Eusipio—“Po o le Tamā Lea o Talafaasolopito o le Lotu”?

I LE tausaga e 325 T.A., na poloaʻia ai e le emeperoa Roma o Konesetatino ia epikopō uma ina ia potopoto ane i Naisia (Nicaea). O lana fuafuaga: ia faaiʻua se mataupu ua loa ona felafolafoaʻi ai e uiga i le faiā a le Atua ma lona Alo. Sa latou iai faatasi ma se tagata sa manatu i ai o se tagata na aupito sili ona atamai i ona taimi, o Eusipio (Eusebius) o Kaisareia. Sa maumauaʻi Eusipio i le suʻesuʻeina o le Tusi Paia ma sa ia lagolagoina le aʻoaʻoga faa-Kerisiano faapea, e toʻatasi le Atua.

O le Fono i Naisia, ua taʻua e se tusi e faapea, “sa taʻitaʻifono ai Konesetatino, ma sa ia faatautaia ma le malosi le talanoaga, ma sa faatūina . . . le manatu tāua lea e faaalia ai le talitonuga faalotu na tusia i le fono, e uiga i le faiā a Keriso ma le Atua, ‘o sē e tino e tasi ma le Tamā’ . . . Ona o le matuā matataʻu i le emeperoa, na sainia ai e epikopō uma le iʻugafono a le lotu seʻi vaganā ai epikopō e toʻalua, ae o le toʻatele lava o i latou na saini na matuā lē mananaʻo i ai.” Po o Eusipio ea o se tasi na ese mai ai? O le ā e tatou te aʻoaʻoina mai i le faaiʻuga na ia faia? Seʻi o tatou vaai atu i le talaaga o Eusipio—ona agavaa ma gaoioiga sa ia faia.

Ana Tusitusiga Mataʻina

E foliga mai na fanau Eusipio i Palesitina pe tusa o le 260 T.A. A o laʻitiiti lava o ia, sa auaufaatasi ma Pafulisa (Pamphilus), o se ovasia o le lotu i Kaisareia. Sa avea Eusipio o se tagata aʻoga e faamaoni tele i le aʻoga faalotu a Pafulisa. Sa ia faaaogā ma le tomai le faletusi mataʻina a Pafulisa. Sa matuā tuutoina atu Eusipio i ana suʻesuʻega, aemaise lava i le suʻesuʻeina o le Tusi Paia. Sa avea foʻi o ia ma uō faamaoni a Pafulisa, ma sa ia faasino iā te ia lava mulimuli ane o “Eusipio le atalii o Pafulisa.”

Na taʻua e Eusipio e tusa ai ma ona faamoemoega e faapea: “O laʻu fuafuaga ia tusia se faamaumauga o faasologa o Aposetolo paia faapea ma mea na tutupu i le taimi ua teʻa mai le taimi o lo tatou Faaola seʻia oo mai i ō tatou taimi; ma ia faamatalaina le tele ma le tāua o mea na tutupu i le talaaga o le lotu; ma taʻua i latou na pulea ma taʻimua i le lotu i vaega sili ona lauiloa o le atunuu, ma i latou i augātupulaga taʻitasi na folafola atu le upu a le Atua a lē o le taʻu gutu atu po o le tusia foʻi.”

E manatua Eusipio i ana tusi tāua faa-Peretania e taʻua, Talafaasolopito o le Lotu Kerisiano. O ana tusi e sefulu na lomia pe tusa o le 324 T.A. e manatu i ai o ni tusi e sili ona tāua o talafaasolopito o le lotu na tusia i aso anamua. Ona o nei tusitusiga, na avea ai Eusipio ma tamā o talafaasolopito o le lotu.

E ese mai i Talafaasolopito o le Lotu, na tusia foʻi e Eusipio tusi e lua e taʻua i le faa-Peretania, o Talaaga. O le tusi muamua o se aotelega o talafaasolopito o le lalolagi aoao. I le senituri lona fā, na avea ai lea tusi ma tusi faavae o suʻesuʻega  o faasologa o mea na tutupu i le lalolagi. O le tusi lona lua o loo iai aso o mea iloga na tutupu i le talafaasolopito. Na vaevaeina e Eusipio itulau o le tusi i vaega, ma faaalia i vaega taʻitasi ia soloaʻiga tautupu a atunuu eseese.

Na tusia foʻi e Eusipio isi tusitusiga e lua o talafaasolopito, e taʻua i le faa-Peretania Maturo o Palesitina ma le Olaga o Konesetatino. O le tusi muamua ua aofia ai tausaga mai le 303-310 T.A. ma o loo faamatalaina ai maturo o lenā vaitaimi. Sa soifua Eusipio i le vaitaimi na tutupu ai na mea. O le Olaga o Konesetatino, e aofia ai se seti o tusi e fā sa tusia ina ua mavae le maliu o le emeperoa o Konesetatino i le 337 T.A., ma o loo iai auʻiliʻiliga tāua o talafaasolopito. Ae na i lo le faamatalaina tuusaʻo o talafaasolopito, e tele lava ina viiviia ai lenā tagata.

O nei tusi a Eusipio, e lagolagoina ai aʻoaʻoga saʻo ma e aofia ai lana tali atu iā Heroki (Hierocles)—o se kovana Roma na iai i lenā taimi. Ina ua tusi e Heroki ni faamatalaga e faaleagaina ai Kerisiano, na tali atu Eusipio e puipuia Kerisiano. E lē gata i lea, o lona lagolagoina o le manatu faapea o le Atua o le tusitala o le Tusi Paia, na ia tusia ai tusi e 35, lea e manatu i ai o ni tusi e sili ona lelei o ia ituaiga o tusi. O uluaʻi tusi e 15 ua faamaonia ai le saʻo o le taliaina e Kerisiano o tusitusiga paia a tagata Eperu. O isi tusi e 20 na aumaia ai faamaoniga o le saʻo o Kerisiano i le tuua o tulafono faa-Iutaia ae talia mataupu silisili ma faiga fou. Na matuā lagolagoina e nei tusi tuufaatasi le Faa-Kerisiano, e tusa ai ma le malamalamaga o Eusipio.

Na soifua Eusipio pe tusa ma le 80 tausaga (c.260-c.340 T.A.), ma avea ma se tasi na tele tusi na ia tusia e uiga i aso anamua. O ana tusitusiga ua aofia ai mea na tutupu i uluaʻi senituri e tolu seʻia oo i le taimi o le emeperoa o Konesetatino. O le isi vaega o lona olaga, sa faaopoopo atu ai ana gaoioiga faa-epikopō i Kaisareia, i lana galuega o se tusitala. E ui lava na lauiloa o ia o se tusitala o talafaasolopito, ae sa avea foʻi Eusipio ma se tagata e lagolagoina lana tapuaʻiga, o sē na faia faafanua, o sē talaʻi, o se faitofā, ma o se tusitala e faamatalaina tusitusiga faalotu.

Ana Fuafuaga e Lua

Aiseā na faia ai e Eusipio lea galuega telē e leʻi faapea ona faia muamua e se isi? O le tali i ai, ona o lona talitonuga, na ola o ia i le taimi o le suiga o olaga o tagata. Na ia manatu faapea, na tutupu mea iloga ma tāua i augātupulaga ua teʻa, ma sa manaʻomia ai ni faamaumauga tusitusia o ia mea mo augātupulaga i le lumanaʻi.

Sa iai foʻi se isi fuafuaga a Eusipio—ia avea ma sē e lagolagoina le mea saʻo. Na ia talitonu faapea o le Faa-Kerisiano na amataina e le Atua. Ae peitaʻi, na tetee nisi i lenei manatu. Na tusi Eusipio e faapea: “O laʻu fuafuaga ia taʻua igoa o tagata ma lo latou aofaʻiga ma pe faafia foʻi ona latou taumafai e faaofi mai aʻoaʻoga fou ma faia ai se mea e matuā sesē, ma taʻua i latou lava o tagata ua mauaina le poto ae pepelo, ua pei ai i latou o luko feʻai ua faaleagaina ma le lē alofa le lafu a Keriso.”

Pe na manatu Eusipio o ia o se Kerisiano? E mautinoa lava o le tulaga lenā, auā sa ia faasino iā Keriso o “lo tatou Faaola.” Na ia taʻua e faapea: “O laʻu fuafuaga . . . o le toe faamatalaina lea o mala na tutupu ia na oo faafuaseʻi i le nuu atoa o Iutaia, ona o iʻuga o ā latou faufauga leaga i lo tatou Faaola, ma tusia auala ma taimi na faaleaga ai le afioga a le Atua e tagata o Nuu Ese, ma faamatalaina ituaiga o tagata na puipui malosi i le afioga a le Atua i vaitaimi eseese, e ui i sauaga ma le faamasaatoto faapea ma le taʻutino atu i le lautele o lo latou faamaoni i ō tatou aso, ma le fesoasoani alofa ma le agalelei ua tuuina atu e lo tatou Faaola iā i latou uma.”

 Ana Saʻiliʻiliga e Tele

E anoanoaʻi tusi na faitauina e Eusipio ma siiina mai ai manatu i ia tusi. E na o tusitusiga lava a Eusipio na faailoa mai ai le toʻatele o tagata iloga o uluaʻi senituri e tolu talu ona soifua mai Iesu. O ana faamaumauga aogā ua mauaina ai le malamalamaga i taualumaga tāua ia e na o ana tusitusiga lava e aliali mai ai. O na faamatalaga, na ia maua mai i tusi ma puna eseese o le poto e lē o toe mauaina nei.

Sa maumauaʻi ma māeʻaeʻa lelei le aoaoina o faamatalaga e Eusipio. E foliga mai sa ia iloa lelei lava faamatalaga e moni ma faamatalaga e lē moni. Peitaʻi, e lē faapea ai ua lē masesē ana tusitusiga. I nisi taimi, na sesē ai ona ia faamatalaina tagata ma e oo foʻi ina lē malamalama iā i latou ma a latou gaoioiga. I nisi taimi sa lē saʻo ona ia faatulaga le faasologa o mea na tutupu ma le taimi na tutupu ai. Sa lē lelei foʻi le auala na ia avatu ai faamatalaga i ana tusi. O lea, e ui lava i vaivaiga i ana tusitusiga, ae o le tele o ana tusi e manatu i ai o se ʻoa e lē mafaatusalia.

Pe sa Ia Naunau ea i le Upu Moni?

Sa manatu mamafa Eusipio i le manatu na lāgā lea e leʻi maua se tonu e faatatau i le sootaga a le Tamā ma le Alo. Pe na muamua soifua le Tamā i le Alo, e pei ona talitonu i ai Eusipio? Pe tutusa le Tamā ma le Alo? Na ia fesili mai, “afai e tutusa le Tamā ma le Alo, e faapefea ona avea le Tamā ma Tamā ma le Alo e avea ma Alo?” Sa ia lagolagoina lona talitonuga i mau faale-Tusi Paia, i le faasino atu i le Ioane 14:28, lea e faapea mai, ‘e sili le Tamā iā Iesu,’ ma le Ioane 17:3, lea o loo faasino atu iā Iesu faapea o lē na “auina mai” e le Atua moni e toʻatasi. I le faasino atu i le Kolose 1:15 ma le Ioane 1:1, na taʻua ai e Eusipio faapea o le Lokou, po o le Upu, o le Alo lea o le Atua ma o “le faatusa o le Atua e lē vaaia.”

O lea, o se mea e faateʻia ai ina ua faaumaina le Fono i Naisia, na lagolagoina e Eusipio le manatu sesē. I le eseese ma lona talitonuga faale-Tusi Paia na iai faapea o le Atua ma Keriso e lē tutusa, na ia lolo atu i le manatu o le emeperoa.

Se Lesona e Aʻoaʻoina Mai Ai

Aiseā na lolo atu ai Eusipio i omiga i le Fono i Naisia ma lagolagoina se aʻoaʻoga e lē faale-Tusi Paia? Pe na taulaʻi atu ea o ia i tulaga faapolotiki? Aiseā na ia auai i le fono? E ui lava na poloaʻia uma epikopō e auai, ae sa na o se vaega toʻaitiiti—e 300—na auai. Pe na manatu mamafa Eusipio i lona tulaga faaletagata? Aiseā na vaai maualuga ai le emeperoa o Konesetatino iā te ia? Sa nofo Eusipio i le itu taumatau o le emeperoa i le taimi o le fono.

E manino mai sa lē mulimuli Eusipio i le faatonuga a Iesu i Ona soo e faapea, e tatau ona “lē ni o le lalolagi i latou.” (Ioane17:16; 18:36) Na fesili le soo o Iakopo e faapea: “O outou tagata mulilulua e, tou te lē iloa ea o le fefaauoaʻi ma le lalolagi o le ita lea i le Atua?” (Iakopo 4:4) O lea ua matuā talafeagai le apoapoaʻiga a Paulo e faapea: “Aua tou te amo faalēgatasi ma ē lē talitonu”! (2 Korinito 6:14, LT) O lea seʻi o tatou tumau pea ona vavae ese mai le lalolagi a o tatou ‘tapuaʻi atu [i le Tamā] i le agaga ma le faamaoni.’—Ioane 4:24.

[Ata i le itulau 31]

Se ata e faaalia ai le Fono i Naisia

[Faamatalaga i Ata]

Scala/Art Resource, NY

[Faamatalaga i Ata i le itulau 29]

Faatagaga a le Special Collections Library, a le Iunivesite o Michigan