“O le Atua, o le Alofa Lava Ia”

“O sē lē alofa ua lē iloa e ia le Atua; auā o le Atua, o le alofa lava ia.”—1 IOANE 4:8.

1-3. (a) O le ā le faamatalaga a le Tusi Paia e faatatau i le uiga o Ieova o le alofa, ma aiseā e mataʻina ai lenā faamatalaga? (e) Aiseā ua faapea mai ai le Tusi Paia “o le Atua, o le alofa lava ia”?

O UIGA uma o Ieova e atoatoa ma matagofie. Peitaʻi, o le uiga e sili ona mataʻina i uiga uma o Ieova, o le alofa. O le māfuaaga sili ua ala ai ona tatou faalatalata atu ai iā Ieova ona o lona alofa. O se mea e fiafia ai, ona ua avea foʻi le alofa ma ona uiga autū. E faapefea ona tatou iloa?

² O loo taʻua i le Tusi Paia se mea e uiga i le alofa, lea e lē o taʻua lava e faatatau i isi uiga autū o Ieova. E lē o faapea mai le Tusi Paia o le Atua o le malosi lava ia, pe o le Atua o le faamasinotonu lava ia, pe o le Atua o le atamai lava ia. O loo iā te ia na uiga, o ia o le puna silisili o na uiga e tolu. Ae e iai se mea e sili atu ona loloto o loo taʻua i le 1 Ioane 4:8 e faatatau i le uiga o le alofa: “O le Atua, o le alofa lava ia.” Ioe, e matuā loloto le alofa o Ieova. O lona uiga moni lea. Atonu e mafai ona tatou manatu i ai faapenei: O le malosi o Ieova ua mafai ai ona ia gaoioi. O lona faamasinotonu ma lona atamai e faatonutonu ai le auala na te gaoioi ai. Peitaʻi, o le alofa o Ieova e uunaʻia ai o ia ina ia gaoioi. O loo faaalia i taimi uma lona alofa i le auala o loo ia faaaogāina ai isi ona uiga.

³ E masani ona faapea atu, o Ieova o le faatinoga moni lava lea o le alofa. O lea la, afai tatou te fia malamalama atili i le alofa, e tatau ona tatou aʻoaʻoina mea e faatatau iā Ieova. Seʻi o tatou iloiloina la ni vala o le alofa lē mafaatusalia o Ieova.

 Le Faatinoga Silisili o le Alofa

4, 5. (a) O le ā le faatinoga silisili o le alofa i le talafaasolopito atoa? (e) Aiseā ua autasia ai Ieova ma lona Alo i le faiā e sili ona malosi o le alofa?

⁴ E tele auala ua faaalia ai le alofa o Ieova, ae o loo iai se auala e tumatilatila ese lava. O le ā lenā auala? O le auina mai lea o lona Alo ina ia puapuaga ma maliu mo i tatou. E mafai ona tatou faapea atu ma le mautinoa, o le faatinoga silisili lenā o le alofa i le talafaasolopito atoa. Aiseā?

⁵ O loo taʻua e le Tusi Paia Iesu “o le ulumatua o mea uma lava ua faia.” (Kolose 1:15) Seʻi manatu foʻi iai—sa muaʻi soifua le Alo o le Atua a o leʻi faia le vateatea. O le ā la le umi na iai faatasi le Tamā ma lona Alo? E tau fuafua e nisi saienitisi faapea ua tusa ma le 13 piliona tausaga talu ona iai le vateatea. Peitaʻi, e tusa lava pe saʻo lenei fuafaatatau, ae o lenā 13 piliona tausaga e sili atu ai le umi o le taimi na soifua ai le Alo ulumatua o Ieova! O ā la ni galuega sa ia faia i lenā taimi atoa? Sa auauna ma le fiafia le Alo e fai ma “tufuga” a lona Tamā. (Faataoto 8:30; Ioane 1:3) Na galulue faatasi la Ieova ma lona Alo e faia uma isi mea. Maʻeu ni taimi fiafia sa la mauaina faatasi! O ai la se isi e mafai ona malamalama i le faiā e lē motusia lea sa iai i lenā taimi e sili ona umi? E manino lava, ua autasia Ieova le Atua ma lona Alo i le faiā e sili ona malosi o le alofa.

6. Ina ua papatisoina Iesu, o le ā na fetalai i ai Ieova e faaalia ai ona faalogona i Lona Alo?

⁶ E ui i lea, na aauina mai e le Tamā lona Alo i le lalolagi ina ia soifua mai o se pepe. Ina ia faataunuu lea fuafuaga, sa tatau ai iā Ieova ona motusia mo le faitau sefulu o tausaga, se la faatasiga māfana ma lona Alo pele sa iai i le lagi. Sa Ia naunau lava e silasila mai le lagi a o tuputupu aʻe Iesu e avea o se tagata lelei atoatoa. E pe tusa o le 30 tausaga o lona soifua, na papatisoina ai Iesu. Sa fetalai mai le Tamā lava ia mai le lagi i le taimi lenā e faapea: “O loʻu Atalii pele lenā, ua ou fiafia lava iā te ia.” (Mataio 3:17) Talu ai sa faia ma le faamaoni e Iesu mea uma lava na valoia po o mea uma na faatalitalia o ia e fai, e lē taumatea la sa matuā faafiafiaina ai le finagalo o lona Tamā!—Ioane 5:36; 17:4.

7, 8. (a) O ā mea na oo iā Iesu iā Nisani 14, 33 T.A., ma o ā ni faalogona o lona Tamā i le lagi? (e) Aiseā na faataga ai e Ieova lona Alo e oo i mafatiaga ma maliu ai?

 ⁷ Peitaʻi, sa faapeʻī faalogona o Ieova iā Nisani 14, 33 T.A.? Na faapeʻī ona faalogona ina ua faalataina Iesu, puʻea o ia e se motu o tagata feitai? Ae faapeʻī le taimi na amusia ai o ia, tuufeanu i ai, taufaituʻi i ai ma sasaina faamoʻamoʻa lea sa ali mai ai aano o lona papatua? O ā lagona o lona Tamā ina ua tutuʻiina i fao lima ma vae o Iesu i se laau ma faatautau ai a o tauemu atu i ai tagata ma faafofogaina alaga tigā a lona Alo pele? Na faapeʻī lagona o Ieova ina ua tō le mānava a lona Alo pele ma toesea o ia mo le uluaʻi taimi talu mai le amataga o le foafoaga?—Mataio 26:14-16, 46, 47, 56, 59, 67; 27:26, 38-44, 46; Ioane 19:1.

⁸ Talu ai o Ieova e iai ona faalogona, e matuā lē mafai lava la e a tatou upu ona faamatala le matuitui o tigā na mafatia ai o ia i le maliu o lona Alo. O le mea e mafai ona faamatalaina, o le māfuaaga na faatagaina ai e Ieova lenei mea ina ia tupu. Aiseā na faatigāina ai le Tamā i na faalogona? O loo faaali mai e Ieova iā i tatou se mea ofoofogia i le Ioane 3:16—o se fuaiupu o le Tusi Paia ua avea ma aotelega o tusi uma o le Evagelia. Ua faapea mai: “Ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” O le māfuaaga la a le Atua, e aotele uma i le upu lenei: o le alofa. O le gaoioiga pito sili lea o le alofa ua mafai ona faaalia.

Le Auala ua Faamautinoa Mai ai e Ieova Lona Alofa

9. O le ā o manaʻo Satani e tatou te talitonu ai i le auala e silasila ai Ieova iā i tatou, ma o le ā ua faamautinoa mai e Ieova iā i tatou?

⁹ Peitaʻi, ua lāgā ai se fesili tāua: Pe e alofa le Atua iā i tatou taʻitoʻatasi? E taofi nisi o loo alofa mai le Atua i le fanau lautele a tagata, e pei ona taʻua ai i le Ioane 3:16. Peitaʻi, i o latou lava lagona: ‘E lē taitai mafai ona alofa mai le Atua iā te aʻu lava ia e toʻatasi.’ O le mea moni, e vilivili lava Satani le Tiapolo ina ia tatou talitonu e lē o alofa mai Ieova iā i tatou, pe na te lē faatāuaina foʻi i tatou. I le isi itu, e ui lava tatou te manatu e leai so tatou aogā pe e lē o alofagia foʻi i tatou, ae ua faamautinoa mai e Ieova iā i tatou e faapea, e tāua iā te ia ana auauna taʻitoʻatasi faamaoni.

10, 11. E faapefea ona faaalia e le talafaatusa a Iesu i manu iti, le tāua o i tatou i le silasila a Ieova?

¹⁰ O se faaaʻoaʻoga, seʻi manatu i fetalaiga a Iesu o loo i le Mataio 10:29-31. Na faaalia e Iesu le tāua o ona soo e ala i le faapea mai: “E lē faataulia ea ni manu iti se lua i le asari? E leai foʻi so laʻua e paʻū i le eleele e aunoa ma lo outou Tamā. A o outou lauulu lava ua faitaulia uma ia. O lea aua tou te matataʻu ai; e sili outou i manu iti e tele.” Ia manatu i uiga o upu na i le ʻaufaalogologo a Iesu i le uluaʻi senituri.

¹¹ I aso o Iesu, sa sili ona taugofie le manu iti mai manulele uma na faatau mo meaʻai. E tasi le asari po o se tupe e itiiti sona aogā, e mafai ona faatau ai ni manu iti se lua. Ae na mulimuli ane fetalai Iesu e tusa ai ma le Luka 12:6, 7 e faapea, pe afai e totogiina e se tagata ni asari se lua, e lima manu iti e maua ai na i lo le fā. Sa avane fua i ai ma le isi manulele e tasi e peiseaʻī e matuā leai lava sona tāua. Atonu o le vaaiga a tagata i na meaola, o ni mea e leai so latou aogā. Peitaʻi o le ā le silafaga a Lē na Foafoaina Mea? Na fetalai Iesu: “E leai foʻi so latou e tasi [e oo lava i le manulele lea e toe faaopoopo ane] ua galo i luma o le Atua.” Atonu ua amata nei ona tatou iloa atu le mea sa agaʻi i ai  le manatu o Iesu. Pe afai o loo faatāua e Ieova se manu iti e tasi, e mautinoa la le sili atu ona ia faatāuaina se tagata! E pei ona faamatala mai e Iesu, e silafia e Ieova mea uma e uiga iā i tatou. Ioe, e oo lava i lauulu o o tatou ulu e mafai ona ia faitaulia uma!

12. E faapefea ona tatou mautinoa e moni le fetalaiga a Iesu e uiga i le faitauina o o tatou lauulu?

¹² E ono manatu nisi ua soona faamamafa naʻuā lea faatusatusaga a Iesu. Ae seʻi mafaufau lava i le faamoemoe o le toetū. O loo silafia lelei i tatou e Ieova, auā e mafai ona ia toe faia i tatou! Talu ai e matuā tāua i tatou iā te ia, e na te manatua mea taʻitasi uma, e aofia ai o tatou uiga faaletagata ma manatunatuga atoa ma mea na tutupu i o tatou olaga atoa. Pe a faatusatusa atu i ai le faitauina o o tatou lauulu—e tusa ma le 100,000 lauulu o se ulu—o se mea e matuā faigofie lava lenā mo le Atua. Ioe, maʻeu le matagofie o fetalaiga a Iesu e faamautinoa mai ai, e manatu mamafa mai Ieova iā i tatou taʻitoʻatasi!

13. E faapefea ona faaalia i le mea na oo i le tupu o Iosefatu, e silasila Ieova i o tatou uiga lelei e ui tatou te lē lelei atoatoa?

¹³ Ua faailoa mai foʻi e le Tusi Paia se isi auala e tatou te mautinoa ai le alofa o Ieova. E silasila ma faatāua e Ieova o tatou uiga lelei. Seʻi fai le tupu lelei o Iosefatu ma faaaʻoaʻoga. Ina ua faia e le tupu se gaoioiga valea, na taʻu atu e le perofeta a Ieova iā te ia e faapea: “O le mea lea o loo i luga ai iā te oe le toʻasā mai iā Ieova.” E mataʻutia tele lenā manatu! Peitaʻi e leʻi gata ai i inā le feʻau mai iā Ieova. Na toe faaauau mai: “A e peitaʻi ua maua mea lelei o iā te oe.” (2 Nofoaiga a Tupu 19:1-3) E leʻi avea le toʻasā amiotonu o Ieova ma itu na galo ai iā te ia uiga “lelei” sa iā Iosefatu. Pe lē o se manatu faagaeeloto ea le iloaina faapea, e silasila Ieova i o tatou uiga lelei e ui tatou te lē o lelei atoatoa?

Se Atua e “Faamagalo Sala”

14. Pe a tatou agasala, o ā faalogona tigā atonu e oo iā i tatou, ae o ā aogā e tatou te maua mai le faamagaloga a Ieova?

¹⁴ Pe a tatou agasala, e ono oo iā i tatou faalogona faanoanoa, māsiasi ma le nofosala ma tatou manatu ai e leai se aogā e tatou te auauna ai iā Ieova. Ia manatua, o Ieova “e faamagalo sala.” (Salamo 86:5) Ioe, pe a tatou salamō mai iā tatou agasala ma taumafai malosi e aua le toe faia, o le a aogā iā i tatou le faamagaloga a Ieova. Seʻi manatu foʻi i le auala ua faamatalaina ai e le Tusi Paia lenei vala mataʻina o le alofa o Ieova.

15. O le ā le mamao e matuā aveesea ai e Ieova a tatou agasala?

¹⁵ Sa faaaogā e Tavita se isi faaupuga uigā e faamatala ai le faamagaloga a Ieova: “E pei ona vāvā mamao o sasaʻe ma sisifo, e faapea lava ona faamamao e ia iā i tatou o a tatou solitulafono.” (Salamo 103:12) O le ā le mamao o sasaʻe mai sisifo? O lona uiga, o sasaʻe e masani lava e matuā mamao ese lava mai sisifo; e lē taitai ona fetaiaʻi nei itulagi e lua. Ua fai mai le manatu o se tasi tagata atamai e faatatau i lenei faaupuga, o lona uiga, “i se mamao lava e oo i ai; i se mamao e mafai ona tatou manatu i ai.” Ua tatou iloa mai i upu a Tavita, pe a faamagalo mai Ieova, e na te matuā aveesea mamao lava a tatou agasala.

16. Pe a faamagaloina i tatou e Ieova, aiseā e lē tatau ai ona tatou lagona pea le nofosala i na agasala i lo tatou olaga atoa?

¹⁶ Na iai ea se taimi sa e taumafai ai e aveese se pisia mai se ofu e lē malosi sona lanu? Atonu o le a aliali mai pea le pisia e ui i ni au taumafaiga malolosi. Ae seʻi mātau fetalaiga a Ieova i le auala e faamagalo ai: “E ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.” (Isaia 1:18) O le upu “mūmū” e faauiga atu i le lanu mūmū sesega. * O le lanu “ulaula” o se tasi o lanu malosi sa vali ai ie. E lē taitai mafai e ni a tatou taumafaiga ona aveesea ai le pisia o le agasala. Peitaʻi, e mafai e Ieova ona aveesea agasala ua matuā mūmū ulaula, ma toe faamamāina e pei o le sinasina o le kiona, po o se fulufulu mamoe e leʻi valia. Pe a faamagalo mai Ieova iā i tatou, e lē manaʻomia ona tatou manatu e tauave le mamafa o na agasala i o tatou olaga atoa.

17. O le ā le uiga o le lafoaʻiina e Ieova o a tatou agasala i ona tua?

 ¹⁷ Na fatuina e Esekia se pese faamomoiloto o le lotofaafetai ina ua manuia mai se maʻi tugā na aafia ai ma faapea atu iā Ieova: “Ua e lafoaʻiina aʻu agasala uma i ou tua.” (Isaia 38:17) Ua faaalia i lenei mau le peiseaʻī o loo lafoaʻiina e Ieova i ona tua agasala a ē salamō, e lē mafai ona Ia toe tagaʻi atu i ai pe toe mātauina foʻi. Ua fai mai se tasi manatu, e mafai ona faaupu faapenei: “Ua e faia [aʻu agasala] e peiseaʻī e leʻi tupu.” Po ua lē faalaeiau ea lenā manatu?

18. Ua faapefea ona faaalia e le perofeta o Mika, e aveeseina e faavavau e Ieova a tatou agasala pe a Ia faamagaloina i tatou?

¹⁸ Ina ua folafola mai e Mika le toe faafoʻisiaga, na ia faailoa mai lona talitonuga maumaututū, o le a faamagalo e Ieova ona tagata ua salamō: “O ai ea se Atua e tusa ma oe . . . ua e lē manatua solitulafono a ē o totoe o lona tofi? . . . e te lafo foʻi a latou agasala uma i mea loloto o le sami.” (Mika 7:18, 19) Seʻi manatu i le uiga o na upu iā i latou sa soifua i tuā i inā. Pe e mafai ona e toe maua mai se mea na lafoina “i mea loloto o le sami”? Ua faaalia mai la i upu a Mika e faapea, pe a faamagalo mai Ieova, e na te aveesea foʻi e faavavau a tatou agasala.

“Ua Mutimutivale le Alofa o lo Tatou Atua”

19, 20. (a) O le ā le uiga o le veape Eperu o loo faamatalaina ai le mutimutivale o le alofa? (e) Ua faapefea ona faaaogā e le Tusi Paia faalogona o se tinā mo sana pepe, e aʻoaʻo mai ai iā i tatou le mutimutivale o le alofa o Ieova?

¹⁹ O se isi vala o le alofa o Ieova, o le mutimutivale. O le ā le mutimutivale? I le Tusi Paia, e tele ni upu Eperu ma upu Eleni o loo faamatala mai ai le uiga o le mutimutivale o le alofa, e pei o le veape Eperu o le ra·chamʹ. O lenei upu Eperu, lea e faatatau atu e Ieova iā te ia lava, e fesootaʻi atu i le upu mo le “faaʻautagata” ma e mafai ona faamatalaina o se “alofa faatinā.”

²⁰ O loo faaaogā e le Tusi Paia faalogona o le tinā mo sana pepe, e aʻoaʻo mai ai iā i tatou le mutimutivale o le alofa o Ieova. I le Isaia 49:15, e tatou te faitau ai: “E galo ea i le fafine lana tama ua susu, na te lē alofa [ra·chamʹ] i le tama a lona lava manava? ai lava e galo iā te i latou, a e lē galo lava oe iā te aʻu.” E faigatā ona talitonuina le iai o se tinā e galo iā te ia ona fafaga ma tausi sana pepe o loo faasusu. Auā foʻi la, o le pepe e matuā leai lava se mea na te mafaia ona fai; o pō ma ao e manaʻomia ai e se pepe le uaʻi ane ma le alofa o lona tinā. Ae e faanoanoa e faapea atu, ua tatou faalogo i tala e faatatau i lenā uiga o le tuulafoaʻia e tinā o a latou fanau, aemaise i nei “aso faigatā.” (2 Timoteo 3:1, 3) Peitaʻi, ua folafola mai e Ieova: “E lē galo lava oe iā te aʻu.” O le mutimutivale o le alofa o Ieova mo ana auauna e sili atu ona malosi na i lo le faalogona e sili ona māfana o loo iai i le tagata—o le alofa lea o se tinā mo sana pepe.

21, 22. Na faapeʻī tulaga o tagata Isaraelu i Aikupito anamua, ma o le ā le auala na tali atu ai Ieova i o latou mafatiaga?

 ²¹ E faapefea ona mutimutivale le alofa o Ieova, e pei o se matua? O loo manino mai lenei uiga o Ieova i le auala sa feutagaʻi ai ma le nuu o Isaraelu anamua. E oo ane i le iʻuga o le senituri lona 16 T.L.M., ua faitau miliona tagata Isaraelu ua faapologaina i Aikupito, o inā sa matuā faileagaina ai i latou. (Esoto 1:11, 14) Ona o o latou puapuaga, sa alalaga atu ai le fanauga a Isaraelu iā Ieova mo se fesoasoani. Na faapefea ona faaalia le mutimutivale o le alofa o le Atua?

²² Na matuā ootia lava le finagalo o Ieova. Na fetalai mai o ia: “Ua ou matuā vaai atu i le puapuaga o [loʻu] nuu o loo i Aikupito, ua ou faalogo foʻi i lo latou alaga . . . ua ou iloa foʻi lo latou tigā.” (Esoto 3:7) E lē mafai e Ieova ona silasila mai i mafatiaga o ona tagata pe faafofoga mai i a latou alaga e aunoa ma sona tigāalofa mai mo i latou. O Ieova o le Atua e tigāalofa. O le tigāalofa—o le tomai lea e lagonaina faatasi ma isi o latou tigā—e fesootaʻi vavalalata atu i le mutimutivale o le alofa. Peitaʻi e leʻi na ona tigāalofa Ieova mo ona tagata; sa gaoioi o ia mo so latou lelei. Ua taʻua i le Isaia 63:9: “Na ia faatauina i latou i lona alofa ma lona agalelei.” O le “aao malosi” o Ieova na ia laveaʻia ai le fanauga a Isaraelu mai Aikupito. (Teuteronome 4:34) Mulimuli ane, ona ia saunia ai lea mo i latou le meaʻai faavavega, ma momoli atu i latou i se laueleele lafulemu e fai mo i latou.

23. (a) E faapefea ona faamautinoa mai e le faisalamo le manatu mamafa mai o Ieova iā i tatou taʻitoʻatasi? (e) O ā auala ua fesoasoani ai Ieova iā i tatou?

²³ E mutimutivale le alofa o Ieova i ona tagata o se vaega. E lē gata i lea, o loo manatu mamafa mai pea lo tatou Atua alofa iā i tatou taʻitoʻatasi. O loo silafia lelei mai e ia so o se mafatiaga atonu o loo tatou fesagaʻia. Na tusi mai le faisalamo: “O fofoga o Ieova o loo faasaga i ē amiotonu, e liliu mai foʻi ona taliga i a latou alaga. Ua latalata mai Ieova i ē ua loto momomo; ua ia faaola foʻi i ē ua loto nutimomoia.” (Salamo 34:15, 18) E faapefea la, ona fesoasoani mai Ieova iā i tatou taʻitoʻatasi? E lē faapea o le a ia aveesea le pogai o o tatou mafatiaga. Peitaʻi e anoanoaʻi sauniuniga ua faia e Ieova mo i latou o ē ole atu iā te ia mo se fesoasoani. Ua ofoina mai e lana Afioga, le Tusi Paia, ni fautuaga aogā. I totonu o le faapotopotoga, ua saunia ai e Ieova ovasia ua agavaa faaleagaga, o ē taumafai e faaatagia atu le mutimutivale o lona alofa e ala i le fesoasoani atu i o latou uso tapuaʻi. (Iakopo 5:14, 15) Ona o ia o le “faafofoga tatalo,” na te foaʻi mai ai le “Agaga Paia i ē ole atu ai iā te ia.” (Salamo 65:2; Luka 11:13) O na sauniuniga uma, e faaalia ai le “mutimutivale [o] le alofa o lo tatou Atua.”—Luka 1:78.

24. E faapefea ona e tali atu i le alofa o Ieova?

²⁴ Pe lē o se oliolisaga le tomānatu i le alofa o lo tatou Tamā o i le lagi? Na faamanatu mai e la tatou suʻesuʻega na muamua atu e faapea, e faaalia e Ieova lona mana, faamasinotonu ma lona atamai auā so tatou manuia. Ua tatou faitau foʻi i lenei suʻesuʻega i auala mataʻina ua faaali tuusaʻo mai ai e Ieova lona alofa mo tagata lautele—ma i tatou taʻitoʻatasi. E lelei la pe a fesili ifo le tagata iā te ia lava, ‘E faapefea ona ou tali atu i le alofa o Ieova?’ Tau ina ia e tali atu e ala i lou alofa atu iā Ieova ma lou loto atoa, agaga atoa ma lou malosi atoa. (Mareko 12:29, 30) Tau ina ia faaatagia atu i le auala e te soifua ai i aso faisoo, lou faanaunauga moni e faalatalata atu pea iā Ieova. Tau ina ia faalatalata mai foʻi Ieova le Atua alofa, iā te oe—seʻia oo i le faavavau!—Iakopo 4:8.

[Faamatalaga pito i lalo]

E te Manatua?

• E faapefea ona tatou iloa o le uiga autū o Ieova o le alofa?

• Aiseā tatou te faapea atu ai o le auina mai e Ieova o lona Alo e mafatia ma maliu mo i tatou o le faatinoga silisili lenā o le alofa?

• E faapefea ona faamautinoa mai e Ieova lona alofa mo i tatou taʻitoʻatasi?

• O ā auala mataʻina ua faamatalaina ai e le Tusi Paia le faamagaloga a Ieova?

[Fesili mo le Suʻesuʻega]

[Ata i le itulau 15]

‘Ua aumai e le Atua lona Alo e toʻatasi’

[Faamatalaga i Ata]

© J. Heidecker/VIREO

[Ata i le itulau 16, 17]

“E sili outou i manu iti e tele”

[Ata i le itulau 18]

O le alofa o le tinā mo lana pepe e tatou te aʻoaʻoina ai le mutimutivale o le alofa o Ieova