Po o E Ava i Uso ma Tuafāfine Matutua?
Po o E Ava i Uso ma Tuafāfine Matutua?
A O OSI feagaiga Isaraelu anamua ma le Atua, na faatonuina i latou e faapea: “Ia e tulaʻi atu i luma o lē ua ulu sinā, ia e ava foʻi i luma o le toeaina, ma ia e mataʻu i lou Atua.” (Levitiko 19:32) O lea, o le faaaloalo i ē matutua o se matafaioi paia, e sootaga atu i le gauaʻi i le Atua. E ui e lē o toe iai Kerisiano i aso nei i lalo o le Tulafono na tuuina iā Mose, ae ua faamanatu mai iā i tatou o loo silasila Ieova i ē matutua o loo auauna iā te ia, e tāua ma e pele iā te ia. (Faataoto 16:31; Eperu 7:18) Pe e tutusa la tatou vaai ma le silasila a Ieova? Pe tatou te ava i o tatou uso ma tuafāfine matutua?
Na Ava Elisaia i Lana Uō Matua
O se tasi o tala o le Tusi Paia o loo faamamafa mai ai le faaalia o le faaaloalo i ē matutua, o loo maua i le tusi lona lua a Tupu. O loo faamatalaina ai le auala na sosoo atu ai le perofeta o Elisaia i le perofeta matua o Elia. Seʻi iloilo po o le ā le mea na tupu i le aso mulimuli o Elia o se perofeta i ituaiga e sefulu o le malo o Isaraelu.
Na faatonuina e Ieova Elia i lenā aso ina ia malaga mai Kilikala i Peteli, mai Peteli i Ieriko, ma mai Ieriko i le vaitafe o le Ioritana. (2 Tupu 2:1, 2, 4, 6) A o alu lenā faigāmalaga pe tusa o le 30 maila [50 kilomita] le mamao, e faatolu ona fai atu Elia iā Elisaia ina ia aua nei mulimuli atu iā te ia. Peitaʻi, e pei lava ona matuā musu o Ruta e tuua Naomi, e faapena foʻi ona musu Elisaia e tuua le perofeta matua o Elia. (Ruta 1:16, 17) E faatolu ona faapea atu Elisaia: “O loo soifua Ieova, ua e ola foʻi oe, ou te lē tuua lava oe.” (2 Tupu 2:2, 4, 6) E oo ane i lenā taimi, pe tusa ua ono tausaga o fesoasoani Elisaia iā Elia. E ui i lea, sa ia faanaunau e galulue faatasi ma Elia i le umi e mafai ai. Ua faaauau mai faapea le tala: “Ua savavali atu pea i laʻua, o tautalatala fano; faauta foʻi, . . . ona alu aʻe ai lea o Elia.” (fuaiupu e 11) Sa talanoa Elia ma Elisaia seʻia oo i le toe taimi o le faiva a Elia i Isaraelu. Sa matuā naunau le perofeta e maua faatonuga ma faalaeiauga mai le perofeta matua o lē ua tele lona poto masani. E manino mai la, na ia ava i lana uō matua.
‘Ia Pei o ni Tamā ma ni Tinā’
E lē faigatā la ona iloa le māfuaaga na alofa ai Elisaia i le perofeta matua e pei o se uō—e pei foʻi o se tamā faaleagaga. (2 Tupu 2:12) A o leʻi māeʻa le tofiga a Elia i Isaraelu, na ia fai atu iā Elisaia e faapea: “Fai mai ia pe se ā se mea ou te faia mo oe manū o leʻi aveeseina aʻu iā te oe.” (Fuaiupu e 9) E oo lava i le toe taimi o lana faiva, na faaalia ai e Elia le naunau mo le tulaga faaleagaga o Elisaia ma le faaauauina o le galuega a le Atua.
I aso nei, maʻeu le faamāfanafana loto o le mātauina o lenā manatu mamafa faatamā ma faatinā i o tatou uso ma tuafāfine Kerisiano matutua, a o latou faaalia atu ma le agalelei i talavou le poto ma le atamai o loo iā i latou. O se faaaʻoaʻoga, ua naunau ē ua loa o galulue tauofo i ofisa o lālā o Molimau a Ieova e fesoasoani i sui fou o le aiga Peteli, ina ia latou maua le tomai e faia ai la latou auaunaga. E lē gata i lea, ua fiafia ovasia femalagaaʻi ma a latou avā o ē o asiasia faapotopotoga i le tele o tausaga, e faaaogā lo latou tomai ua mauaina ina ia fesoasoani iā i latou, o ē o loo toleniina e avea o ni faifeʻau femalagaaʻi. O loo iai foʻi uso ma tuafāfine matutua, o ē o loo auauna ma le faamaoni iā Ieova mo le faitau sefulu tausaga i faapotopotoga a Molimau a Ieova i le lalolagi aoao, o ē fiafia e avatu ni fautuaga atamai ma aogā i ē fou mai i le faapotopotoga.—Faataoto 2:7; Filipi 3:17; Tito 2:3-5.
O le manatu mamafa moni o loo faaalia e nei uso pele Kerisiano matutua, o se fiafiaga moni le faaaloalo iā i latou. O lea la, tatou te mananaʻo ai e faaaʻoaʻo i le faataʻitaʻiga a Elisaia o le talisapaia loloto lea o uso talitonu matutua. E pei ona faamanatu mai e le aposetolo o Paulo iā i tatou, seʻi faaauau ona tatou feutagaʻi ma “se toeaina . . . peiseaī se tamā” ma “loomatutua, peiseaī o tinā.” (1 Timoteo 5:1, 2) O le faia faapea, o loo tatou faia ai se sao tele i le faagaoioia ma le agaʻigaʻi i luma o le faapotopotoga Kerisiano i le lalolagi atoa.
[Ata i le itulau 30]
Sa faanaunau Elisaia e galulue ma Elia i le umi e mafai ai
[Ata i le itulau 31]
E maua e le toʻatele aogā mai Kerisiano matutua