Vivii Iā Ieova “i Totonu o le Faapotopotoga”
Vivii Iā Ieova “i Totonu o le Faapotopotoga”
O SAUNIGA faa-Kerisiano o faatulagaga na a Ieova e tausia ai ona tagata ia malolosi faaleagaga. E tatou te faaalia le talisapaia i sauniuniga a Ieova e ala i le auai e lē aunoa i sauniga. E lē gata i lea, e mafai ona tatou “taufaatupu ai [i tatou uso] le alofa ma galuega lelei,” o se auala lea e faaalia ai le alofa o le tasi i le isi. (Eperu 10:24; Ioane 13:35) E faapefea ona tatou taufaatupu le alofa i o tatou uso i sauniga?
Ia Taʻutino Atu
Na tusi le tupu o Tavita e faatatau iā te ia lava e faapea: “Ou te taʻu atu lou suafa i oʻu uso; ou te vivii atu iā te oe i totonu o le faapotopotoga. Ou te vivii lava iā te oe i totonu o le faapotopotoga tele.” “Ou te vivii atu iā te oe i le faapotopotoga tele, ma pese atu iā te oe i luma o le nuu e toʻatele.” “Ua ou talaʻi le amiotonu i le faapotopotoga tele; faauta, ou te leʻi taofia lava oʻu laugutu.”—Salamo 22:22, 25; 35:18; 40:9.
I aso o le aposetolo o Paulo, ina ua faatasitasi Kerisiano mo le tapuaʻiga, na latou faia foʻi ni taʻutinoga faapena o lo latou faatuatua iā Ieova ma i lona mamalu. I lenei auala na latou faalaeiauina ma taufaatupu ai le alofa ma galuega lelei i le tasi i le isi. I o tatou aso, i le tele o senituri ina ua mavae Tavita ma Paulo, ua tatou “iloa o le aso [o Ieova] o loo tāulata mai.” (Eperu 10:24, 25) Ua latalata atu nei le faiga o mea a Satani i lona faaumatiaga, ma ua faaauau ona faateleina ai faafitauli. E leʻi faapea lava muamua, ‘ona aogā ia te i tatou le onosai.’ (Eperu 10:36) O ai nisi e sili ona agavaa na i lo tatou uso e faalaeiauina i tatou ina ia onosai?
I aso nei, e pei foʻi lava o taimi ua mavae, ua maua e tagata talitonu taʻitoʻatasi avanoa e faailoa atu ai lo latou faatuatua i “totonu o le faapotopotoga.” O se tasi o avanoa ua talafeagai mo tagata uma o le faia lea o se sao e tali ai i fesili e fai atu i le aofia i sauniga a le faapotopotoga. Ia aua lava neʻi manatu māmā i aogā tatou te maua mai i le faia o se tali. O se faaaʻoaʻoga, o tali ia e faaalia ai le auala e foʻia ai pe ʻalofia ai faafitauli e faamalosia ai le maumauaʻi o tatou uso e mulimuli i mataupu silisili o le Tusi Paia. O tali o loo faamatalaina mau o le Tusi Paia ua faasino mai i le palakalafa ae lē o siiina mai, pe aofia ai ni manatu e maua mai i saʻiliʻiliga a le tagata lava ia, e ono faalaeiauina ai isi ina ia atiina aʻe le masani o le faia o ni suʻesuʻega e sili atu.
O le iloaina faapea o le faia o ni tali i sauniga o le a aogā iā i tatou ma isi, e tatau ona uunaʻia ai Molimau a Ieova e foʻia le matamuli ma le fefe. E tāua tele mo toeaina ma auauna o le faiva ona faia ni tali i sauniga, auā ua faatalitalia i latou e taʻimua i le faia o se sao i sauniga faapea ma le auai i sauniga. O lea, e faapefea ona mafai e se tasi ona faaleleia lea tulaga pe afai ua faigatā ona ia faia se tali i sauniga?
Fautuaga e Faaleleia Ai
Ia manatua o loo aofia ai la tatou tapuaʻiga iā Ieova. Ua faamatalaina e se tuafafine Kerisiano e nofo i Siamani le auala ua ia manatu ai i ana tali. “O aʻu tali na i taumafaiga a Satani e taofia tagata o le Atua mai le taʻutino atu o lo latou faatuatua.” Ua faapea mai se uso fou faatoʻā uma ona papatiso o lē o loo aufaatasi atu i le faapotopotoga lava lenā: “O le tele o taimi ou te tatalo ai ia fai se tali.”
Ia sauniuni lelei. Afai e te lē suʻesuʻe muamua i le mataupu, o le a faafaigatā la ona fai sau tali ma o le a lē uigā ai foʻi au tali. O fautuaga mo le faia o tali i sauniga a le faapotopotoga o loo maua i le tusi, Mauaina o Aogā Mai i le Aʻoga o le Faiva Faatiokarate, itulau 70. *
Ia faataatia se sini e fai se tali i sauniga uma. O lona uiga, o le saunia lea o ni tali, auā o le tele lava e sii ai i luga o lou aao, o le ono tele foʻi lenā o avanoa e tofia ai oe e le uso o loo taulimaina le mataupu. E mafai foʻi ona e faailoa muamua atu iā te ia po o lē fea fesili ua e sauni e te tali ai. E aogā faapitoa lenei auala pe afai e te fou mai. Atonu o le a uunaia oe e sii i luga lou aao ma fai sau tali i le “faapotopotoga tele,” ona ua e iloaina o le palakalafa lea ua e sauni e te tali ai ma o le a tagaʻi mai foʻi lē o loo taʻitaʻia le sauniga i lou aao.
Ia vave fai lau tali. O se galuega faigatā e lē faigofie pe afai e tolopō. O le vave fai o se tali i le sauniga e mafai ona aogā. O le a faateʻia ai oe i le faigofie ona e tali faalua pe faatolu ona ua teʻa le faigatā lea sa iai muamua o le faia o se tali.
Ia filifili se nofoa talafeagai. O nisi e faigofie ona faia ni tali pe a alaala i le pito i luma o le Maota o le Malo. E itiiti mea e faalavelavea ai, ma atonu o le a mafai ona silafia e lē o loo faia le sauniga lou aao. Pe afai e te faia faapea, ia aua neʻi galo ona tautala leo tele ina ia lagona ai e tagata uma, aemaise lava pe afai e lē faaaogāina e le faapotopotoga maikorofoni.
Faalogologo lelei. O le a fesoasoani lea iā te oe e ʻalofia ai le toe taʻua o se manatu faatoʻā uma ona fai e se tasi. E lē gata i lea, o tali ia sa faia e isi atonu e faamanatu atu ai iā te oe se mau po o se manatu e mafai ona e faaopoopo atu i ai i le manatu na faaalia. I nisi taimi, atonu e mafai ona faataʻitaʻia se manatu o le talanoaga i se mea puupuu na tupu. E matuā aogā na tali.
Faamasani e tali i au lava upu. O le faitauina o le tali mai le palakalafa e mafai ona faaalia ai ua e mauaina le tali saʻo, ma atonu o se auala lelei lea e amata ai ona tali. Peitaʻi, o le agaʻigaʻi i luma i le faia o se tali i au lava upu e faaalia ai ua e malamalama i le manatu. E lē talafeagai ona faitau mai i lomiga. E lē na ona toe faaleo atu e Molimau a Ieova faamatalaga ia o loo i a latou lomiga.
Faafesootaʻi lelei tali i le mataupu. O tali e lē sootaga atu i le mataupu pe salaese mai manatu o loo talanoaina e lē talafeagai. O lona uiga o au tali e tatau ona fesootaʻi atu i le mataupu o loo talanoaina. O le a saosaolaumea lea i se talanoaga faalaeiau faaleagaga o le matua o loo talanoaina.
O le sini ia faalaeiau ai isi. Talu ai o le māfuaaga tāua mo tali o le faalaeiauina lea o isi, e tatau ai la ona tatou taumafai e ʻalofia le faia o faamatalaga e faavaivaia ai i latou. Aua le tali i le palakalafa atoa o le a laʻitiiti ai pe ua leai se manatu e totoe mo isi e tali ai. O tali uumi ma lavelave o le a faafaigatā ai ona malamalama i le uiga. O le faia o ni tali pupuu i ni nai upu e mafai ona uigā, ma o le a faalaeiau ai foʻi i ē fou ina ia faia ni tali pupuu.
O le Matafaioi a i Latou o Loo Taʻitaʻia Sauniga
E tusa ma le auala e faalaeiauina ai, ua iai i lē o loo taʻitaʻia le sauniga se tiute tauave mamafa. Ua faaalia lona naunau moni i tali uma o loo aumai e ala i le faafofoga lelei ma e ala i le tagaʻi atu i lē o loo tali na i lo le uaʻi atu i se isi mea. Pagā se lē talafeagai pe afai na te lē faafofoga lelei ma mulimuli ane ua ia toe taʻua mea ia ua uma ona taʻua po o le toe faia foʻi o se fesili ua faatoʻā uma ona taliina!
O se tulaga foʻi e faavaivai ai pe a fai ma masani a lē o loo taulimaina le mataupu, le toe faaupuina o se tali lea faatoʻā uma ona fai i nisi upu, e pei e foliga mai e lē o manino le tali. Ae i le isi itu, maʻeu le faalaeiauina pe a saosaolaumea tali ina ia faalautele ai se talanoaga o se manatu tāua. ‘O le a faapefea ona tatou faatatauina lenei mea i a tatou faapotopotoga?’ po o, ‘O le ā le mau o loo i le palakalafa e lagolagoina ai le manatu lea faatoʻā
taʻua?’ o nei fesili e uunaia ai ni tali faalaeiau, lea e aogā tele i le aofia.E tatau ona avatu le faamālō faapitoa iā i latou o ē fou mai ma i latou e matamumuli pe a faia ni a latou tali. Ia faia lenei mea iā i latou taʻitoʻatasi pe a māeʻa le suʻesuʻega ina ia ʻalofia ai le māsiasi ma maua ai foʻi le avanoa o le fai suʻesuʻega e avatu ai ni fautuaga pe a talafeagai ai.
I talanoaga masani, o se tasi e faumalo i se talanoaga na te faamutaina fesootaʻiga. E manatu ai lana ʻaufaalogologo e lē manaʻomia fua ona faaalia so latou manatu. Ua latou faalogo ae e lē o iai lo latou loto pe lē faalogo foʻi. E ono tupu foʻi se mea faapena pe afai e faumalo lē o loo taulimaina le talanoaga e ala i le faaopoopo soo. Peitaʻi, o lē o loo taʻitaʻia atonu e na te uunaʻia le aofia ma faatupu manatu i le mataupu e ala i le faia o fesili faaopoopo. Ia aua neʻi tele naʻuā na fesili.
E lē talafeagai i lē o loo taʻitaʻia ona tofia le tagata e muamua sii i luga lona aao. O le a faavaivaia ai i latou o ē e manaʻomia sina taimi e faamaopoopo ai a latou tali. O le faatali laititi, o le a tuu atu ai le avanoa i se tasi e leʻi faia sana tali e fai ai. O le a faaalia foʻi lona faautauta e ala i le lē tofia o tamaiti laiti e tali i fesili e tusa ai ma mataupu e leʻi oo i ai lo latou malamalama.
Ae faapefea pe afai e sesē se tali? E tatau ona ʻalofia e lē o loo taulimaina le mataupu le faamāina o le tagata lea na faia le tali. E masani lava ona aofia ai ni faamatalaga moni i tali e tusa lava pe sesē. E mafai e le fai suʻesuʻega ona faasaʻo le tali e aunoa ma le faamāsiasi ai o se tasi e ala i le filifilia ma le faautauta o se manatu atonu e saʻo sa ia faia, pe toe faaupu le fesili, pe ala foʻi i le toe faia o se fesili faaopoopo.
Ina ia faalaeiau se tasi e fai se tali, e tatau i lē taulimaina le mataupu ona ʻalofia le fesili atu i le aofia, e pei, ‘E iai se tasi e fia faaopoopo?’ E lē gata i lea, o le fesili atu faapea, ‘O ai e leʻi faia se tali? O lou avanoa mulimuli lenei!’ atonu e faia ona o se faanaunauga lelei, peitaʻi o le a faafaigatā ai i se tasi ona faaalia sona manatu. E lē tatau ona leaga faalogona o uso ona o le lē vave faia o se tali i le suʻesuʻega. Na i lo lea, e tatau ona faalaeiauina i latou e faaali atu mea ua latou silafia auā o se faailoaga lea o le alofa. E lē gata i lea, pe a uma ona tofia atu e le fai suʻesuʻega se tasi e fai sana tali, e lē atamai ona faapea atu, “A uma lea, ona tatou faalogologo atu lea i le tali a le Uso o Tui ona sosoo lea ma Seve, a uma lenā ona sosoo lea ma le tali a le Tuafafine o Pai sosoo ai ma Lafai.” E tatau i le fai suʻesuʻega ona faalogologo muamua i le tali ona filifili lea pe toe manaʻomia se isi manatu faaopoopo.
O se Faaeaga le Faia o Tali
O le auai i sauniga o se manaʻoga faaleagaga ma o se faaeaga le faia o tali i na sauniga. O le tele o lo tatou auai i lenei vala tutasi e vivii atu ai iā Ieova i “totonu o faapotopotoga,” o le tele foʻi lenā o lo tatou mulimuli i le faaaʻoaʻoga a Tavita ma le utagiaina o le fautuaga a Paulo. O lo tatou faia o se sao i sauniga e faamaonia ai tatou te alolofa i o tatou uso ma o i tatou foʻi o se vaega o le faapotopotoga tele a Ieova. O loo tatou mananaʻo ia iai i lenei faapotopotoga a o tatou “iloa o le aso o loo taulata mai.”—Eperu 10:25.
[Faamatalaga pito i lalo]
^ pala. 10 Lomia e Molimau a Ieova.
[Ata i le itulau 20]
E tāua le faalogologo ma le faia o tali i sauniga faa-Kerisiano
[Ata i le itulau 21]
O loo faaalia le naunau o lē o loo taulimaina se mataupu i tali uma