Fesoasoani Moni mo Ē Matitiva

A O IAI Iesu Keriso, le Alo o le Atua i le lalolagi, na ia matuā naunau ai e fesoasoani i ē matitiva. Na mātauina e se tagata na vaaitino i le faiva a Iesu e faapea: “Ua pupula tauaso ma ua savavali pipili, ua faamamāina lepela ma ua logo tutuli, ua faatutūina o ē na oti ma ua folafolaina foʻi le tala lelei i ē matitiva.” (Mataio 11:5) Peitaʻi, e faapefea le faitau miliona o tagata matitiva i aso nei? Pe o iai ea se tala lelei ua talafeagai mo i latou? Ioe, o loo iai se feʻau o le faamoemoe!

E ui lava e masani ona lē amanaʻiaina ma faagaloina tagata matitiva e le lalolagi lautele, ae ua folafola mai e le Afioga a le Atua le Tusi Paia e faapea: “E lē faagalogaloina e faavavau o ē matitiva; o le faamoemoega foʻi o ē ua puapuagatia e lē fano lea a le tu a le tu lava.” (Salamo 9:18) O le a faataunuuina na upu faamāfanafanaloto pe a suitulaga le Malo o le Atua, le malo lea faalelagi, i pulega uma faaletagata. (Tanielu 2:44) O le avea o Iesu o se tupu i lenā malo faalelagi: “E alofa atu ia i lē ua vaivai ma lē ua mativa; e faaola lava e ia ē ua matitiva. E laveaʻi o ia iā i latou ai le sauā ma le faamalo; e silisili foʻi o latou toto i lona manatu.”—Salamo 72:13, 14.

O le ā le tulaga o le a iai le soifuaga pe a pule mai Iesu i le lalolagi? O i latou o ē soifua i le lalolagi o loo pulea e Keriso o le a olioli i fua o a latou galuega. Ua faapea mai le Mika 4:3, 4: “A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai; auā ua faapea ona tulei mai ai le siʻufofoga o Ieova o ʻau.” O le a foʻia foʻi e le Malo o le Atua faafitauli o le maʻi ma le oti. (Isaia 25:8) Maʻeu se suiga o le a iai le lalolagi! E mafai ona tatou talitonu i nei folafolaga a le Tusi Paia auā na faagaeeina e le Atua.

E lē gata i le aumaia o le feʻau o le faamoemoe, ae ua fesoasoani foʻi le Tusi Paia i le auala e taulimaina ai faafitauli i aso taʻitasi, e pei o le manatu māmā o le tagata iā te ia lava, atonu e māfua ona o le mativa. E iloa e se Kerisiano mativa mai i lana suʻesuʻega o le Tusi Paia e faapea e tāua o ia i le silafaga a Ieova e pei lava foʻi o se Kerisiano e tamaoaiga. Ua mātauina e le tusi o Iopu e faapea, o le Atua e ‘lē sili lona silasila i lē mauʻoa i lona silasila i lē mativa, auā o le galuega a ona aao i latou uma.’ (Iopu 34:19) E alofa Ieova i tagata uma.—Galuega 10:34, 35.