia le tausiga ma le puipuiga e pei o mamoe. Sa tatau i se leoleo mamoe i ona pō o le Tusi Paia ona lototele e puipuia lana lafu mai luko, o urosa, ma leona. (1 Samuelu 17:34-36; Ioane 10:10-13) Ae sa iai foʻi taimi na manaʻomia ai le faapelepele pe a puipuia mamoe. O se faaaʻoaʻoga, a mamao ese mai i le lafu le mea e fanau ai se mamoe, e faapefea ona vaavaai e le leoleo mamoe le tamaʻi mamoe ua faatoʻā fanau? Atonu na te tauaveina mo ni nai aso “i lona fatafata”—e aui i lona ofu talaloa. E faapefea ona iai se tamaʻi mamoe i le “fatafata” o le leoleo mamoe? Atonu e faalatalata atu le tamaʻi mamoe i le leoleo mamoe ma suasua lemū lona vae. Peitaʻi, o le leoleo mamoe, o ia lea e punou ifo, sii i luga, ma tuu le tamaʻi mamoe ia saogalemu i lona fatafata. Maʻeu se ata alofa o le finagalo malie o le Leoleo Mamoe Silisili ina ia puipuia ma tausia ana auauna!

10. O le ā le puipuiga ua saunia e Ieova i aso nei, ma aiseā e tāua tele ai lenā puipuiga?

¹⁰ Ae e sili atu mea ua faia e Ieova na i lo o le tau ina folafola mai o se puipuiga. I le vaitaimi o le Tusi Paia, sa ia faaalia ai i ni auala faavavega lona mafai ona ia “laveaʻi mai ai i ē amio Atua ai le tofotofoga.” (2 Peteru 2:9) Ae ā aso nei? Ua tatou malamalama, na te lē faaaogāina lona malosi ina ia puipuia ai i tatou mai mala uma i le taimi nei. Peitaʻi, na te tuuina mai se mea e sili ona tāua—o le puipuiga faaleagaga. E puipuia i tatou e lo tatou Atua alofa mai le faaleagaina faaleagaga e ala i le saunia o mea tatou te manaʻomia ina ia tutumau ai i tofotofoga ma leoleomalu ai la tatou faiā ma ia. O se faaaʻoaʻoga, o loo taʻua i le Luka 11:13 e faapea: “O outou e leaga, afai ua iloa e outou ona avatu o mea lelei mā a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ole atu ai iā te ia?” E mafai e lenā mana malosi ona fesoasoani mai iā i tatou e manumalo ai i so o se tofotofoga po o se faafitauli tatou te ono fetaiaʻi. (2 Korinito 4:7) Ua faia e Ieova fuafuaga ina ia faasaoina ai o tatou ola, e lē mo na o ni nai tausaga, ae e oo i le faavavau. I le manatu atu i le tulaga lenā, e ao ona tatou vāai i mafatiaga o lenei faiga o mea o se tulaga e “vave mavae.” (2 Korinito 4:17) Pe tatou te lē tosina atu ea i se Atua o lē o loo matuā faaaogāina lona malosi mo i tatou?

 “E Fiafia Ieova i le Faamasinoga”

11, 12. (a) Aiseā e tatou te tosina atu ai iā Ieova ona o lona faamasinotonu? (e) O le ā le faaiʻuga na faia e Tavita i le faamasinotonu o Ieova, ma e faapefea i faaupuga na o le Tusi Paia ona faamāfanafanaina ai i tatou?

¹¹ E faia e Ieova le mea e tonu ma talafeagai, ma na te faia faapena i taimi uma, e aunoa ma le faailoga tagata. O le faamasinotonu tauatua, e lē o se uiga sauā ma ʻinaʻinā e faamamao ese ai i tatou, ae o se uiga matagofie e tatou te tosina atu ai iā Ieova. O loo faamatala manino e le Tusi Paia ni vala faamāfanafanaloto o lenei uiga. Seʻi o tatou iloiloina la, ni auala se tolu o loo faatinoina ai e Ieova lona faamasinotonu.

¹² Muamua, o le faamasinotonu o Ieova ua uunaʻia ai o ia ina ia faaalia le maufaatuatuaina ma le faamaoni i ana auauna. Na tofo le faisalamo o Tavita i lenei vala o le faamasinotonu o Ieova. O le ā le faaiʻuga na faia e Tavita ona o mea na tutupu iā te ia ma lona suʻesuʻe i ala o le Atua? Na taʻutino mai o ia: “E fiafia Ieova i le faamasinoga, na te lē tuua foʻi ona tagata amio Atua; e leoleoina i latou e faavavau.” (Salamo 37:28) Maʻeu se faamautinoaga faamāfanafanaloto! E lē taitai ona tuulafoaʻiina e lo tatou Atua ē e faamaoni iā te ia. O le mea lea e mafai ai ona tatou faalagolago i lona faalatalata mai ma lana tausiga alofa. O lona faamasinotonu o se faamautinoaga lenā o lenei mea!—Faataoto 2:7, 8.

13. Na faapefea ona faamaonia i le Tulafono na tuuina atu iā Isaraelu, le manatu mamafa o Ieova i tagata matitiva?

¹³ Lona lua, o le faamasinotonu tauatua e mataalia i manaʻoga o ē e puapuagatia. O le manatu mamafa o le Atua mo ē matitiva e faamaonia lea i le Tulafono na ia tuuina atu iā Isaraelu. O se faaaʻoaʻoga, na avatu i le Tulafono se fuafuaga e faamautinoa ai ua tausia lelei tamaiti ua mātuaoti ma fafine ua oti a latou tane. (Teuteronome 24:17-21) I le silafiaina o le faigatā o olaga o na aiga, na avea ai Ieova lava ia o so latou tamā e Faamasino ma Puipuia i latou. (Teuteronome 10:17, 18) Na ia lapataʻia tagata Isaraelu, afai e latou te sauāina fafine ma tamaiti ua lē malupuipuia, na te faafofogaina lo latou alalaga atu. Na ia fetalai e pei ona faamauina i le Esoto 22:22-24 e faapea: “E matuā tupu ai loʻu ita.” E ui lava o le ita e lē o se uiga autū lea o le Atua, ae e faamalosia o ia ina ia faaoo mai lona toʻasā amiotonu ona o gaoioiga lē tonu, aemaise pe afai o ē ua aafia ai o loo iai i se tulaga pagatia.—Salamo 103:6.

14. O le ā se faamaoniga sili ona mataʻina o le lē faailoga tagata o Ieova?

¹⁴ Lona tolu, i le Teuteronome 10:17, ua faamautinoa mai ai e le Tusi Paia iā i tatou e faapea, o Ieova e “lē faailogaina tagata, e lē talia foʻi e ia se taui.” I le lē pei o le toʻatele o tagata o loo iai le pule po o le malosi, e lē taaʻina Ieova i ni ʻoa faaletino po o le vaaiga faaletagata. Na te lē faaalia le faailoga tagata, pe faasili i se tasi. O se faamaoniga sili ona mataʻina o lona lē faailoga tagata, o lenei: E lē o faatapulaaina i na o sina vaega filifilia le avanoa e avea ai ma ona tagata tapuaʻi moni ma faapea ona ola ai e faavavau. Na i lo lenā, ua taʻua i le Galuega 10:34, 35: “E lē faailogaina tagata e le Atua; a e peitaʻi o lē mataʻu iā te ia i nuu uma lava, ma fai le amiotonu, ua talia i latou e ia.” O lenei faamoemoe o loo tatalaina atu i tagata uma e tusa lava po o le ā lo latou tulaga tau tamaoaiga, lanu, po o le atunuu o loo soifua ai. Pe e lē o le tulaga aupito sili ea lenā ona maualuga o le faamasinotonu? O le mea moni, o se malamalamaga lelei i le faamasinotonu o Ieova e tatou te tosina atu ai iā te ia!

‘Auē! Le Loloto o le Poto o le Atua’

15. O le ā le atamai, ma e faapefea ona faaalia e Ieova?

¹⁵ Na uunaʻia le aposetolo o Paulo e alaga e pei ona faamauina i le Roma 11:33 e faapea: “Auē! le loloto . . . o le poto atoa ma le silafaga a le Atua.” Ioe, a o tatou iloiloina vala eseese o le poto po o le atamai maoaʻe o Ieova, ua faapea ona faatumulia ai i tatou i le maofa. E faapefea la ona tatou faamatalaina lenei uiga? O le atamai, o lona uiga, o le faatatauina lea o le iloa, le faautauta, ma le malamalama, ina ia mafai ona iʻu i ni āuga lelei. I le faatinoina o le lautele o lona silafia ma le loloto o lona malamalama, e faia pea e Ieova na filifiliga e sili ona lelei, ma faatino na filifiliga i se auala e lelei atoatoa.

16, 17. E faapefea ona faamaonia e foafoaga a Ieova le tele o lona atamai? Ia fai se faataʻitaʻiga.

¹⁶ O ā ni faamaoniga patino o le tele o le atamai o Ieova? Ua faapea mai le Salamo 104:24:  “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.” O le mea moni, o le tele o lo tatou iloa e uiga i mea na faia e Ieova, o le tele foʻi lenā o lo tatou maofa i lona atamai. Ioe, ua aʻoaʻoina e saienitisi le tele o mea e ala i le suʻesuʻeina o foafoaga a Ieova! Ua iai foʻi se matātā ua taʻua o le biomimetics, lea e taumafai e matuā malamalama ma faataʻitaʻi i fausaga o mea na foafoaina e Ieova.

¹⁷ O se faataʻitaʻiga, atonu ua e silaloa ona o se faamoega o se apogaleveleve. O le mea moni, o se fausaga ofoofogia. Ua faia aʻe lea i ni mea e foliga mai e vaivai, ae e sili atu ona malolosi na i lo o le uʻamea, e sili atu ona malō na i lo o se ofu e puipuia ai mai pulufana. O le ā tonu lava le uiga o lenei mea? Seʻi tau ina manatu i se faamoega apogaleveleve ua faasolo ina telē seʻia oo ina pei lona telē o se upega o loo faaaogā e vaafagota. O le malosi o se faamoega apogaleveleve faapena, e mafai ona taofia ai se vaalele laʻupasese i le vanimonimo! Ioe, na faia e Ieova na mea uma i le atamai.

18. E faapefea ona iloa le atamai o Ieova i lona faaaogāina o tagata e tusia lana Afioga, le Tusi Paia?

¹⁸ O le faamaoniga sili o le atamai o Ieova e mafai ona maua i lana Afioga, le Tusi Paia. O fautuaga atamai o loo iai ua faailoa mai ai iā i tatou le auala e sili ona lelei e ola ai. (Isaia 48:17) Ae o loo vaaia foʻi le maoaʻe o le atamai o Ieova i le auala na tusia ai le Tusi Paia. E faapefea? I lona atamai, na filifili ai Ieova e faaaogā tagata e tusia lana Afioga. Afai na ia faaaogāina agelu, po o le a tutusa ea le aogā o le Tusi Paia? E moni, e ono mafai e agelu ona faaataina mai Ieova i lo latou tulaga maualuga ma faamatalaina mai lo latou lava tuutoina atu iā te ia. Ae pe o le a mafai ea ona tatou malamalama i manatu o foafoaga agaga lelei atoatoa, o ē e sili mamao atu lo latou poto, tomai ma le malosi na i lo i tatou?—Eperu 2:6, 7.

19. O le ā le faaaʻoaʻoga e iloa ai o le faaaogāina o tagata e fai ma tusitala, o se mea ua atili ai ona māfana ma matagofie ai le Tusi Paia?

¹⁹ O le faaaogāina o tagata e tusia, ua maua ai i le Tusi Paia le tele o lagona māfana ma le aogā. O ona tusitala o ni tagata sa iai ni faalogona e pei foʻi o i tatou. Ona o le lē lelei atoatoa, sa latou fesagaʻi ai foʻi ma tofotofoga ma omiga e pei o i tatou. I nisi o tulaga, sa latou tusia e uiga i o latou lava faalogona ma o latou lava mafatiaga. (2 Korinito 12:7-10) Na latou tusiaina la faaupuga e lē mafai ona faamatalaina e agelu. Seʻi fai ma faaaʻoaʻoga upu a Tavita ua faamauina i le Salamo 51. E tusa ai ma le ulutala, sa tuufaatasia e Tavita lenei salamo ina ua mavae lana agasala matuiā. Na ia sasaa atu lona loto, i  le faaalia o le faanoanoa ma ʻaiʻoi atu mo le faamagaloga a le Atua. Ua faapea mai le fuaiupu e 2 ma le 3: “Ia e matuā fufulu mai iā te aʻu i laʻu amio leaga, ma ia e faamamā mai iā te aʻu i laʻu agasala. Auā ua ou iloa e aʻu loʻu solitulafono; e lē aunoa foʻi ona i ai i oʻu luma o laʻu agasala.” Mātau le fuaiupu e 5: “Faauta, na fanaua aʻu ma le amio leaga; na ou i ai foʻi i le manava o loʻu tinā ma le agasala.” Ua faapea mai foʻi le fuaiupu e 17: “O taulaga i le Atua, o le loto momomo lea; le Atua e, e te lē inosia le loto momomo ma le nutimomoia.” Pe mafai ea ona e lagona le matuā ōia o faalogona o le tusitala? O ai ea se tasi, ae vaganā se tagata lē lelei atoatoa, e mafai ona ia faaalia ni lagona loloto faapena?

20, 21. (a) E ui lava na faaaogāina tagata e fai ma tusitala, ae aiseā ua iai ai i le Tusi Paia le atamai o Ieova? (e) O le ā o le a talanoaina i le mataupu o loo sosoo mai?

²⁰ E ala i lona faaaogāina o na tagata lē lelei atoatoa, ua foaʻiina mai e Ieova le mea tonu lava e tatou te manaʻomia—o se tusi “e mai le Agaga o le Atua” ae o loo tumu i lagona o tagata. (2 Timoteo 3:16) Ioe, sa taʻitaʻia e le agaga paia o le Atua na tusitala. O le mea lea na latou tusiaina ai le atamai o le Atua, ae lē o o latou lava manatu. O lenā atamai e maufaatuatuaina atoatoa. E sili mamao atu na i lo o lo tatou lava atamai o lea ua uunaʻia ai ma le alofa i tatou e le Atua e faapea: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) O le utagiaina o lenā fautuaga atamai, e tatou te vavalalata atu ai i lo tatou Atua e tumu i le atamai.

²¹ O le uiga e sili ona tausaafia ma matagofie i uiga uma o Ieova, o le alofa. O le a talanoaina i le mataupu o loo sosoo mai le auala ua faaalia ai e Ieova lona alofa.

E te Manatua?

• O ā laasaga ua uia e Ieova ina ia mafai ai ona tatou maua se faauōga ma ia?

• O ā ni faaaʻoaʻoga o le mana o Ieova e foafoaina ai mea ma lona mana e puipuia ai?

• O ā auala e faaalia ai e Ieova lona faamasinotonu?

• Ua faapefea ona iloa le atamai o Ieova i ana foafoaga ma le Tusi Paia?

[Fesili mo le Suʻesuʻega]

[Ata i le itulau 10]

E pei o se leoleo mamoe o loo tauave se tamaʻi mamoe i lona fatafata, e tausia ma le alofa e Ieova Ana mamoe

[Ata i le itulau 13]

E iloa le atamai o Ieova i le auala na tusiaina ai le Tusi Paia