Le Auala e Faamalosia ai Lau Faaipoipoga

SEʻI mafaufau i se fale ua matuā leaga lava. Ua mafoʻefoʻe le vali, leaga le taualuga ma ua vaoa foʻi autafa o le fale. E manino lava, na faaleagaina lenei fale e matagi malolosi i ni tausaga ma lē tausia lelei. Pe tatau loa ona tala i lalo? Atonu e leai. Afai o loo malosi pea le faavae ma lelei le fausaga, atonu e mafai ona toe faafou.

Pe ua faamanatu atu ea e le tulaga o lenā fale iā te oe lau faaipoipoga? I le tele o tausaga, o faafitauli matuiā atonu ua afāina ai lau faaipoipoga. Atonu o le faatamala o se tasi po o oulua uma foʻi ua māfua ai ona aafia i faafitauli. Atonu e te ono lagona e pei o Sandy. Ina ua mavae le 15 tausaga talu ona faaipoipo, na ia faapea mai: “E leai ma se mea e ma te fiafia e faia faatasi, peitaʻi na ona ma faaipoipo lava. Ae e lē lava lenā.”

E tusa lava pe ua oo lau faaipoipoga i le tulaga lea, ae ia aua lava neʻi vave ona faia se faaiʻuga e faamutaina loa. E mafai lava ona toe faaleleia lau faaipoipoga. E faalagolago lava i le maumauaʻi o oe ma lau paaga, ina ia faaleleia ma tausia le lua faaipoipoga. O lenā naunautaʻiga po o manaʻoga, e fesoasoani ai e faamautū se faaipoipoga i taimi o puapuaga. E faapefea ona fesoasoani le Tusi Paia iā te oe ia matuā maumauaʻi ai i le tausia o lau faaipoipoga?

E Aofia ai Tiute Fai i Lenei Mataupu

O lenei mataupu e faatatau i le faaipoipoga ua faamatalaina faapea o le iloa lea o le tiute tauave e ao ona fai po o le faagaeeina e lagona ina ia faia se mea. I nisi taimi, e mafai ona faatatau atu i se feagaiga faapisinisi. O se faaaʻoaʻoga, atonu e manatu le tufuga o lana tiute tauave le faataunuuina o tuutuuga o se feagaiga ua sainia e fausia ai se fale. Atonu e lē iloa lelei e ia lē na ia faatulagaina le galuega. Ae ui i lea, ua ia manatu o lona tiute tauave le faataunuuina o ana upu.

E ui lava o le faaipoipoga e lē o se feagaiga faapisinisi e aunoa ma ni lagona māfana, ae e aofia ai ma tiute fai. Ua uma ona oulua tautō aloaʻia i luma o le Atua ma tagata o le a lua nonofo faatasi e tusa lava po o le ā e tulaʻi mai. Na fetalai Iesu: “O lē na faia tagata i le amataga, na ia faia i laʻua o le tane ma le fafine, na ia fetalai ane foʻi, O le mea lea e tuua ai e le tane o lona tamā ma lona tinā, a e faatasi ma lana avā.” Na  toe faaopoopo Iesu e faapea: “O ē ua faatasia e le Atua, aua neʻi faateʻaeseina e se tagata.” (Mataio 19:​4-6) Pe a aliaʻe faafitauli, e tatau iā te oe ma lau paaga ona tausisi e faataunuu le tautōga ua uma ona oulua faia. * Ua faapea mai se tasi avā: “Na faatoʻā faaleleia le tulaga o mea ina ua ma lē toe mafaufau faapea e sili pe a tatala le faaipoipoga.”

Peitaʻi, e sili atu mea e manaʻomia ina ia tausia ma faasaoina le faaipoipoga. O ā isi mea e aofia ai?

O le Galulue Faatasi e Faamalosia ai se Faaipoipoga

E tusa lava pe maumauaʻi e faatumauina se faaipoipoga, ae iai lava mea o le a lē malilie faatasi ai se ulugalii. Pe a mapuna aʻe se faafitauli, e tatau ona matuā naunau e foʻia le mataupu e lē gata ona o le tautōga ua uma ona faia, ae ona o le alofa foʻi. Na fetalai Iesu e faatatau i le tane ma le avā e faapea: “E lē toe toʻalua ai, a o le tino e tasi i laʻua.”

O le ā le uiga ua “tino e tasi” ma lau paaga? Na tusi Paulo e faapea e tatau ona “alolofa o tane i a latou lava avā, faapei o latou lava tino.” (Efeso 5:​28, 29) O le avea ma “tino e tasi” o lona uiga o lou manatu mamafa lea mo le lelei o lau paaga e pei ona e manatu mo lou lava lelei. E manaʻomia e ulugalii faaipoipo ona suia o latou mafaufau, na i lo le iloiloina e le tagata e toʻatasi o le mataupu, e tatau ona la iloiloina o se ulugalii. Na tusi mai se tagata faufautua e faapea: “E tatau i paaga uma ona taofia amioga e pei lava e leʻi faaipoipo, ae ia mafaufau ma manatua o i laʻua o se ulugalii ua uma ona faaipoipo.”

Pe o lua mafaufau ma lau paaga o oulua o “se ulugalii ua uma ona faaipoipo?” E mafai ona lua faatasia mo le tele o tausaga ae ua lē “tino e tasi” ai i lenā uiga. Ioe, e mafai ona tupu lenā mea, ae ua faapea mai le tusi Giving Time a Chance: “O le faaipoipoga o lona uiga o le faifai mea faatasi lea, o le tele lava la o le faifaimea faatasi o se ulugalii o le faaleleia atili foʻi lenā o le faaipoipoga.”

O nisi ulugalii e lē manuia a latou faaipoipoga ua nonofo faatasi pea mo le lelei o a latou fanau pe ona o tulaga tautupe. O nisi ua nonofo pea ona o le iai o ni faalogona malolosi e lē tatau ona tatalaina le faaipoipoga po o le popole i manatu o isi pe afai o le a teteʻa. E avatu le faamālō ona o le tumau o nei faaipoipoga, ae ia manatua o la outou sini e tatau ona iai se faiā alofa, e lē na o le avea o se faiā e tumau.

 Tāua Tele le Lē Manatu Faapito i le Faaipoipoga

Na valoia e le Tusi Paia e faapea o “aso e gata ai,” e avea ai tagata ma ē “alolofa i latou iā i latou.” (2 Timoteo 3:1, 2) E pei ona valoia, e foliga mai i aso nei ua faamamafa ai le manatu o le tagata iā te ia lava. O le tele o faaipoipoga, e manatu o le matuā alofa atu o le tagata i lana paaga faaipoipo e aunoa ma le faatalitalia e toe maua mai ai se mea, e vaai i ai o se vaivaiga. Peitaʻi, o se faaipoipoga taulau manuia, e faaalia e paaga uma e toʻalua le agaga faataulaga. E mafai faapefea ona e faaalia lenā agaga?

Na i lo le faamamafaina o lenei fesili, ‘O le ā le mea ua ou maua mai i lenei faiā?’ ia fesili ifo iā te oe lava, ‘O le ā o loo oʻu faia ina ia faamalosia ai laʻu faaipoipoga?’ Ua faapea mai le Tusi Paia e tatau i Kerisiano ona “aua neʻi taʻitasi ma vaavaai i ana lava mea, a ia taʻitasi ma vaavaai i mea a isi.” (Filipi 2:4) A o mafaufau loloto i lenei mataupu silisili o le Tusi Paia, ia tilofaʻia au gaoioiga i le vaiaso ua teʻa. Na faafia ona e faatinoina se gaoioiga agalelei e aogā i lau paaga? Pe a fia talanoa lau paaga, pe sa e faalogologo atu i ai e tusa lava pe e te lē o naunau e faalogo atu i ai? O le a le tele o ni gaoioiga na e faia e fiafia i ai lau paaga na i lo oe?

O le mafaufau i na fesili, ia aua neʻi popole e faapea o le a lē amanaʻiaina au gaoioiga lelei. Ua faapea mai se tasi tusi: “I le tele o faiā, o gaoioiga lelei e uunaia ai isi e tali mai foʻi i ni gaoioiga lelei, o lea ia faia le mea sili e te mafai ina ia faamalosia ai lau paaga e gaoioi i se auala lelei e ala i lou faia o gaoioiga lelei.” O le agaga faataulaga e faamalosia ai lau faaipoipoga, talu ai e faamaonia ai lou faatāuaina o lau faaipoipoga ma e te manaʻo ia faasaoina.

E Tāua le Vaai i ai o se Mea e Tumau

E faatāua e Ieova le Atua le faamaoni. O le mea moni, ua faapea mai le Tusi Paia: “E te amio alofa [faamaoni] oe [Ieova] i lē ua alofa [faamaoni].” (2 Samuelu 22:26) O le tausia o le faamaoni i le Atua, e aofia ai le tausia o le faamaoni i le faatulagaga o le faaipoipoga lea na ia amataina.​—Kenese 2:24.

Afai e faamaoni le tasi o le paaga i le isi, o le a oulua olioli ai i le iloaina e faapea o lenei faatasiga o se mea o le a tumau. Pe a lua mafaufau i le lumanaʻi, ua lua mafaufau la e faatasia pea oulua. O le a oulua manatu ai pea o lau lava lea faaipoipoga, ma atili faamautūina ai la oulua faaipoipoga. Ua faapea mai se tasi avā: “E tusa lava pe ou te matuā ita lava i [laʻu tane] ma ua ou lē fiafia i le mea ua tupu iā i maʻua, ou te lē popole e faapea o le a muta ai la ma faaipoipoga. Ou te popole i le auala e toe faalelei ai o ma faafitauli. Ou te mautinoa e mafai ona faaleleia o ma faafitauli, ae i lenā taimi ou te lē iloa le auala e foʻia ai.”

E manaʻomia ona vaai i le faaipoipoga o se mea e tumau, ae e faanoanoa lava e lē o maua lenā vaaiga i le tele o faaipoipoga. I taimi o taugā upu, atonu e eʻē atu le isi o le paaga, “O le a ou alu!” po o le faapea atu foʻi, “O le a  ou alu e suʻe se isi e alofa moni iā te aʻu!” E moni, o na upu e lē o latou lagona moni na. Ae, ua faamatala mai e le Tusi Paia e faapea o le laulaufaiva ua “tumu i le mea oona e oti ai.” (Iakopo 3:8) O faiga taufaafefe po o le taʻua o ni iʻuga leaga e ono tupu pe a lē usitaia le faatonuga a le isi, o le a aumaia ai se manatu e faapea: ‘Ou te lē manatu e tumau la ma faaipoipoga. E mafai ona ou alu ese i so o se taimi.’ O le iai o manatu faapea, e vave ona faaleagaina ai se faaipoipoga.

Pe a e vaai i lau faaipoipoga o se mea e tumau, e te faatalitalia le lua faatasi ma lau paaga e tusa lava po o a faigatā ma faafitauli. E iai aogā e maua mai ai. O le a faigofie ai iā te oe ma lau paaga ona taliaina vaivaiga ma mea sesē ma ia fefaapalepaleaʻi, ma ia fefaamagaloaʻi le tasi i le isi. (Kolose 3:13) Ua faapea mai se tasi tusi: “O se faaipoipoga lelei, e mafai ona sesē oulua uma i nisi taimi, ae e mafai lava ona tumau pea le faaipoipoga e ui lava i na mea.”

I le aso o lau faaipoipoga, ua e faia ai se tautōga faamaoni e lē i se faiga tau i le faaipoipoga, ae i lau paaga. O lenei mea e tatau ona iai sona aafiaga lelei tele i le auala o loo e mafaufau ma gaoioi ai o se tasi ua faaipoipo. Pe e te lē ioe ea e tatau ona lua nonofo faatasi ma lau paaga e lē gata ua e talitonu i le paia o le faaipoipoga ae ona talu ai e te alofa i le tagata lea ua lua faaipoipo?

[Faamatalaga pito i lalo]

[Pusa/Ata i le itulau 5]

O Mea e Mafai Ona E Faia Nei

E faapefea ona taulau manuia lau faaipoipoga e tusa ai ma le manaoga ia tausia ma faasaoina? Atonu ua e mātauina e mafai ona faaleleia. Ina ia faaleleia lea tulaga, ia taumafai e faataʻitaʻi mea o loo mulimuli mai:

● Ia fai se iloiloga o oe lava ia. Ia fesili ifo iā te oe lava: ‘Pe ua ou faaipoipo moni lava, po o oʻu mafaufau ma gaoioi e pei o se tagata nofofua?’ Ia tilofaʻia po o le ā o loo manatu ai lau paaga e faatatau iā te oe e tusa ai ma lenā tulaga.

● Ia faitau lenei mataupu faatasi ma lau paaga. O lea, ia talanoa i se uiga toʻamālie auala e mafai ai ona oulua faatatauina fautuaga ina ia faamalosia ai la oulua faaipoipoga.

● Ia faia ma lau paaga ni gaoioiga e mafai ona faamalosia ai oulua, ia maumauaʻi ai i le tausia lelei o la oulua faaipoipoga. O se faaaʻoaʻoga: Ia matamata i ata o la oulua faaipoipoga ma nisi mea na tutupu e lē mafai ona galo. Ia fai mea sa oulua fiafia e fai a o fai la oulua faigāuō po o le pōpō fou o la oulua faaipoipoga. Ia suʻesuʻe faatasi mataupu i lomiga faale-Tusi Paia mai le Olomatamata ma le Ala Mai! ia e faatatau atu i faaipoipoga.

[Pusa/Ata i le itulau 6]

O le Maumauaʻi e Tausia Lelei Lau Faaipoipoga e Aofia ai  . . .

● Tiute Fai “Inā e faia le mea ua e tautō ai. E sili ona lelei ona e lē tautō, i lou tautō a e lē avatua.”​—Failauga 5:4, 5.

● Galulue Faatasi “E sili ona lelei o le toʻalua i le toʻatasi . . . Auā afai e paʻū le tasi e faatūina o ia i luga e lē la te toʻalua.”—Failauga 4:9, 10.

● Faataulagaina “E sili le manuia o lē na te foaʻi atu, i lo lē na te talia mai.”​—Galuega 20:35.

● Vaai i ai o se Mea e Tumau ‘O le alofa e onosai i mea uma.’​—1 Korinito 13:4, 7 LT.

[Ata i le itulau 7]

Pe a fia talanoa lau paaga, pe o le a e faalogologo ea?