O se Vitiō e Pāʻia ai Loto o le ʻAutalavou

NA FAALAEIAUINA le toʻatele o talavou e iloilo lelei a latou amio ina ua matamata i le vitiō Young People Ask—How Can I Make Real Friends? * O loo iai i lenei vitiō fautuaga o le Tusi Paia, o faamatalaga a talavou Kerisiano ma se tala faaonapōnei faagaeeloto ua faavae aʻe i le tala o le Tusi Paia e faatatau iā Tina. (Kenese, mataupu 34) O faamatalaga o loo mulimuli mai, na faia e talavou o aumau i Mekisikō.

Na faapea mai Mareta: “Na matuā pāʻia loʻu loto e le vitiō. E pei o aʻu lea na māfua ai ona saunia le vitiō. Na ou faapea ua lava ma totoe pe a iloa e oʻu faiaʻoga ma tamaiti matou te aʻoʻoga faatasi, o aʻu o se Molimau a Ieova. Peitaʻi ane, ou te leʻi faailoa atu e ala i le molimau atu iā i latou. Ua matuā ou talisapaia faamatalaga ua saunia e Ieova, aemaise o se mea e sili ona faagaeeloto e pei o lenei vitiō.”

Na faapea mai Ioane Talo: “Na ou mafaufau lelei e uiga i faamatalaga o loo i le vitiō. Ona o aʻu o se talavou, e iai mea sesē ua ou faia ma ou te malamalama i mea na oo i nisi o tagata o loo i le tala. I ni tausaga ua teʻa, na ou ola ai i se olaga faauigalua ae na ou iloa e lē iʻu lelei lea olaga. Ua ou maumauaʻi la e faamaoni iā Ieova ona o lea ua ou matamata i le vitiō.”

Na taʻutino mai Sulema: “Na ootia loʻu loto ina ua ou matamata i le vitiō. O le taimi ua teʻa na ou lē toe faitauina ai le Tusi Paia, ma e seāseā foʻi oʻu tatalo iā Ieova. Ae ina ua ou faalogologo i faamatalaga a le ʻautalavou i le vitiō, na faamalosia ai aʻu e toe suʻesuʻe i le Tusi Paia ma tatalo atu iā Ieova.”

E matuā anoanoaʻi luʻi ua fesagaʻi ma le ʻautalavou i aso nei, ma e masani lava ona tele se aafiaga o i latou ona o a latou aumea. (Salamo 26:4; Faataoto 13:20) O loo fesoasoani le vitiō Young People Ask—How Can I Make Real Friends?, i le toʻatele ina ia filifili lelei a latou aumea.

[Faamatalaga pito i lalo]