Fesili Mai le ʻAufaitau

Aiseā ua taʻua ai Satani i le Eperu 2:14, “o lē ua i ai le mālō e oti ai”?

Pe a faapuupuu le manatu, o le uiga o le tala a Paulo, e mafai e Satani lava ia pe e ala foʻi i ona sui, ona faapogaia le oti o tagata. E ōgatusa lenā manatu ma le fetalaiga a Iesu e faapea o Satani “o le fasioti tagata ia talu le amataga.”—Ioane 8:44.

E ono tupu le fenuminumiaʻi ona o le auala ua faaliliu ai e isi Tusi Paia le mau i le Eperu 2:14, e faapea “o le pule e oti ai.” (King James Version) O lenā faaliliuga e foliga mai ai e mafai e Satani ona fasiotia so o se tasi lava e loto i ai. Ae e lē o le tulaga lenā. Anafai e mafai e Satani ona fasiotia so o se tagata e loto i ai, e lē taumatea ua leva ona ia faaumatiaina auauna uma a Ieova.—Kenese 3:15.

O le faaupuga Eleni ua faaliliuina “o lē ua i ai le mālō e oti ai” i le Tusi Paia Samoa (1969) o le “kraʹtos tou tha·naʹtou.” O le tou tha·naʹtou o se vaega o le upu e faauiga atu i le “oti.” A o le kraʹtos o lona uiga o le “malosi po o le mana.” E tusa ai ma se lomifefiloi o le Tusi Paia, o le uiga o lenā faaupuga, “o le iai o le malosi na i lo le faatinoina o le malosi.” (Theological Dictionary of the New Testament) O lea la, e leʻi manatu Paulo i le Eperu 2:14 e faapea, o loo iā Satani le pule silisili i le oti. Na i lo lea, na faasino atu Paulo i le malosi po o le tomai o Satani e faapogaia ai le oti.

E faapefea la ona faaaogā e Satani lona “mālō e oti ai”? O loo faamatala e le tusi o Iopu se mea e na o le faatasi lava le taimi na tupu ai. Fai mai le tala, na faaagi mai e Satani se matagi tele ma ‘faapogaia ai le oti’ o fanau a Iopu. Ae seʻi mātau foʻi, na mafai e Satani ona faia lenā mea ona o le faatagaga a le Atua lea na māfua i se luʻi tāua sa moomia ona foʻia. (Iopu 1:12, 18, 19) E leʻi mafai la ona fasiotia e Satani Iopu auā e leʻi faatagaina o ia e le Atua. (Iopu 2:6) Ua faailoa mai i lenā mea, e ui lava sa iai le taimi na faapogaia ai e Satani le oti o tagata faamaoni, ae e lē tatau ona tatou fefefe fua neʻi mea ua faapogaia e Satani lo tatou oti pe a manaʻo i ai.

Ua faaaogā foʻi e Satani tagata ina ia faapogaia le oti o isi tagata. O le māfuaaga lea ua toʻatele ai Kerisiano ua maliliu ona o lo latou faatuatua, o isi na fasiotia e tagata fouvale a o isi na fasiotia e aunoa ma ni māfuaaga tatau, ona o faatonuga a le malo po o faamasino faapiʻopiʻo.—Faaaliga 2:13.

E lē gata i lea, e iai taimi ua faapogaia ai e Satani le oti e ala i le faaaogāina o tuʻinanauga o tagata. I tuā i aso o Isaraelu, na fautua ai e le perofeta o Palaamo tagata Moapi e faaosooso i tagata Isaraelu ina ia ‘solia ai le afioga a Ieova.’ (Numera 31:16) Na iʻu ina feoti ai tagata Isaraelu e sili atu ma le 23,000. (Numera 25:9; 1 Korinito 10:8) E faapena foʻi ona lolo atu isi i “togafiti” a Satani ma faapea ona aafia ai i amioga lē mamā ma isi amioga faalēmataʻu. (Efeso 6:11) E moni e masani ona lē muta ai loa le ola o na tagata. Peitaʻi ane, ua lē mautinoa ai lo latou avanoa mo le ola e faavavau, ma o le auala lenā ua faapogaia ai e Satani lo latou oti.

E ui lava tatou te iloaina le malosi o Satani e faapogaia ai mea leaga, ae e lē o se mea o le a tatou matataʻu ai fua iā te ia. Ina ua faapea mai Paulo sa iā Satani le mālō i le oti, na faapea mai foʻi o ia na maliu Keriso “ina ia faaumatia e ia i lona maliu o [Satani] . . . ma tuusaunoaina ai i latou uma, o ē na faapologaina i o latou olaga uma ona o le mataʻu i le oti.” (Eperu 2:14, 15) Ioe, na totogi e Iesu le togiola ma faapea ona tuusaʻoloto ai tagata amiotonu mai le agasala ma le oti.—2 Timoteo 1:10.

Ioe, o se manatu e faapopoleina ai le mafai e Satani ona faapogaia le oti, ae tatou te mautinoa e mafai e Ieova ona toe faaleleia aafiaga leaga ua faapogaia e Satani ma ona sui. Ua faamautinoa mai e Ieova o le a “faaumatia” e Iesu “galuega a le tiapolo.” (1 Ioane 3:8) E ala i le mana o Ieova, o le a faatūina ai e Iesu ē uma ua maliliu ma faapea ona tafieseaina le oti. (Ioane 5:28, 29) Ona faaalialia lea e Iesu le gata mai o le malosi o Satani e ala i le lafoina o ia i le to e lē gata, ma mulimuli ane faaumatia e faavavau.—Faaaliga 20:1-10.