O le ā se Mea e Finagalo ai Ieova Mai iā i Tatou?
O le ā se Mea e Finagalo ai Ieova Mai iā i Tatou?
“Se ā foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa, ma ia feooaʻi ma lou Atua ma le loto faamaulalo?”—MIKA 6:8.
1, 2. Aiseā atonu e lotovaivai ai nisi o auauna a Ieova, ae o le ā o le a fesoasoani iā i latou?
O VERA, o se Kerisiano faamaoni pe tusa ma le 75 tausaga o lona soifua ma e lē lelei lona soifua mālōlōina. Ua ia faapea mai: “O nisi taimi, ou te vaavaai atu ai i fafo i le faamalama ma iloa atu ai uso ma tuafāfine Kerisiano o loo talaʻi mai i lea fale i lea fale. E maligi oʻu loimata ona ou te fia iai faatasi ma i latou, peitaʻi ua faatapulaaina e loʻu maʻi laʻu auaunaga iā Ieova.”
2 Pe sa e manatu ea faapena? O le mea moni, o i latou uma o ē alolofa iā Ieova latou te faanaunau e savavali i lona suafa ma ausia mea na te faafinagaloina. Ae ā pe afai ua faasolo ina faalētonu lo tatou soifua mālōlōina, ua afu le soifua, po ua iai ni avega tauave i le aiga? Atonu tatou te lotovaivai talu ai, o na tulaga e ono taofia ai i tatou mai le faia o mea uma o loo moomoo i ai o tatou loto ina ia faia i le auaunaga a le Atua. Afai o le tulaga lenei o loo tatou iai, e ono faalaeiauina i tatou i le iloiloina o le Mika mataupu e 6 ma le 7. O loo faamatilatila i nei mataupu e faapea, o mea e faafinagaloina e Ieova e talafeagai ma e mafai ona ausia.
Le Auala e Feagai ai Ieova ma Lona Nuu
3. Ua faapefea ona feagai Ieova ma tagata fouvale Isaraelu?
3 Seʻi o tatou tagaʻi muamua i le Mika 6:3-5 ma mātau le auala ua feagai ai Ieova ma lona nuu. Ia manatua sa fouvale tagata Isaraelu i le vaitaimi o Mika. E ui i lea, ua faafeiloaʻi atu ma le alofa Ieova iā te i latou i upu e faapea, “Lou nuu e.” Ua ʻaiʻoi atu Ieova e faapea: “Lou nuu e, inā e manatua ia.” Na i lo le soona faitioina e Ieova o i latou, ua ia taumafai ina ia pāʻia o latou loto e ala i le fesili atu e faapea, “Se ā ea saʻu mea ua ou faia iā te oe?” Na ia uunaʻia foʻi i latou ina ia “momoli” pe molimau faasaga iā te ia.
4. O le ā se aafiaga e tatau ona iā i tatou ona o le faaaʻoaʻoga o le alofa na faaalia e le Atua?
4 Maʻeu se faaaʻoaʻoga ua faataatia e Ieova mo i tatou uma! Na taʻua ma le alofa e Ieova tagata fouvale o Isaraelu ma Iuta i le vaitaimi o Mika o “lou nuu e,” ma sa ʻaiʻoi atu iā i latou. E manino lava la, e tatau ona tatou faaalia lagona alofa ma le agalelei i a tatou feutagaʻiga ma i latou o i le faapotopotoga. E moni, atonu e lē faigofie i nisi ona feoeoeaʻi ma isi, ia pe atonu foʻi e vaivai faaleagaga. Peitaʻi, afai e latou te alolofa iā Ieova, tatou te mananaʻo la e fesoasoani atu iā i latou ma faaalia i ai lagona alofa.
5. O ā manatu autū o loo taʻua i le Mika 6:6, 7?
5 O le isi manatu, seʻi o tatou suʻe i le Mika 6:6, 7. Ua lāgā ai e Mika ni fesili e faapea: “Ou te alu atu ma ni ā i luma o Ieova? ou te ifo atu ma ni ā i le Atua maualuga? Ou te alu atu ea i ona luma ma taulaga mū, ma tamaʻi povi e tasi lo latou tausaga? E fiafia ea Ieova i afe o mamoe poʻa, ma manomano ālia o tafe suāuu? Ou te tuuina atu ea laʻu ulumatua e sui aʻi loʻu solitulafono, o laʻu fanau to tino e sui aʻi le agasala a loʻu agaga?” E leai, e lē mafai ona faafiafiaina Ieova “i afe o mamoe poʻa, ma le manomano ālia o tafe suāuu.” Ae e iai se mea e mafai ona faafiafiaina ai o ia. O le ā lenā mea?
E Tatau Ona Tatou Fai le Amiotonu
6. O ā mea e tolu e faafinagaloina e le Atua o loo faatulaga mai i le Mika 6:8?
6 I le Mika 6:8, e tatou te aʻoaʻoina ai le mea o loo finagalo ai Ieova mai iā i tatou. Na fesili Mika e faapea: “Se ā foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa, ma ia feooaʻi ma lou Atua ma le loto faamaulalo?” O nei mea manaʻomia e tolu e aofia ai o tatou lagona, o mafaufauga, ma gaoioiga. E tatau ona tatou naunau e faaalia nei uiga, mafaufau i le auala e faaalia ai, ma gaoioi ia faaalia. Seʻi o tatou iloiloina taʻitasi la nei mea manaʻomia.
7, 8. (a) O le ā e uiga i ai le faaupuga ia “fai le amiotonu”? (e) O ā faiga lē tonu sa taatele i ona pō o Mika?
7 O le faaupuga “ia fai le amiotonu” o lona uiga ia faia le mea tonu po o le faamasinotonu. O le auala o loo tauaaoina ai mea e le Atua, o le faatulagaga lenā mo le faia o le mea tonu. Peitaʻi e leʻi faia e ē na ola faatasi ma Mika le amiotonu, ae o le amiolētonu. I ā auala? Seʻi tatou iloiloina le Mika 6:10. I le faaiʻuga o lenā fuaiupu, o loo faamatalaina ai le mea o loo faaaogā e le ʻaufaatauʻoa o le “efa faaaimago,” o lona uiga o se fua e laʻitiiti tele. Ua faaopoopo mai le fuaiupu e 11 e faapea ua latou faaaogāina “fua faatautau faalētatau.” E lē gata i lea, e tusa ai ma le fuaiupu e 12, o “o latou laulaufaiva foʻi i o latou gutu ua faaʻoleʻole ia.” O lea la, sa taatele le faaaogāina o fua faaaimamago, o fua faatautau pepelo, ma le faia o tala pepelo i faiga faapisinisi i ona pō o Mika.
8 E leʻi gata ai faiga lē tonu i maketi. Sa taatele foʻi i totonu o fale faamasino. Ua faaalia i le Mika 7:3 e faapea “ua fai atu le alii sili atoa ma le faamasino i se taui.” Sa tuuina atu taui faatogafalea i faamasino ina ia latou faaee atu ai ni faasalaga lē tonu i tagata lē sala. Ua auai foʻi “le matai,” po o le tagata sili i solitulafono. O le mea moni, ua taʻu mai e Mika e faapea ua “faapiʻopiʻo,” o lona uiga ua galulue faatasi le alii, le faamasino, ma le matai ina ia faia a latou gaoioiga leaga.
9. Na faapefea ona aafia Iuta ma Isaraelu i faiga lē tonu na faia e tagata amioleaga?
9 O faiga lē tonu ia sa faia e taʻitaʻi amioleaga, sa aafia ai tagata uma o Iuta ma Isaraelu. Ua mātauina i le Mika 7:5 e faapea, ona o le leai o ni faiga tonu na iʻu ai i le lē fetalitonuaʻi i le va o uō, o aumea mamae, ma e oo lava i paaga faaipoipo. Ua faapea mai le fuaiupu e 6, na iʻu lenā mea i se tulaga ua oo lava i tauaiga ua ʻinoʻino le tasi i le isi, e aofia ai le va o fanau ma mātua.
10. Ua faapefea ona amioaʻi Kerisiano i aso nei e tusa ai ma faiga lē tonu?
10 Ae faapefea i aso nei? Pe e tatou te lē o vaaia foʻi ni tulaga talitutusa faapena? I le pei o Mika, ua siʻomia i tatou i faiga lē tonu, i se siʻomaga o le lē fetalitonuaʻi, ma le malepelepe o le olaga tau vafealoaʻi ma olaga faaleaiga. E ui o i tatou o ni auauna a le Atua o loo ola i lenei lalolagi amiolētonu, tatou te lē faatagaina ai le agaga o feutagaʻiga lē tonu a lenei lalolagi, ina ia ofi mai i totonu o le faapotopotoga Kerisiano. Na i lo lea, tatou te tauivi e lagolagoina mataupu silisili o le fai mea tonu ma faamaoni, ma ia faaalia nei uiga i o tatou olaga i aso taʻitasi. O le mea moni, ‘o loo loto i tatou e amio lelei i mea uma lava.’ (Eperu 13:18) Pe e te lē ioeina ea e faapea o le faia o le mea tonu, e mafai ona tatou maua ai le tele o faamanuiaga ona o le iai o se ʻauuso e fetalitonuaʻi?
E Faapefea Ona Faalogo Tagata i “le Siʻufofoga o Ieova”?
11. Ua faapefea ona faataunuuina le Mika 7:12?
11 Ua valoiaina e Mika e faapea, e ui lava i tulaga lē tonu ua iai, ae o le a faaoo atu lava le faamasinogatonu i ituaiga uma o tagata. Ua valoia e le perofeta le faapotopotoina o tagata “mai le tasi sami e oo i le tasi sami, mai le tasi mauga e oo i le tasi mauga” ina ia avea o ni tagata tapuaʻi a Ieova. (Mika 7:12) I aso nei, i le faataunuuga faaiʻu o lenei valoaga, ua mauaina ai e lē o se atunuu patino e tasi, ae o tagata mai atunuu uma lava, ia aogā mai le faamasinogatonu lē faailoga tagata a le Atua. (Isaia 42:1) E faapefea ona faamaonia le moni o lenei mea?
12. Ua faapefea ona lagonaina “le siʻufofoga o Ieova” i aso nei?
12 Seʻi o tatou iloiloina uluaʻi upu a Mika mo se tali. Ua faapea mai le Mika 6:9: “O loo alaga le siʻufofoga o Ieova i le aai, (o lē ua poto e iloa e ia lou suafa).” E mafai faapefea ona faalogo tagata o nuu uma i “le siʻufofoga o Ieova” ma e faapefea ona fesootaʻi atu lenei mea i lo tatou faia o le mea tonu? Ioe, e lē mafai e tagata i aso nei ona lagonaina le siʻufofoga o le Atua. Peitaʻi, e ala i le galuega talaʻi i le lalolagi aoao, ua faapea ona lagonaina ai le siʻufofoga o Ieova e tagata mai ituaiga uma ma tulaga eseese. O le iʻuga, o i latou o ē o loo faalogo, ua ‘iloa le suafa o le Atua,’ ma ua matataʻu i ai. Ua tatou gaoioi i se auala tonu ma le alofa e ala i le auauna o ē faalauiloa ma le maelega le Malo. E ala i le faalauiloaina o le suafa o le Atua i tagata uma e aunoa ma le faailogatagata, ua tatou ‘faia ai le amiotonu.’
E Tatau Ona Tatou Naunau i le Agalelei
13. O le ā le eseesega o le alofa agalelei ma le alofa?
13 Seʻi o tatou see atu la i le iloiloina o le mea manaʻomia lona lua ua taʻua i le Mika 6:8. O loo faatalitalia i tatou e Ieova ina ia “naunau i le alofa [“agalelei,” NW].” O le upu Eperu ua faaliliuina i le “agalelei” o loo faaliliuina foʻi i le “alofa agalelei” po o le “alofa faamaoni.” O le alofa agalelei o se gaoioiga alofa lea po o le magafagafa mo isi. O le alofa agalelei e ese mai i le alofa. E faapefea? I nisi gagana o le alofa o se upu e lautele sona uiga, e mafai ona faatatau atu i ni mea atoa ai ma ni manatu. I le isi itu, o le alofa agalelei e aofia ai tagata i taimi uma, aemaise i latou o loo auauna i le Atua. O le mea lea, ua taʻua ai i le Mika 7:20 e faapea, na ‘faaoo le [“alofa agalelei,” NW] iā Aperaamo’—o se tagata na auauna i le Atua.
14, 15. E faapefea ona faaalia le alofa agalelei, ma o le ā le faamaoniga o le faaalia o lea uiga?
14 E tusa ai ma le Mika 7:18, o loo taʻua ai e le perofeta e faapea o le Atua ‘e fiafia o ia i le alofa agalelei.’ I le Mika 6:8, ua taʻu mai ai iā i tatou e faapea, ia aua le tau ina faaalia o le alofa agalelei, ae ia naunau i ai i lenā uiga. O le ā ua tatou aʻoaʻoina mai i nei mau? O le alofa agalelei e faaalia lea i le lotomalie ma le agaalofa ona o loo tatou mananaʻo e faaalia atu. I le pei o Ieova, e tatou te olioli ai, pe fiafia, i le faailoaina atu o le alofa agalelei i isi ua mafatia.
15 I aso nei, ua avea ai lenā alofa agalelei o se faailoga o tagata o le Atua. Seʻi manatunatu e tau o se faaaʻoaʻoga se tasi. Iā Iuni 2001, na faapogaia ai e se afā mataʻutia ni lologa tetele i Texas i Amerika, ma na faaleagaina ai le faitau afe o fale o tagata, e aofia ai ma le faitau selau o fale o Molimau a Ieova. Ina ia fesoasoani i o latou uso Kerisiano puapuagatia, na ofo fua atu ai e ni Molimau a Ieova e tusa ma le toʻa 10,000 lo latou taimi ma le malosi. Mo le sili atu i le ono masina, na galulue tauofo ai i latou e aunoa ma se faavaivai, e faaaogā o latou aso, o pō, ma faaiʻuga o vaiaso ina ia toe fausia ai ni fale e 700 mo o latou uso Kerisiano. O i latou sa lē mafai ona faia ni galuega faapena, sa latou foaʻiina atu meataumafa, o meafaufale, atoa ai ma tupe. Aiseā na lolofi atu ai lenei faitau afe o Molimau e fesoasoani i o latou uso? Auā latou te “naunau i le agalelei.” Maʻeu le faamāfanafanaloto i le iloaina e faapea o na gaoioiga o le alofa agalelei o loo faaalia lea e o tatou uso i le lalolagi aoao! Ioe, o le ausiaina o le manaʻoga “ia naunau i le agalelei” e lē o se avega mamafa, a o se mea e olioli ai!
Ia Feoaʻi ma le Atua ma le Loto Faamaulalo
16. O le ā le tala faatusa ua fesoasoani e faamamafa ai le manaʻomia ona feoaʻi ma le Atua ma le loto faamaulalo?
16 O le mea manaʻomia lona tolu o loo maua i le Mika 6:8, “ia feooaʻi ma lou Atua ma le loto faamaulalo.” O le uiga o lenei mea, o le iloa lea o le mea e gata ai lo tatou malosi ma ia faalagolago i le Atua. Ina ia faataʻitaʻi: Seʻi tagaʻi faalemafaufau mo se minute i se teineitiiti o loo ia uumauina le lima o lona tamā a o la savavali atu i le agi mai o se matagi malosi. Ua iloa e le teineitiiti e iai le mea e gata ai lona malosi, ae o loo ia faalagolago i lona tamā. O i tatou foʻi e iai le mea e gata ai lo tatou malosi, ae e tatou te faalagolago i lo tatou Tamā faalelagi. E mafai faapefea ona tatou faalagolago pea iā Ieova? O se tasi o auala, o le teu lea i loto o le pogai e atamai ai le vavalalata atu iā Ieova. Ua toe faamanatu mai e Mika ni māfuaaga se tolu e faapea: O Ieova o lo tatou Faaola, o lo tatou Taʻitaʻi, ma o Lē e Puipuia i tatou.
17. Na faapefea ona faaolaina, taʻitaʻia ma puipuia e Ieova lona nuu i aso anamua?
17 E tusa ai ma le Mika 6:4, 5, o loo fetalai Ieova e faapea: “Na ou faaaʻe mai iā te oe ai le nuu o Aikupito.” Ioe, na avea Ieova o se Faaola mo Isaraelu. Ua ia fetalai atili mai e faapea: “Na ou aauina foʻi i ou luma Mose, Arona ma Miriama.” O le mea moni, sa faaaogāina Mose ma Arona e taʻitaʻia le nuu, ae na taʻitaʻia e Miriama fafine Isaraelu i se siva manumalo. (Esoto 7:1, 2; 15:1, 19-21; Teuteronome 34:10) O lea, na saunia ai e Ieova se taʻiala i ana auauna. I le fuaiupu e 5, na toe faamanatu atu ai e Ieova i le nuu o Isaraelu, lona puipuia o i latou mai iā Palako ma Palaamo, ma na ia puipuia foʻi i latou i le vaega faaiʻu o la latou faigāmalaga mai Setima i le nuu o Moapi e oo i Kilikala i le Nuu o le Folafolaga.
18. Ua faapefea ona gaoioi le Atua o so tatou Faaola, Taʻitaʻi, ma o sē e Puipuia i tatou i aso nei?
18 A o tatou savavali ma le Atua, na te faasaoina i tatou mai le lalolagi a Satani, e na te taʻitaʻia i tatou e ala i Lana Afioga ma lana faalapotopotoga, ma na te puipuia i tatou o se vaega pe a osofaʻia i tatou e ē faasagatau mai. O lea ua anoanoaʻi ai māfuaaga e tatou te uumauina ai le aao o lo tatou Tamā faalelagi, a o tatou savavali atu faatasi ma ia i lenei vaega faaiʻu o la tatou faigāmalaga o loo fesouaʻiina i faafitauli, e agaʻi atu i se mea e sili atu na i lo o le Nuu o le Folafolaga—o le lalolagi fou amiotonu lea a le Atua.
19. O le ā le auala e fesootaʻi atu ai le lotomaulalo i mea e gata ai lo tatou malosi?
19 O le faaalia o le lotomaulalo a o savavali ma le Atua, e fesoasoani foʻi lea iā i tatou ina ia maua ai se vaaiga moni e uiga i o tatou tulaga o loo iai. Talu ai o le faaalia o le lotomaulalo, e aofia ai le amanaʻia o mea e gata ai lo tatou malosi. O le soifua matua po o le lē lelei o le soifua mālōlōina atonu e faatapulaa ai mea e mafai ona tatou faia i le auaunaga iā Ieova. Ae ui i lea, na i lo le faalotovaivaia ai o i tatou e ia mea, ia manatua e talia e Ieova a tatou taumafaiga ma taulaga ‘e tusa ma mea o iā i tatou, ae lē tusa ma mea e lē o iā i tatou.’ (2 Korinito 8:12) O le mea moni, o loo finagalo Ieova ia tatou auauna atu iā te ia ma le loto atoa, i le faia o so o se mea e tusa ai ma o tatou tulaga. (Kolose 3:23) Pe a tatou finafinau ma maelega e faia mea uma tatou te mafaia i lana auaunaga, o le a faaʻoaina i tatou i faamanuiaga a le Atua.—Faataoto 10:22.
O le Faatalitali i le Faamoemoe e Aumaia ai Faamanuiaga
20. O le iloaina o le ā o le a fesoasoani ai iā i tatou e faatalitali i le faamoemoe e pei o Mika?
20 O le mauaina o faamanuiaga a le Atua e uunaʻia ai i tatou e faataʻitaʻi i le agaga sa faaalia e Mika. Ua ia faapea mai: “Ou te faamoemoe i le Atua o loʻu olataga.” (Mika 7:7) E faapefea ona fesootaʻi nei upu i lo tatou savavali ma le lotomaulalo ma le Atua? O le faatalitali i le faamoemoe po o le onosai pea, e fesoasoani lea iā i tatou ina ia ʻalofia ai lagona lē fiafia ona e leʻi oo mai le aso o Ieova. (Faataoto 13:12) O le mea moni, o loo tatou moomoo uma lava ia oo mai ia le iʻuga o lenei lalolagi amioleaga. Peitaʻi, i vaiaso taʻitasi uma e faitau afe tagata ua faatoʻā amata ona latou savavali faatasi ma le Atua. O le iloaina o lenā mea e aumaia ai se māfuaaga e sili ona lelei ina ia tatou faatalitali ai i le faamoemoe. Na taʻua e se tamāloa ua leva ona avea ma Molimau e fesootaʻi atu i lenei mea e faapea: “I le toe tepa i tua i le sili atu ma le 55 tausaga o auai i le galuega talaʻi, ua ou talitonu ai ou te leʻi oge i se mea ona o le faatalitali iā Ieova. I le tuufaafeagai, ua ou lē oo ai i le tele o mafatiaga tigā.” Pe sa tupu se mea faapena iā te oe?
21, 22. Ua faapefea ona faataunuuina le Mika 7:14 i o tatou aso?
21 O le savavali ma Ieova e lē mafesiligia lo tatou mauaina ai o aogā. A o tatou faitauina le Mika 7:14, o loo faatusatusa ai e Mika tagata o le Atua i mamoe o loo nonofo saogalemu ma lo latou leoleo mamoe. I aso nei o le faataunuuga tele o lenei valoaga, ua maua ai e le vaega totoe o Isaraelu faaleagaga, atoa ai ma isi mamoe le saogalemu i lo latou Leoleo Mamoe maufaatuatuaina o Ieova. O lo latou nonofo “ese i le vao”—i le totonugalemu o se togālaau ʻaina, o lona uiga ua vavaeese faaleagaga mai i lenei lalolagi ua tumu i faafitauli mataʻutia.—Ioane 10:16; Teuteronome 33:28; Ieremia 49:31; Kalatia 6:16.
22 O loo olioli tagata o le Atua i se tulaga manuia e pei foʻi ona valoia mai e le Mika 7:14. Na taʻua e Mika e faatatau i mamoe a le Atua e faapea: “Ia latou aai i Vasana ma Kiliata.” E pei ona sa aai mamoe i vao lafulemu o Vasana ma Kiliata ma malolosi ai, ua faapena foʻi ona olioli tagata o le Atua i aso nei i lo latou tulaga manuia faaleagaga—o se isi foʻi lenā o faamanuiaga mo i latou e savavali faatasi ma le lotomaulalo ma le Atua.—Numera 32:1; Teuteronome 32:14.
23. O le ā se lesona tatou te aʻoaʻoina mai i le iloiloina o le Mika 7:18, 19?
23 I le Mika 7:18, 19, o loo faamatilatila ai e le perofeta le faanaunauga o Ieova ina ia faamagalo iā i latou o ē salamō. Ua taʻua i le fuaiupu e 18 e faapea, o Ieova o lē ‘faamagaloina agasala’ ma ua “lē manatua solitulafono.” E tusa ai ma le fuaiupu e 19, na te “lafo foʻi a latou agasala uma i mea loloto o le sami.” O le ā se lesona tatou te aʻoaʻoina mai i lenei mea? E mafai ona fesili ifo iā i tatou lava po ua tatou faataʻitaʻi ea iā Ieova i lenei itu. Pe e tatou te faamagalo ea i mea sesē e fai mai e isi iā i tatou? Pe a salamō i latou na ma saʻili ina ia toe faia se leleiga, e mautinoa o le a tatou mananaʻo ai la e faaatagia atu le finagalo malie o Ieova e faamagalo atoatoa ma ia oo i le faavavau.
24. Na faapefea ona e mauaina aogā mai le valoaga a Mika?
24 Ua faapefea ona tatou maua aogā mai le iloiloina o le valoaga a Mika? Ua toe fafagu mai ai iā i tatou e faapea, ua faamaonia le avea o Ieova o se Atua o le faamoemoe moni mo i latou o ē faalatalata atu iā te ia. (Mika 2:1-13) Ua faalaeiauina ai i tatou ina ia faia mea uma e mafai e faaauilumaina ai le tapuaʻiga moni, ina ia tatou savavali ai pea i le suafa o le Atua e oo i le faavavau. (Mika 4:1-5) Ua faamautinoa mai foʻi iā i tatou e faapea, po o le ā lava le tulaga o loo tatou iai, e mafai lava ona tatou ausia mea ua faafinagaloina e Ieova. Ioe, e faamalosia moni lava e le valoaga a Mika i tatou ina ia savavali i le suafa o Ieova.
O le a Faapefea Ona E Tali?
• E tusa ai ma le Mika 6:8, o le ā o loo faafinagaloina mai e Ieova iā i tatou?
• O le ā e moomia pe afai tatou te “fai le amiotonu”?
• E faapefea ona tatou faaalia e tatou te “naunau i le agalelei”?
• O le ā e aofia ai i le ‘feoaʻi ma le Atua ma le loto faamaulalo’?
[Fesili mo le Suʻesuʻega]
[Ata i le itulau 21]
E ui i tulaga leaga i ona aso, sa soifua pea Mika e tusa ma mea na faafinagaloina e Ieova. E mafai foʻi ona e faia faapea
[Ata i le itulau 23]
Ia fai le amiotonu e ala i le molimau atu i so o se ituaiga o tagata
[Ata i le itulau 23]
Ia faaalia lou naunau i le agalelei e ala i le fesoasoani atu i isi
[Ata i le itulau 23]
Ia lotomaulalo e fai le mea e te mafai i lou iloaina o mea e gata ai lou malosi