‘Ia Faalatalata Atu i le Atua, Ona Ia Faalatalata Mai Lea’

Le Olaga Muamua ma Mulimuli Ane Ai—Na Ia Maua le Malosi e Faia ai ni Suiga

NA TAʻUA e se fafine i Mekisikō e suafa iā Sandra, e faapea o ia o le tagata faalogogatā i lona aiga. O le teena o ia ma le leai o ni faalogona māfana e faaalia iā te ia na faaleagaina ai ona tausaga talavou. Ua ia faapea mai: “I le taimi o loʻu talavou na lofitūina aʻu i faalogona mafatia ma le tele o masalosaloga e uiga i le māfuaaga ua ou ola ai ma faatatau i le olaga.”

A o iai Sandra i le aʻoga maualuga, na amata ai ona ia inuina le uaina a lona tamā sa i le fale. Mulimuli ane, na amata ona ia faatau ana lava fagu malosi ma avea ai o ia ma se tasi e pulea e le ʻava malosi. Ua ia taʻutino mai e faapea: “Sa leai soʻu faanaunauga e ola.” I lona matuā lē mautonu, na amata ai ona ia faaaogāina fualaau faasāina. Ua ia faapea mai: “E na o le pau lava le mea e fesoasoani iā te aʻu e faagalo ai oʻu faafitauli, o mea ia o loo ou tauaveina i totonu o laʻu tamaʻi ato: o se fagu malosi, o ni fualaau faasāina ma ni mariuana.”

Ina ua uma le aʻoga faafomaʻi a Sandra, na atili ai ona pulea o ia e le ʻava malosi. Na ia taumafai e pule i lona ola peitaʻi na ola pea o ia.

Sa leʻi taulau lana saʻiliga i le tele o lotu eseese mo se fesoasoani faaleagaga ma le lagolagosua tau faalogona. Ona o le leai o se faamoemoe ma le lē mautonu, na ia ole atu ai e lē aunoa i le Atua: “O fea ea o e iai? Aiseā e te lē fesoasoani mai ai iā te aʻu?” Ina ua matuā leai lava ni ona faalogona o le faatāuaina o ia lava, na talanoa atu ai se tasi o Molimau a Ieova iā te ia. O lea, na amata ai loa se suʻesuʻega faale-Tusi Paia. Na matuā pāʻia le loto o Sandra ina ua ia aʻoaʻoina e faapea e “latalata mai Ieova i ē ua loto momomo.”—Salamo 34:18.

Na fesoasoani lē o loo la suʻesuʻeina faatasi le Tusi Pai iā te ia ina ia malamalama e faapea, ua silafia e Ieova le Atua ua maileia i tatou ona o le agasala ma le lē lelei atoatoa na tuufaasolo mai iā Atamu. Na iloa e Sandra e faapea e malamalama lelei le Atua e lē mafai ona tatou ola atoatoa e ōgatusa ma faatulagaga amiotonu. (Salamo 51:5; Roma 3:23; 5:12, 18) Ua ia fiafia e aʻoaʻoina e lē taulaʻi Ieova i na o tatou vaivaiga ma na te lē faatalitalia ni mea e sili atu na i lo mea tatou te mafaia. Na fesili le faisalamo e faapea: “Ioa e, afai e te mātaulia lē amio leaga, le Alii e, o ai sē na te mafaia ona tulaʻi?”—Salamo 130:3.

O le upu moni tāua o le Tusi Paia na faamāfanafanaina ai le loto o Sandra, o le taulaga togiola a Iesu Keriso. E ala mai i lenā taulaga togiola, ua tuuina ai ma le agalelei e Ieova i tagata usiusitai se tulaga amiotonu e ui i lo latou tulaga lē lelei atoatoa. (1 Ioane 2:2; 4:9, 10) Ioe, e mafai ona ‘faamagaloina a tatou agasala’ ma fesoasoani e foʻia so o se faalogona o le lē aogā.—Efeso 1:7.

Na aʻoaʻoina e Sandra ni lesona tāua mai le faaaʻoaʻoga a le aposetolo o Paulo. Na ia matuā talisapaia le agalelei o le Atua i le faamagaloina ma le alofa o ana mea sesē ua teʻa ma lagolagoina lana taumafaiga faigatā i le foʻiaina o ni vaivaiga e faaauau ona tulaʻi mai. (Roma 7:15-25; 1 Korinito 15:9, 10) Na faasaʻoina e Paulo ona ala o le olaga i le ‘faatoʻilaloina o lona tino ma fai ma pologa’  ina ia tumau ai i le ala na faamaonia e le Atua. (1 Korinito 9:27) Sa ia leʻi faatagaina ona faanaunauga agasala e taʻitaʻia ai o ia o se pologa.

O vaivaiga o Sandra na pagatia ai o ia, ae peitaʻi na faaauau pea ona ia taumafai malosi e foʻia. Sa ia tatalo ma le faatauanau mo le fesoasoani a Ieova ina ia foʻia ai ma saʻili lona alofa mutimutivale. (Salamo 55:22; Iakopo 4:8) O le lagonaina o le naunau totino o le Atua iā te ia, na mafai ai e Sandra ona suia lona olaga. Ua ia faapea mai: “Ua ou maua le olioli o le aʻoaʻoina o isi i taimi uma i le Tusi Paia.” Na iā Sandra le faaeaga o le fesoasoani atu i lona uso matua ma lona uso laititi ia iloa Ieova. A o ia ‘faia galuega lelei,’ ua faaaogā foʻi lona tomai faafomaʻi e galue tauofo ai i tauaofiaga a Molimau a Ieova.—Kalatia 6:10.

Ae faapefea mea na pulea ai Sandra? Ua ia faapea mai ma le mautinoa: “Ua mamā loʻu mafaufau. Ua ou lē toe inu, ulaula pe faaaogā fualaau faasāina. Ua ou lē toe manaʻomia na mea. Ua ou maua le mea na ou saʻilia.”

[Faamatalaga faaopoopo i le itulau 9]

“Ua ou maua le mea na ou saʻilia”

[Pusa i le itulau 9]

Mataupu Silisili o le Tusi Paia e Aogā

O nisi nei o mataupu silisili o le Tusi Paia na fesoasoani i le toʻatele e saʻoloto ai mai i le faaleagaina i mea na pulea ai i latou:

“Ia tatou faamamā iā te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” (2 Korinito 7:1) Ua faamanuia le Atua iā i latou o ē na faamamāina i latou lava mai le faaleagaina ma ʻalofia faiga lē mamā.

“O le mataʻu iā Ieova, o le ʻinoʻino lea i le leaga.” (Faataoto 8:13) O le mataʻu ma le migao i le Atua e fesoasoani i se tasi e saʻoloto mai ai i amioga leaga e aofia ai le faaleagaina i fualaau faasāina. E lē gata e faafiafiaina ai le finagalo o Ieova, ae e puipuia ai lē ua suia ona ala mai faamaʻi mataʻutia.

‘Ia outou usiusitai ma gauaʻi i alii sili ma faipule.’ (Tito 3:1) I le tele o nofoaga, o le mauaina po o le faaaogāina o fualaau faasāina o le solia lea o le tulafono. E lē tatau ona mauaina pe faaaogāina e Kerisiano moni fualaau faasāina.