Talaaga o le Soifuaga

O Loo Tausia Pea i Tatou e Ieova

UA FAAMATALAINA E ENELESI MZANGA

O le tausaga e 1972. Na osofaʻia lo matou fale e ni alii talavou e toʻasefulu, o ni sui o le vaega o le Faapotopotoga a le ʻAutalavou a Malawi, na latou uu mau aʻu ma toso faatātā atu i le togātolo. Na latou sasa aʻu ma tuu ai i inā ma lo latou manatu ua ou oti.

Sa mafatia le toʻatele o Molimau a Ieova i Malawi i osofaʻiga ogaoga e pei o lenei. Aiseā na sauāina ai i latou? O le ā na fesoasoani iā i latou e tumau ai? Faamolemole seʻi oʻu faamatala atu iā te outou laʻu tala e faatatau i loʻu aiga.

NA OU fanau iā Tesema 31, i le 1921, i se aiga e toaaga i le lotu. O loʻu tamā o se faifeʻau o le Lotu Periperiane i Aferika Tutotonu. Na ou ola aʻe i Nkhoma, o se tamaʻi aai e latalata ane i Lilongwe, le laumua o Malawi. Na avea aʻu ma avā a Emmas Mzanga ina ua sefulu lima oʻu tausaga.

I se tasi aso, na asiasi mai ai iā i matou le uō a loʻu tamā, o ia foʻi o se faifeʻau. Na ia iloaina o loo nonofo latalata mai Molimau a Ieova i lo matou fale ma sa ia lapataʻia i matou ina ia aua neʻi iai sa matou fesootaʻiga ma i latou. Sa ia taʻu mai iā i matou e faapea, o Molimau e temonia ma afai matou te lē faaeteete, o le a pulea foʻi i matou e temoni. Na faapopoleina i matou i lea lapataʻiga lea na matou siitia atu ai loa i le isi nuu, o i inā sa maua ai le galuega a Emmas o se faatauoloa. Peitaʻi, e leʻi umi ae matou iloaina foʻi e latalata lo matou fale fou i Molimau a Ieova!

O lea, ona o le naunau o Emmas i le Tusi Paia, e leʻi umi ae uunaʻia o ia e talanoa atu i se tasi o Molimau a Ieova. Ina ua maua ni tali faamalieloto i le tele o ana fesili, na taliaina ai loa e Emmas le ofo a le Molimau e suʻesuʻe le Tusi Paia ma ia. I le taimi muamua, sa faia le  suʻesuʻega i le faleoloa i le mea o loo faigaluega ai, ae mulimuli ane sa faia i lo ma fale. O taimi uma lava e ō mai ai Molimau a Ieova, sa ou alu ese ai ma le fale ona sa ou fefe iā i latou. Peitaʻi sa faaauau pea ona suʻesuʻe e Emmas le Tusi Paia. E tusa ma le ono masina talu ona amata ona ia suʻesuʻe, ae papatiso loa iā Aperila i le 1951. Na te leʻi taʻuina mai iā te aʻu ona sa popole neʻi avea lea tala ma māfuaaga e faamuta ai la ma faaipoipoga.

Vaiaso Faigatā

I se tasi aso, na taʻu mai ai iā te aʻu e laʻu uō o Ellen Kadzalero e faapea o laʻu tane ua uma ona papatiso e avea o se Molimau a Ieova. Na matuā ou ita lava! Na amata mai lava i le aso lenā ou te leʻi toe tautala atu iā te ia pe saunia se meaʻai mo ia. Na ou lē toe asuina foʻi pe faamāfanafana sona vaitāʻele—o se galuega e tusa ai ma la matou aganuu o se tiute lea a le avā.

O le onosaia o nei faiga mo le tolu vaiaso, na faapea mai ai ma le agalelei Emmas seʻi o ma talanoa, ma sa ia taʻuina mai ai iā te aʻu le māfuaaga na ia faia ai le filifiliga e avea ma se Molimau. Sa ia faitau ma faamatalaina ni mau, e pei o le 1 Korinito 9:16. Na matuā ootia loʻu loto ma ou manatu ai e manaʻomia foʻi ona faia soʻu sao i le talaʻiga o le tala lelei. O lea na ou filifili ai loa e suʻesuʻe ma Molimau a Ieova. Na matuā faafiafiaina si aʻu tane e ese le alofa i lenā afiafi ina ua ou saunia se taumafataga manogi mo ia.

Talaʻi Atu le Upu Moni i Aiga ma Uō

Na matuā tetee o ma mātua ina ua faalogo o loo ma auaufaatasi ma Molimau a Ieova. Na tusi mai loʻu aiga ma faapea mai ua sā ona ma toe asiasi atu iā te i latou. Na ma lagona le faanoanoa i la latou faaiʻuga ae peitaʻi, na ma faatuatua i le folafolaga a Iesu o le a tele o ma uso, tuafāfine, tamā ma tinā faaleagaga.—Mataio 19:29.

Sa vave ona ou agaʻigaʻi i luma i laʻu suʻesuʻega faale-Tusi Paia ma sa ou papatiso ai iā Aokuso i le 1951, pe tusa e tolu ma le ʻafa masina talu ona uma ona papatiso laʻu tane. Na ou manatu o se mea e tatau ona ou faia, o le talaʻi atu lea o le upu moni i laʻu uō o Ellen. O se mea e fiafia ai, sa ia taliaina laʻu ofo o le suʻesuʻega faale-Tusi Paia. Iā Me i le 1952, na papatisoina ai Ellen ma avea ma oʻu uso faaleagaga, o lea na faamausalīina ai la ma faigāuō. I aso nei, o loo māfana pea la ma faigāuō.

Na filifilia Emmas o se ovasia o le matagaluega e asiasia faapotopotoga i le 1954. Ua toʻaono la ma fanau i lenā taimi. I na aso, e faaalu e se ovasia e iai sona aiga le vaiaso e tasi e asiasi ai i se faapotopotoga ona faaalu lea o le isi vaiaso faatasi ma lana avā ma ona alo. Pe a malaga Emmas e masani lava ona ia faamautinoa ia ou faia le suʻesuʻega faale-Tusi Paia a lo matou aiga. Sa ma taumafai ia avea le suʻesuʻega o se mea e fiafia i ai la ma fanau. Na ma talanoa atu foʻi e faatatau i lo ma alolofa mo Ieova ma lo ma naunau i le upu moni i lana Afioga, ma sa matou auai o se aiga i le galuega talaʻi. O lenei toleniga faaleagaga sa faamalosia ai le faatuatua o la ma fanau ma sauniunia ai i latou e tusa ma sauāga ia toe o se aga matou fesagaʻia.

Amata Sauāga Ona o le Tapuaʻiga

Na avea Malawi ma atunuu tū toʻatasi i le 1964. Ina ua iloa e faipule o le malo lo matou solitū i faiga faapolotiki, na latou taumafai e faamalosia ai i matou e faatau pepa e lagolago ai vaega faaupufai a le malo. Talu ai sa ma teena ma Emmas le faatauina o ni pepa, na ō mai ai sui o le Faapotopotoga a le ʻAutalavou ma faaleagaina lo matou togā sana—o la matou meaʻai autū lenā i le tausaga e sosoo ai. A o salaina i lalo e le Faapotopotoga a le ʻAutalavou le togā sana, sa latou pepese e faapea: “O i latou uma e mumusu e faatau le pepa a Kamuzu [le peresitene o Banda], o le a ʻai e manu ninii a latou sana ae o  le a latou fetagisi.” E ui i le leai o ni meaʻai ae e leʻi mou atu ai lo matou faamoemoe. Sa tausia i matou e Ieova. Na ia faamalosia ma le agalelei i matou.—Filipi 4:12, 13.

Sa na o aʻu ma tamaiti i le fale i le leva o le pō iā Aokuso 1964. O loo matou momoe, ae na ou ala i pesega mai i se mea mamao lava. O le ʻau Gulewamkulu lea, o i latou o se vaega fai faananā ma e faia siva mataʻutia e osofaʻia ai tagata ma faafoliga o agaga o tuaa ua maliliu. Sa aauina mai e le Faapotopotoga a le ʻAutalavou ia le vaega o le Gulewamkulu e osofaʻia matou. Na vave ona ou fafagua i luga tamaiti ma matou sosola i le togāvao a o leʻi oo mai le ʻauosofaʻi i lo matou fale.

Na matou iloa mai le mea o loo matou lalafi ai le susulu o le malamalama. Ua susunu e le vaega o le Gulewamkulu lo matou fale atolau. Na matuā liu efuefu lo matou fale faapea ma a matou meatotino. A o ō ese le ʻauosofaʻi mai le mea na mū ai lo matou fale lea o loo asuasu aʻe pea, na matou faalogo atu o loo latou faapea mai: “Ua tatou saunia se afi lelei mo lenā Molimau e faamāfanafana ai.” Maʻeu lo matou lotofaafetai iā Ieova ona na matou sosola ese ma le saogalemu! E moni na latou faaleagaina uma a matou meatotino, peitaʻi, e leʻi mafai ona latou faaleagaina lo matou maumauaʻi e faatuatua iā Ieova na i lo tagata.—Salamo 118:8.

Na matou iloaina sa faia foʻi le mea lava lea e tasi e le vaega o le Gulewamkulu i aiga Molimau a Ieova e toʻalima i lo matou vaipanoa. Maʻeu lo matou olioli ma lotofaafetai ina ua ō mai o matou uso mai i faapotopotoga tuaoi ma fesoasoani mai iā i matou! Na latou toe fausia o matou fale ma saunia meaʻai mo i matou mo ni vaiaso.

Faateleina Sauāga

Iā Setema 1967 na faia ai se fuafuaga e puʻe faamalosi Molimau a Ieova i le atunuu atoa. Ina ia maua i matou na ō mai ai alii talavou lē alolofa ma amio pei o ni manu—o ni sui o le Faapotopotoga a le ʻAutalavou ma Talavou Taʻimua a Malawi ma a latou sapelu—ma suʻe Molimau mai i lea fale i lea fale. Pe a maua i latou, na taumafai e faamalosia i latou e faatau pepa e lagolago ai vaega faaupufai.

Ina ua taunuu mai i lo matou fale, sa fesili mai pe iai sa matou pepa. Na ou fai i ai: “E leai, e leʻi faatauina se pepa. Ou te lē faatauina foʻi se pepa i le taimi nei, e faapena foʻi i le lumanaʻi.” O lea na latou uumau maʻua ma laʻu tane ma ave i le ofisa o leoleo, e aunoa ma se tuuina mai o se avanoa e ave ai ni mea. Na matuā popole la ma fanau laiti ina ua foʻi mai i le aʻoga ma te lē o iai i le fale. Ae o le mea e faafetai ai, na taunuu mai la ma tama tama matua o Tanielu, ma maua le tala i le mea na tupu mai i lo matou tuaoi. Sa faavave ona ia ave nai ona tei laiti ma ō atu loa i le ofisa o leoleo. Na latou taunuu tonu i le taimi o loo laʻu ai i matou e leoleo i loli e ave i Lilongwe. Sa matou ō ma tamaiti.

I Lilongwe, sa faia ai se faamasinoga e faatala pepelo ona fai i le ofisa ulu o leoleo. Na fesili mai leoleo iā i matou e faapea: “Pe o le a faaauau pea ona avea outou ma Molimau a Ieova?” Na matou tali “Ioe,” e ui lava o lenei tali o lona uiga o le a faasalaina ai mo le fitu tausaga i le falepuipui. O i latou o ē na “taʻitaʻia” le faalapotopotoga, e faasalaina i le 14 tausaga.

Na ave i matou e leoleo i le Falepuipui i Maula ina ua mavae ona faaaluina le pō atoa e aunoa ma ni meaʻai po o se mālōlōga. I inā na matuā lē ofi sela ma na lē maua ai se mea e momoe ai i luga o le fola! E tasi le pakete sa faaaogā e fai ma faleese i sela feomaʻi taʻitasi. Sa lē lava meaʻai ma na lē lelei foʻi ona saunia. Ina ua mavae le lua vaiaso, na iloa e le pule o le falepuipui o i matou o ni tagata e filemu ma faataga ai i matou e ō i fafo i le lotoā o le falepuipui. Ona o le toʻatele o i matou o loo iai faatasi, na matou maua ai avanoa i aso uma e faalaeiau ai le tasi i le isi ma avatu ai se molimau i isi pagota. Ina ua mavae le tolu masina o lo matou faasalaga i le falepuipui, na faateʻia i matou ina ua faasaʻolotoina i matou ona o omiga na oo i le Malo o Malawi mai atunuu i le lalolagi atoa.

Na uunaʻia i matou e leoleo e toe foʻi i o matou aiga, ae na latou toe faapea mai o loo  faasāina Molimau a Ieova i Malawi. Sa faia lenei sā mai iā Oketopa 20, 1967, e oo atu iā Aokuso 12, 1993—toetoe lava 26 tausaga. O tausaga faigatā na, ae ona o le fesoasoani a Ieova na mafai ai ona matou tumau i lo matou maumauaʻi i le solitū.

Tulia e Pei o ni Manu

Iā Oketopa 1972, na faatuina ai e le malo se tulafono fou lea na māfua ai ona toe amata sauāga mataʻutia. O lenei tulafono na faatonuina ai ia tuliesea Molimau a Ieova uma mai galuega, ma i latou o loo nonofo i nuu ia tulieseina mai i o latou aiga. Na tulia Molimau e pei o ni manu.

I lenā taimi, na sau ai se uso talavou Kerisiano ma se feʻau faavavevave mo Emmas e faapea, ‘Ua fuafua le Faapotopotoga a le ʻAutalavou e vavae ese lou ao, faapipii i luga o se pou ma ave i le alii sili o le nuu.’ Na vave ona tuua e Emmas le fale, ina ua uma ona fai le fuafuaga mo i matou e mulimuli atu iā te ia i le vave e mafai ai. Na ou auina atu faanatinati tamaiti. A o toeitiiti lava a ou tuua le fale, ae tutū mai loa ma sui e toʻasefulu o le Faapotopotoga a le ʻAutalavou o loo ō mai e suʻe Emmas. Sa latou osofaʻia lo matou fale ma latou iloaina ai ua sola Emmas. Na toso faatātā atu aʻu ma le ita e tamāloloa i le togātolo e latalata ane, o i inā na latou kiki ma sasa aʻu i ogātolo. Ona latou tuua lea o aʻu ma lo latou manatu ua ou oti. Na ou tolotolo i le fale ina ua ou toe malamalama.

Ina ua pogisa i lenā pō, na tuu ai e Emmas lona ola ia lamatia e ala i le toe foʻi mai i lo matou fale e suʻe aʻu. Ina ua ia mauaina aʻu ua matuā leaga lava le fasiga, sa aveina ai aʻu ma le faaeteete e Emmas i le taavale a lana uō. Ona matou ō atu lea i le fale o se uso i Lilongwe, o i inā na toe faasolosolo ai ona ou manuia ma na amata ai ona faia e Emmas ni fuafuaga matou te sosola ese mai le atunuu.

Leai se Nofoaga e Sulu i ai Tagata Sulufaʻi

Sa iai se loli telē a la ma tama teine o Dinesi ma lona toʻalua. Sa la faafaigaluegaina se avetaavale o lē na avea muamua ma sui o Talavou Taʻimua a Malawi ae na oo ina ia lagolagoina lo matou tulaga. Na ia tauofo mai e fesoasoani iā i matou ma isi Molimau. I nisi afiafi e aveina ai e le ave taavale ia Molimau mai nofoaga sa fuafuaina e lalafi ai. Ona ia laʻeiina lea o lana togiga o Talavou Taʻimua a Malawi ma ave atu lana loli lea na lalafi ai Molimau i tua ma sa mafai ona pasia ni poloka a leoleo na faia i le auala. Na lamatia o ia ona o le fesoasoani i le faitau selau o Molimau ina ia sopoʻia le tuaoi agaʻi i Zambia.

Ina ua mavae ni nai masina, ona toe auina atu lea o i matou e faipule o Zambia i Malawi, ae matou te leʻi toe foʻi atu i lo matou nuu. Na gaoia uma a matou meatotino. E oo lava i ʻapa na ato ai le fale na aveesea uma. Ona o le leai o  se nofoaga saogalemu matou te ō i ai, na matou sosola atu loa i Mozambique ma nonofo ai i nofoaga o sulufaʻiga i Mlangeni mo le lua ma le ʻafa tausaga. Peitaʻi, iā Iuni i le 1975, na tapunia ai e se faigāmalo fou i Mozambique le nofoaga o sulufaʻiga ma faamalosia i matou e toe foʻi i Malawi, ae e leʻi suia le tulaga o mea mo tagata o Ieova i inā. E leai se isi mea sa mafai ona matou faia vaganā ai le toe sosola atu i Zambia mo le taimi lona lua. Na matou taunuu i inā i nofoaga o sulufaʻiga i Chigumukire.

E lua masina mulimuli ane ai na ō mai ai solo o pasi ma loli a vaegāʻau i le auala, ma na lolofi ane le faitau selau o fitafita Zambia i le nofoaga o tagata sulufaʻi. Na latou faapea mai, ua uma ona fausia fale mananaia mo i matou ma ua latou saunia auala o femalagaaʻiga e ave ai matou. Na matou iloa lelei e lē moni ia folafolaga. Na amata ona tulei tagata e fitafita i loli ma pasi, ma tupu ai loa se vevesi. Na taapeape solo uso ma tuafāfine ona o le fefefe ina ua faapāpā faalausosoo e fitafita a latou laau malosi i le ʻea.

Ona o le fenuminumiaʻi, na paʻū ai i lalo Emmas ma solia ai i vae o isi tagata, peitaʻi na fesoasoani se tasi o uso e toe faatūina o ia i luga. Na matou mafaufau o le amataga lenei o le puapuaga tele. Sa toe sosola uma tagata sulufaʻi agaʻi i Malawi. I Zambia, na matou taunuu ai i se vaitafe, sa faia e uso se laina umī ma uu lima faatasi ina ia fesoasoani i tagata uma e sopoʻia ma le saogalemu le vaitafe. Peitaʻi, i le isi itu o le vaitafe, o loo siʻomia ai i matou e fitafita Zambia ma na toe auina faamalosi atu matou i Malawi.

Ina ua matou toe foʻi i Malawi, na matou lē iloa po o fea a nonofo ai. Na matou iloaina, sa lapataʻia tagata e fonotaga faapolotiki ma nusipepa ina ia faaeteete i “tagata fou” e faasino atu i Molimau a Ieova ia o le a taunuu i lo latou nuu. O lea na matou filifili ai e ō atu i le laumua, o i inā e tau lē iloa ai i matou e pei ona faigofie ona iloa i le nuu. Sa maua sa matou tamaʻi fale mautotogi, ma na toe faaauau ai asiasiga faalilolilo a Emmas o se ovasia femalagaaʻi.

Auai i Sauniga a le Faapotopotoga

O le ā na fesoasoani iā i matou ia tumau ai i le faamaoni? O sauniga a le faapotopotoga! I nofoaga o sulufaʻiga i Mozambique ma Zambia, sa faigofie ona matou auai i sauniga sa faia i Maota o le Malo e faigofie fausaga ma e ato i lau. Sa faigatā ma mataʻutia le faatasitasi faatasi mo sauniga i Malawi—ae sa aogā tele iā i matou na sauniga. E masani ona fai a matou sauniga i le leva o le pō i se nofoaga mamao mai tagata ina ia lē mauaina ai i matou. O lea, ina ia ʻalofia le uaʻi mai o tagata i la matou faatasiga, matou te lē patipati e faaalia ai lo matou lotofaafetai i le failauga ae e mili faatasi o matou lima.

Sa faia papatisoga i le leva o le pō. Na papatiso ai la ma tama tama o Abiyudi i se taimi faapena. Ina ua māeʻa le lauga o le papatisoga, na taʻitaʻiina atu ai o ia ma isi sui papatiso i le pogisa i le taufusi lea sa eliina ai se pu papaʻu, ma o i inā, sa papatisoina ai i latou.

Sa Avea lo Matou Fale ma Nofoaga Lilo mo le Galuega

Na avea lo matou fale i Lilongwe ma nofoaga e lē iloagofie e leoleo, i vaitaimi o faasāsāaga a le malo. Sa auina mai faananā meli ma lomiga mai le ofisa o le lālā i Zambia i lo matou fale. O uso sa galulue i le tilivaina o lomiga i uila vili vae latou te ō mai i lo matou fale ma ave uta o lomiga mai i Zambia ma auina atu meli ma lomiga i vaipanoa uma o Malawi. E matuā manifinifi lava mekasini o le Olomatamata ia na tufatufaina atu ona sa lomia i pepa e lomia ai le Tusi Paia. Sa faigofie ai i uso o loo tilivaina mekasini ona faaluaina le tele o mekasini ona e lē lomia i pepa e masani ai. Sa aveina atu foʻi e uso tamaʻi Olomatamata lea e lomia ai na o mataupu o suʻesuʻega. Sa faigofie ona nanā tamaʻi mekasini i taga o ofu ona sa na o le tasi le laupepa.

Sa lamatia le saʻolotoga ma ola o nei uso ina ua latou ui atu i le togāvao, o nisi taimi e ō atu i le pogisa o le pō, ma ni uta o lomiga e faulalaʻi i luga o latou uila vili vae. E ese mai i auala sa  faia ai poloka a leoleo ma isi lamatiaga, na latou malaga i le faitau selau o maila i tau eseese ina ia faaoo atu meaʻai faaleagaga i o latou uso. Maʻeu le lototetele o na uso pele!

E Tausia e Ieova Fafine ua Oti a Latou Tane

Iā Setema 1992, na mafatia ai Emmas i le maʻi o le pē o le itu o le tino, a o fai atu sana lauga i le taimi o lana asiasiga i se faapotopotoga. Na lē toe lelei ai lana tautala. Na toe mafatia foʻi o ia i le maʻi lava lenā, lea na pē atoa ai le tasi itu o lona tino. E ui lava ina sa faigatā iā te ia le faafetaiaʻia o le lē lelei o lona soifua mālōlōina, ae o le lagolagosua alofa a lo matou faapotopotoga na aveesea ai loʻu lotovaivai. Na mafai ai ona ou tausia laʻu tane i le fale seʻia oo i lona maliu iā Novema 1994, ina ua 76 tausaga o lona soifua. E 57 tausaga talu ona ma faaipoipo, ma na vaai Emmas i le iʻuga o faasāsāaga a o leʻi maliu. Peitaʻi, o loo oʻu faanoanoa pea i le maliu o si aʻu tane faamaoni.

Ina ua maliu laʻu tane, na tauave ai e le tane a laʻu tama teine le tiute tauave o le tausia e lē gata o lana avā ma lana fanau e toʻalima aemaise foʻi ma aʻu. Ae faanoanoa lava, na maliu o ia iā Aokuso 2000 ona o se gasegase. O le a faapefea nei la e laʻu tama teine ona saʻilia ni meaʻai ma se fale mo i matou? Na ou iloa o loo tausia pea i matou e Ieova o “le Tamā ia o ē ua mātuaoti, lē na te faamasinoina mo fafine ua oti a latou tane.” (Salamo 68:5) Na saunia e Ieova se fale matagofie e ala mai i ana auauna i le lalolagi. Sa faapefea ona tupu lenā mea? Ina ua iloa e uso ma tuafāfine o la matou faapotopotoga lo matou tulaga faigatā, sa latou fausia loa se fale mo i matou i le na o le lima lava vaiaso! Na ō mai isi uso e leiina piliki mai isi faapotopotoga e fesoasoani. Na ootia o matou loto ona o le alofa ma le agalelei o nei Molimau uma talu ai o le fale sa latou fausia mo i matou e sili atu na i lo fale o loo nonofo ai le toʻatele o i latou. O le alofa lea sa faaalia e le faapotopotoga na avatu ai se molimau lelei i o matou tuaoi. Ua ou lagona e pei lava ua ou iai i le Parataiso pe a ou moe i le pō! Ioe, sa fausia lo matou fale fou manaia i piliki ma simā, ae pei ona taʻua e le toʻatele, o se fale sa fausia moni lava i le alofa.—Kalatia 6:10.

O Loo Faaauau Pea le Tausiga a Ieova

E ui lava e iai taimi ou te matuā faanoanoa ai lava, ae e agalelei ma lagolago mai pea Ieova iā te aʻu. O le toʻafitu o laʻu fanau e toʻaiva o loo soifua pea, ma ua 123 nei le aofaʻi o loʻu aiga. Maʻeu loʻu lotofaafetai ona o le toʻatele o i latou o loo auauna ma le faamaoni iā Ieova.

Ua 82 nei oʻu tausaga, ma pe a ou vaai i le mea ua faataunuuina e le agaga o Ieova i Malawi e faatumulia ai aʻu i le olioli. Na ou vaaia le faateleina o aofaʻi o Maota o le Malo mai i le tasi i le sili atu i le 600 i tausaga e fa ua mavae. Ua iai foʻi se ofisa fou o le lālā i Lilongwe, ma ua matou olioli ona ua lē toe faalavelavea le mauaina o meataumafa faaleagaga. Ua ou lagona ua ou tofo i le faataunuuga o le folafolaga a le Atua o loo i le Isaia 54:17, o loo faamautinoa mai ai iā i tatou e faapea: “O auupega uma e faia e tau ma oe e lē manuia ia.” Ina ua mavae le sili atu i le 50 tausaga o auauna iā Ieova, na ou mautinoa ai po o ā lava tulaga faigatā e fesagaʻi ma i tatou, e tausia pea i tatou e Ieova.

[Ata i le itulau 24]

Na papatiso laʻu tane o Emmas iā Aperila i le 1951

[Ata i le itulau 26]

O se vaega lototetele o uso sa tilivaina lomiga

[Ata i le itulau 28]

O le fale na fausia i le alofa