Sa Ia Naunau i le Alofa

NA MALIU Milton. G. Henschel o se sui ua loa o le Vaega Pule o Molimau a Ieova ma o se Kerisiano faauuina, iā Mati 22, 2003. E maliu ua 82 tausaga o lona soifua.

A o avea o ia o se alii talavou, na ia aufaatasi atu i le ʻaufaigaluega a le ofisa ulu o Molimau a Ieova ma auauna ai ma le faamaoni i le sili atu i le 60 tausaga. Na vave lava ona mātauina o ia ona o lona tofā mamao ma lona naunau faamaoni i le galuega talaʻi o le Malo. I le 1939, na avea ai o ia ma failautusi a N. H. Knorr, o lē na avea ma ovasia o le fale lomitusi o Molimau a Ieova i Brooklyn. I le 1942, na avea ai le uso o Knorr ma taʻimua o Molimau a Ieova i le lalolagi aoao, ma na ia tofia ai le uso o Henschel o sana fesoasoani. I le 1956, na faaipoipo atu ai le uso o Henschel iā Lucille Bennett, ma na la tofo faatasi ai i le olioli ma feagai faatasi ma luʻi o le olaga.

Na galulue soosootauau le uso o Henschel ma le uso o Knorr seʻia oo i le maliu o Knorr i le 1977. I le tele o taimi na faimalaga faatasi le uso o Knorr ma le uso o Henschel ma e sili atu i le 150 atunuu na oo i ai le uso o Henschel, e asiasi ma faalaeiau i Molimau a Ieova i le lalolagi atoa aemaise lava i misionare ma i latou o loo i ofisa o le lālā. O na faigāmalaga e lamatia ma mataʻutia i nisi o taimi. I le 1963 ina ua asiasi atu i se tauaofiaga sa faia i Liberia, na oo ai i le uso o Henschel sauāga ogaoga ona o le teena o le faia o se vaega i se sauniga faalotonuu. * I le lē faavaivai na toe foʻi atu ai le uso o Henschel i Liberia i nai masina mulimuli ane ina ia feiloaʻi ma le peresitene o le atunuu ma saʻili atili se saʻolotoga o le tapuaiga mo Molimau a Ieova i inā.

Ua mātauina le uso o Henschel i lona faufautua lelei, fetuutuunaʻi ma le agamalu i le taulimaina o faafitauli faigatā ma luʻi. E fiafia ana aumea i lona fai mea maopoopo, lotomaulalo ma le agamālie. Ua iā te ia se mafaufau mataʻina na te manatuaina ai mea, na te faafiafiaina le tele o misionare i le lalolagi atoa e ala i le vave ona ia manatuaina o o latou suafa, se fuaiupu se tasi pe lua o le gagana a le atunuu, ma tala mālie e toē ai tagata.

Ua faamanatu mai e le Mika 6:8 e faapea e finagalo Ieova le Atua iā i tatou ia “naunau i le alofa.” E manatuaina pea Milton Henschel i le faataatiaina o se faaaʻoaʻoga lelei e faatatau i lenā vala. E ese mai i ana tiute tauave mamafa, e faigofie pea ona talanoa atu iā te ia, e agamalu ma agalelei. O lana masani o le faapea atu, “Pe afai e te lē iloa po o le ā le mea tonu e fai, ia manatua o le faia o ni gaoioiga agalelei o le mea saʻo lenā.” A o tatou faavauvau i le maliu o lenei uso pele, tatou te olioli ona ua ia tumau ma le faamaoni seʻi oo i le iʻuga, ma faamautinoa le mauaina o lona taui, o “le pale o le ola.”—Faaaliga 2:10.

[Faamatalaga pito i lalo]

[Ata i le itulau 31]

M. G. Henschel ma N. H. Knorr

[Ata i le itulau 31]

Ma lona faletua o Lucille