‘Ua Maua Fua e Outou, Ia Foaʻifuaina Atu’

“UA MAUA fua e outou, ia outou foaʻifuaina atu.” (Mataio 10:8) O le faatonuga lenā a Iesu i le ʻauaposetolo ina ua ia aauina atu i latou e talaʻia le tala lelei. Faamata na usiusitai le ʻauaposetolo i lenā poloaʻiga? Ioe, ma na faaauau pea ona latou usiusitai i ai ina ua toe afio aʻe Iesu i le lagi.

O se faaaʻoaʻoga, ina ua vaaia e Simona lea na avea muamua ma faataulāitu, le mana nai le aposetolo o Peteru ma Ioane e fai ai vavega, na ofoina atu ai e Simona se totogi ina ia mafai ona ia mauaina lenā mana. Ae na aʻoaʻi atu Peteru iā te ia ma faapea atu: “Ia fano lau ario faatasi ma oe, auā ua e manatu e faatauina le mea foaʻi fua a le Atua i tupe!”—Galuega 8:18-20.

O le manatu foʻi lenā o Paulo sa iai, e pei o Peteru. Na ono mafai ona tagisā atu Paulo mo se fesoasoani faaletino i ona uso Kerisiano i Korinito, ma avea ai o ia ma avega iā i latou. Peitaʻi, na galue Paulo i ona lava lima ina ia maua mea e ola ai. (Galuega 18:1-3) O le māfuaaga lenā na mafai ona fai mai ai Paulo i se agaga mautinoa e faapea, na ia talaʻiina le tala lelei i tagata Korinito “ma le lē tauia mai.”—1 Korinito 4:12; 9:18.

O se mea e faanoanoa ai ona o le toʻatele o tagata ua faapea mai e mulimuli iā Keriso, ae latou te lē o faaalia lenā lava agaga o le lotomalie e “foaʻifuaina atu.” O le mea moni, o le toʻatele o taʻitaʻi lotu e “aʻoaʻo i le fia fai taui” ae o loo faapea mai o i latou o Kerisiano. (Mika 3:11) Ua maumea foʻi isi taʻitaʻi lotu ona o tupe ua maua mai iā latou tagata lotu. I le 1989, na faasalaina ai se faievagelia i Amerika mo le 45 tausaga i le falepuipui. O le ā le māfuaaga? Talu ai na ia “mauaina mai le faitau miliona o tālā Amerika a lana ʻaulotu i ni auala taufaaʻoleʻole ma faaaogā se vaega tupe ina ia faatau ai fale, taavale ma e oo lava i se tamaʻi fale ʻea mālūlū mo lana taʻifau ma totogi ai foʻi ana faigāmalaga a o mālōlō.”—People’s Daily Graphic, Oketopa 7, 1989.

E tusa ai ma le nusipepa o le Ghanaian Times o Mati 31, 1990, na tago se patele Katoliko Roma i le atunuu o Ghana, i le tupe na aoina i se sauniga faalelotu ma toe tauʻai atu i le ʻaulotu. Na faapea mai le nusipepa “o le māfuaaga na faapena ai le patele, ona sa tatau i tagata matutua o le ʻaulotu ona foaʻi atu ni tupe e tetelē atu.” E lē o se mea e faateʻia ai, le taumafai o le tele o lotu ina ia faaaogā le matapeʻapeʻa o a latou ʻaulotu mo suʻega tupe, e ala i le faia o taaloga faitupe ma isi faiga faapena.

E matuā eseese lava ma Molimau a Ieova o ē e filigā e faaaʻoaʻo atu iā Iesu ma ona soo o le uluaʻi senituri. E lē totogia ni a latou faifeʻau. O Molimau a Ieova uma lava, o loo iai le avega tauave o le talaʻia o le “tala lelei o le malo” i tagata. (Mataio 24:14) O lea la, e sili atu i le ono miliona Molimau a Ieova i le lalolagi aoao o loo galulue i le foaʻifuaina o “vai o le ola” i tagata. (Faaaliga 22:17) O le faia faapea, ua aogā foʻi feʻau o le Tusi Paia i ē “ua leai ni tupe.” (Isaia 55:1) E ui lava ua lagolagoina la latou galuega  i le lalolagi aoao i meaalofa tauofo, ae e lē faia ni a latou suʻega tupe. Talu ai o i latou o faifeʻau moni a le Atua, e latou te lē “faafilogia le afioga a le Atua” ae e tautalatala “mai le loto lelei, mai le Atua.”—2 Korinito 2:17.

Aiseā e lotomalilie ai Molimau a Ieova e fesoasoani i isi e aunoa ma le totogiina o i latou? O le ā e uunaʻia i latou? Po o le foaʻifuaina ea, o lona uiga e leai se taui o a latou taumafaiga?

O le Tali i le Luʻi a Satani

O le uunaʻiga sili mo Kerisiano moni i aso nei, o le faafiafiaina o Ieova ae lē ina ia maumea ai. Ona o lea, ua mafai ai ona latou tuuina atu se tali i se luʻi na lāgā e Satani le Tiapolo, i le faitau selau o tausaga ua tuanaʻi. Ona o le tagata amiotonu o Iopu, na luʻia ai e Satani Ieova i lenei fesili: “Ua mataʻu fua ea Iopu i le Atua?” Na faapea atu Satani, e pau le māfuaaga na auauna ai Iopu i le Atua ona na puipuia o ia e le Atua. O le manatu o Satani, o le a faifai Iopu i le Atua pe a aveeseina uma ana meafaitino!—Iopu 1:7-11.

Ina ia foʻia lenei luʻi, na faataga ai e le Atua, Satani e tofotofoina Iopu i le faapea atu i ai: “Ua i lou lima ana mea uma.” (Iopu 1:12) O le ā le iʻuga? Na faamaonia e Iopu le pepelo o Satani. Na tumau pea le faamaoni o Iopu po o ā lava toʻatugā na oo iā te ia. Na fai mai o ia: “Seʻia oo lava i loʻu oti ou te lē faateʻaina lava laʻu amio sao.”—Iopu 27:5, 6.

E pei o Iopu, ua faapena le manatu o tagata tapuaʻi moni i aso nei. E lē o uunaʻia la latou auaunaga i le Atua ona o le fia mauaina o meafaitino.

O le Meaalofa o le Alofa Tunoa o le Atua

O se isi māfuaaga e lotomalilie ai Kerisiano moni e “foaʻifuaina atu,” ona na “maua fua” e i latou mea mai i le Atua. Ua nofo pologa tagata i aso nei i le agasala ma le oti ona o le agasala a lo tatou tamā o Atamu. (Roma 5:12) Na faia e Ieova se fuafuaga alofa e ala i le faataulagaina o lona Alo i le oti—o se mea na matuā ootia ai le finagalo o le Atua. O le mea moni, e lē o se mea e ao ona maua e tagata, ae o se meaalofa mai le Atua.—Roma 4:4; 5:8; 6:23.

Na faapea atu Paulo i Kerisiano faauuina e pei ona faamauina i le Roma 3:23, 24: “Ua agasala tagata uma lava, ma ua lē oo i le mamalu o le Atua; ua taʻuamiotonuina fua i lona alofa tunoa i le togiola e a Keriso Iesu.” O i latou e faamoemoe e ola e faavavau i le lalolagi, ua latou mauaina “fua” lenā faamoemoe. E aofia ai foʻi le taʻuamiotonuina o i latou o ni uō a Ieova.—Iakopo 2:23; Faaaliga 7:14.

Ua mafai foʻi ona avea Kerisiano uma ma faifeʻau a le Atua ona o le taulaga togiola a Keriso. Na tusi mai le aposetolo o Peteru: “Ua fai aʻu ma auauna a lenā tala lelei [o le mea lilo paia] e tusa ma le mea foaʻifuaina mai i le alofa tunoa o le Atua.” (Efeso 3:4-7) Na valaauina faifeʻau a le Atua e ala i se sauniuniga na foaʻifuaina atu iā i latou, ina ia faatinoina lenei faiva. O le māfuaaga lea e lē mafai ai ona latou faatalitalia le mauaina o ni meafaitino e totogi aʻi i latou, pe a latou tufatufaina atu lenei feʻau i isi.

 Ola e Faavavau—Po o se Mea e Faatupuina ai le Manatu Faapito?

Po o lona uiga ea ua faatalitalia e le Atua, Kerisiano ina ia auauna atu iā te ia e aunoa ma se faamoemoe o le mauaina o se taui? E leai, talu ai na tusi atu le aposetolo o Paulo i ona uso talitonu: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.” (Eperu 6:10) E tonu ala uma o Ieova. (Teuteronome 32:4) O Ieova “foʻi na te tauia mai o ē matuā saʻili iā te ia.” (Eperu 11:6) Peitaʻi, pe e lē faatupuina ea e le faamoemoe o le ola e faavavau le manatu faapito?—Luka 23:43.

E leai. O se tasi o māfuaaga, auā foʻi o le Atua na ala ai ona iai le faanaunauga e ola e faavavau i le Parataiso. O le Atua lava ia na faailoaina atu lenā faamoemoe i le uluaʻi ulugalii. (Kenese 1:28; 2:15-17) Ina ua melea e Atamu ma Eva lenā faamoemoe mo lo la fanau, na fai ai foʻi e le Atua le fuafuaga ina ia toe maua mai lenā faamoemoe. O lea la, ua folafola mai e le Atua i lana Afioga e faapea e “faamoemoe ia tuusaunoa ia lava mea na faia ia lē faapologaina e le iʻu vale, a e oo i le saʻolotoga o le fanau a le Atua e manuia ai.” (Roma 8:21) I le pei o Mose i aso anamua, e matuā talafeagai foʻi mo Kerisiano i aso nei ona ‘faanaunau atu i le taui.’ (Eperu 11:26) E lē faapea ua tuuina mai e le Atua lenei taui ina ia tatou auauna ai iā te ia. Ae o lona alofa faamaoni i ana auauna ua ala ai ona latou mauaina lenā taui. (2 Tesalonia 2:16, 17) O lea la, “ua tatou alolofa, auā na ia muaʻi alofa mai iā te i tatou.”—1 Ioane 4:19.

Le Māfuaaga Saʻo e Auauna ai i le Atua

E ui i lea, e tatau i Kerisiano i aso nei ona iloilo lelei māfuaaga e latou te auauna ai i le Atua. O loo taʻua i le Ioane 6:10-13 le taimi na fai ai e Iesu le vavega e fafagaina ai tagata e sili atu i le toʻalima afe. O lea na mulimuli ai nisi iā Iesu ona o le manatu faapito mo so latou lava lelei. Na fetalai atu Iesu iā i latou: ‘E saʻili mai outou iā te aʻu auā ua outou aai i areto, ma outou maoona ai.’ (Ioane 6:26) E sili atu i le 30 tausaga mulimuli ane ai, na avatuina foʻi e isi Kerisiano tuuina atu le auaunaga paia i le Atua ae “e lē faia ma le faamaoni.” (Filipi 1:17) Na taumafai foʻi nisi e ‘leʻi gauaʻi i upu e ola ai a Iesu Keriso,’ e faaaogā uso Kerisiano ina ia maua ai a latou oloa.—1 Timoteo 6:3-5.

E mafai foʻi ona faaalia e se Kerisiano i aso nei le manatu faapito, pe a faapea e pau le māfuaaga e auauna ai ona e fia ola e faavavau i le Parataiso. Atonu o le a paʻū faaleagaga lenā tagata mulimuli ane. Talu ai ua faaumiumi lenei faiga o mea a Satani na i lo le mea na manatu i ai, e ono “faavaivai” ai ona o lona manatu ua tuai mai le iʻuga. (Kalatia 6:9) E ono oo foʻi le lagona ita iā te ia ona o meafaitino na semanū e na te mauaina i le taimi ua tuanaʻi. Na faamanatu mai e Iesu iā i tatou: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37) Ioe, o le tagata e auauna i le Atua ona e alofa iā te Ia, e lē popole po o le ā lava le umi o le taimi o totoe. O lona naunautaʻiga, o le auauna iā Ieova e faavavau! (Mika 4:5) E lē salamō o ia i mea na ia faataulagaina mo le auaunaga i le Atua. (Eperu 13:15, 16) Ua uunaʻia o ia i le alofa i le Atua e faamuamua manaʻoga o le Atua i lona olaga.—Mataio 6:33.

Ua sili atu i le ono miliona tagata tapuaʻi faamaoni i aso nei ua “fai taulaga ma le loto” i le auaunaga iā Ieova. (Salamo 110:3) Po o e iai ea i lenā aofaʻiga? Afai e leai, e lelei pe a manatunatu i le mea ua ofoina mai e le Atua: o le poto saʻo i le upu moni; (Ioane 17:3) saʻolotoga mai le nofo pologa i aʻoaʻoga sesē a lotu; (Ioane 8:32) le faamoemoe o le ola e faavavau. (Faaaliga 21:3, 4) E mafai ona fesoasoani atu Molimau a Ieova iā te oe ina ia e silafia pe faapefea ona e mauaina mea uma na foaʻi mai e le Atua—e aunoa ma se totogi.

[Faamatalaga faaopoopo i le itulau 22]

O le māfuaaga autū e auauna ai Kerisiano moni i aso nei, o le faafiafiaina o Ieova —ae lē ina ia maumea ai

[Ata i le itulau 21]

O le meaalofa foaʻifuaina a le Atua o le togiola, ua uunaʻia ai Kerisiano e tufatufaina le tala lelei e aunoa ma se totogi