E Iai le Faamoemoe Moni o Auauna a Ieova
E Iai le Faamoemoe Moni o Auauna a Ieova
“E i ai foʻi ē ua totoe o Iakopo i nuu e tele e pei o le sau mai iā Ieova, . . . e lē faatalitali i tagata.”—MIKA 5:7.
1. Ua faapefea ona avea le Isaraelu faaleagaga ma puna e faafouina ai?
O IEOVA o lē na faia le timu ma le sau. E matuā lē aogā lava ona faamoemoe i tagata e saunia le sau ma le timu. Na tusi le perofeta o Mika e faapea: “E i ai foʻi ē ua totoe o Iakopo i nuu e tele e pei o le sau mai iā Ieova, pei o le ua foʻi i luga o vao iti, o le mea e lē faatalitali i tagata, e lē faatalitali foʻi i le fanau a tagata.” (Mika 5:7) O ai “ē ua totoe o Iakopo” i aso nei? O i latou o le Isaraelu faaleagaga, le vaega totoe o “le Isaraelu o le Atua.” (Kalatia 6:16) I “nuu e tele” o le lalolagi, ua pei le vaega totoe o le “sau mai iā Ieova” e faafouina ai ma le “ua foʻi i luga o le vao iti.” O le mea moni, ua avea Kerisiano faauuina o se faamanuiaga mai i le Atua i tagata i aso nei. I le avea o ē faalauiloa le Malo, ua faaaogāina ai i latou e Ieova e taʻu i tagata lana feʻau o le faamoemoe moni.
2. E ui ina tatou ola i lenei lalolagi faigatā, ae aiseā ua iai ai so tatou faamoemoe moni?
2 E lē o se mea e faateʻia ai le leai o se faamoemoe moni i lenei lalolagi. Ua lē mautū faiga faapolotiki, ua leaga tele le tulaga tau amio, ua faateleina solitulafono, o suiga i le tamaoaiga, o faiga faatupu faalavelave ma taua—o nisi nei o mea ua mātauina ai le lalolagi ua pulea e Satani le Tiapolo. (1 Ioane 5:19) E lētioa la ona matataʻu le toʻatele, e uiga i mea atonu o le a oo mai i le lumanaʻi. Peitaʻi, ona o loo tatou tapuaʻi iā Ieova, tatou te lē matataʻu ai ona o loo iai so tatou faamoemoe mautinoa i le lumanaʻi. O se faamoemoe moni ona o loo faavae i le Afioga a le Atua. E tatou te faatuatua atoatoa iā Ieova ma lana Afioga, ona e taunuu ana fetalaiga uma.
3. (a) Aiseā na faasalaina ai e Ieova Isaraelu ma Iuta? (e) Aiseā ua faatatau ai foʻi upu a Mika i aso nei?
3 Ua faamalosia i tatou e le valoaga a Mika na faagaeeina e le Atua, ina ia savavali i le suafa o Ieova ma ua aumaia ai iā i tatou se faavae mo le faamoemoe moni. Ina ua faia lana valoaga i le senituri lona valu T.L.M., o le taimi lea o vaeluaina tagata o le Atua o ē na latou osi feagaiga, i ni nuu se lua—o Isaraelu ma Iuta, ma sa lē usitaia uma e ia nuu le feagaiga a le Atua. Na iʻu ai i amioga leaga, aʻoaʻoga sesē a lotu e tetee i le tapuaʻiga moni ma le soona pupū atu i meafaitino. O lea, na lapataʻi atu ai Ieova o le a ia faasalaina i latou. O le mea moni, na taulaʻi atu lapataʻiga a Ieova i tagata o aso o Mika. Ae ona o le tutusa pau o le tulaga lea o loo iai i o tatou aso ma le vaitaimi o Mika, ua faapea ona faatatau ai foʻi upu a Mika i o tatou aso. O le a faamaonia lenei mea a o tatou iloiloina nisi o manatu autū i mataupu e fitu o le tusi o Mika.
O le ā ua Faaalia Mai e le Aotelega
4. O ā faamatalaga ua saunia e le Mika mataupu 1 seʻia oo i le mataupu e 3?
4 Seʻi o tatou tagaʻi puupuu i le aotelega o mataupu o loo i le tusi o Mika. I le mataupu 1, o loo faaalialia ai e Ieova le fouvale o Isaraelu ma Iuta. O le iʻuga o a latou amioga leaga, o le a faaumatia ai Isaraelu, a o le faasalaga o Iuta o le a oo atu i le faitotoʻa o Ierusalema. O le mataupu e 2, o loo faaalia ai le faapologaina e ē mauʻoa ma ē malolosi o ē e vaivai ma lē tagolima. E ui i lea, sa tuuina atu foʻi se folafolaga tauatua. O le a faapotopotoina tagata o le Atua i le autasi. I le mataupu e 3, o loo lipotia mai ai faasalaga a Ieova e faasaga i taʻitaʻi o atunuu ma perofeta leaga. Ua faapiʻoina e taʻitaʻi le faamasinogatonu, ae taʻutaʻu atu e perofeta upu pepelo. E ui lava i lenei mea, ae na faamalosia e le agaga o Ieova Mika ina ia faalauiloa atu le faamasinoga a Ieova o loo fotuaʻi mai.
5. O ā manatu autū o le Mika mataupu e 4 ma le 5?
5 I le mataupu e 4, o loo valoia ai e faapea i le vaega faaiʻu o aso e gata ai, o le a gasolo ai nuu uma i le mauga e sili ona maualuga o loo iai le fale o Ieova, ina ia aʻoaʻoina i latou e ia. A o lumanaʻi lenā mea, o le a faatāfea ai Iuta i Papelonia, ae o le a laveaʻiina o ia e Ieova. I le mataupu e 5, o loo faaalia ai le fanau mai o le Mesia i Peteleema i Iuta. O le a ia leoleoina ma faasaʻolotoina lona nuu mai nuu sauā.
6, 7. O ā manatu o loo aumaia i le mataupu e 6 ma le 7 o le valoaga a Mika?
6 I le Mika mataupu e 6, o loo faamauina ai finauga a Ieova faasaga i lona nuu i se faatulagaga faafaamasinoga. O le ā se mea na ia faia ua faapogaia ai lona nuu e fouvale? E leai se mea. O le mea moni, e matuā talafeagai mea ua ia faafinagaloina. O lona finagalo ia faia e ona tagata tapuaʻi le amiotonu, ia agalelei ma ia lotomaulalo a o latou savavali faatasi ma ia. Ae na i lo le faia o lenā mea, ua mulimuli Isaraelu ma Iuta i se ala fouvale ma mafatia ai i iʻuga o le faia faapea.
7 I le mataupu faaiʻu o lana valoaga, o loo taʻusalaina ai e Mika le amioleaga o lana augātupulaga. E ui i lea, e leʻi lotovaivai ai o ia ae ua maumauaʻi e “faatalitali” iā Ieova. (Mika 7:7) O loo faaiʻu mai le tusi i se faamatalaga mautinoa e faapea o le a faaalia e Ieova le alofa mutimutivale i Lona nuu. Ua faamaonia i le talafaasolopito na faataunuuina lenei faamoemoe. I le 537 T.L.M., ina ua māeʻa ona aʻoaʻiina e Ieova ona tagata, sa ia toe faafoʻisia ai ma le alofa se vaega totoe i lo latou nuu.
8. O le a faapefea ona e aoteleina le tusi o Mika?
8 Maʻeu se faamatalaga matagofie ua faaali mai e Ieova e ala iā Mika! Ua aumaia e lenei tusi ni faaaʻoaʻoga lapataʻi i le auala e feagai ai Ieova ma i latou o ē e faapea mai o loo auauna iā te ia ae lē faamaoni. Ua valoia mai ai mea o loo tutupu i aso nei. O loo aumaia ai foʻi fautuaga a le Atua i le auala e ao ona tatou amioaʻi i nei aso faigatā ina ia faamausalī ai lo tatou faamoemoe.
Ua Fetalai le Alii Pule Silisili Ese o Ieova
9. E tusa ai ma le Mika 1:2, o le ā o le a faia e Ieova?
9 Seʻi o tatou iloiloina atili nei la le tusi o Mika. I le Mika 1:2, tatou te faitau ai e faapea: “Faalogologo mai ia outou nuu uma; faasaga mai ia le lalolagi e, atoa ma mea ua tumu ai, seʻia fai e le Alii o Ieova ana mau iā te outou, o le Alii lava ai lona malumalu paia.” Anafai sa e soifua ai i ona pō o Mika, e leai se masalosalo o le a e matuā uaʻi atu i na upu. O le mea moni, ua e matuā uaʻi atu i ai i aso nei ona o loo fetalai mai Ieova mai lona malumalu paia ma o loo fetalai mai e lē gata iā Isaraelu ma Iuta, ae i tagata uma lava. I ona pō o Mika, na umi se taimi na lē amanaʻia ai e tagata le Alii Silisili Ese o Ieova. Ae ua toe o se aga, ona suia lea o lenā mea. Ua maumauaʻi Ieova e gaoioi ma le tonu.
10. Aiseā e tāua ai iā i tatou upu o loo i le Mika 1:2?
10 Ua moni foʻi lenā tulaga i aso nei. Ua faaalia i le Faaaliga 14:18-20, ua toe fesootaʻi mai foʻi Ieova mai lona malumalu paia. E lē o toe mamao ona faia lea e Ieova se gaoioiga maumauaʻi, ma o le a faapea ona toe oo i tagata ni mea mataʻutia. I lenā taimi, o le a lafoina ai le “vine [amioleaga] o le lalolagi” i le soligavine tele o le toʻasa o Ieova, ina ia faaumatia atoatoa ai le faiga o mea a Satani.
11. O le ā le uiga o upu o loo i le Mika 1:3, 4?
11 Faafofoga foʻi i le mea o le a faia e Ieova. Ua faapea mai le Mika 1:3, 4: “Auā faauta, o loo afio mai Ieova ai lona afioaga, e afio ifo o ia, ma soli i mea maualuluga o i le lalolagi. E liu suāvai mauga i lalo iā te ia, e māvaevae vanu, pei o le pulu i le afi, faapei o le vai ua tafe ifo i le tofē.” Po o le a tuua e Ieova lona nofoālii i le lagi ae afio ifo i le tino e femaliuaʻi i atumauga ma fanua laugatasi o le Nuu Folafolaina? E leai. E lē manaʻomia ona ia faia faapea. O lona uiga, o le a ia liuliualo mai i le lalolagi ina ia faataunuuina lona finagalo. E lē gata i lenā, e lē o faatatauina i le laueleele, ae o i latou o loo nonofo ai o le a mafatia i mea na faamatalaina mai. Pe a gaoioi Ieova, o le a matuā pagatia iʻuga e oo i ē e lē faamaoni—e pei ua liu suāvai atumauga e pei o le pulu, ma e pei ua māvaevae le eleele i se mafuiʻe.
12, 13. I le ōgatusa ai ma le 2 Peteru 3:10-12, o le ā ua faamausalīina ai lo tatou faamoemoe?
12 O upu faavaloaga i le Mika 1:3, 4 atonu e toe faamanatu atu ai iā te oe se isi valoaga faagaeeina o loo valoia ai ni mala mataʻutia o le a tutupu i le lalolagi. E pei ona faamauina i le 2 Peteru 3:10, na tusi le aposetolo o Peteru e faapea: “A e sau le aso o le Alii pei o se gaoi, e mavaeeseina ai le lagi ma le gogolo tele, e teʻa eseese ai foʻi o mea na fai aʻi ina ua mū; o le lalolagi foʻi ma galuega o i ai e susunuina lava.” I le pei o valoaga a Mika, e lē o faatatauina atu upu a Peteru i le lagi ma le lalolagi moni. Ae o loo faasino atu i le puapuaga tele o loo fotuaʻi mai i lenei faiga o mea amioleaga.
13 E ui i lenā mala o loo fotuaʻi mai, i le pei o Mika, e mafai e Kerisiano ona nonofo ma le mautinoa i le lumanaʻi. E faapefea? E ala i le mulimuli i le fautuaga o loo maua i fuaiupu o loo sosoo mai i le tusi a Peteru. Ua faapea mai le aposetolo: “Pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua.” (2 Peteru 3:11, 12) O le a mautinoa lo tatou faamoemoe mo le lumanaʻi pe afai tatou te atiina aʻe se loto usiusitai, ma ia faamautinoa o loo lelei a tatou amio, ma o loo tatou gaoioi ma le amio Atua i taimi uma. Ina ia faamausalīina lo tatou faamoemoe, e tatau foʻi ona tatou manatua o le a oo moni mai lava le aso o Ieova.
14. Aiseā na tatau ai ona faasalaina Isaraelu ma Iuta?
14 Ua faamatala mai e Ieova le pogai na tatau ai ona faasalaina lona nuu i aso anamua. Ua faapea mai le Mika 1:5: “Ona o le solitulafono a Iakopo e oo ai ia mea uma, ona o agasala foʻi a le aiga o Isaraelu. Se ā ea le solitulafono a Iakopo? E lē o Samaria ea? O ā ea foʻi mea maualuluga a Iuta? E lē o Ierusalema ea?” Na māfua ona iai o Isaraelu ma Iuta ona o Ieova. Ae peitaʻi, sa la fouvale faasaga iā te ia, ma ua oo atu lo la fouvale i o la aai laumua, o Samaria ma Ierusalema.
Anoanoaʻi Faiga Amioleaga
15, 16. O ā amioga leaga na taʻusalaina ai tagata i aso o Mika?
15 O se faaaʻoaʻoga o le amioleaga o tagata i aso o Mika, o loo faamatala manino mai i le Mika 2:1, 2: “Oi talofa i ē mafaufau i amiolētonu, ma latou saunia mea leaga i o latou moega; pe a malama aʻe le taeao ua latou faia, auā ua mafai iā te i latou. Ua latou mananaʻo foʻi i fanua, ma latou fao ai faasauā, atoa ma fale, ma latou avea; ua latou sauā atu i le tagata ma lona aiga, o le tagata ma lona tofi.”
16 E leʻi momoe i le pō tagata matapeʻapeʻa ona o le mafaufau i se togafiti e fāoa ai fanua ma fale o o latou tuaoi. E latou te vave usu i le taeao, e faataunuu a latou faufauga leaga. Ae o le a lē mafai ona latou faia na togafiti pe afai e latou te manatuaina le feagaiga a Ieova. O loo iai i le Tulafono na tuuina mai iā Mose, ni aiāiga e puipuia ai tagata matitiva. I lalo o lenā Tulafono, e lē tatau i se aiga ona faamatuu atoatoa atu lo latou tofi. Peitaʻi e leʻi popole i ai tagata matapeʻapeʻa i lenā mea. Latou te leʻi amanaʻiaina upu o le Levitiko 19:18, lea o loo faapea mai: “E te alofa atu i lē lua te tuaoi ia pei o oe lava iā te oe.”
17. O le ā e mafai ona tupu i tagata o loo faapea mai e auauna i le Atua ae saʻili muamua meafaitino i le olaga?
17 Ua faaalia i lenei mea, le mea e mafai ona tupu i tagata o loo faapea mai e auauna i le Atua, pe afai e puaoa la latou vaai i o latou sini faaleagaga ae saʻili muamua meafaitino. Na lapataʻi atu Paulo i Kerisiano i ona aso e faapea: “O ē manaʻo i le fia mauʻoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” (1 Timoteo 6:9) Afai e avea le saʻilia o tupe ma sini autū i le olaga o se tagata, o lona uiga o loo ia tapuaʻi i se atua sesē—o Mamone, po o le ʻOa. E lē o maua se faamoemoe mautū mo le lumanaʻi mai i lenā atua pepelo.—Mataio 6:24, LT.
18. O le ā o le a tupu i ē na mananaʻo tele i meafaitino i aso o Mika?
18 Ona o puapuaga na oo iā i latou, sa iloa ai e le toʻatele o tagata i ona pō o Mika, o le faalagolago i meafaitino o le ʻai i le matagi. Ua fetalai mai Ieova e tusa ai ma le Mika 2:4: “E saunia se faataoto iā te outou i lea aso, e pese le pese e aualofa aʻi tele lava, e faapea, Ua matuā faatafunaina i tatou; ua suia e ia le tofi o loʻu nuu; auē! ua ia aveeseina ai iā te aʻu, ua na tufatufa i o tatou fanua ina ia liliueseina.” Ioe, o i latou na sa gaoia fale ma fanua, o le a aveesea o latou tofi e pei o fale ma fanua. O le a ave faatagataotauaina i latou i se nuu ese, ma o le a fai a latou meatotino ma vete a isi po o tagata o nuu ese. O faamoemoega uma mo se lumanaʻi faamanuiaina, o le a faalēaogāina.
19, 20. O le ā na tupu i tagata Iutaia o ē na faatuatua iā Ieova?
19 Peitaʻi, o le a taulau le faamoemoe o i latou o ē e faatuatua iā Ieova. E faamaoni Ieova i ana feagaiga na faia ma Aperaamo ma Tavita, ma e alofa mutimutivale foʻi o ia iā i latou e pei o Mika, o ē e alolofa iā te ia ma o ē e faanoanoa ona o le tūtūmatāvao o o latou uso a tagata mai i le Atua. O le a iai se toe faafoʻisiaga e tusa ai ma le taimi atofaina a le Atua, auā se manuia o tagata faamaoni.
20 Na tupu lenā mea i le 537 T.L.M., ina ua mavae le paʻū o Papelonia, ma ina ua toe foʻi atu le vaega totoe o tagata Iutaia i lo latou nuu. I lenā taimi, na iai se uluaʻi faataunuuga o upu i le Mika 2:12. Ua fetalai mai Ieova e faapea: “Iakopo e, ou te faapotopoto lava iā te outou uma lava; ou te aofaʻiina lava ē o totoe o Isaraelu, ou te faatasia i latou pei o le lafu mamoe i Posara, pei o le lafu manu i totonu o le mea e fafaga ai, latou te soona ualolo [pisapisaō] ona o le vao tagata.” Maʻeu le alofa o Ieova! Ina ua māeʻa ona aʻoaʻiina o lona nuu, ua ia faatagaina se vaega totoe e toe foʻi atu ma auauna iā te ia i le nuu sa ia foaʻiina atu i o latou augātamā.
Se Tulaga Matilatila e Talafeagai ma o Tatou Aso
21. E faapefea ona faatusatusa tulaga o mea i aso nei ma ona pō o Mika?
21 A o tatou iloiloina uluaʻi mataupu e lua o le Mika, po ua e maofa ea i le tutusa lelei ma mea i aso nei? I le pei o ona pō o Mika, e toʻatele tagata i aso nei o loo faapea mai e auauna i le Atua. Peitaʻi, i le pei o Iuta ma Isaraelu, o loo fevaevaeaʻi nei tagata ma ua oo foʻi ina latou fetauaʻi. O le toʻatele o tagata mauʻoa i lotu ua taʻua o Kerisiano ua latou faileagaina tagata matitiva. Ua faatoʻateleina le aofaʻi o taʻitaʻi lotu o ē taliaina amioga e matuā taʻusalaina e le Tusi Paia. E lētioa lava ona latalata tele mai le iʻuga o lotu ua taʻua o Kerisiano, faatasi ai ma le isi vaega o “Papelonia le aai tele” o le emepaea o lotu sesē i le lalolagi! (Faaaliga 18:1-5) I le pei o tulaga o mea i ona pō o Mika, o le a tumau ona iai auauna faamaoni a Ieova i le lalolagi.
22. O ā vaega e lua ua tuu atu lo latou faamoemoe i le Malo o le Atua?
22 I le 1919, na vavaeese atoatoa ai Kerisiano faamaoni ua faauuina, mai lotu ua faapea mai o Kerisiano ina ia faalauiloa le tala lelei o le Malo i atunuu uma. (Mataio 24:14) Sa muamua lava ona latou muaʻi saʻilia ē o loo totoe o le Isaraelu faaleagaga a le Atua. Ona sosoo ai lea ma le aoaoina o “isi mamoe,” ona avea ai lea o na vaega e lua o se ‘lafu e tasi, ma le leoleo mamoe e toʻatasi.’ (Ioane 10:16) E ui ina o loo latou auauna atu nei i le Atua i atunuu e 234, ae o nei tagata tapuaʻi faamaoni uma a Ieova o loo ‘aufaatasia i latou.’ I le taimi nei, o loo ‘pisapisaō ai le vao o tagata’ i le lotoā o mamoe. E lē o tuuina atu lo latou faamoemoe i lenei faiga o mea, ae i le Malo o le Atua, lea ua lē o toe mamao ona taʻitaʻia atu ai lea i le parataiso i le lalolagi.
23. Aiseā ua e talitonu ai ua mausalī lou faamoemoe?
23 Ua faapea mai le fuaiupu faaiʻu o le Mika mataupu e 2 e tusa ai ma tagata tapuaʻi faamaoni a Ieova: “E afio atu foʻi lo latou Tupu i o latou luma, e muamua foʻi Ieova iā te i latou.” Po o e vaaia ea oe i lenā solo manumalo o loo mulimuli atu i le Tupu, o Iesu Keriso, ma o loo taʻimua atu ai Ieova lava ia? Afai o le tulaga lenā, o lona uiga ua e talitonu i lenā manumalo ma mausalī ai lou faamoemoe. O le a faamautinoa atili lenei mea a o tatou iloiloina isi mea tāua o le valoaga a Mika.
O le a Faapefea Ona E Tali?
• Aiseā na filifili ai Ieova e faasalaina Iuta ma Isaraelu i ona pō o Mika?
• O le ā e mafai ona tupu i tagata o loo faapea mai e auauna i le Atua ae o loo saʻili muamua meafaitino o le olaga?
• Ina ua māeʻa le iloiloina o le Mika mataupu e 1 ma le 2, aiseā ua e talitonu ai ua mausalī lou faamoemoe?
[Fesili mo le Suʻesuʻega]
[Ata i le itulau 9]
O le valoaga a Mika e mafai ona faamalosia ai i tatou faaleagaga
[Ata i le itulau 10]
Ua faaauilumaina e le Isaraelu faaleagaga ma a latou aumea le tapuaiga moni, e pei ona sa faia e le vaega totoe o tagata Iutaia i le 537 T.L.M.