Matini Luteru—Lona Olaga ma Mea na Maua Mai iā te Ia

“E MAFAI ona faapea atu e sili atu tusi na tusia e faatatau iā [Matini Luteru] na i lo se isi lava tagata na soifua i le talafaasolopito, seʻi vaganā ai lona matai, o Iesu Keriso.” Sa taʻua lenā faamatalaga i le mekasini o le Time. O upu ma gaoioiga a Luteru na fesoasoani i le amataina o le Toefuataʻiga—o se gaoioiga faalelotu na faamatalaina o le “fouvalega e sili ona mataʻina i le talafaasolopito o tagata.” Sa ia fesoasoani i le suia o tulaga faalotu o Europa ma faaiʻuina aso o le pogisa i lenā konetineta. Na ia toe saunia le auala e faamaopoopo lelei ai le gagana tusitusia i le faa-Siamani. O lana faaliliuga o le Tusi Paia ua sili ona fiafia i ai tagata i lo se isi faaliliuga.

O le ā le ituaiga tagata sa iai Matini Luteru? Na faapefea ona tele sona aafiaga i mataupu fai a Europa?

Avea Luteru ma se Tagata Atamai

Na soifua mai Matini Luteru i Esilipeni, [Eisleben] i Siamani, iā Novema i le 1483. E ui ina sa galue lona tamā i le nofoaga e eli ai le apamemea, ae na lava tupe mai i lona totogi e maua ai se aʻoga lelei a Matini. I le 1501, na avea ai Matini ma tagata aʻoga i le Iunivesite o Erefata. I le potu tusi i le aʻoga, na ia faitauina ai le Tusi Paia mo le uluaʻi taimi. Na ia faapea mai: “Sa matuā faafiafiaina aʻu i le tusi, ma sa ou manaʻo ia faamanuiaina aʻu i le mauaina o se tusi faapena i se aso.”

I le 22 o ona tausaga, na ulu atu ai Luteru i le nofoaga o monike e taʻua o Aokusotino i Erefata. Na ia auai mulimuli ane i le Iunivesite o Vitenipeki, ma maua ai lona tikeri i mataupu faalelotu. Na ōia lona lotofuatiaifo i nisi taimi, ona sa manatu Luteru o ia o se tagata agasala e lē mafai ona maua le finagalo malie o le Atua, ma na matuā faanoanoa ai. Peitaʻi, o le suʻesuʻeina o le Tusi Paia, tatalo ma le mafaufau loloto na fesoasoani ai iā te ia ina ia maua se isi malamalamaga sili i le auala o loo silasila ai le Atua i tagata agasala. Na iloa e Luteru e lē mafai ona maua le finagalo malie o le Atua i a tatou lava taumafaiga. Na i lo lea, e maua e ala i le alofa tunoa o le Atua iā i latou o ē faaalia le faatuatua.—Roma 1:16; 3:23, 24, 28.

Na faapefea ona faia e Luteru se faaiʻuga e faapea e saʻo lenei malamalamaaga fou? Na tusi mai le polofesa o Uluaʻi Talaaga o le Lotu ma Suʻesuʻega o Mau o le Feagaiga Fou o Kurt Aland e faapea: “Sa ia mafaufau loloto i le Tusi Paia atoa ina ia faamautinoa ai pe ōgatusa lenei poto fou ma isi faamatalaga a le Tusi Paia, ma na ia mauaina ai e saʻo lelei lona manatu.” O le aʻoaʻoga o le faaolataga, e ala i  le faatuatua ae lē o galuega po o le salamō, sa tumau ona avea ma aʻoaʻoga autū a Luteru.

Toʻatamaʻi i le Faatauina o Pepa mo le Faamagaloga

O le malamalamaaga o Luteru i le auala o loo silasila ai le Atua i tagata agasala, na māfua ai sa latou feeseeseaʻiga ma le Lotu Katoliko Roma. Sa taatele le talitonuga e faapea, pe a feoti tagata agasala o le a faasalaina i le puapuaga mo se vaitaimi. Peitaʻi, na faapea mai e mafai ona faapuupuuina lea vaitaimi e ala i le faatauina o ni pepa mo faamagaloga lea na faia e le pope. O tagata e faatauina atu pepa mo le faamagaloga e pei o Ioane Tesili, o lē na avea ma sui o le akiepikopō o Alapati mai i Mainz, sa ola lelei sana pisinisi na fai o le faatauina atu o na pepa i tagata lautele. Sa manatu le toʻatele na faatauina mai ia pepa mo le faamagaloga e aogā mo agasala o le a faia i le lumanaʻi.

Sa matuā toʻatamaʻi Luteru i le faatauina atu o nei pepa mo faamagaloga. Na ia iloa e lē mafai ona fai se maliega i le va o le tagata ma le Atua e ala i lenā auala. I le tau e afu ai mea i le tausaga e 1517, na ia tusia ai ni mataupu taʻutaʻua e 95, lea na taʻusalaina ai le lotu ona o faiga leaga tautupe, tau aʻoaʻoga ma faiga faalelotu. Na auina atu e Luteru ni kopi o ana mataupu taʻutaʻua i le akiepikopō o Alapati i Mainz ma isi tagata atamamai ona sa ia manaʻo e uunaia le faia o ni suiga i le lotu, ae lē o se fouvalega. O loo faasino atu le toʻatele o tusitala o talafaasolopito i le tausaga 1517 po o se taimi lata ane i ai faapea na amata ai le Toefuataʻiga.

Sa lē na o Luteru na faaalia le lē fiafia i mea sesē ua faia e le lotu. I le selau tausaga na muamua atu, na taʻusalaina ai foʻi e Ioane Hasi o se tagata lotu mai i Czech le faatauina o pepa mo le faamagaloga. E muamua atu iā Hasi, na faasino atu ai foʻi e Ioane Uikilifi o Egelani i nisi o aganuu e lē faale-Tusi Paia o loo tausia pea e le lotu. O tupulaga a Luteru o Eramasi mai i Rotterdam ma Tiniteli o Egelani, na la uunaia foʻi le faia o suiga i le lotu. Ae o le fesoasoani a Ioane Kutenipeki i le fausiaina o se masini lomitusi e sili ona lelei na i lo le ituaiga sa iai muamua, sa iai ni aafiaga malosi o feʻau tusitusia a Luteru ma salalau mamao atu na i lo gaoioiga a isi tagata na mananaʻo foʻi e faia ni suiga i le lotu.

Sa faaaogāina le masini lomitusi a Kutenipeki i Mainz i le 1455. I le amataga o le senituri na sosoo ai, na iai masini e 60 i aai o Siamani ma le 12 i isi atunuu o Europa. O le uluaʻi taimi lea i le talafaasolopito, na mafai ai ona vave iloa e tagata lautele mea o loo tutupu i nisi o vaipanoa. Atonu e aunoa ma sana ioega, na lomia ma faasalalauina ai mataupu taʻutaʻua e 95 a Luteru. O le mataupu i suiga e ao ona fai i le lotu ua lē toe avea o se mataupu na o totonu o Siamani. Ua salalau atu lenei finauga, ma na avea ai Matini Luteru o se tagata sili ona lauiloa i Siamani.

Gaoioiga a le “Lā ma le Masina”

Mo le faitau senituri, sa pulea ai Europa e faalapotopotoga malolosi e lua: o le Emepaea Paia a Roma ma le Lotu Katoliko Roma. Na faamatalaina e Hanns Lilje, o se tasi peresitene sa iai muamua o le Faalapotopotoga o le Lalolagi o le Lotu Luteru e faapea: “E autasi le emeperoa ma le pope e pei o le la ma le masina.” Peitaʻi, ua lē mautonu po o ai e faatatau i ai le lā a o ai e faatatau i ai le masina. I le amataga o le senituri e 16, na mou atu ai le malosi o nei faalapotopotoga e lua. O le a tutupu ai se suiga i le tulaga o mea.

 Na tali atu Pope Leo X i mataupu taʻutaʻua e 95 e ala i le faamataʻuina o Luteru e faapea o le a faateʻaina o ia pe afai e lē ioe i le sesē o ana aʻoaʻoga. Sa tetee pea Luteru ma sa ia susunuina i luma o tagata le tusi na avatu ai le poloaʻiga a le Pope, ma na ia toe lomia isi tusi e uunaia ai le taupulega a le lotu e faia suiga i le lotu e aunoa ma le ioega a le pope. I le 1521, na faateʻa ai e Pope Leo X ia Luteru. Ina ua tetee Luteru ona o le taʻusalaina o ia i faamasinoga e lē saʻo ona fai, sa faatonuina o ia e le emeperoa o Salesa V ina ia tū i luma o le fono aoao a le taupulega i Vemi. O le faigāmalaga a Luteru i aso e 15 mai i Vitenipeki agaʻi i Vemi iā Aperila i le 1521 sa pei o se solo o se manumalo. Sa lagolagoina o ia e le lautele, ma sa lolofi ane tagata e fia vāai iā te ia.

I Vemi, sa tū ai Luteru i luma o le emeperoa, aloalii ma sui maualuluga a le pope. Sa fesagaʻi foʻi Ioane Hasi ma se faamasinoga faapea i Constance i le 1415 ma sa susunuina o ia a o saisaia i se laau. Sa taulaʻi atu le Lotu ma le emepaea iā Luteru a o faia le fono, ae sa lē mafai ona ioe o ia e sesē ana aʻoaʻoga seʻi vaganā ua mafai ona latou faamaonia mai le Tusi Paia lona sesē. Peitaʻi e leai se isi o i latou na tutusa lona manatuaina o mau o le Tusi Paia e pei o Luteru. Na taʻua le iʻuga o le faamasinoga i se pepa ua taʻua o le Faaiʻuga i Vemi. Sa faaalia ai lona lē toe mauaina o se puipuiga i so o se mea ma sa faasāina ana tusitusiga. Talu ai na faateʻaina o ia e le pope ma faasalaina o ia e le emeperoa, na lamatia ai lona ola.

Na tupu se mea uiga ese e leʻi faatalitalia. Ina ua toe malaga atu i Vitenipeki, na faatagā puʻeina ai o ia e se tagata agalelei e suafa iā Fereti Sakisone. Na lē mafai ai e fili o Luteru ona toe mauaina o ia. Sa ave faananā atu loa Luteru i le olo o Votipeki, o i inā na faatutupu ai lana ʻava ma na iloa ai o ia o se isi tagata e igoa iā Junker Jörg.

Manaʻomia Tele le Tusi Paia Setema

I le isi sefulu masina, na nofo faalilolilo ai Luteru i le olo o Votipeki ina neʻi maua o ia e le emeperoa ma le pope. Ua faamatalaina e le tusi Le Nofoaga Taʻutaʻua o Votipeki (i le faa-Siamani) e faapea: “O taimi a o iai Luteru i Votipeki, o vaitaimi sili na ona fuatele mai ma lelei o lona olaga.” O se tasi o mea sili na ia faia i inā, o le faaliliuina lea i le faa-Siamani o vaega o le Tusi Paia ua taʻua o Tusitusiga Eleni mai le faaliliuga a Eramasi. Na lomia iā Setema i le 1522 e aunoa ma le faailoaina o Luteru o lē sa faaliliuina, ma sa taʻua o le Tusi Paia Setema. O le tau o le Tusi Paia e tusa ma le totogi i le tausaga atoa o se teine faigaluega teufale. Sa matuā tele lava le manaʻoga mo le Tusi Paia Setema. I totonu o le sefulu lua masina na faalua ona faia lomiga o lea Tusi Paia ma na lomia ai ni kopi e 6,000, ae i le isi sefululua tausaga mulimuli ane ai, e lē itiiti ifo i le 69 taimi na toe faia ai lomiga o lea Tusi Paia.

I le 1525, na faaipoipo atu ai Matini Luteru iā Katerina voni Pora o lē sa avea muamua ma taupousa. Sa lelei tele Katerina i le faia o mataupu tau i le aiga ma le faasoasoaina o tupe e tusa ma le lima foaʻi o lana tane. Na aofia ai i le aiga o Luteru e lē gata o lana avā, o ona alo e toʻaono, o ana uō, o tagata aʻooga ma le ʻau sulufaʻi. Ina ua matua o ia sa lauiloa ai Luteru o se tasi e iai le uta mamao, ma na masani ona tusia i lalo ana fautuaga e tagata aʻoga na nonofo i lona fale.  Na tuufaatasia nei faamaumauga i se tuufaatasiga ua taʻua o Talanoaga a Luteru i le Laulau (Luther’s Table Talk). E mo se taimi sa lona lua le faasalalauina atu o lea tusi i le gagana Siamani i le faasalalauina atu o le Tusi Paia.

O se Faaliliu Poto ma Anoanoaʻi Ana Tusitusiga

I le 1534, na māeʻa ai le faaliliuina e Luteru o le vaega o le Tusi Paia e taʻua o Tusitusiga Eperu. Na lelei lona faaaogāina o upu, tomai i lona tulaga faafatusolo, ma upu na faaaogā. O le iʻuga na maua ai se Tusi Paia sa malamalama i ai tagata lautele. Na tusi mai Luteru e tusa ai ma lana auala e faia ai faaliliuga e faapea: “E tatau ona tatou talanoa ma tinā i o latou aiga, o tamaiti i luga o auala ma tamāloloa i le maketi, ma faalogo i faaupuga ua latou faaaogāina ona faaliliu lea ina ia malamalama tagata.” Na fesoasoani le Tusi Paia a Luteru e faataatia se faavae mo le gagana tusitusia na mulimuli ane taliaina i Siamani atoa.

Sa ō faatasi le poto o Luteru e faaliliu ma lona tomai tau tusitusi. Ua faapea mai nisi, i lona olaga atoa i le taimi sa galue ai, e taʻilua vaiaso ma tusi sana mataupu. O nisi o nei tusitusiga sa faatupu finauga e pei o le tusitala. O ana uluaʻi tusitusiga e tuusaʻo, ma ina ua matua Luteru, e leʻi fai ifo ai lenā faiga. Na agaʻi ina faateleina le malosi o ana tusitusiga na fai mulimuli ane. E tusa ai ma le tusi Mataupu o Aʻoaʻoga Faalotu ma le Ekalesia (i le faa-Siamani), ua faaalia i tusitusiga a Luteru “lona matuā toʻatamaʻi tele” ma e “augapiu ma se lotomaulalo ma se alofa” ae e lē gata i lea “e manatu e tatau lava ona fai le mea lea e mafaufau e fai.”

Sa fesiligia Luteru e tusa ai ma sona taofi ina ua gāpā le taua a tagata e galulue i fanua ma alii na pulea i latou, lea na faamasaa ai le toto o le toʻatele. Pe alagātatau ona faitio tagata faigaluega i a latou matai ma alii? E leʻi taumafai Luteru e faamalie tagata i le faia o se tali o le a fiafia ai le toʻatele. Na ia talitonu e tatau i auauna a le Atua ona usiusitai i le pule. (Roma 13:1) I lona manatu tuusaʻo, na faapea atu ai Luteru e tatau ona faauma faamalosi le fouvalega. Na ia faapea mai: “O ai lava e mafai ona faia ia tuʻi, ta, ma fasioti.” Sa faapea mai Hanns Lilje o lenei tali ua “lē toe fiafia ai tagata e pei ona i ai muamua” iā Luteru. E lē gata i lenā, o tusitusiga mulimuli a Luteru e faatatau i tagata Iutaia o ē na mumusu e liliu i le faa-Kerisiano, aemaise lava le tusi Tagata Iutaia ma a Latou Pepelo (i le faa-Siamani), na māfua ai ona faapea mai tagata na inoino le tusitala i tagata Iutaia.

Mea na Maua Mai iā Luteru

O le faamalosia o le Toefuataʻiga e tamāloloa e pei o Luteru, Kalavini ma Suigeli, na iʻu ai i se faiga fou faaletapuaʻiga e taʻua o le faa-Porotesano. O se tasi o mea sili na maua e le faa-Porotesano mai iā Luteru, o lana aʻoaʻoga lea o le a faaolaina tagata e ala i le faatuatua. O itumalo taʻitasi o Siamani na latou filifili i le lotu e auai ai, a lē o le lotu Porotesano o le Katoliko. Na salalau atu le Porotesano ma sa lagolagoina i Scandinavia, Suisilani, Egelani ma Holani. I aso nei, ua faitau miliona tagata ua lolotu ai i lotu Porotesano.

 O le toʻatele o ē e lē ioe i talitonuga a Luteru o loo manatu maualuga pea iā te ia. I le 1983, na faamanatu ai le 500 tausaga talu mai le aso na fanau ai Luteru, i le vaipanoa na pulea muamua e le Malo Faatemokalasi a Siamani, lea na aofia ai Esilipeni, Erafata, Vitenipeki ma Votipeki. Na faailoa mai e lenei Malo o ia o se tagata taʻutaʻua i le talafaasolopito ma le aganuu a Siamani. Ae lē gata i lenā, i se taimi o le 1980-1989 na aotele ai e se taʻitaʻi lotu Katoliko iʻuga o galuega a Luteru e faapea: “E leai ma se isi ina ua mavae atu Luteru na tutusa ma ia.” Na tusi mai le polofesa o Aland e faapea: “I tausaga taʻitasi, a itiiti mai e 500 lomiga fou e uiga iā Matini Luteru ma le Toefuataʻiga e lomia i le toetoe o gagana autū uma lava a le lalolagi.”

E maai tele le mafaufau o Matini Luteru, e lelei tele lona manatuaina o mea, e mau upu ma e filigā i ana galuega. O ia foʻi o se tagata e ita vave ma manatu faatauvaa i isi, ma e vave ona tali atu i faiga ua ia talitonu e faagutugutulua. A o lata ina maliu o ia iā Fepuari i le 1546 i Esilipeni, na fesili atu ai uō a Luteru iā te ia po o pipii mau atu pea i talitonuga sa ia aʻoaʻoina ai isi. Na ia tali mai faapea: “Ioe.” Na maliu Luteru, ae e toʻatele o loo pipii atu pea i na talitonuga.

[Ata i le itulau 27]

Sa tetee Luteru i le faatauina o pepa mo le faamagaloga

[Faamatalaga i Ata]

Mit freundlicher Genehmigung: Wartburg-Stiftung

[Ata i le itulau 28]

Na lē ioe Luteru i lona sesē seʻi vaganā ua faamaonia mai e tagata tetee mai le Tusi Paia

[Faamatalaga i Ata]

Mai le tusi The Story of Liberty, 1878

[Ata i le itulau 29]

O le potu o Luteru i le Olo o Votipeki lea sa ia faaliliuina ai le Tusi Paia

[Faamatalaga i Ata]

Ata uma e lua: Mit freundlicher Genehmigung: Wartburg-Stiftung

[Faamatalaga i Ata i le itulau 26]

Mai le tusi Martin Luther The Reformer, Lomiga lona tolu, lomia e Toronto Willard Tract Depository, Toronto, Ontario

[Faamatalaga i Ata i le itulau 30]

Mai le tusi The History of Protestantism (Tusi I)