Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• O ā ni auala ua avea ai Ruta o se faaaʻoaʻoga lelei?

Na avea o ia ma faaaʻoaʻoga i lona alofa mo Ieova, i lona alofa faamaoni iā Naomi ma le faaalia o lona maelega ma le lotomaulalo. E tele ni māfuaaga, na vaai ai tagata iā te ia o se “fafine lelei.” (Ruta 3:11)—4/15, itulau 23-26.

• E faapefea ona tatou iloa e alofa mai Ieova i tagata lautele?

Na ia taʻu atu i le fanauga a Isaraelu, lea na faapologaina i Aikupito, ina ia aua neʻi agaleaga i tagata matitiva. (Esoto 22:21-24) Na faaaʻoaʻo Iesu i lona Tamā i le faaalia lea o le naunau moni i tagata lautele, ma na ia filifilia ona soo mai i tagata o ē e “leʻi aʻoaʻoina.” (Galuega 4:13; Mataio 9:36) E mafai foʻi ona tatou faaalia le manatu mamafa mo isi, e pei o le ʻautalavou.—4/15, itulau 28-31.

• E faapefea ona tatou mautinoa o loo silafia e Ieova mea o tatou faia?

Ua faaalia i tala o le Tusi Paia e faapea e silafia e Ieova mea e faia e tagata. Na ia silafia le taulaga na ofoina atu e Apelu ma o loo ia silafia foʻi la tatou ‘taulaga o viiga, o le fua o o tatou laugutu.’ (Eperu 13:15) Na silafia e Ieova sa tauivi Enoka e faafiafia lona finagalo e ala i le ola i se olaga mamā tau amio. Na silafia foʻi e Ieova se fafine ua oti lana tane e lē o se Isaraelu ae sau mai i Sarefata ona faasoa sina meaʻai itiiti na iā te ia ma le perofeta o Elia. E silafia foʻi e Ieova a tatou gaoioiga o le faatuatua.—5/1, itulau 28-31.

• Aiseā e mafai ona faapea atu ai ina ua mavae le Penetekoso 33 T.A., o tagata Iutaia uma na avea ma Kerisiano sa tatau ona latou faia se tuuina atu i le Atua?

I le 1513 T.L.M., na iai sa latou faiā ma Ieova o ni tagata ua uma ona tuuina atu. (Esoto 19:3-8) Mai i lenā taimi, na fananau mai ai Iutaia i se nuu ua uma ona tuuina atu iā Ieova i lalo o le feagaiga o le Tulafono. E ala i le maliu o Keriso i le 33 T.A., na aveesea ai e Ieova le feagaiga o le Tulafono. (Kolose 2:14) Ina ua mavae lenā, o tagata Iutaia na mananaʻo e taliaina e le Atua la latou auaunaga sa manaʻomia ona faia se tuuina atu iā te ia ma papatisoina i le suafa o Iesu Keriso.—5/15, itulau 30-31.

• Pe o le faamūina o mea manogi e ōgatusa ma le tapuaʻiga moni?

O le faaaogāina o mea manogi o se vaega o le tapuaʻiga moni i Isaraelu anamua. (Esoto 30:37, 38; Levitiko 16:12, 13) Ae peitaʻi, o le feagaiga o le Tulafono e aofia ai ma le faaaogāina o mea manogi, na faaiʻuina i le maliu o Keriso. E mafai ona filifili lava Kerisiano latou ia pe faaaogā mea manogi i fuafuaga e lē faale-tapuaʻiga, ae e lē o se vaega o le tapuaʻiga moni. E tatau ona manatunatu i faalogona o isi ina ia ʻalofia ai le tausuai o i latou.—6/1, itulau 28-30.

• O le ā se tala o se mea na tupu talu ai nei ua uunaʻia ai nisi e manatunatu sa soifua moni lava Iesu i le lalolagi?

Na salalau le tele o faamatalaga e uiga i le pusa o ponaivi lea sa maua i Isaraelu. E foliga mai o le umi na iai lenei pusa pe tusa o le uluaʻi senituri, ma o loo iai ni tusitusiga i luga o le pusa e faitauina faapea: “O Iakopo le atalii o Iosefa, o le uso o Iesu.” O nisi ua manatu e ese mai i le Tusi Paia, o “faamaoniga aupito sili ona leva o suʻesuʻega i le eleele” e uiga i le soifua moni o Iesu.—6/15, itulau 3-4.

• E faapefea ona iloa e le tagata le auala e faaalia ai le alofa?

E muamua lava ona iloa e le tagata le auala e alofa ai, e ala i le faaaʻoaʻoga ma le toleniga a ona mātua. Pe afai e faaalia e le tane ma le avā le alofa ma le faaaloalo i lo la va, o le a aʻoaʻoina ai foʻi tamaiti ina ia faaalia le alofa. (Efeso 5:28; Tito 2:4) E tusa lava pe e leʻi soifua aʻe se tasi i se aiga e faaalia ai le alofa, ae e mafai ona ia iloa le auala e faaalia ai le alofa e ala i le taliaina o taʻiala faatamā a Ieova, i le fesoasoani a le agaga paia ma maua aogā mai le lagolagosua māfana a le ʻauuso Kerisiano.—7/1, itulau 4-7.

• O ai Eusipio ma o le ā le lesona tatou te aʻoaʻoina mai i lona olaga?

O Eusipio o se tusitala o talafaasolopito o lē na tusia tusi e sefulu ua taʻua o Talafaasolopito o le Lotu Kerisiano i le faa-Peretania i le 324 T.A. E ui lava sa ia talitonu na soifua muamua le Tamā i le Alo, ae na taliaina e Eusipio se vaaiga ese i le fono i Naisia. E manino mai sa ia lē amanaia mea na manaʻomia e Iesu mai ona soo e faapea, e tatau ona “lē ni o le lalolagi i latou.” (Ioane 17:16)—7/15, itulau 29-31.

• Pe ua suia le finagalo o Ieova e faatatau i le tele o avā?

E leai, e leʻi suia le finagalo o Ieova e faatatau i le tele o avā. (Malaki 3:6) O le faatulagaga a le Atua mo le tane o le ‘faatasi atu i lana avā’ ma avea ma tino e tasi. (Kenese 2:24) Na fetalai Iesu e faapea o le teteʻa a o leʻi mulilua ma toe faaipoipo o le mulilua ia. (Mataio 19:4-6, 9) Ua lē toe faatagaina e Ieova le tele o avā, ina ua faavaeina le faapotopotoga Kerisiano.—8/1, itulau 28.