Ua Autasia e le Tapuaʻiga Moni se Aiga

O LE 13 o tausaga o Maria, na la faalogo ai ma lona uso o Lusi, e uiga iā Ieova mai i so la tauaiga. Na ia faamatalaina atu foʻi iā i laʻua le faamoemoe o le Parataiso i le lalolagi. Ona o le fia iloa, na latou ō ai ma ia i le Maota o le Malo o Molimau a Ieova. Sa faagaeetia Maria i faatonuga manino na faia i inā. Na matuā ese mai lava i lotu, e matele lava ina pepese! E leʻi umi lava ae suʻesuʻeina loa e teineiti le Tusi Paia ma se tasi o Molimau a Ieova.

Na naunau lo la tuagane matua o Hugo i manatu faafilosofia ma le evolusione. Na ia manatu iā te ia lava o se tasi e lē talitonu e iai se Atua. A o iai o ia i le auaunaga faavaegāʻau, na ia faitau ai i le tusi Life—How Did It Get Here? By Evolution or by Creation? * Na ia maua tali i fesili ia e leʻi mafai e se isi lava lotu ona taliina. Ina ua uma lana auaunaga faavaegāʻau, na amata ai loa ona ia faamalosia lona faatuatuaga fou i le Atua e ala i le suʻesuʻeina o le Tusi Paia ma auai ma ona tuafāfine i sauniga. Ina ua mavae le lua tausaga talu ona uluaʻi faalogo Maria ma Lusi i le upu moni, na papatisoina ai laʻua i le 1992, ae na papatisoina lo la tuagane i le lua tausaga mulimuli ane ai.

Ae i le taimi lenā, na tuutoina atu ai o latou mātua i talitonuga faa-Katoliko, ma na faalēfiafia i le upu moni. E ui lava ina sa la mātauina amioga lelei ma laʻei talafeagai a talavou Molimau ia na valaaulia e le la fanau i lo latou fale, ae sa la manatu i Molimau a Ieova o ē e faatigā. E lē gata i lenā, i taimi o taumafataga, ina ua talanoa tamaiti e uiga i mea na latou aʻoaʻoina i le sauniga, na faaosofia ai le naunau fia iloa o o latou mātua.

Ae peitaʻi, na fiafia pea mātua i faiga faataulāitu. O le tamā, o se tasi e onā soo ma sauā i lo latou tinā. Na toeitiiti a malepe ai le aiga. Na faaaluina e le tamā le lua vaiaso i le falepuipui ona o amioga lē mafaufau ona o le onā. A o iai i le falepuipui, na amata ai ona ia faitauina le Tusi Paia. A o ia faitau, na ia tau ai i fetalaiga a Iesu e faatatau i faailoga o aso e gata ai. Sa tele ni mea na fia iloa e le tamā ma le tinā, o lea na la ō atu ai i le Maota o le Malo ma sa taliaina se suʻesuʻega faale-Tusi Paia. Ina ua aʻoaʻoina le upu moni, na la faaleagaina uma ai a la tusi o faiga faataulāitu ma na la maua se mapusaga mai i osofaʻiga a temoni e ala i le valaau atu i le suafa o Ieova. Na amata ona la faia le tele o suiga i o la uiga.

Pe e mafai ona e manatu i le faagaeetia o Maria ma Lusi i le vaai atu i o la mātua o papatisoina mai e Hugo i se tasi o tauaofiaga itumalo i Polivia i le 1999? Na tupu lenei mea e tusa ua iva tausaga ua mavae talu ona uluaʻi faalogo Maria ma Lusi e uiga iā Ieova ma ana folafolaga. Ua latou aufaatasi nei ma Hugo i le faiva faataimi atoa. Maʻeu lo latou olioli ona ua autasia e le tapuaʻiga moni lo latou aiga!

[Faamatalaga pito i lalo]