Faatuatuaina Atoatoa o Ieova i Taimi o Puapuaga

“O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.”—SALAMO 46:1.

1, 2. (a) O le ā le faaaʻoaʻoga e iloa ai e lē lava le faapea atu tatou te faatuatuaina le Atua? (e) Aiseā e tele atu ai mea e ao ona tatou faia na i lo le tau ina faapea e tatou te faatuatuaina Ieova?

E FAIGOFIE ona faapea atu tatou te faatuatuaina le Atua ae e lē faigofie ona faatino. O se faaaʻoaʻoga, ua leva ona iai le faaupuga lenei “Matou te Faatuatua i le Atua,” i tupe Amerika. * I le 1956, na pāsia ai e le Fono Faitulafono a le Iunaite Setete se tulafono e avea ai lenā faaupuga ma tagāvai a Amerika. E ui i lea, o le toʻatele o tagata—e lē gata i Amerika a o le lalolagi aoao foʻi—ua sili lo latou faatuatua i tupe ma meafaitino na i lo o le Atua.—Luka 12:16-21.

² Talu ai o i tatou o Kerisiano moni, e tele atu mea e ao ona tatou faia na i lo le tau ina faapea tatou te faatuatuaina Ieova. E pei ona ‘mate o le faatuatua pe a leai ni galuega,’ e faapena foʻi ona leai se uiga o le faapea atu tatou te faatuatuaina le Atua, seʻi vaganā ai ua faaalia i a tatou gaoioiga. (Iakopo 2:26) I le mataupu na seʻi teʻa atu, na tatou aʻoaʻoina ai e faapea e faaalia lo tatou faatuatuaina o Ieova pe afai e tatalo atu iā te ia, saʻili i taʻiala o i lana Afioga, ma vaavaai atu i lana faalapotopotoga mo le taʻitaʻiga. Seʻi o tatou iloiloina la, pe faapefea ona tatou faatatauina manatu na e tolu, i taimi o puapuaga.

Pe a Vāea ma le Galuega pe Faatauvaa le Totogi

3. O ā faafitauli tau tamaoaiga e fesagaʻi ma auauna a Ieova i nei “aso faigatā,” ma e faapefea ona tatou iloa e naunau le Atua e fesoasoani mai iā i tatou?

³ I nei “aso faigatā,” e tutusa faafitauli tau tamaoaiga tatou te fesagaʻia ma isi foʻi tagata, e ui o i tatou o Kerisiano. (2 Timoteo 3:1) O lea la, e ono faafuaseʻi ona faamālōlō i tatou mai a tatou  galuega. Pe e tatau foʻi ona tatou faigaluega mo ni itula uumi e ui ina faatauvaa le totogi. O na tulaga, atonu e faigatā ai ona tatou ‘tausi i o tatou aiga.’ (1 Timoteo 5:8) Pe e naunau ea le Atua Silisili Ese e fesoasoani mai iā i tatou i taimi faapena? Ioe! Ae o le mea moni, e lē puipuia i tatou e Ieova mai toʻatugā uma o le olaga i lenei faiga o mea. Peitaʻi, afai tatou te faatuatua iā te ia, o le a tatou tofo i le moni o upu o i le Salamo 46:1: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” E faapefea ona tatou faaalia e tatou te faatuatuaina atoatoa Ieova i taimi o puapuaga tau tamaoaiga?

4. Pe a fetaiaʻi ma faafitauli tautupe, o le ā e mafai ona tatou tatalo atu i ai, ma e faapefea ona tali mai Ieova i a tatou tatalo?

⁴ O se tasi o auala e faaalia ai lo tatou faatuatuaina o Ieova, o le tatalo atu lea iā te ia. Ae o le ā e mafai ona tatou tatalo atu i ai? Talu ai ua tatou fetaiaʻi ma faafitauli tautupe, atonu o le taimi sili lenā e tatou te moomia ai le atamai. Aua le faatalatū, ia tatalo atu mo lenā atamai! Ua faamautinoa mai le Afioga a Ieova e faapea: “A e afai ua leai se [atamai] i so outou, inā ole atu ia i le Atua, o lē foaʻi tele mai i tagata uma ma le lē toe taʻutaʻua; ona foaʻiina mai ai lea iā te ia.” (Iakopo 1:5) Ioe, ia ole atu iā Ieova mo le atamai—o le tomai e faaaogā lelei ai le poto, malamalama ma le faautauta—ina ia fai ai ni filifiliga lelei ma le saʻo. Ua faamautinoa mai e lo tatou Tamā alofa i le lagi, o le a ia faafofoga i a tatou tatalo. O loo naunau Ieova i taimi uma lava ina ia faatonuina ala o ē e faatuatua iā te ia ma o latou loto atoa.—Salamo 65:2; Faataoto 3:5, 6.

5, 6. (a) Aiseā tatou te saʻili atu ai i le Afioga a le Atua mo le fesoasoani ina ia faafetaiaʻia ai omiga tau tamaoaiga? (e) O le ā e mafai ona tatou faia e faaitiitia ai popolega pe a vāea ma le galuega?

⁵ O le saʻili atu i le Afioga a le Atua mo taʻiala, o se tasi lenā o auala e faaalia ai tatou te faatuatuaina Ieova. O ana faamanatuga atamai o loo i le Tusi Paia e mautinoa e “matuā faamaoni.” (Salamo 93:5) E ui ina tusiaina i le sili atu ma le 1,900 tausaga ua teʻa, a o lenā tusi lea e mai i le agaga o le Atua, o loo iai fautuaga maufaatuatuaina ma le atamai e fesoasoani ina ia tatou iloa le auala e faafetaiaʻia ai omiga tau tamaoaiga. Seʻi tōmanatu i nisi o faaaʻoaʻoga o le atamai o loo i le Tusi Paia.

⁶ Na mātau e le tupu poto o Solomona i aso anamua e faapea: “E lelei le moe o lē faigaluega, pe itiiti, pe tele ana mea e ʻai; a o le maʻona o le mauʻoa e lē mafai ai ona moe o ia.” (Failauga 5:12) E tele le taimi ma tupe e faaaluina i le toe faaleleia, faamamāina, tausia ma le puipuia o a tatou meafaitino. Pe a vāea ma le galuega, atonu tatou te toe iloiloina ai o tatou olaga ina ia taumafai e iloa le eseesega o mea e moomia moni ma mea e lē o moomia. Ina ia faaitiitia popolega, atonu e atamai le faia o ni suiga. O se faaaʻoaʻoga, pe e mafai ona faafaigofie o tatou olaga, atonu e siitia atu i se fale e laʻitiiti atu po o le aveesea foʻi o meafaitino e lē o moomia moni?—Mataio 6:22.

7, 8. (a) Na faapefea ona faaalia e Iesu na ia silafia e matele ina soona popole tagata lē lelei atoatoa i meafaitino? (Tagaʻi i le faaopoopoga i le pito i lalo.) (e) O le ā le fautuaga atamai a Iesu i le auala e ʻalofia ai le soona popolevale fua?

⁷ Na fautua mai Iesu i lana lauga i le Mauga: “Aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai.” * (Mataio 6:25) Na silafia e Iesu, o le tulaga masani lava o le tagata lē lelei atoatoa o le popole lea i le mauaina o mea e ola ai. E faapefea la, ona ‘aua neʻi o tatou popole’ i mea faapena? Na fetalai Iesu, “ia outou muaʻi saʻili [le] malo.” Po o ā lava faafitauli e oo mai iā i tatou, e tatau ona tatou faamuamuaina pea le tapuaʻiga a Ieova i o tatou olaga. O lo tatou faia faapea, o le a “faaopoopoina” ai e lo tatou Tamā i le lagi, mea uma e moomia mo le soifuaga i aso faisoo. E iai lava le auala o le a saunia ai e Ieova mea tatou te moomia.—Mataio 6:33.

⁸ O se isi lenei fautuaga a Iesu: “Aua tou te popole i le aso a taeao; auā e popole le aso a taeao i ana lava mea.” (Mataio 6:34) E lē o se tulaga atamai  le soona popole fua i mea e ono tutupu a taeao. Na faapea mai se tagata poto: “E masani lava ona lē matuiā mea moni e tutupu i le lumanaʻi e pei ona tatou popole i ai.” O le taliaina ma le lotomaulalo o fautuaga a le Tusi Paia ina ia taulaʻi atu i mea e sili ona tāua ma ia ola e tusa ai ma mea e moomia i le aso, o le a fesoasoani iā i tatou e ʻalofia ai le soona popolevale fua.—1 Peteru 5:6, 7.

9. Pe a fesagaʻi ma faafitauli tautupe, o ā ni fesoasoani tatou te maua i lomiga a “le auauna faamaoni ma le mafaufau”?

⁹ Pe a fesagaʻi ma faafitauli tautupe, e mafai ona faaalia lo tatou faatuatua iā Ieova e ala i le saʻili atu mo le fesoasoani i lomiga a “le auauna faamaoni ma le mafaufau.” (Mataio 24:45) Mai lea taimi i lea taimi, na aofia ai i mekasini o le Ala Mai! mataupu o loo maua ai ni taʻiala aogā ma fautuaga i le auala e fesagaʻi ai ma faafitauli tau tamaoaiga. O le mataupu e faapea, “Ua Leai se Galuega—O ā ni Mea e Mafai Ona Fai?” i le lomiga faa-Peretania o Aokuso 8, 1991, ua taʻua ai ni taʻiala aogā se valu ua fesoasoani i le toʻatele o tagata ina ia faaauau ona lelei lo latou tulaga tautupe ma taufaalogona e ui ua leai ni a latou galuega. * Ae e tatau ona faapaleni na taʻiala ma se vaaiga saʻo e faatatau i le tulaga moni o tupe. Na talanoaina lenā manatu i le mataupu “O se Mea e Sili Atu Ona Tāua na i lo Tupe,” lea na maua foʻi i le lomiga lenā.—Failauga 7:12.

Pe a Puapuaga i se Gasegase

10. E faapefea ona faaalia i le faaaʻoaʻoga a le tupu o Tavita, e mafai ona faalagolago iā Ieova a o maʻi tigāina?

¹⁰ Faamata e mafai ona faatuatuaina Ieova pe faalagolago foʻi iā te ia, a o maua i se gasegase tigāina? Ioe e mafai! O loo manatu mamafa mai Ieova i ona tagata o faatafa gasegase. E lē gata i lea, e naunau Ieova e fesoasoani mai. O se faaaʻoaʻoga, seʻi manatu foʻi i le tupu o Tavita. Atonu na maʻi tigāina o ia a o tusi e uiga i feutagaʻiga a le Atua ma tagata amiotonu o loo gasegase. Na fai mai o ia: “E lagolago ane Ieova iā te ia i le taotoga o lona maʻi; e te liua lona moega uma lava i lona maʻi.” (Salamo 41:1, 3, 7, 8) Na tumau pea ona matuā faalagolago Tavita i le Atua, ma na toe malosi ai mai lona maʻi. E faapefea la ona tatou faalagolago i le Atua a o tatou mafatia i maʻi?

11. Pe a maua i se maʻi, o le ā e mafai ona talosaga atu i ai i lo tatou Tamā i le lagi?

¹¹ Pe a tatou maua i se maʻi, o se tasi o auala e faaalia ai lo tatou faalagolago iā Ieova o le ole atu lea iā te ia i le tatalo mo se fesoasoani ina ia tatou onosai ai. E mafai ona tatou talosaga atu iā te ia e fesoasoani mai e faaaogā “le poto” ina ia tatou saʻilia ai togafitiga mo gasegase e tusa  ma lo tatou tulaga o iai. (Faataoto 3:21) E mafai foʻi ona ole atu mo lana fesoasoani ina ia tatou onosai ma lavātia ai lo tatou tulaga maʻi. Ae e sili atu i nei mea uma, tatou te mananaʻo e talosaga atu iā Ieova e faamalosia i tatou ina ia maua le malosi e faamaoni ai pea iā te ia, ma ia faaauau ona saʻo la tatou vaaiga po o le ā lava se mea e ono tupu. (Filipi 4:13) O le tumau i le faamaoni i le Atua, e sili atu ona tāua na i lo le faatumauina o tatou ola i le taimi nei. Afai tatou te tumau i le faamaoni, o le a foaʻi mai e Lē e maua mai ai le Taui Sili, le ola ma le soifua mālōlōina lelei atoatoa e lē uma.—Eperu 11:6.

12. O ā mataupu silisili o le Tusi Paia e fesoasoani iā i tatou e fai ai ni faaiʻuga atamai pe a oo i togafitiga faafomaʻi?

¹² O lo tatou faalagolago iā Ieova e uunaʻia ai foʻi i tatou e vaavaai atu i lana Afioga le Tusi Paia, mo ni taʻiala aogā. O mataupu silisili o i le Tusi Paia, e mafai ona fesoasoani iā i tatou e faia ai ni filifiliga atamai pe a oo i togafitiga faafomaʻi. O se faaaʻoaʻoga, talu ai tatou te iloa e taʻusalaina e le Tusi Paia “le fai togafiti faataulāitu,” tatou te teena la faiga e suʻe ai maʻi po o ni togafitiga e aafia i faiga faataulāitu. (Kalatia 5:19-21; Teuteronome 18:10-12) O se isi faaaʻoaʻoga lenei o le atamai maufaatuatuaina o le Tusi Paia: “O lē ua faigofie, e talia e ia upu uma; a o lē ua mafaufau, ua faautauta o ia i lona ala.” (Faataoto 14:15) A o tatou tōmanatu i togafitiga faafomaʻi, o se gaoioiga atamai le saʻili o faamatalaga maufaatuatuaina na i lo le ‘talia o upu uma.’ O lenā gaoioiga “faautauta” e fesoasoani iā i tatou e iloilo lelei ai togafitiga faafomaʻi ua folasia mai i o tatou luma, ma fai ai sa tatou faaiʻuga lea na tatou mafaufau lelei i ai.—Tito 2:12.

13, 14. (a) O ā mataupu aogā e faatatau i gasegase na lomiaina e le mekasini o le Olomatamata ma le Ala Mai!? (Tagaʻi i le pusa i le itulau 17.) (e) O ā fautuaga o loo i le Ala Mai! faa-Peretania o Ianuari 22, 2001, i le auala e feagai ai ma gasegase faaumiumi?

¹³ E mafai foʻi ona faaalia lo tatou faalagolago iā Ieova e ala i le saʻiliʻili atu i lomiga a le auauna faamaoni. Mai lea taimi i lea taimi, na lomiaina ai e le mekasini o le Olomatamata ma le Ala Mai! mataupu aogā i le tele o ituaiga o gasegase faapitoa. * Na iai taimi na taulaʻi atu ai nei lomiga i tala a tagata na faafetaiaʻia ma le manuia na ituaiga o gasegase eseese. E lē gata i lea, na maua foʻi i isi mataupu taʻiala mai le Tusi Paia, faapea foʻi ma fautuaga aogā i le auala e feagai ai ma gasegase faaumiumi.

¹⁴ O se faaaʻoaʻoga, o le Ala Mai! faa-Peretania o Ianuari 22, 2001, e faapea lona faavaa “Faamāfanafanaga mo Ē Gasegase.” O mataupu na faatomua ai lenā mekasini, sa tolaulauina ai mataupu silisili aogā o le Tusi Paia ma faamatalaga mai tagata ua tele lo latou silafia ona ua loa tausaga o maua i gasegase tigāina. O le mataupu “E Faapefea Ona E Soifua ma le Manuia ma Lou Gasegase?” ua iai le fautuaga lenei: Ia iloa ma aʻoaʻoina le tele o faamatalaga e faatatau i lou gasegase. (Faataoto 24:5) Ia faataatia ni sini e mafai ona e ausiaina,  e aofia ai ni sini o le fesoasoani i isi, peitaʻi ia malamalama e faapea atonu e lē mafai ona e ausia sini ia e mafai ona ausiaina e isi. (Galuega 20:35; Kalatia 6:4) ʻAlofia le vavae ese o oe mai isi tagata. (Faataoto 18:1) Ia avea le asiasi atu iā te oe o se mea e fiafia i ai tagata. (Faataoto 17:22) Ae o le mea e sili ona tāua, ia faaauau ona iai se faiā lelei ma Ieova atoa foʻi ma le faapotopotoga. (Nauma 1:7; Roma 1:11, 12) Ioe, tatou te matuā lotofaafetai ona o taʻiala maufaatuatuaina ua saunia e Ieova e ala mai i lana faalapotopotoga!

Pe a Faaauau Ona Iai se Vaivaiga

15. Na faapefea ona manumalo le aposetolo o Paulo a o tauivi ma vaivaiga o lona tino augavale, ma o le ā le faamautinoaga ua iā i tatou?

¹⁵ Na tusi le aposetolo o Paulo: “E leai se mea lelei ua nofo i totonu iā te aʻu.” (Roma 7:18) Na iloatino e Paulo le matuā faigatā o le tauivi faasaga i tuʻinanauga ma vaivaiga o le tino augavale. E ui i lea, na mautinoa e Paulo e mafai lava ona ia manumalo mai ai. (1 Korinito 9:26, 27) E faapefea? E ala i le faatuatuaina atoatoa o Ieova. O le māfuaaga lenā na mafai ai ona faapea mai Paulo: “Auē o aʻu le tagata malaia! o ai sē laveaʻi iā te aʻu ai le tino o lenei oti? Ou te faafetai lava i le Atua, auā o Iesu Keriso lo tatou Alii.” (Roma 7:24, 25) Ae ā i tatou? O loo tatou tauivi foʻi ma vaivaiga o o tatou tino. A o tatou tauivi ina ia puleaina na vaivaiga, e faigofie lava ona mou ese lo tatou mautinoa ma manatu ai e lē mafai ona tatou manumalo. Ae o le a fesoasoani mai Ieova pe afai e pei i tatou o Paulo ma faalagolago atoatoa iā Ieova ae lē o lo tatou lava malosi.

16. Pe a faaauau ona iai so tatou vaivaiga, o le ā e moomia ona tatou tatalo atu i ai, ma o le ā e tatou te faia pe a toe lolo atu i na vaivaiga?

¹⁶ Pe a faaauau ona iai so tatou vaivaiga, e mafai ona faaalia lo tatou faatuatuaina o Ieova i le ole atu iā te ia i le tatalo. E moomia ona tatou talosaga faatauanau atu iā Ieova i le fesoasoani a lona agaga paia. (Luka 11:9-13) E mafai ona patino la tatou talosaga ina ia tatou lē gaoiā (po o le puleaina o i tatou lava e tusa ai ma le gagana Eleni), auā o se tasi lenā o fua o le agaga o le Atua. (Kalatia 5:22, 23, LT) O le ā se mea e fai pe a tatou toe lolo atu i o  tatou vaivaiga? E lē tatau ona tatou faavaivai ai. Aua neʻi o tatou fiu i le tatalo atu ma le agaga maulalo i lo tatou Atua alofa mutimutivale, ma talosaga atu i lana faamagaloga ma lana fesoasoani. E lē teena e Ieova se loto “momomo ma le nutimomoia” ona ua mamafatū i se lotofuatiaifo lē lelei. (Salamo 51:17) A tatou faatoga atu iā te ia i se loto faamaoni ua salamō, o le a fesoasoani mai Ieova ina ia tatou teena faaosoosoga.—Filipi 4:6, 7.

17. (a) Aiseā e tāua ai le tōmanatu i faalogona o Ieova e tusa ai ma se vaivaiga patino o tatou tauivi ai? (e) O ā mau atonu tatou te taulotoina pe afai o tatou tauivi faasaga i le ita vave? ia faaeteete i a tatou tala e fai atu? ia teena le faananau atu i faafiafiaga lē mamā?

¹⁷ E mafai foʻi ona faaalia lo tatou faatuatuaina o Ieova e ala i le saʻili i lana Afioga mo le fesoasoani. O le faaaogāina o se tusi faasino mau o le Tusi Paia po o le Faasino Mataupu mo le Olomatamata (lea e maua i so o se lomiga o Tesema 15), e mafai ona tatou saʻili ai i le tali o le fesili lenei, ‘O ā faalogona o Ieova i le vaivaiga o oʻu tauivi ai?’ O le tōmanatu i faalogona o Ieova e tusa ai ma lenā vaivaiga, e faamalosia ai lo tatou faanaunauga ina ia faafiafia iā te ia. O le a pei ai o tatou faalogona o faalogona o Ieova ma tatou inoino ai i mea ua inosia e ia. (Salamo 97:10) Ua iloa e nisi le aogā o le taulotoina o mau o le Tusi Paia lea e patino i o latou vaivaiga. Po o faigatā ea ona pulea lo tatou ita vave? Tatou te ono taulotoina mau e pei o le Faataoto 14:17 ma le Efeso 4:31. Po o se luʻi iā i tatou le faaeteete i a tatou tala e fai atu? Tatou te ono taulotoina mau e pei o le Faataoto 12:18 ma le Efeso 4:29. Po o tatou faananau atu i faafiafiaga lē mamā? Tatou te ono taumafai e tauloto mau e pei o le Efeso 5:3 ma le Kolose 3:5.

18. Aiseā e lē tatau ai ona tatou faatalatū ona o le māsiasi e talosaga atu i le ʻautoeaina mo se fesoasoani e manumalo ai i vaivaiga?

¹⁸ O le saʻilia o le fesoasoani a toeaina na tofiaina e le agaga o le Atua i le faapotopotoga, o se isi lenā o auala e faaalia ai lo tatou faalagolago iā Ieova. (Galuega 20:28) O nei “mea alofa i tagata” o se sauniuniga lenā a Ieova e ala iā Keriso ina ia puipuia ma tausiaina ana mamoe. (Efeso 4:7, 8, 11-14) O le mea moni e lē faigofie ona talosaga atu mo se fesoasoani e tusa ai ma o tatou vaivaiga. E ono oo iā i tatou le māsiasi ma popole ina neʻi lē fiafia mai le ʻautoeaina iā i tatou. Peitaʻi, e mautinoa o le a matuā naunau nei tane taʻumatuaina faaleagaga, e fesoasoani mai iā i tatou ona o lo tatou loto tele e talosaga atu mo se fesoasoani. E lē gata i lea, o loo filigā le ʻautoeaina ina ia faaaʻoaʻo i uiga o Ieova a o  feagai ai ma le faapotopotoga. O a latou fautuaga faamalosiau ma aogā atoa foʻi ma faatonuga mai le Afioga a le Atua, atonu o le mea tonu lava lenā o tatou moomia ina ia faamalosia ai lo tatou faanaunauga e manumalo i o tatou vaivaiga.—Iakopo 5:14-16.

19. (a) O ā auala ua taumafai ai Satani e faaaogā le tulaga iʻu vale o le olaga i lenei faiga o mea? (e) O le ā e aofia ai i le faatuatuaina o Ieova, ma o le ā e ao ona avea ma a tatou filifiliga maumauaʻi?

¹⁹ Aua neʻi galo e iloa e Satani ua saasaa ona pō. (Faaaliga 12:12) E manaʻo Satani e faaaogā le tulaga iʻu vale o le olaga i lenei lalolagi, ina ia faavaivaia ma taofia ai i tatou. Tau ina ia o tatou talitonu atoatoa i upu o loo taʻua i le Roma 8:35-39: “O ai sē na te faateʻaeseina mai i tatou i le alofa o Keriso? o le puapuaga ea, po o le atuatuvale, po o le sauā, po o le oge, po o le lē lavalavā, po o le pagatia, po o le pelu? . . . A ua tatou manumalo aʻiaʻi i nei mea uma lava, ona o ia ua alofa mai iā te i tatou. Auā ua ou mautinoa, e lē mafaia e le oti, po o le ola, po o agelu, po o alii, po o ē malolosi, po o mea i nei ona pō, po o mea atalī, po o le maualuga, po o le loloto, po o se tasi mea na faia, e lē mafaia e ia mea ona faateʻaeseina mai i tatou i le alofa o le Atua, o loo iā Keriso Iesu lo tatou Alii.” Maʻeu ni faaupuga e faaalia ai le faatuatuaina o Ieova! Peitaʻi, o lenā faatuatuaina o ia e lē na o se faalogona masani. E aofia ai le faia o faaiʻuga ua uma ona tatou mafaufau lelei i ai i aso faisoo o le olaga. O lea la, seʻi o tatou filifili maumauaʻi ina ia faatuatuaina atoatoa Ieova i taimi o puapuaga.

[Faamatalaga pito i lalo]

Pe E te Manatua?

• Pe a fesagaʻi ma faafitauli tau tamaoaiga, o ā auala e faaalia ai tatou te faatuatuaina Ieova?

• E faapefea ona faalagolago iā Ieova a o tatou puapuaga i gasegase?

• Pe a faaauau ona iai so tatou vaivaiga, e faapefea ona faaalia tatou te matuā faalagolago iā Ieova?

[Fesili mo le Suʻesuʻega]

[Pusa i le itulau 17]

Po o E Manatuaina Mataupu Nei?

Pe afai o tatou atuatuvale ona o se gasegase ua tatou maua ai, o se faalaeiauga la lo tatou faitau e uiga i nisi na faafetaiaʻia ma le manuia, ituaiga o gasegase eseese. O faamatalaga o mulimuli mai, o nisi na o mataupu na lomiaina e le mekasini o Le Olomatamata ma le Ala Mai!

“Ua Lafotuina i Lalo, a e le Fano” o loo talanoa i le auala e feagai ai ma le gasegase o le pē o le tino.—Le Olomatamata, Novema 1, 1995.

“Le Tuua e Loida e le Tulaga Lē Magagana” ua taulaʻi i le auala e feagai ai ma le gasegase tigāina o le cerebral palsy.—Ala Mai!, Oketopa-Tesema, 2000.

“Se Vaaiga Fiafia e ui i le Lē Atoatoa o le Malosi o le Tino” ua talanoa i le auala e feagai ai ma le gasegase o le lē tupu o ponaivi o le tino.—Ala Mai!, Iulai-Setema, 2000.

“E Lē Iloa e Outou se Mea e Tupu a Taeao” o loo talanoa i le auala e feagai ai ma le maʻi o le mafaufau e taʻua o le bipolar disorder.—Le Olomatamata, Tesema 1, 2000.

“O le Auauna i Isi e Faaitiitia ai Mafatiaga” o loo talanoa i le auala e feagai ai ma le maʻi tigāina e taʻua o le multiple sclerosis.—Le Olomatamata, Iulai 1, 2003.

[Ata i le itulau 15]

Pe a vāea ma se galuega, atonu e atamai le toe iloilo o o tatou olaga

[Ata i le itulau 16]

O le tala iā Loida e faaalia ai o le faalagolago iā Ieova e fesoasoani e onosai ai. (Tagaʻi i le pusa i le itulau e 17)

[Ata i le itulau 18]

E lē tatau ona tatou māsiasi fua e talosaga atu mo se fesoasoani ina ia manumalo ai i o tatou vaivaiga