Talaaga o le Soifuaga

Amuia le Tagata e Fai Ieova ma Ona Atua

FAAMATALAINA E TOM DIDUR

Ua uma ona totogi le maota. E 300 tagata o loo faamoemoe e tauaofia mo le fonotaga i le aai o Porcupine Plain i le itumalo o Saskatchewan, i Kanata. Na amata ona toʻulu mai le kiona i le Aso Lulu ma e oo atu i le Aso Faraile ua lē mafai ona iloa atu se mea i le mafiafia o le kiona. Na faateteleina le mālūlū o le tau, e 40° tikeri le mālūlū e i lalo ifo o le 0° tikeri. E toʻa 28 ē na tauaofia e aofia ai ma nisi o tamaiti. O le fonotaga muamua lea na tofia ai aʻu o se ovasia matagaluega a o 25 oʻu tausaga, ma o se mea na ou popole tele ai. E lelei pe a ou faamatalaina atu muamua pe faapefea ona ou mauaina lenei faaeaga faapitoa i le auaunaga, a o leʻi faaauauina laʻu tala.

E TOʻA valu la matou fanauga ma o tama uma, o aʻu le tama lona fitu. O Pili le igoa o loʻu uso aupito i matua, ona sosoo lea ma Metero, Ioane, Feleti, Mikaele ma Alesana. Na ou fanau i le 1925 ma o Uali le igoa o le uii. Na faamautū lo matou aiga e lata ane i le taulaga o Ukraina i le itumalo o Manitoba, lea na iai se faatoʻaga laʻitiiti a oʻu mātua o Michael ma Anna Didur. O le galuega a loʻu tamā, o le tausiaina lea o se vaega o le auala mo le nofoaafi. Talu ai e faigatā ona nonofo lo matou aiga toʻatele i se fale lē lelei ma mamao ese e tafatafa ane i se auala mo nofoaafi, na matou nonofo ai pea i le faatoʻaga. Na tele lava ina tausia i matou e lo matou tinā ona e seāseā iai lo matou tamā i le fale. E iai taimi na malaga atu ai tinā ina ia faatasi ma tamā mo se vaiaso pe sili atu foʻi, ae na aʻoaʻoina lelei i matou i le auala e kuka ma fai ai feʻau. Talu ai na matou lolotu i le Lotu Katoliko Eleni, na aʻoaʻoina ai i matou e tinā i le tatalo ma isi sauniga faalotu a o matou laiti.

 Mauaina o Upu Moni o le Tusi Paia

A o avea aʻu ma talavou, na amata ai ona ou moomoo e malamalama i le Tusi Paia. Na masani ona asia lo matou aiga e se tasi o o matou tuaoi Molimau a Ieova, e na te faitauina mai mau o le Tusi Paia e uiga i le Malo o le Atua, o Amaketo ma faamanuiaga o le lalolagi fou. E leʻi fia faalogo loʻu tinā i Molimau a Ieova ae na naunau Mikaele ma Alesana i lana talaʻiga. Ona o mea na la aʻoaʻoina, e leʻi auai ai i le auaunaga faavaegāʻau i le taua lona lua a le lalolagi, ona o o la lotofuatiaifo. Na faasalaina Mikaele i le falepuipui i se taimi puupuu ae na auina atu Alesana i le falepuipui e fai ai galuega mamafa i le itumalo o Ontario. Mulimuli ane, na taliaina foʻi e Feleti ma Uali le upu moni. Peitaʻi, e leʻi taliaina e oʻu uso matutua e toʻatolu le upu moni. Na umi tele o tetee loʻu tinā i le upu moni peitaʻi na faateʻia i matou uma ina ua ia filifili e auauna iā Ieova. Na papatisoina o ia i le 83 tausaga o lona soifua, ma e 96 ona tausaga ae maliu loa. Na fiafia foʻi loʻu tamā i le upu moni a o leʻi maliu.

I le 17 o oʻu tausaga, na ou malaga atu ai i le aai o Winnipeg e suʻe saʻu galuega ma faatasitasi ai ma ē e mafai ona fesoasoani iā te aʻu e suʻesuʻeina le Tusi Paia. O le taimi lenā na faasāina ai le galuega a Molimau a Ieova, ae na faia e lē aunoa a latou sauniga. O le sauniga muamua lava na ou auai i ai, sa faia i le fale o se tasi o aiga. E ese lava laʻu faalogo i mea na ou faalogologo i ai auā foʻi na ou ola mai lava i le lotu Katoliko Eleni. Na faasolosolo mālie ona ou malamalama i le māfuaaga e lē taliaina ai e le Tusi Paia le faaesea o le faifeʻau mai le ʻaulotu, ma le māfuaaga e lē taliaina ai e le Atua faamanuiaga a taʻitaʻi lotu i faiga taua. (Isaia 2:4; Mataio 23:8-10; Roma 12:17, 18) E sili atu ona fetaui ma logolelei iā te aʻu, le ola e faavavau i se Parataiso i le lalolagi na i lo le alu atu i se isi nofoaga mamao e faavavau.

Talu ai na ou mautinoa o le upu moni lenei, na tuuina atu ai loʻu ola iā Ieova ma ou papatiso i le 1942 i le aai o Winnipeg. I le 1943, na faatagaina ai le galuega a Molimau a Ieova i Kanata ma faapea ona matuā olaola ai le galuega talaʻi. Na faaauau pea ona goto upu moni o le Tusi Paia i loʻu loto. Na ou mauaina le faaeaga e fai ma auauna tofia i le faapotopotoga. Na ou auai foʻi i fuafuaga ina ia faia lauga lautele i isi vaega o le oganuu ma galueaʻiina oganuu e leʻi tofiaina i se faapotopotoga. O loʻu auai atu i tauaofiaga tetele i le Iunaite Setete o Amerika na atili ai ona ou agaʻigaʻi i luma faaleagaga.

Faalauaʻitele Atu Laʻu Auaunaga iā Ieova

I le 1950, na tusia ai loʻu igoa e avea aʻu ma paeonia ma na valaauliaina foʻi aʻu i le tausaga lava lenā, e auauna o se ovasia matagaluega. Na tele se fesoasoani na ou mauaina mai le uso o Charlie Hepworth i lona toleniina o aʻu mo le galuega, e lata ane i le aai o Toronto. O Charlie o se uso e agavaa ma e faamaoni tele. Na faafiafiaina foʻi aʻu ina ua ma galulue ma loʻu uso o Alesana i le vaiaso mulimuli o laʻu toleniga a o avea o ia o se ovasia matagaluega i le aai o Winnipeg.

E lē mafai ona galo iā te aʻu le fonotaga matagaluega muamua lava na ou auai ai, lea na faamatalaina atu i le amataga. Na ou popole i le sologa lelei o le fonotaga. E tele galuega na tuu mai e lo matou ovasia itumalo o Jack Nathan, e matou te faia ma na faafiafiaina ai i matou. Na matou otootoina manatu tāua o le polokalame faatasi ma i latou na tauaofia ai. Na matou auauaʻi e faamatala mea na tutupu iā i matou, faataʻitaʻi taulimaga mai lea fale i lea fale, le faia o toe asiga ma le faataʻitaʻia o le auala e fai ai suʻesuʻega faale-Tusi Paia i aiga. Na matou usuina foʻi pese o le Malo. Na anoanoaʻi meataumafa na iai. E toetoe lava taʻilua itula ma tufa mai ipu kofe ma pai. Na momoe isi i nofoa ma i luga o le pulelaa, a o isi na momoe i luga o le fola o le fale. E oo atu i le Aso Sa ua faaitiitia le toʻulu o le kiona ma e 96 ē na tauaofia mo le lauga i le lautele. O lenā mea na tupu, na ou iloa ai le auala e taulimaina ai tulaga faigatā.

 O loʻu tofiga na sosoo ai o le asiasi atu lea i le itu i mātū o Alberta, o British Columbia ma le oganuu o Yukon lea e iai le vaitaimi o le tausaga e lē goto ai le lā. Na moomia ona ou onosai ma faaeteete a o oʻu talaʻi ma faimalaga atu i le auala tele o Alaska mai Dawson Creek i British Columbia e oo atu i Whitehorse i Yukon [e 918 maila pe 1,477 kilomita le mamao]. O se luʻi tele iā te aʻu le solo ifo o le kiona, o aʻega maseesee ma le faigatā ona iloa atu o se mea auā le toʻulu malosi mai o le kiona ona o le matagi.

O le mea na ou ofo ai, o le mamao o le vaipanoa na oo i ai le upu moni i le itu i Mātū. Na iai le taimi na ma asiasi atu ai ma le uso o Walter Lewkowicz i se tamaʻi fale e lata i le nuu o Lower Post i British Columbia lea o loo tu i tafatafa o le auala tele o Alaska e lata ane i le taufaasiʻusiʻuga o le oganuu o Yukon. Na ma iloa o loo iai se tagata i le tamaʻi fale ona na ma vāai atu o ola se molī i se faamalama laʻitiiti. Atonu o le tā na o le iva i le pō, ma na ma tuʻituʻi atu ai i le faitotoʻa. Na valaau mai le tamāloa e ma te ō atu i totonu. Na faateʻia i maʻua i le vaavaai atu i se toeaina o taoto i lona moega ma faitauina le mekasini o le Olomatamata! E fou atu foʻi lana mekasini na i lo o mekasini lea o loo ma ofoina i tagata. Na fai mai o ia e meli atu ana mekasini e ala i le vaalele. O le māfuaaga e leʻi maua ai ni ma mekasini fou, ona ua atoa nei le valu o aso talu ona ma ō ese mai le faapotopotoga. Na faailoa mai e le toeaina lona igoa o Fred Berg ma o le taimi muamua lenei ua asiasi atu ai Molimau a Ieova iā te ia e ui lava ua fai sina umi o maua atu ana mekasini i le meli. Na valaaulia i maʻua e Fred e ma te mālōlō i le pō. Na ma faamatalaina atu iā te ia le tele o upu moni o le Tusi Paia ma na fai ai foʻi fuafuaga e toe asia o ia e Molimau e ō ane soo i lenā vaipanoa.

E tolu matagaluega laiti na tofia ai aʻu mo ni nai tausaga. O aʻu matagaluega e amata mai i le aai o Grande Prairie i Alberta i le itu i sasaʻe e oo atu i le itu i sisifo i Kodiak i Alaska, o se oganuu e 2,200 maila [3,500 kilomita] lona telē.

O se mea faagaeeloto na ou iloaina mai i inā, e faaalia e Ieova lona agalelei faifua i tagata uma e aofia ai foʻi ma tagata o nei oganuu mamao ese, ma e uunaia e lona agaga ia manatu ma loto o ē ua saunia mo le ola  e faavavau. O se faaaʻoaʻoga o lenā mea, o se tamāloa e igoa iā Henry Lepine mai le aai o Dawson i Yukon. Na alaala Henry i se nofoaga e tu mamao ese. E 60 tausaga e leʻi alu ese lava Henry mai lenā nofoaga e eli ai auro. Peitaʻi ane, na uunaia e le agaga o Ieova lenei tamā e 84 tausaga lona soifua e malaga atu mo le 1,000 maila [1,600 kilomita] ona taunuu lea i le nofoaga o fai ai le fonotaga matagaluega i Anchorage, e ui lava e leʻi auai muamua o ia i se sauniga a le faapotopotoga. Na faafiafiaina o ia i le fonotaga ma na olioli foʻi i le faatasiga a le ʻauuso. Ina ua taunuu i le aai o Dawson, na faaauau pea ona tumau ma le faamaoni Henry e oo i lona maliu. O le toʻatele o tagata na masani iā Henry, na latou fia iloa le māfuaaga na ala ai ona malaga lenei tamā i se nofoaga mamao. Na oo ina ō mai nisi o i latou na i le upu moni, ona o lenā agaga fia iloa. O lea la, na mafai ona tuuina atu e Henry se molimau lelei i se auala lē fuafuaina.

Na Ou Mauaina le Agalelei Faifua o Ieova

I le 1955, na ou olioli ai ina ua ou mauaina se valaaulia e auai ai i le vasega lona 26 o le Aʻoga Faale-Tusi Paia a le Olomatamata o Kiliata. O lenei aʻoga na faamalosia ai loʻu faatuatua ma atili ai ona ou vavalalata iā Ieova. Ina ua ou faauu, na tofia aʻu e faaauau ona ou auai i le galuega matagaluega i Kanata.

Na ou auauna i le itumalo o Ontario e pe tusa ma se tausaga. Ona toe tofiaina lea o aʻu i laufanua matalasi o Alaska. E lē mafai ona galo iā te aʻu vaaiga matagofie o auala tetele i tafatafa o vaituloto e manino ma iila, ma le aʻe atu i luga o mauga o loo ufitia o latou tumutumu i le kiona. I le taumāfanafana, o se vaaiga matalasi le vaai atu i vanu ma mutia ua matuā lilofia e fugālaau felanulanuaʻi. E ese le mālū o le ʻea ma le mamā o le vai. O loo iai urosa, luko, aila lapopoʻa ma isi manu tataa i o latou nofoaga masani e aunoa ma le faalavelave atu i ai o tagata.

Peitaʻi ane, e iai luʻi na tulaʻi mai i Alaska—e lē gata o le fesuisuiaʻi o le tau a o le mamao foʻi o oganuu. O le telē o laʻu matagaluega, e 2,000 maila [3,200 kilomita] mai i le itu i sasaʻe e oo atu i le itu i sisifo. O le taimi lenā e leʻi faia ai le faatulagaga e saunia e le lālā se taavale mo ovasia o le matagaluega. Na tauofo mai uso i faapotopotoga e latou te momoliina aʻu i isi faapotopotoga. Ae na iai taimi na ou lifi ai i loli tetele po o le ʻauturisi.

Na tupu se mea faapena a o oʻu iai i le auala tele o Alaska i le va o faafetauaʻiga o auala i le nuu o Tok i Alaska ma le nofoaga e taʻua o le Mile 1202 po o le vaipanoa o Scotty Creek. E 100 maila [160 kilomita] le va o ofisa o leoleo ma tiute ma nofoaga na e lua. Na ou pasia le ofisa o leoleo ma tiute a le Iunaite Setete i Tok ma na maua ai laʻu lifi mo le 30 maila [50 kilomita]. E leʻi toe alu ane lava se isi taavale ma na ou savali ai pe tusa ma le 10 itula i le sili atu i le 25 maila [40 kilomita] le mamao. Na faatoʻā ou iloa mulimuli ane, e leʻi umi lava ona ou sao mai le ofisa o leoleo ma tiute, ae taofia loa taavale uma ona na solo ifo le kiona e lē mamao mai le mea na iai le ofisa. E oo ane i le vaeluaga o le pō ua matuā malūlū le tau lea na paʻū i le 10° tikeri i lalo ifo o le 0° tikeri ma pe tusa ma le 50 maila [80 kilomita] le mamao ona ou faatoʻā mauaina lea o se mea e mapu ai. Na matuā ou manaʻo lava i se nofoaga ou te mapu ma mālōlō ai.

A o oʻu taumafai malosi e savali pea, na ou tau ai i se taavale ua tiaʻi i le magāala ma na ufitia se vaega o lona tino i le kiona. Na ou manatu, afai e mafai ona ou sao i totonu ma faaaogā nofoa o  le taavale ou te moe ai, e mafai ona ou mapu mai le pō malūlū. Na mafai ona ou aveeseina le kiona ma tatalaina le faitotoʻa, peitaʻi ua na o le atigi taavale o totoe ae ua leai ni nofoa. O le mea na ou faafetai ai, e leʻi umi lava ae ou mauaina loa se tamaʻi fale tuufua. E ui ina faigatā ona ou sao i totonu ma taumafai e tutu se afi, ae na oo ina mafai ona ou mālōlō mo ni nai itula. Na maua laʻu lifi i le taeao na sosoo ai i le isi faletalimālō lea na ou mauaina ai meaʻai ma fusi ai oʻu lima ua maʻosiʻosia.

Ua Faatuputeleina e Ieova le Galuega i Alaska

Na matuā faamalosiau laʻu uluaʻi asiasiga i le aai o Fairbanks. Na iʻu lelei la matou faiva ma e toʻa 50 tagata na auai i le lauga i le lautele i le Aso Sa. Na matou faapotopoto i le tamaʻi fale misionare na nonofo ai Vernor ma Lorraine Davis. Na fālō mai ulu o ē na iai i le umukuka, le potumoe ma le mea e sāvali ai ina ia faalogologo i le lauga. Ona o le toʻatele o tagata na auai, na matou iloa ai o le a aloaʻia le galuega talaʻi pe a iai se Maota o le Malo i Fairbanks. E faatasi ai ma le fesoasoani a Ieova, na matou faatauina ai se maota na avea muamua ma fale siva e talafeagai lona telē, ma siitia atu i se fanua talafeagai. Na eliina se vaieli, faia ni fale lē taʻua ma faapipiiina foʻi se masini e faamāfanafana ai le fale. E leʻi atoa le tausaga ae mafai loa ona faaaogā le Maota o le Malo i Fairbanks. Ina ua uma ona toe faaopoopoina ai se umukuka, na faaaogāina le maota mo se tauaofiaga itumalo i le 1958 lea e toʻa 330 ē na tauaofia ai.

I le taumāfanafana o le 1960, na ou malaga ai i le taavale i le ofisa ulu o Molimau a Ieova i Niu Ioka, ina ia ou auai ai i se aʻoga faapitoa mo ovasia femalagaaʻi uma i le Iunaite Setete ma Kanata, ma o se malaga umi. A o oʻu iai i inā, na talanoa mai ai le uso o Nathan Knorr ma isi uso agavaa e tusa ai ma le tatalaina o se ofisa o le lālā i Alaska. Mulimuli ane ina ua mavae ni nai masina, na faafiafiaina ai matou ina ua matou faalogo i le tala e faapea o le a faatūina le ofisa o le lālā mo Alaska iā Setema 1, 1961. Na tofiaina le uso o Andrew K. Wagner e vaavaaia le lālā. E 20 tausaga na auauna ai le uso o Andrew ma lana avā o Vera i Brooklyn ma na iai foʻi lona poto masani i le galuega femalagaaʻi. Na matou talisapaia le faatūina o le ofisa o le lālā i Alaska talu ai na faaitiitia ai femalagaaʻiga a le ovasia matagaluega ma mafai ai ona ia uaʻi atu i manaʻoga faapitoa o faapotopotoga ma oganuu mamao ese.

O le taumāfanafana i le 1962 i Alaska, o se vaitaimi na olioli ai. O le taimi lenā na faapaia ai le lālā ma na faia ai foʻi se tauaofiaga itumalo i le aai o Juneau i Alaska. Na fausiaina ai Maota o le Malo fou i inā faapea foʻi ma le aai o Whitehorse i Yukon, ma na faatūina foʻi nisi o vaega fou i oganuu mamao.

Toe Foʻi i Kanata

Ua fai sina umi talu ona ma fetusiaʻi ma le tuafafine o Margareta Petras i Kanata. Na amata le auaunaga paeonia a Reta (o le igoa tauvalaau o Margareta) i le 1947 ma na faauu mai i Kiliata i le 1955 ma paeonia ai i le itu i sasaʻe o Kanata. Na ou fai i ai ma te faaipoipo ma na ioe o ia. Na ma faaipoipo i le aai o Whitehorse iā Fepuari 1963. O le tausaga foʻi lenā i le tau e afu ai mea, na tofia ai aʻu i le galuega matagaluega i le itu i sisifo o Kanata, ma na ma auauna ai ma le olioli mo le 25 tausaga mulimuli ane ai.

Ona o gasegase o le tino, na tofia ai i maʻua e auauna o ni paeonia faapito i le 1988 i le aai o Winnipeg i Manitoba. E tusa ma le lima tausaga na ma vaavaaia ai foʻi le Maota mo Fonotaga. O loo faaauau pea ona ma auai i le galuega faafiafia loto o le faia o soo, e tusa ai ma le mea e sili ona ma mafaia. I le galuega matagaluega, na ma amataina ai le tele o suʻesuʻega faale-Tusi Paia lea na faia e isi. I le taimi nei, ona o le agalelei faifua o Ieova ua mafai ai ona ma amataina suʻesuʻega ma faapea ona vaaia lo latou agaʻigaʻi i le tuuina atu ma papatisoina, lea o se fiafiaga iā i maʻua.

Ua ou mautinoa, o le auauna iā Ieova o le auala sili lenā ona lelei e ola ai. O se olaga e faamalieloto ma uigā ma e faatuputeleina ai lo tatou alofa mo Ieova i aso taʻitasi. O le auala lenā e maua ai le fiafiaga moni. Po o le ā lava lo tatou tofiga e tuuina mai e le Atua ma po o fea foʻi le oganuu e tofia i ai i tatou, ae ua tatou ioe i upu a le faisalamo e faapea: “Amuia le nuu e fai Ieova mo latou Atua.”—Salamo 144:15.

[Ata i le itulau 24, 25]

A o oʻu auai i le galuega matagaluega

[Ata i le itulau 25]

Asiasi atu iā Henry Lepine i le aai o Dawson. O aʻu lea i le itu agavale

[Ata i le itulau 26]

O le uluaʻi Maota o le Malo i Anchorage

[Ata i le itulau 26]

O i maʻua ma Reta i le 1998