Fesili Mai le ʻAufaitau

O le ā le uiga o le i “totonu iā te ia lava le ola”?

O loo tautala le Tusi Paia iā Iesu Keriso e faapea ua i “totonu iā te ia lava le ola” ma i ona soo e faapea ua i ‘totonu iā te i latou le ola.’ (Ioane 5:26; 6:53) Peitaʻi, o nei mau e lua e eseese o la uiga.

Na fetalai Iesu e faapea: “Auā faapei o le Tamā e i totonu iā te ia lava le ola, e faapea foʻi ona foaʻi mai e ia i le Atalii, ia i totonu iā te ia lava le ola.” A o leʻi faia e Iesu nei saunoaga mataʻina, na ia fetalai e faapea: “E moni, e moni, ou te fai atu iā te outou, o lē faalogo mai i laʻu upu, ma talitonu iā te ia na na auina mai aʻu, ua iā te ia le ola faavavau . . . e oo i le aso, ua oo nei foʻi i ai, e faalogo mai ai ē ua oti i le leo o le Atalii o le Atua; o ē faalogo ai foʻi, e ola ai i latou.” I inei o loo faasino atu e Iesu i le mana uiga ese na foaʻiina atu e lona Tamā iā te ia—o lona uiga e ala iā Iesu ua mafai ai ona maua e tagata se tulaga lelei i le silafaga a le Atua. Ae e lē gata i lea, ua mafai e Iesu ona avatu le ola i ē ua feoti ma toe faatutūina ai i latou. E faatatau iā Iesu, o le iai i totonu “iā te ia lava o le ola” o lona uiga ua tuuina atu iā te ia le mana e faataunuu ai ia mea. E faapei o le Tamā, e faapena foʻi i le Atalii ona iai i totonu ‘iā te ia le meaalofa o le ola’ e tusa ai ma nisi o faaliliuga. (Ioane 5:24-26) Ae faapefea ona soo?

Pe tusa ma se tausaga mulimuli ane, na fetalai atu ai Iesu i lana ʻaufaalogologo e faapea: “E moni, e moni, ou te fai atu iā te outou, afai tou te lē aai i le tino o le Atalii o le tagata, a lē inu foʻi i lona toto, ua lē i totonu iā te outou le ola. O lē ʻai i loʻu tino ma inu i loʻu toto, ua iā te ia le ola faavavau; ou te toe faatūina foʻi o ia i le aso gataaga.” (Ioane 6:53, 54) Ua faatusatusa e Iesu i inei le iai “i totonu iā te outou le ola” ma le mauaina o le “ola faavavau.” O faaupuga faapena faalekalama e pei o “i totonu iā te outou le ola” o loo maua i isi vaega o Tusitusiga Eleni. O ni faaaʻoaʻoga nei se lua, ia “iā te outou le masima” ma ua “tauia foʻi i latou i o latou lava tino.” (Mareko 9:50; Roma 1:27) I nei fuaiupu, e lē o uiga atu le faaupuga i le malosi e avatu ai le masima i isi po o le tuuina atu o le taui ma sui i isi. Na i lo lea, na faasino atu i le atoatoa i totonu. O lea, o le faaupuga  ua i “totonu iā te outou le ola” lea na faaaogāina e le Ioane 6:53 o loo uiga atu i le mauaina o le atoaga o le ola.

O le faasino atu e Iesu i ona soo e faapea, ua i totonu iā i latou le ola sa ia taʻua ai lona tino ma lona toto. Mulimuli ane, ina ua faavaeina le Talisuaga Afiafi a le Alii, na toe fetalai foʻi Iesu e faatatau i lona tino ma lona toto ma faasino atu o le a iai ona soo i se feagaiga fou ina ia tagofia le areto lē faafefeteina ma le uaina. Pe o le uiga o lenei manatu e faapea ua na o Kerisiano faauuina o ē o loo i le feagaiga fou ma Ieova le Atua, o le a ulu atu i lenā ola atoatoa? E leai. Sa faia e Iesu na faamatalaga e tasi le tausaga na va ai. O i latou o ē na faalogo i upu a Iesu na faamauina i le Ioane 6:53, 54 e leʻi iai so latou iloa i le faamanatuina faaletausaga o le tino ma le toto o Keriso lea e fai ai ma sui le areto ma le uaina.

E tusa ai ma le Ioane mataupu e 6, o loo faatusaina muamua ai e Iesu lona tino i le manai, i lona fetalai mai e faapea: “Na aai e o outou tamā le manai i le vao, a ua oti i latou. O lenei le areto ua alu ifo mai le lagi; ai se ʻai ai ona lē oti lea o ia. O aʻu le areto ola na alu ifo mai le lagi; pe a ʻai se tasi i lenei areto, ona ola ai lea o ia e faavavau.” Sa sili atu le aogā o le tino ma le toto o Iesu na i lo le manai. E faapefea? O lona tino ua ia avatua lea ma “ola o le lalolagi” ina ia maua ai le ola e faavavau. * O lea la, o le faaupuga o loo i le Ioane 6:53 e faapea ua i “totonu iā te outou le ola” ua faatatau atu iā i latou uma o ē mauaina le ola e faavavau—i le lagi po o le lalolagi.—Ioane 6:48-51.

O afea e maua ai e soo o Keriso le ola i totonu iā te i latou, pe a oo atu i le ola atoatoa? O i latou o suli faauuina o le malo, o le a tupu lenei mea pe a toetutū i latou i le ola i le lagi o ni foafoaga agaga e lē toe oti. (1 Korinito 15:52, 53; 1 Ioane 3:2) O le a maua e “isi mamoe” le ola atoatoa pe a mavae le Pulega o le Afe o Tausaga a Iesu. I lenā taimi, o le a uma ona tofotofoina i latou ma iloa ai lo latou faamaoni ma taʻuamiotonuina ai mo le ola e faavavau i le lalolagi Parataiso.—Ioane 10:16; Faaaliga 20:5, 7-10.

[Faamatalaga pito i lalo]

[Ata i le itulau 31]

O Kerisiano moni uma lava e mafai ona i ‘totonu iā te i latou le ola’