Le Auala e Atiina Aʻe ai le Alofa Moni

“O le alofa o le vaifofō o mea tigā uma i le olaga; e lē mafai ona soifua se tasi e aunoa ma le alofa.”—Mauaina o Aogā Silisili o le Olaga, tusia i le gagana Peretania e Joseph Johnson, 1871.

E FAAPEFEA ona iloa e le tagata le auala e faaalia ai le alofa? Pe e ala ea i le suʻesuʻeina o faalogona faale-tagata, faitauina o tusi e faaleleia ai olaga, matamata i se ata tifaga i faiga uō a se alii ma se tamaʻitaʻi? Ailoga! E muamua lava ona iloa e le tagata le auala e alofa ai, e ala i le faaaʻoaʻoga ma le toleniga a ona mātua. E iloa e tamaiti le uiga moni o le alofa pe afai latou te ola aʻe i se siʻomaga o loo iai le lotoaiga, e latou te vāai i le auala e tausia ma puipuia ai i latou e mātua, e talanoa ma i latou, ma le matuā naunau atu o mātua iā i latou. E iloa foʻi e le fanau le auala e faaalia ai le alofa, pe afai e aʻoaʻo i latou e mātua ina ia iloaina tapulaa e saʻo ma sesē.

O le alofa moni e lē tau ina agalelei atu i isi. Peitaʻi, e faaauau ona gaoioi mo le lelei o isi e tusa lava pe lē o malamalama atoatoa i le tāua o le mea o tupu, lea e masani ona oo i le fanau pe a aʻoaʻia i latou. O le faaaʻoaʻoga silisili o se tasi e lē manatu faapito lona alofa, o Lē na Foafoaina Mea. Na tusi le aposetolo o Paulo: “Loʻu atalii e, aua le faatauvaa i lou manatu le aʻoaʻiga a le Alii; aua foʻi le faavaivai pe a aʻoaʻiina oe e ia. Auā o lē ua alofagia e le Alii, ua aʻoaʻi atu o ia iā te ia.”—Eperu 12:5, 6.

Mātua e, e faapefea ona oulua faaaʻoaʻo atu iā Ieova i le auala e faaalia ai le alofa i lo oulua aiga? Ma o le ā le tāua o le lua faaaʻoaʻoga i la oulua faiā o se ulugalii?

Aʻoaʻo Atu le Alofa e Ala i la Oulua Faaaʻoaʻoga

Afai o oe o se tane, pe e te tagaʻi i lau avā o ia o se tagata e tāua, e te faaaloalo ma ava iā te ia? Afai o oe o se avā, pe e te alofa ma lagolagosua i lau tane? Ua faapea mai le Tusi Paia e tatau ona iai le alofa ma le faaaloalo i le va o le tane ma lana avā. (Efeso 5:28; Tito 2:4) Afai o lea, ua vāai la le fanau i le auala e faatino ai le alofa faa-Kerisiano. Maʻeu se faaaʻoaʻoga malosi ma aogā ua faia e mātua!

E faatupuina foʻi e mātua le alofa i le aiga pe afai la te tausisi i tapulaa maualuluga ua faataatia e le aiga i vala e pei o faafiafiaga, amioga, sini ma mea e faamuamua. Ua iloa e tagata i le lalolagi aoao, le telē o le aogā o le Tusi Paia i le faatutūina o tapulaa faapena mo le aiga, ma ua avea i latou ma faamaoniga e iloa ai o le Tusi Paia “e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu.” (2 Timoteo 3:16) O le mea moni, e  leai nisi fautuaga ua manatu i ai le toʻatele o tagata e sili atu ona lelei, na i lo tapulaa o amioga tatau ma taʻiala o loo maua i le Lauga i le Mauga.—Mataio, mataupu e 5-7.

Afai e saʻili atu le aiga atoa i le Atua mo taʻiala ma mulimuli i ana mataupu silisili, o le a maua ai e sui taʻitasi o le aiga lagona mautinoa iā i latou lava ma e lē taumatea o le a faatuputeleina ai le alofa ma le faaaloalo o le fanau mo mātua. Peitaʻi i le isi itu, afai e femoumouaʻi ma lē lelei tapulaa a le aiga, e iʻu ina fiu, feitai ma fouvale ai le fanau.—Roma 2:21; Kolose 3:21.

Ae ā aiga e toʻatasi le matua? Po o lona uiga ea, e itiiti le tomai o le matua lenā e aʻoaʻo atu ai le alofa i le fanau? E leai. E ui e tāua tele le iai uma o le tinā ma le tamā, ae e mafai ona iloa mai i mea e tutupu, o le lelei o faiā faaleaiga e mafai ona fesoasoani e feagai ai ma faalogona o le leai o le isi matua. Afai e na o oe le matua, ia taumafai e faatatau mataupu silisili o le Tusi Paia i lou aiga. Ua faapea mai se faataoto: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala”—e aofia ai ma ala o le matua.—Faataoto 3:5, 6; Iakopo 1:5.

I aso nei, e faitau afe faapotopotoga Kerisiano o Molimau a Ieova i le lalolagi aoao, o loo auauna ai ma le faamaoni le toʻatele o talavou lelei o ē na ola aʻe i aiga e na o le toʻatasi le matua. O se faamaoniga lenā e iloa ai, e mafai foʻi e mātua ua leai ni paaga, ona taulau manuia i le aʻoaʻoina o a latou fanau e faatatau i le alofa.

Le Auala e Atiina Aʻe ai e Tagata Uma le Alofa

Na valoia e le Tusi Paia se tasi o vala e iloa ai “aso e gata ai,” o le leai o se “lotoaiga.” (2 Timoteo 3:1, 3) E ui i lea, e tusa pe na tupuga mai se tagata i se aiga e leai se lotoaiga, ae e mafai lava ona atiina aʻe e lenā tagata le alofa. E faapefea? E ala i le faalogo atu iā Ieova le Puna o le alofa, lea e alofa faapelepele i ē uma e saʻili atu iā te ia ma o latou lotoatoa. (1 Ioane 4:7, 8) Na fai mai se tasi faisalamo: “E ui lava ina tuua aʻu e loʻu tama ma loʻu tinā, a e talia aʻu e Ieova.”—Salamo 27:10.

E anoanoaʻi auala eseese ua faaalia ai e Ieova lona alofa mo i tatou. O se faaaʻoaʻoga, o taʻiala faatamā o loo i le Tusi Paia, o le fesoasoani o le agaga paia ma le lagolagosua māfana a le ʻauuso Kerisiano. (Salamo 119:97-105; Luka 11:13; Eperu 10:24, 25) Seʻi tomānatu pe faapefea ona fesoasoani auala nei e tolu, ina ia faatuputele ai lou alofa i le Atua ma ou tuaoi.

Taʻiala Faatamā Mai le Atua

Ina ia atiina aʻe se faigāuō lelei ma se tasi, e tatau ona tatou iloa lelei o ia. E ala i le faailoa mai o ia i le Tusi Paia, ua valaaulia ai i tatou e Ieova e faalatalata atu iā te ia. Ae e lē lava le faitauina o le Tusi Paia. E tatau ona tatou faatatauina aʻoaʻoga o loo iai, ma tatou tofo i iʻuga lelei e maua mai ai. (Salamo 19:7-10) Ua faapea mai le Isaia 48:17: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai.” Ioe, ona o Ieova o le alofa lava ia, ua ia faatonutonu ai i tatou i mea e aogā iā i tatou—e lē faapea e finagalo e faatapulaa lo tatou saʻolotoga i le anoanoaʻi o tulafono.

O le iloa lelei o le Tusi Paia, e fesoasoani foʻi e faatuputeleina ai lo tatou alofa mo tagata. O le māfuaaga o lenā mea, ona ua tatou aʻoaʻoina i le Tusi Paia le auala e silasila ai le Atua i tagata, ma o loo iai foʻi mataupu silisili i le auala  e tatou te feagai ai ma isi. Ua tatou maua ai la se faavae lelei i le auala e atiina aʻe ai le alofa mo o tatou tuaoi, mai i faamatalaga o loo i le Tusi Paia. Na faapea mai le aposetolo o Paulo: “O laʻu tatalo foʻi lenei, ia faatuputeleina pea lava lo outou alofa, ma le iloa lelei, atoa ma le faautauta uma.”—Filipi 1:9.

Ina ia faatonutonuina e lenā “iloa lelei” le auala saʻo e faaalia ai le alofa, seʻi fai ma faataʻitaʻiga le mea moni o loo taʻua i le Galuega 10:34, 35: “E lē faailogaina tagata e le Atua; a e peitaʻi o lē mataʻu iā te ia i nuu uma lava, ma fai le amiotonu, ua talia i latou e ia.” E silasila le Atua i tagata ona o lo latou amiotonu ma le mataʻu iā te ia, ae lē o atunuu e ō mai ai po o latou lanu foʻi. Pe e lē tatau foʻi ona faapena la tatou vaai i isi ma aua le faailoga tagata?—Galuega 17:26, 27; 1 Ioane 4:7-11, 20, 21.

Alofa—O se Fua o le Agaga o le Atua

E lelei fua o le seleselega o se faatoʻaga pe afai e talafeagai timuga. E mafai foʻi ona faaalia e se tagata faamaoni uiga po o “fua o le Agaga” e pei ona taʻua i le Tusi Paia, e ala i le fesoasoani a le agaga o le Atua. (Kalatia 5:22, 23) A o le sili o na fua uma, o le alofa lea. (1 Korinito 13:13) E faapefea la ona tatou mauaina le agaga o le Atua? O se auala tāua e maua ai, o le tatalo. E foaʻi mai e Ieova lona agaga pe afai tatou te tatalo atu i ai. (Luka 11:9-13) Faamata tatou te “ole atu” pea mo le agaga paia a o tatou tatalo? Afai o lea, o le a atili ai ona tatou faaalia fua o le agaga i o tatou olaga, e aofia ai ma le alofa.

Peitaʻi, o loo iai se isi agaga o loo gaoioi e faasagatau i le agaga o le Atua. Ua taʻua e le Tusi Paia lenā agaga “o le agaga o lenei lalolagi.” (1 Korinito 2:12; Efeso 2:2) E leaga lona taaʻiga ma e sau mai iā Satani le Tiapolo, “le alii o lenei lalolagi” o tagata e lē o auauna i le Atua. (Ioane 12:31) E pei o se matagi e saveʻuina i luga le otaota ma le palapala, e faapena foʻi ona saveʻuina i luga e “le agaga o lenei lalolagi” faanaunauga leaga lea e aveesea ai le alofa, ae faamalieina ai tuʻinanauga o le tino.—Kalatia 5:19-21.

E aafia tagata i lenā agaga leaga pe afai e iai i se siʻomaga e faaalia ai le matapeʻapeʻa, manatu fia muamua, sauā ma e lē o iai se vaaiga saʻo i le alofa lea o loo taatele i aso nei. Afai e te faanaunau e faatuputeleina lou alofa moni, e tatau ona e matuā tetee malosi i le agaga o lenei lalolagi. (Iakopo 4:7) Peitaʻi, aua neʻi e faalagolago i lou malosi, ae ia saʻili mo le fesoasoani a Ieova. E mafai ona faamalosia oe e lona agaga lea e aupito i malosi i le lalolagi ma le lagi, ma o le a e taulau manuia ai.—Salamo 121:2.

Aʻoaʻoina le Alofa Mai le ʻAuuso Kerisiano

E pei ona aʻoaʻoina e tamaiti le alofa e ala i lo latou mauaina o le alofa i o latou aiga, e mafai foʻi e i tatou uma ona faatuputeleina lo tatou alofa e ala i le auaufaatasi ma isi Kerisiano. (Ioane 13:34, 35) O le mea moni, o se tasi o aogā autū o le faapotopotoga Kerisiano ina ia  maua ai e tagata le avanoa e “taufaatupu ai le alofa ma galuega lelei.”—Eperu 10:24.

E tāua lenā alofa aemaise i tagata ua “lailoa i latou ma tuulafoaʻiina” i le lalolagi lē alofa o loo tatou ola ai. (Mataio 9:36) Ua faaalia e mea e tutupu, o le iai o faiā māfana i tagata matutua, e mafai ona faaleleia ai āuga leaga o se tagata na ola mai i se siʻomaga e aunoa ma se alofa. O lea la, e tāua tele mo Kerisiano uma ona faafeiloaʻi atu ma le māfana i tagata fou o loo auaufaatasi ma i latou!

“E Lē Uma le Alofa”

Ua fai mai le Tusi Paia “e lē uma le alofa.” (1 Korinito 13:8) I le ā le itu? Na fai mai le aposetolo o Paulo: “E onosai le alofa, e agamalu, e lē losilosi le alofa, e lē mitamita vale le alofa, e lē faafefeteina, e lē amio matagā, e lē saʻilia e ia ana lava mea, e lē faaitaitagofie, e lē faitau leaga ua tuuina mai e nisi.” (1 Korinito 13:4, 5) E manino mai la, o lenei alofa e lē o se fagogo po o se talafatu. Peitaʻi, o i latou o loo faaalia lenei alofa, ua latou iloa ma amanaʻia mafatiaga ma faanoanoaga o le olaga, ae latou te lē faatagaina na tulaga lē lelei e taofia ai lo latou alofa mo tagata. O lenā alofa “o le fusi lea e atoatoa ona lelei ai.”—Kolose 3:12-14.

Seʻi manatu foʻi i le faaaʻoaʻoga a se tamaʻitaʻi Kerisiano e 17 tausaga e nofo i Korea. Na tetee lona aiga ina ua amata ona auauna lenei tamaʻitaʻi iā Ieova le Atua, ma faapea ona tuliesea mai le aiga. Na i lo le ita, na tatalo o ia e tusa ma le mea ua tupu ma uaʻi atu lona loto i le Afioga a le Atua ma lona agaga. Ona fai lea ma ana masani le tusi atu i lona aiga ma faailoa atu i ai lona alofa māfana mo i latou. O le iʻuga na oo iai, na amata ona suʻesuʻeina e ona tuagane matutua e toʻalua, le Tusi Paia ma ua avea nei i laʻua ma Kerisiano ua uma ona tuuina atu. Na taliaina foʻi e lona tinā ma lona tuagane laʻitiiti upu moni o le Tusi Paia. Mulimuli ane, na telē se suiga na faia e lona tamā lea na matuā tetee muamua. Na tusi mai le tamaʻitaʻi Molimau a Ieova e faapea: “Na matou faaipoipo uma i Kerisiano, ma ua toʻa 23 nei lo matou aiga ua autasi i le tapuaʻiga.” Maʻeu le taulau manuia ona o le alofa!

Pe e te manaʻo e atiina aʻe le alofa moni ma fesoasoani i isi e maua lenā alofa moni? Ia saʻili atu la iā Ieova, le Puna o lenā uiga tautele. Ioe, ia uaʻi atu lou loto i lana Afioga, tatalo mo lona agaga paia, ma ia auaufaatasi e lē aunoa ma le ʻauuso Kerisiano. (Isaia 11:9; Mataio 5:5) Maʻeu se faamāfanafanaga i le iloa ua toe o se aga ona aveesea lea o le amioleaga, ae faatotoe ai na o i latou e faaalia le alofa moni faa-Kerisiano! Ioe, o le alofa o le auala lenā e maua ai le fiafia ma le ola.—Salamo 37:10, 11; 1 Ioane 3:14.

[Ata i le itulau 6]

O le tatalo ma le suʻesuʻeina o le Afioga a le Atua, o le a fesoasoani iā i tatou e atiina aʻe ai le alofa moni