Pe e iā te Oe le Uiga o le “Faatalitali”?

“Pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua?”—2 PETERU 3:11, 12.

1, 2. E faapefea ona tatou faataʻitaʻiina le iai o se uiga o le “faatalitali” e tusa ai ma le aso o Ieova?

SEʻI faapea o loo faatalitalia e se aiga ni mālō mo se taumafataga. Ua lē o toe umi lava ae taunuu loa. O loo pisi le tinā i le faia o tapenapenaga mulimuli mo le taumafataga. O loo fesoasoani le tamā ma le fanau ina ia faamautinoa ua saunia mea uma. Ua fiafia tagata uma. Ioe, ua faatalitali ma le naunautaʻi le aiga atoa i le taunuu mai o mālō ma o loo tulimataʻi se taumafataga manogi ma se aufaatasiga manaia.

² I le avea o ni Kerisiano, o loo tatou faatalitali ai i se mea e sili atu lona tāua. Faatalitali mo le ā? O i tatou uma lava o loo faatalitali i “le aso o le Atua.” A o leʻi oo mai, e manaʻomia ona tatou pei o le perofeta o Mika, o lē na faapea mai: “Ou te faatalitali iā Ieova, ou te faamoemoe i le Atua o loʻu olataga.” (Mika 7:7) Po o lona uiga ea o le a lē toe iai ni gaoioiga e fai? E leai. O loo tele galuega e tatau ona fai.

3. E tusa ai ma le 2 Peteru 3:11, 12, o le ā le uiga e tatau ona iai i Kerisiano?

³ Ua fesoasoani mai le aposetolo o Peteru iā i tatou ina ia iai se uiga saʻo a o tatou faatalitali. Ua ia faapea mai: “Pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua?” (2 Peteru 3:11, 12) Mātau i lana faamatalaga, e leʻi fesiligia pe faatupuina e Peteru se masalosalo i le ituaiga o tagata e tatau ona tatou iai. I ana tusi e lua na faagaeeina e le Atua, na ia faamatalaina ai po o ā ituaiga tagata e tatau ona iai Kerisiano. Na ia apoapoaʻi iā i latou ina ia faaauau ona faia le “amio lelei ma le amio Atua.” E ui lava ua mavae le 30 tausaga talu ona taʻu atu e Iesu le faailoga “o le faaiʻuga o le faiga o mea,” ae sa lē tatau ona taofia ai le mataalia o Kerisiano. (Mataio 24:3, NW) Sa tatau ona latou “faatalitali ma naunau atu” ia aulia mai le aso o Ieova.

4. O le ā e aofia ai i le “naunau atu ia aulia mai le aso o le Atua”?

⁴ O le upu Eleni i inei e faaliliuina ia “naunau atu” o lona uiga moni “ia faatelevave.” O le mea moni, e lē mafai ona tatou ‘faatelevaveina’ le aso o Ieova. I lenā tulaga, tatou “te lē iloa le aso po o le itu aso” o le a afio mai ai Iesu e faaoo le faasalaga i fili o lona Tamā. (Mataio 24:36; 25:13) Ua faamatalaina e se tasi o faamaumauga, o le veape autū o le faaupuga “ia faatelevave” o loo uiga atu “‘i le faanatinati’ ma e fesootaʻi vavalalata ‘i le maelega, tiotio ma manatu mamafa i se mea.’” O  lea na uunaʻia ai e Peteru uso talitonu ina ia matuā naunau ia aulia mai le aso o Ieova. E mafai ona latou faia lenei mea e ala i le manatua pea e lē aunoa. (2 Peteru 3:12) Ua matuā latalata mai lava “le aso tele ma le silisili o Ieova,” ua tatau ai ona faapena foʻi o tatou uiga.—Ioelu 2:31.

Faatalitali ma le “Amio Lelei”

5. E mafai faapefea ona tatou faaalia o loo tatou matuā naunau e vāai i “le aso o le Atua”?

⁵ Pe afai o loo tatou matuā naunau ina ia faasaoina i le aso o Ieova, o le a tatou faamaonia lenā mea e ala i la tatou “amio lelei ma le amio Atua.” O le faaupuga “amio lelei” atonu ua faamanatu mai ai iā i tatou le apoapoaʻiga a Peteru e faapea: “Ia pei o fanau gauaʻi, aua neʻi faatusaina outou e outou i o outou tuʻinanau tuai, a o vālea outou; a e pei ona paia o ia na valaauina outou, ia faapea foʻi outou ona paia i a outou amio uma; auā ua tusia, Ia paia outou, auā o aʻu nei e paia lava aʻu.”—1 Peteru 1:14-16, LT.

6. Ina ia paia, o le ā e tatau ona tatou faia?

⁶ Ina ia paia, e tatau ona tausia lo tatou mamā faaletino, mafaufau, amio ma le faaleagaga. Pe o tatou sauniuni ea i “le aso o le Atua” e ala i le tausia o i tatou taʻitoʻatasi ia paia i le avea ma tagata o loo molimau atu i le suafa o Ieova? E lē faigofie i aso nei ona tausia lenā mamā, talu ai ua faasolosolo ina matuā leaga lava tulaga tau amio a le lalolagi. (1 Korinito 7:31; 2 Timoteo 3:13) Pe o i ai ea se eseesega i tulaga o a tatou amio ma i latou o i le lalolagi? Afai e leai, ua iai la se māfuaaga tatou te popole ai. Po o o tatou tapulaa tau amio, lea e sili atu na i lo o i latou i le lalolagi, ua faasolosolo ina paʻū maulalo? Afai o lea, e manaʻomia ona tatou faia se gaoioiga e faasaʻo ai o tatou tulaga ina ia faafiafia ai le Atua.

7, 8. (a) E mafai faapefea ona sesē la tatou vaai i le tāua o le faia o le “amio lelei”? (e) O ā ni gaoioiga saʻo e manaʻomia?

⁷ Ua faapea mai se tasi o fomaʻi, o le faigofie ona mauaina o ata ma faamatalaga matagā o faiga faaleituaiga i le Initineti ma le mafai ona matamata i ai e aunoa ma le iloa mai e isi, o nisi o ē e leʻi mafai muamua ona matamata i na ata matagā ua latou mauaina nei “le tele o faamatalaga e faatatau i faiga faaleituaiga.” Pe afai tatou te saʻili i na faiga lē mamā i le Initineti, e mautinoa ua tatou lē amanaʻiaina le faatonuga a le Tusi Paia ia “aua neʻi paʻi atu i se mea leaga.” (Isaia 52:11) Pe a tatou faia lenā mea, po o tatou matuā “naunau atu ia aulia mai le aso o le Atua”? Pe atonu o loo tolopō i o tatou mafaufau lenā aso, i le manatu faapea e tusa lava pe faaleagaina o tatou mafaufau i na faamatalaga matagā, ae o loo lava pea le taimi e faamamāina ai i tatou? Pe afai e iai so tatou faafitauli e faatatau i ata ma faamatalaga matagā o faiga faaleituaiga, e tāua tele le vave ona ole atu iā Ieova ina ‘ia liliueseina o tatou mata neʻi vaai i mea lē aogā ma ia faaolaolaina i tatou i ona ala’!—Salamo 119:37.

⁸ O le toʻatele o Molimau a Ieova, o ē talavou ma matutua, ua pipii atu i tapulaa maualuluga tau amio a le Atua ma ʻalofia faaosoosoga lē mamā a lenei lalolagi. Ua faaauau ona latou faia le “amio lelei” ona ua latou iloaina le televave o o tatou taimi ma le lapataʻiga a Peteru e faapea, “e sau le aso o le Alii pei o se gaoi.” (2 Peteru 3:10) Ua faamaonia i a latou gaoioiga o loo latou “faatalitali ma naunau atu ia aulia mai le aso o le Atua.” *

 Faatalitali ma le “Amio Atua”

9. O le ā e tatau ona uunaʻia i tatou e le amio Atua e fai?

⁹ E tāua foʻi le “amio Atua” pe afai o tatou naunau atu i le aso o Ieova. E aofia i le “amio Atua” le migao i le Atua, lea e uunaʻia ai i tatou e faia le mea e fiafia ai lona finagalo. O le pipiimau atu ma le faamaoni iā Ieova, o le uunaʻiga malosi lea i na gaoioiga amio Atua. O lona finagalo ia “faaolaina o tagata uma lava, ma ia oo ina iloa lelei le upu moni.” (1 Timoteo 2:4) O le Atua e “lē finagalo ia fano se tasi, a ia oo uma lava i le salamō.” (2 Peteru 3:9) O lea la, pe lē tatau ea ona faagaeetia ai i tatou e lo tatou amio Atua, e faateleina atili a tatou taumafaiga e fesoasoani i tagata ina ia aʻoaʻoina e uiga iā Ieova ma faaaʻoaʻo iā te ia?—Efeso 5:1.

10. Aiseā e tatau ai ona leoleoina i tatou faasaga i “le pepelo o le ʻoa”?

¹⁰ O le a faateleina gaoioiga o le amio Atua i o tatou olaga pe afai tatou te muaʻi saʻili le Malo o le Atua. (Mataio 6:33) E aofia ai i lenei mea le iai o se vaaiga paleni i meafaitino. Na lapataʻi Iesu e faapea: “Ia outou, ia leoleo outou iā te outou aua le matapeʻapeʻa; auā e lē ola se tasi i le tele o ana mea ua iā te ia.” (Luka 12:15) E ui lava atonu e faigatā ona tatou manatu e faapea ua faatauasoina i tatou i le manaʻo i tupe, ae lelei ona mātau e faapea o “le loto popole i mea a lenei lalolagi, ma le pepelo o le ʻoa” e mafai ona “fetinaʻiina ai le upu” a le Atua. (Mataio 13:22) Atonu e lē faigofie le saʻilia o mea e tausi ai le soifua. I nisi atunuu o le lalolagi, ua manatu ai le toʻatele o tagata e faapea ina ia soifua i se olaga lelei, e tatau ona latou siitia atu i se atunuu e sili atu lona tamaoaiga, atonu e tuua ai o latou aiga mo ni nai tausaga. E oo lava i nisi tagata o le Atua ua latou manatu i le auala lea. O le faimalaga atu i se isi atunuu, atonu o le a mafai ai ona latou saunia meafaitino faaonapōnei mo o latou aiga. Ae peitaʻi, o le ā e ono tupu i le tulaga faaleagaga o ē e pele iā i latou o loo faamuli mai i le aiga? A aunoa ma le faatinoina ma le talafeagai o le tulaga ulu i le aiga, pe o le a latou malolosi ea faaleagaga ina ia faasaoina ai i le aso o Ieova?

11. Na faaalia faapefea e se tagata na malaga i se isi atunuu e faigaluega ai, le sili atu ona tāua o le amio Atua na i lo le tamaoaiga?

¹¹ Na aʻoaʻoina e se tagata Filipaina le upu moni o le Tusi Paia mai i Molimau a Ieova, ina ua malaga atu i Iapani e faigaluega ai. Ina ua ia aʻoaʻoina e faatatau i le tiute tauave faale-Tusi Paia a le ulu o le aiga, na ia iloa ai e manaʻomia ona ia fesoasoani i lona aiga ia avea ma tagata tapuaʻi iā Ieova. (1 Korinito 11:3) Na matuā tetee malosi lana avā o loo faamuli mai i le aiga i lona faatuatuaga fou ma na manaʻo ai iā te ia e auina atu pea tupe na i lo le toe foʻi atu e aʻoaʻo le aiga i ona talitonuga faale-Tusi Paia. Ae ui i lea, na ia toe foʻi atu i le aiga ona o le faagaeetia o ia i le faanatinati tele o le taimi ma lona manatu mamafa i ē e pele iā te ia. Na tauia lona onosai e feutagaʻi ma le alofa ma sui o lona aiga. Mulimuli ane, na autasia lona aiga i le tapuaʻiga moni ma na auai lana avā i le faiva faataimi atoa.

12. Aiseā e tatau ai ona tatou faamuamua manaʻoga faaleagaga i o tatou olaga?

¹² Atonu e mafai ona faatusaina lo tatou tulaga, iā i latou o loo i se fale ua mū. Pe e atamai  ea lou momoʻe faanatinati atu ina ia toe maua mai meafaitino mai le fale o loo mū ma ua toeitiiti paʻū? Na i lo lea, pe lē sili atu ea le tāua o le faasaoina o tatou lava ola, o o tatou aiga ma isi o loo nonofo i le fale? Ioe, ua vave ona oo atu lenei faiga amioleaga o mea i lona faaumatiaga ma ua lamatia ai soifua o tagata. O le iloaina o lenei mea, e mautinoa ua tatau ai ona tatou faamuamua manaʻoga faaleagaga ma uaʻi atu ma le maelega i le galuega faasaoola o le talaʻiga o le Malo.—1 Timoteo 4:16.

E Manaʻomia Ona Tatou “Lē Ponā”

13. O le ā le tulaga tatou te mananaʻo e iai pe a oo mai le aso o Ieova?

¹³ O le faamamafa mai o le tāua o le tausia o se uiga o le faatalitali, ua faapea mai Paulo: “Le ʻau pele e, ua outou faatalitali i ia mea, o lea ia outou finafinau ai lava ina ia maua outou e [le Atua] ma le manuia, ua lē ponā, ma le lē mataʻuleagaina.” (2 Peteru 3:14) I le faaopoopo atu i lana timaʻiga ina ia faia le amio lelei ma le amio Atua, ua faamamafa ai e Peteru le tāua o le maua mai e Ieova o i tatou taʻitoʻatasi, ua faamamāina e ala i le toto tāua o Iesu. (Faaaliga 7:9, 14) E manaʻomia ai ona faaalia e se tasi le faatuatua i le taulaga a Iesu ma avea o se auauna tuuina atu ma papatisoina a Ieova.

14. O le ā ua aofia ai i le “lē ponā”?

¹⁴ Na uunaʻia i tatou e Paulo ina ia faia le mea sili tatou te mafai ina ia “lē ponā” ai. Pe o tatou tausia ea a tatou amioga faa-Kerisiano ma uiga lē ponā, ina ia lē pisia i le lalolagi? Pe a tatou mātauina se pisia i o tatou laʻei, e vave lava ona tatou taumafai e aveese. Ae afai o se laʻei e sili ona tatou fiafia iai lea ua pisia, e tatou te matuā faaeteete lava i le tāina. Pe tatou te manatu ea faapena pe afai ua oo ina pisia a tatou amioga faa-Kerisiano, ona o ni masei i o tatou uiga po o amioga?

15. (a) Aiseā na faia ai e Isaraelu tuupao i pito o latou ofu? (e) Aiseā ua tū ese ai auauna a Ieova i aso nei?

¹⁵ Sa tatau ona faia e tagata Isaraelu “tuupao i pito o latou ofu” ma latou “tuu foʻi le sii uliuli i luga o le tuupao i le tafatafa.” Aiseā? Ina ia latou manatua ai poloaʻiga uma a Ieova, usitai i ai ma “ia paia” ai i latou i lo latou Atua. (Numera 15:38-40) I le avea ma auauna a Ieova i aso nei, ua tū ese ai i tatou mai le lalolagi talu ai tatou te tausia tulafono ma mataupu silisili a le Atua. O se faaaʻoaʻoga, ua tatou tumau i le mamā tau amio, tatou te faaaloalo i le paia o le toto ma ʻalofia so o se ituaiga o ifoga i tupua. (Galuega 15:28, 29) Ua faaaloalo le toʻatele iā i tatou ona o la tatou filifiliga maumauaʻi ia tausia lo tatou tulaga mamā.—Iakopo 1:27.

E Manaʻomia Ona Tatou “Lē Mataʻuleagaina”

16. O le ā ua aofia ai i le tausia o i tatou ia “lē mataʻuleagaina”?

¹⁶ Ua faapea mai foʻi Peteru ia “lē mataʻuleagaina” i tatou. E mafai faapefea lenā mea? O le pisia e mafai ona soloi ese pe faamamā, peitaʻi e sili atu ona matuiā le mataʻuleagaina. Ua faailoa mai ai le leaga o se mea o loo i totonu. Na apoapoaʻi le aposetolo o Paulo i le ʻauuso Kerisiano i Filipi e faapea: “Ia faia mea uma lava ma le lē muimui, ma le lē fefinauaʻi; ina ia avea outou ma ē ua lē mataʻuleagaina, ma ē ua sao le amio, o le fanau a le Atua e lē ponā i totonu o le tupulaga amio faapiʻopiʻo ma le finau vale; ua outou susulu atu i ai faapei o mea e faamalamalama aʻi le lalolagi.”  (Filipi 2:14, 15) Pe afai tatou te mulimuli i lenā fautuaga, o le a tatou ʻalofia ai la le muimui ma finauga ae o le a tatou auauna i le Atua i se uunaʻiga saʻo. O le a uunaʻia i tatou ona o le alofa iā Ieova ma o tatou tuaoi e talaʻi atu “lenei tala lelei o le malo.” (Mataio 22:35-40; 24:14) E lē gata i lea, o le a faaauau ai pea ona tatou folafola atu le tala lelei, e ui lava o le tele o tagata atonu e lē o malamalama pe aiseā ua ofo atu ai o tatou taimi ina ia taumafai e fesoasoani ai i isi e aʻoaʻo e uiga i le Atua ma lana Afioga, le Tusi Paia.

17. O le ā e tatau ona avea ma o tatou faanaunauga pe a tatou aapa atu i faaeaga i le faapotopotoga Kerisiano?

¹⁷ Talu ai tatou te faanaunau ina ia “lē mataʻuleagaina,” e tatau ai la ona iloilo o tatou faanaunauga i mea uma o loo tatou saʻilia. Ua tatou lafoaʻia ala o le lalolagi i le faia o mea mo se māfuaaga manatu faapito, e pei o le tauivi e maua le tamaoaiga po o le pule. Pe afai tatou te aapa atu i faaeaga i le faapotopotoga Kerisiano, seʻi tumau ai pea ona mamā o tatou faanaunauga ma ia uunaʻia pea e le alofa mo Ieova ma isi. O se mea e faafouina ai le vaai atu i tane faaleagaga o loo ‘naunau i le faiva o le epikopo’ po o le ovasia, ma le olioli ma se faanaunauga lotomaulalo e auauna iā Ieova ma o latou uso talitonu. (1 Timoteo 3:1; 2 Korinito 1:24) O le mea moni, o i latou ua agavaa e auauna o ni toeaina e tatau ona latou “leoleo i le lafu mamoe a le Atua . . . a e lē o le faatauanauina; aua foʻi neʻi faia ma le fia fai oloa, a o le loto fiafia. Aua foʻi neʻi faapei o ē pule faasauā i ē ua tofia i ai outou, a ia fai outou ma faaaʻoaʻo i le lafu mamoe.”—1 Peteru 5:1-4.

E Manaʻomia Ona Tatou Filemu

18. O ā uiga ua lauiloa ai Molimau a Ieova?

¹⁸ E lē gata i lea, ua taʻu mai e Peteru iā i tatou ia tatou “manuia” pe ia filemu. Ina ia soifua ai e tusa ma lenei manaʻoga, tatou te manaʻomia ai le filemu ma Ieova ma o tatou tuaoi. Ua faamamafa mai e Peteru le tāua o le mauaina o le “alofa naunau o le tasi i le tasi” ma le tausia o le filemu ma o tatou uso Kerisiano. (1 Peteru 2:17; 3:10, 11; 4:8; 2 Peteru 1:5-7) Ina ia tausia le tatou filemu, e tatau ona tatou fealofani. (Ioane 13:34, 35; Efeso 4:1, 2) E matuā faamaonia lo tatou alofa ma le filemu pe a faia a tatou tauaofiaga faavaomalo. I se tauaofiaga na faia i Costa Rica i le 1999, na lē fiafia ai se tagata na faatau atu ana oloa i le malae vaalele i Molimau i inā ia na faafeiloaʻia le taunuu ane o le ʻauusufono, ona na latou pupunia ana mea faatau. Ae peitaʻi, i le aso lona lua, na ia mātauina ai le alofa ma le filemu sa faaalia i le faafeiloaʻia ma le naunautaʻi o le ʻauusufono, e ui lava o Molimau i inā e lē masani iā i latou. I le aso mulimuli, na aufaatasi atu ai le tagata lea e faatau atu ana oloa i le faafeiloaʻia o le ʻauusufono ma talosagaina ai loa se suʻesuʻega faale-Tusi Paia.

19. Aiseā e tāua ai le saʻilia o le filemu ma uso talitonu?

 ¹⁹ O lo tatou faamaoni e saʻilia le filemu ma o tatou uso ma tuafafine faaleagaga, atonu e iai sona aafiaga i le auala o loo tatou matuā faatalitali ai i le aso o Ieova ma lana lalolagi fou na folafolaina mai. (Salamo 37:11; 2 Peteru 3:13) Seʻi faapea ua faigatā ona tausia le filemu ma se tasi o uso talitonu. Pe mafai ona tatou faaataina i tatou o loo nonofo ma le filemu ma ia i le Parataiso? Pe afai e iai se mea ua tigā ai se uso iā i tatou, e tatau ona tatou vave ‘ona faalelei ma ia.’ (Mataio 5:23, 24) E tāua le faia faapea pe afai tatou te mananaʻo e filemu ma Ieova.—Salamo 35:27; 1 Ioane 4:20.

20. O ā auala e ao ona faaalia ai le uiga o le “faatalitali”?

²⁰ Pe o tatou taʻitoʻatasi ea ma “faatalitali ma naunau atu ia aulia mai le aso o le Atua”? E mafai ona faaalia lo tatou matuā naunau atu ina ia faaiʻuina le amioleaga, e ala i le tumau i le paia i lenei lalolagi lē mamā. Ae lē gata i lea, o lo tatou matuā naunau ia oo mai le aso o Ieova ma soifua i lalo o le pulega a le Malo e faamaonia lea e ala i a tatou amio Atua. Ma o lo tatou faatalitali e soifua i se lalolagi fou filemu e faaalia lea i lo tatou saʻilia o le filemu ma o tatou uso tapuaʻi i aso nei. E ala i na auala, ua tatou faaalia ai o loo iā i tatou le uiga o le “faatalitali” ma o loo “naunau atu ia aulia mai le aso o le Atua.”

[Faamatalaga pito i lalo]

Pe E te Manatua?

• O le ā o loo uiga i ai le “naunau atu ia aulia mai le aso o le Atua”?

• E faapefea i le iai o se uiga o le “faatalitali” ona fesootaʻi atu i a tatou amio?

• Aiseā e tāua ai le “amio Atua”?

• O le ā e tatau ona tatou faia ina ia maua mai ai i tatou e Ieova o ē e “manuia [pe filemu], ua lē ponā, ma le lē mataʻuleagaina”?

[Fesili mo le Suʻesuʻega]

[Ata i le itulau 11]

O le iai o se uiga o le “faatalitali” e faamaonia e ala i le faaalia o le amio lelei

[Ata i le itulau 12]

O le talaʻiga o le Malo o le galuega faasaoola

[Ata i le itulau 14]

A o tatou faatalitali atu i le aso o Ieova, seʻi tatou saʻilia le filemu ma isi