Ia Mafaufau Lelei ma Gaoioi ma le Poto

SEʻI manatu i lenei vaaiga: O loo faamatalaina e Iesu Keriso o le a faapogaia e fili faalelotu i Ierusalema le tigā tele iā te ia ma oo ai ina fasiotia o ia. E leʻi talitonu i ai lana uō vavalalata o le aposetolo o Peteru. O le mea moni, na taʻitaʻiina e Peteru Iesu i autafa ma vavao iā te ia. E lē mafesiligia le faamaoni ma le manatu mamafa moni o Peteru. Ae peitaʻi, e faapefea ona manatu Iesu i manatunatuga o Peteru? Ua faapea mai Iesu: “Satani e, inā alu ia oe i oʻu tua, ua fai oe ma mea ou te tausuai ai; auā e lē o mea a le Atua ua e loto i ai, a o mea a tagata.”—Mataio 16:21-23.

Pagā le faateʻia o Peteru! Na i lo le avea o se fesoasoani ma se lagolagosua, ua avea o ia “ma mea e tausuai ai” i lona Matai faapelepeleina. Na faapefea ona tupu lenei mea? Atonu ua maileia Peteru i masei masani o mafaufauga faaletagata—o le talitonu na o mea e manaʻo e talitonu i ai.

Aua le Soona Mautinoa Naʻuā

O se faamataʻuga i lo tatou tomai e mafaufau lelei ai, o le faanaunauga lea o le soona mautinoa naʻuā. Na lapataʻi le aposetolo o Paulo i uso Kerisiano i Korinito anamua e faapea: “O lē manatu o loo o tū ia, inā faaeteete ia neʻi paʻū.” (1 Korinito 10:12) Aiseā na fai mai ai faapea Paulo? Talu ai, e foliga mai na ia iloa lelei le faigofie ona sesē o mafaufauga faaletagata—e oo lava i mafaufau o Kerisiano e mafai “ona faaleagaina . . . manatu ina ia lē tonu iā Keriso.”—2 Korinito 11:3.

O le mea lenei na tupu i le augātupulaga o tupuaga o Paulo. Na taʻu atu e Ieova iā i latou e faapea: “O oʻu manatu e lē o outou manatu, o oʻu ala e lē o outou ala.” (Isaia 55:8) Ua avea i latou ma ē “popoto i o latou lava manatu,” ua iʻu ai i ni iʻuga leaga. (Isaia 5:21) O lea la, e mautinoa, e talafeagai ona tatou iloiloina pe faapefea ona tatou tausia o tatou lava mafaufauga ina ia lelei ma ʻalofia ai iʻuga leaga faapena.

Ia Faaeteete i Mafaufauga Faaletagata

Na matuā aafia nisi i Korinito i mafaufauga faaletagata. (1 Korinito 3:1-3) Ua latou ave le faamamafa i filosofia a tagata na i lo le Afioga a le Atua. E lē taumatea, o le ʻaufaitofā Eleni i lenā taimi, o ni tagata atamamai tele. Ae peitaʻi, e vālea i latou i le silafaga a le Atua. Na faapea mai Paulo: “Ua tusia, Ou te faaumatia le poto o ē popoto, ma ou faalēaogāina le atamai o ē atamamai. Po o ifea le tagata poto? Po o ifea le tusiupu? Po o ifea le filifiligā o lenei  lalolagi? E lē ua avea ea e le Atua le poto o lenei lalolagi ma valea?” (1 Korinito 1:19, 20) O na tagata atamamai sa pulea e “le agaga o lenei lalolagi” na i lo le agaga o le Atua. (1 Korinito 2:12) O o latou filosofia ma manatu e lē talafeagai ma le finagalo o Ieova.

O le pogai autū o na mafaufauga faaletagata o Satani le Tiapolo, o lē na faaaogāina le gata e ʻolegiaina Eva. (Kenese 3:1-6; 2 Korinito 11:3) Pe o avea ea o ia o se lamatiaga iā i tatou? Ioe! E tusa ai ma le Afioga a le Atua, o Satani “ua faatauasoina manatu” o tagata i le telē ua iai nei lea ua ia “faasesē i le lalolagi uma.” (2 Korinito 4:4; Faaaliga 12:9) Maʻeu le matuā tāua o le mataala i ana togafiti!—2 Korinito 2:11.

Mataala i “le Pepelo o Tagata”

Na lapataʻi mai foʻi le aposetolo o Paulo e faasaga i “le pepelo o tagata.” (Efeso 4:14) Na ia fetaiaʻi ma le “ʻau faigaluega ʻoleʻole” o ē na faafoliga o loo tautatala i le upu moni, peitaʻi ua latou mimilosesēina. (2 Korinito 11:12-15) Ina ia ausia a latou fuafuaga, atonu ua faaaogā e na tagata faamaoniga e lagolagoina ai o latou manatu, faaupuga e faagaee ai faalogona o tagata, faamatalaga e lē moni atoatoa ma faamatalaga uiga lua po o le pepelo.

O le tagata e faia faamatalaga taufaasesē e masani ona faaaogāina le upu e pei o le “lotu mavae” e taʻuleagaina ai isi. I le Fono a le Palemene a Europa, na faatūina ai se manatu e faapea, o tagata maualuluga o loo iloiloina vaega o tapuaʻiga fou e “tatau ona fautuaina lelei ia aua neʻi faaaogāina lenei faaupuga.” Aiseā? Ona e manatu o le upu “lotu mavae” e matuā lē logolelei lava lona uiga. I se auala faapena, na tuuaʻia sesē ai e le ʻau atamamai a Eleni le aposetolo o Paulo faapea o se “tagata sii i le lau,” po o se tagata e tautala soo. O lona uiga na latou faapea mai o Paulo o sē e fai tala lē atoatoa pe faatupu tala. Ae o le mea moni, o Paulo “ua na folafola atu iā te i latou le tala lelei iā Iesu ma le toe tū mai.”—Galuega 17:18.

Po o taulau ea auala a tagata o loo faia faamatalaga taufaasesē? Ioe. Ua avea i latou ma vala autū i le faapogaia o le feitagaʻi i le va o ituaiga o tagata ma lotu e ala i le mimilosesēina o le vaaiga a tagata i isi atunuu po o lotu. O le toʻatele ua faaaogāina na auala ina ia taʻufaatauvaaina ai se vaega o tagata e lē o fiafia i ai tagata lautele. Na faaaogāina ma le uigā e Adolf Hitler na auala ina ua ia faaataina mai tagata Iutaia ma isi vaega e faapea o ni ē ua “matuā paʻū maulalo,” “amioleaga,” ma o se “taufaamataʻu” i le lo latou atunuu. Ia aua lava neʻi faatagaina nei ituaiga o faamatalaga taufaaʻoleʻole e faaleagaina ai ou mafaufauga.—Galuega 28:19-22.

Aua Neʻi Faasesēina Oe Lava

E faigofie foʻi ona faasesēina i tatou lava. O le mea moni, atonu e matuā faigatā ona aveesea ni talitonuga e pele iā i tatou pe lē manaʻo foʻi e fesiligia. Aiseā? Talu ai o o tatou manatu e aafia ai o tatou faalogona. O lea, atonu e mafai ona faasesēina ai i tatou lava e ala i mafaufauga sesē—faapogaia o māfuaaga e faamaonia ai se talitonuga ae o le mea moni, e sesē lenā talitonuga.

Na tupu lenei mea i nisi o Kerisiano i le uluaʻi senituri. Na latou iloa le Afioga a le Atua, peitaʻi latou te leʻi faatagaina e pulea ai o latou mafaufauga. Na iʻu i le ‘faasesēina ai o i latou e i latou lava.’ (Iakopo 1:22, 26) O se tasi o faailoga e iloa ai pe atonu ua maileia i tatou i le faasesēina o i tatou lava, o le lē fiafia lea pe a fesiligia o tatou talitonuga. Na i lo le lē fiafia, e atamai ona fetālaʻi o tatou mafaufau ma faalogologo ma le faaeteete i mea o fai mai ai isi, e tusa lava pe tatou te mautinoa o o tatou manatu e saʻo.—Faataoto 18:17.

Matuā Saʻili i “le Poto i le Atua”

O le ā e mafai ona tatou faia ina ia tausia ai o tatou mafaufauga ia lelei? Ua iai le tele o fesoasoani, peitaʻi e tatau ona tatou tauivi e galulue ina ia maua. Na faapea mai le tupu poto o Solomona: “Loʻu atalii e, afai e te talia  aʻu upu, ma e teu i lou loto aʻu poloaʻiga, e uaʻi atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te saʻiliʻili iā te ia, e pei ona saʻiliʻili i le ario; afai e te suʻesuʻe i ai, pei ona suʻesuʻe i le oloa lilo; ona e lagona ai lea o le mataʻu iā Ieova, ma e maua ai le poto i le Atua.” (Faataoto 2:1-5) Ioe, afai e fai ni a tatou lava taumafaiga e faatumu o tatou mafaufau ma loto i upu moni o le Afioga a le Atua, o le a tatou maua le atamai, malamalama ma le faautauta. O le iʻuga, o le a tatou matuā saʻili mo mea e sili atu ona tāua na i lo le ario po o so o se isi lava ʻoa faaletino.—Faataoto 3:13-15.

O le atamai ma le poto e mautinoa o vala tāua ia o mafaufauga lelei. Ua faapea mai le Afioga a le Atua: “A oo le poto i lou loto, ma ua mālie iā te oe le atamai; e faafeao le mafaufau iā te oe; e leoleo iā te oe le faautauta; ina ia laveaʻi iā te oe ai le ala leaga; ai le tagata ua tautala i mea faapiʻopiʻo; o ē tuua ala tonu, a e ui atu i ala pogisa.”—Faataoto 2:10-13.

E faapitoa lava ona tāua le faatagaina o mafaufauga a le Atua e taʻitaʻia o tatou mafaufauga i taimi o mafatiaga po o faigatā. O faalogona malolosi e pei o le ita ma le mataʻu e mafai ona faafaigatā ai ona mafaufau lelei. Ua faapea mai Solomona: “O le sauā e faavalea ai lava le tagata poto.” (Failauga 7:7) E ono oo ai lava ina “ita foʻi [o tatou] loto iā Ieova.” (Faataoto 19:3) E faapefea? E ala i le tuuaʻia o le Atua i o tatou faafitauli ma faaaogāina na mea e fai ma faamolemolega i le faia o mea e lē talafeagai ma ana tulafono ma mataupu silisili. Na i lo le mafaufau faapea e masani ona tatou faia ni faaiʻuga saʻo, seʻi o tatou faalogo atu ma le lotomaulalo iā i latou ua iai le atamai o ē o saʻili e fesoasoani iā i tatou e ala i le faaaogāina o le Tusi Paia. Ma pe afai e talafeagai ai, seʻi o tatou sauniuni e lafoaʻia o tatou manatu pe afai ua faamaonia e sesē.—Faataoto 1:1-5; 15:22.

“Inā Ole Atu ia i le Atua”

Ua tatou ola i taimi fenuminumiaʻi ma le mataʻutia. E tāua le tatalo e lē aunoa mo le taʻitaʻiga a Ieova pe afai o le a tatou faia se faaiʻuga lelei ma gaoioi ma le atamai. Ua tusi mai Paulo e faapea: “Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” (Filipi 4:6, 7) Afai ua leai se poto iā i tatou e taulimaina ai faafitauli faigatā po o tofotofoga, e manaʻomia ona tatou “ole atu ia i le Atua, o lē foaʻi tele mai i tagata uma ma le lē toe taʻutaʻua.”—Iakopo 1:5-8.

I le iloaina faapea e manaʻomia e uso Kerisiano le atamai, na saʻili ai le aposetolo o Paulo e ‘faamāfanafana i o latou loto faamaoni.’ Na ia manaʻo iā i latou ina ia ‘manatu i valoaga na fai mai e le ʻau perofeta paia, ma le poloaʻiga a le Alii o le Faaola,’ o Iesu Keriso. (2 Peteru 3:1, 2) Afai tatou te faia lenei mea ma tausia o tatou mafaufauga ia talafeagai ma le Afioga a Ieova, o le a tatou mafaufau lelei ai ma gaoioi ma le atamai.

[Ata i le itulau 21]

Na faataga e uluaʻi Kerisiano le atamai o le Atua, ae lē o manatu faafilosofia, e pulea ai o latou mafaufauga

[Faamatalaga i Ata]

O le ʻaufaifilosofia mai i le itu agavale: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Ata i le itulau 23]

E tāua le tatalo ma le suʻesuʻeina o le Afioga a le Atua