“O le Tulafono a Lē ua Poto”—O le Puna o le Ola Lea

NA FAAILOA mai e Paulo e faapea: “Aue! le loloto o le tamaoaiga o le poto atoa ma le silafaga a le Atua. E lē masuʻesuʻeina ana faamasinoga; e lē mafai foʻi ona iloa ona ala.” (Roma 11:33) Ae na faapea mai foʻi le augātamā faamaoni o Iopu: “[O Ieova le Atua] e poto lona finagalo.” (Iopu 9:4) Ioe, o Lē na Foafoaina le lagi ma le lalolagi e lē mafaatusalia lona poto ma lona atamai. Ae faapefea le tulafono, po o le Afioga tusia a Lē na Foafoaina Mea?

Na pese le faisalamo e faapea: “E sao le tulafono a Ieova, e faafoʻisia mai ai le agaga; e faamaoni poloaʻiga a Ieova, e faapotoina ai lē ua faigofie. E tonu feʻau a Ieova, e faafiafia ai le loto; e mamā poloaʻiga a Ieova, e malamalama ai mata.” (Salamo 19:7, 8) Maeu le malamalama o le tupu o Solomona o Isaraelu anamua i le moni o na upu! Na ia faapea mai: “O le tulafono a lē ua poto, o le puna o le ola lea, e ʻalo ese ai i mailei e oti ai.” (Faataoto 13:14) I fuaiupu muamua e 13 o le Faataoto mataupu e 13, na faaalia ai e Solomona le auala e maua ai fautuaga i le Afioga a le Atua e fesoasoani e faaleleia ai le uiga o o tatou olaga ma ʻalofia ai lamatiaga.

Ia Aʻoaʻogofie

Ua faapea mai le Faataoto 13:1: “E faalogo le atalii poto i le aʻoaʻo atu a lona tamā; a o lē faatauemu, e lē faalogo ia i le aoaiga.” O le aʻoaʻiga mai i se tamā e mafai ona māmā e mafai foʻi ona mamafa. E mafai ona faia e ala i le aʻoaʻo muamua i ai, ae afai e teena ona faia loa lea o se faasalaga. O le atalii e poto e talia e ia le aʻoaʻiga a lona tamā.

Ua faapea mai le Tusi Paia: “O lē ua alofagia e le Alii, ua aʻoaʻi atu o ia iā te ia; ua sasaina foʻi e ia atalii uma ua talia e ia.” (Eperu 12:6) O se tasi o auala o loo aʻoaʻia ai i tatou e lo tatou Tamā faalelagi e ala lea i lana Afioga tusia le Tusi Paia. Pe afai tatou te faitauina le Tusi Paia ma se uiga migao ma faatatauina mea ua tatou aʻoaʻoina mai ai, o loo aʻoaʻia la i tatou e lana Afioga. O mea uma o loo fetalai mai ai Ieova e aogā tele iā i tatou ma e mo lo tatou lelei.—Isaia 48:17.

E mafai foʻi ona tatou maua aʻoaʻiga e ala i se faasaʻoga mai i se uso talitonu o lē o loo manatu mamafa i lo tatou lelei faaleagaga. O so o se fautuaga lava e ōgatusa ma le Afioga a le Atua, e ao ona tatou manatu i ai e lē o ni manatu o le tagata lenā, peitaʻi e aumai i le Puna sili o le upu moni. Ia tatou taliaina ma le atamai na fautuaga mai iā Ieova. O le a tatou mauaina aogā mai aʻoaʻiga pe a tatou faia faapea, auā o le a suia ai o tatou mafaufauga, faaleleia ai lo tatou malamalamaaga i le Tusi Paia, ma faasaʻo ai o tatou ala. O le tulaga foʻi lenā i fautuaga tatou te maua mai i sauniga faa-Kerisiano ma lomiga faale-Tusi Paia. O le gaoioi e tusa ma mea ua aʻoaʻoina mai i upu tusitusia ma upu ua tautala atu ai, o le auala lenā e sili ona lelei e aʻoaʻia ai e le tagata ia lava.

 I le isi itu, o lē faatauemu e lē faalogo i aʻoaʻiga. Ua faapea mai se tasi tusi: “Talu ai, ua mafaufau o ia ua sili atu lona iloa, e lē o ia la o se tasi e aʻoaʻogofie.” E lē faalogo o ia i le aʻoaʻiga. Pe e mafai ea ona ia faamaonia le sesē o aʻoaʻiga a le Tamā? E lē taitai ona sesē Ieova ma o le a ia lē mafai lava. O le teena o aʻoaʻiga ua iloa ai le valea o lē tauemu. Maʻeu le fetaui lelei o upu na faaaogāina e Solomona e faaalia ai le aogā o le avea ma sē e aʻoaʻogofie!

Leoleo Lou Laulaufaiva!

Ua faatusaina e le tupu o Isaraelu le fofoga i se laau e fuaina mai ni fua, e faaalia ai le tāua o le taʻitaʻiina e le Afioga a le Atua o a tatou talanoaga. Ua ia faapea mai: “E ʻai le tagata i mea lelei ai le fua o lona gutu; a o le manaʻo o ē amio leaga, e ʻai ia i le sauaga.” (Faataoto 13:2) O upu e tautala ai o fua lenā o le gutu. E selesele e le tagata mea ua ia lūlū i ana upu. Ua faapea mai se tasi o tagata atamai: “A tautala ma le agalelei ma manaʻo e faia ni faiā faaleuō ma tuaoi, o le a lelei lana ʻai, ma olioli ai i se olaga fiafia ma filemu.” E ese ai le tulaga o ē tauemu. E manaʻo o ia e faia faiga sauā ma faaleagaina isi. Ua ia faia faufauga sauā ma na te seleseleina mai foʻi le tulaga lava lenā. O loo i ona luma mailei e oti ai.

Ua faaauau mai faapea Solomona: “O lē na te leoleo i lona gutu, e tausia e ia lona agaga; a o lē faamaga ona laugutu, e iā te ia le malaia.” (Faataoto 13:3) O se talaaga ua faaleagaina, faalogona tigā, lē lelei le va ma isi tagata pe oo foʻi ina lavea ai le tino, o iʻuga uma na o le tautala e aunoa ma se mafaufau ma le valea. O laugutu e lē pulea le tautala e lē aumaia ai se faamaoniga a le Atua, auā e talatala atu e tagata taʻitoʻatasi le tala i le Atua e tusa ma ana upu. (Mataio 12:36, 37) O le mea moni, o le pulea atoatoa o o tatou laulaufaiva o le a lē faaleagaina ai i tatou. O lea la, e mafai faapefea ona tatou pulea o tatou laulaufaiva?

O le auala faigofie lava o le lē tautala soo. Ua faapea mai le Tusi Paia: “O le tele o upu e lē oge solitulafono ai.” (Faataoto 10:19) O se isi auala, o le mafaufau muamua a o leʻi tautala atu. Ua faapea mai le tusitala faagaeeina: “O i ai lē soona tautala, e pei o tutuʻi i le pelu.” (Faataoto 12:18) Pe afai e lē mafaufau muamua i mea o le a fai atu ai a o leʻi tautala atu, o le a manuʻa ai faalogona o lē o loo faalogologo mai ma lē o loo faia le faamatalaga. O lea la, ua aumaia ai e le Tusi Paia iā i tatou se fautuaga aogā: “E manatunatu le loto o lē amiotonu, ina ia fai se tali.”—Faataoto 15:28.

Ia Filigā

Ua faapea mai Solomona: “Ua tuʻinanau le loto o le paiē, a e leai se mea e maua; a o le manaʻo o ē filigā i galuega e matuā maʻona ia.” (Faataoto 13:4) Ua taʻua e se tasi tusi: “O le manatu o [lenei faataoto] e lē aogā le tuʻinanau i se mea, ae o le mea tāua o le filigā e faia se mea. E malosi le tuʻinanau o tagata paiē . . . ae latou te lē maua se mea.” Ae peitaʻi, o le a faamalieina faanaunauga o ē filigā.

E faapefea i latou ia o loo ʻalofia le faia o se tuuina atu iā Ieova ona latou te lē mananaʻo e tauaveina a latou tiute tauave? Atonu latou te faaalia le mananaʻo e ola i le lalolagi fou a le Atua peitaʻi, po o latou tauivi ea e faia se mea e faatatau i lenā tulaga? O se mea e manaʻomia e i latou o ē “ō mai nai le puapuaga tele,” o le faaalia lea o le faatuatua i le taulaga togiola a Iesu, faia se tuuina atu iā Ieova ma faailogaina lo latou tuuina atu e ala i le papatisoga i le vai.—Faaaliga 7:14, 15.

 Seʻi manatunatu po o le ā e aofia ai i le aapa atu i se faaeaga o se ovasia i le faapotopotoga. O le faanaunauga e aapa atu i lenei galuega lelei ua tatau i ai le faamālō ma o loo faalaeiauina foʻi i le Tusi Paia. (1 Timoteo 3:1) Peitaʻi, e lē lava le na o le faanaunau i ai. Ina ia agavaa mo se faaeaga e manaʻomia ai le atiina aʻe o uiga moomia ma le tomai. E manaʻomia ai ni taumafaiga filigā a le tagata lava ia.

O le Amiotonu e Leoleoina Ai

E atiina aʻe e le tagata amiotonu uiga faale-Atua ma tautala i le upu moni. Ua ia iloa o le pepelo o le tetee lea faasaga i le tulafono a Ieova. (Faataoto 6:16-19; Kolose 3:9) Ua faapea mai Solomona e tusa ai ma lenei tulaga: “Ua ʻinoʻino lē amiotonu i le upu pepelo; a o lē amio leaga e inosia o ia ma faamāina.” (Faataoto 13:5) E lē na o le ʻalofia e le tagata amiotonu o le pepelo, ae ua matuā inoino lava i ai. Ua ia iloaina po o le ā lava le foliga mai e lē afāina le pepelo, ae e faaleagaina ai faiā lelei a tagata. Ae e lē gata ai lea, e lē mafai ona faatuatuaina se tagata pepelo. E gaoioi ma le māsiasi le tagata amioleaga a lē o le pepelo po o se isi foʻi auala, ma e iʻu ina inosia o ia.

Ina ia faaalia le aogā o le faia o le mea saʻo i le silafaga a le Atua, ua faapea mai le tupu poto: “O le amiotonu e leoleoina ai lē ua sao lana amio; a o le amio leaga e lafotuina ai lē ua agasala.” (Faataoto 13:6) I le pei o se olo, e puipuia e le amiotonu se tagata, peitaʻi o le tagata amioleaga e faaumatia lea.

Aua le Faatagā Faafoliga

I le faaalia o le malamalama i uiga o tagata, ua mātauina ai e le tupu o Isaraelu e faapea: “O i ai lē tasi e faatagā mauʻoa, a e leai lava sana mea; o i ai lē faatagā mativa, a e tele ana oloa.” (Faataoto 13:7) Atonu e lē o le tulaga moni o le tagata lea e pei ona faafoliga mai. O nisi tagata matitiva atonu e faafoliga mai e mauʻoa—atonu ona o le fia faalialia, pe avatu ai foʻi se manatu o le taulau manuia po o le fia tagata. Ae atonu e faatagā faafoliga mai se tasi e mativa, e natia ai lona tamaoaiga.

E leaga le faatagā mauʻoa po o le faatagā mativa. O le faaaluina o le tele o tupe i le faatauina o mea taugatā e faafoliga mai ai e mauʻoa ae e lē lava le tupe mo mea manaʻomia mo le aiga, e mafai ona mafatia ai le aiga. O se tasi e faafoliga e mativa ae mauʻoa e ono avea o ia o se tasi e lima mau, lē faaaloalogia ai o ia ma lē maua ai le olioli ona o le foaʻi atu. (Galuega 20:35) O le soifua ma le faamaoni o le a iʻu i se olaga e sili ona lelei.

 Aua le Manaʻo i Mea e Tele

Ua faapea mai Solomona: “O le togiola o le tagata, o lana oloa lea; a o lē mativa, e lē faalogo o ia i le aʻoaʻiga.” (Faataoto 13:8) O le ā se lesona o loo aumaia i nei upu poto?

E iai aogā o le avea ma mauʻoa, peitaʻi, e lē aumaia ai se fiafiaga moni. I nei taimi leaga o loo tatou ola ai, e masani ona lamatia ai soifua o tagata mauʻoa ma o latou aiga i le puʻe faamalosia ma tāpā se tupe e totogi ina ia toe faasaʻoloto mai ai. I nisi taimi, e totogi atu ai e le tagata mauʻoa le tupe lea ina ia faasaoina ai lona ola po o se tasi foʻi o le aiga. Ae masani lava ona fasiotia se tasi na puʻe faamalosia. Ua ola le tagata mauʻoa i se tulaga lamatia.

O le tagata mativa e lē popole faapena. Talu ai e lē tele ni ana mea o maua e pei o lea e olioli ai le tagata mauʻoa, e lē avea foʻi la o ia ma taulaiga a i latou e puʻea faamalosia tagata. O se tasi lea o aogā e maua ona o le lē manaʻo tele ma lē faaaluina ai foʻi o tatou taimi ma le malosi i le saʻilia o le ʻoa.—2 Timoteo 2:4.

Fiafia i le “Malamalama”

O loo faaauau ona faaalia mai e Solomona e faapea o le faia o mea e tusa ai ma ala o Ieova o le a aogā iā i tatou. Ua ia faapea mai: “E fiafia le malamalama o ē amiotonu; a o le lamepa a ē amio leaga, e tineia lea.”—Faataoto 13:9.

O le lamepa o loo faaata mai ai le mea tatou te faalagolago i ai ina ia faamalamalama ai o tatou ala o le olaga. ‘O le Afioga a le Atua o le sulu i vae o le tagata amiotonu ma le malamalama i ona ala.’ (Salamo 119:105) O loo iai i lea Afioga le poto e lē gata mai ma le atamai o Lē na Foafoaina Mea. O le tele e faaleleia ai lo tatou malamalama i le finagalo o le Atua ma lana fuafuaga, o le atili manino foʻi lenā o le malamalama faaleagaga lea o loo taʻitaʻia ai i tatou. Maʻeu se māfuaaga e olioli ai! Aiseā tatou te tosina atu ai fua i le poto faalelalolagi po o mea ua “igoa pepelo ai o le iloa”?—1 Timoteo 6:20; 1 Korinito 1:20; Kolose 2:8.

O le tagata amioleaga, e tusa lava pe faafoliga mai e tele lona tamaoaiga ma po o le a le foliga pupula lelei o lana lamepa, ae o le a tineia. O le a iʻu i le pogisa, e tautevateva ai ona vae. Ae e lē gata i lea, “e lē iʻu i se lelei” lona olaga.—Faataoto 24:20.

O le ā e ao ona tatou faia, pe afai tatou te lē mautinoa i se gaoioiga e tatau ona tatou faia i se tulaga patino? Ae faapefea pe afai tatou te lē mautinoa po ua iā i tatou le aiā e gaoioi ai? Ua lapataʻi mai le Faataoto 13:10 e faapea: “Na o le faamaualuga lava e tupu ai le misa.” O le gaoioi e aunoa ma le iloa po o le faia e aunoa ma le aiā e fai ai, o se gaoioiga faamaualuga ma e māfua ai le faatupuina o faafitauli ma isi. Pe e lē sili ea ona filifili ia talanoa ma isi o ē iai le poto ma le faautautaga? Ua faapea mai le tupu poto: “A o ē filifili, e popoto i latou.”

 Faaeteete i Faamoemoega Sesē

E aogā le tupe. E sili le lava o tupe e ola ai na i lo le ola mativa. (Failauga 7:11, 12) Peitaʻi, e mafai ona faaʻoleʻole ni faamanuiaga tau tupe lea e maua e ala i ni faiga faasolitulafono. Ua lapataʻi mai Solomona: “E faaitiitia le oloa i le fai mea faatauvaa; a o lē faaputu mea i galuega, e faateleina ana mea.”

Seʻi manatunatu mo se faaaʻoaʻoga le faaosoosoga o le taaloga faitupe. E ono faaaluina e le tagata taalo lona totogi na maua mai i lana galuega mamafa i lona faamoemoe e manumalo i se aofaʻiga tele o ni tupe. Ae pagā lea, ua ia faia lenei mea ae mafatia ai le aiga! O le ā e tupu pe afai e manumalo le tagata taalo? Talu ai e faigofie le mea ua maua mai ai le tupe, atonu e itiiti ai foʻi la lona talisapaia o le aogā o le tupe. Ae lē gata i lea, atonu ua ia lē iloa ona faaaogā lelei lenei tupe ua maua. Pe lē vave ea ona mou atu lona tamaoaiga e pei o le vave na ia maua mai ai? I le isi itu, o le tamaoaiga e tatau ona faasolosolo mālie ona faatuputeleina—faasolosolo e ala i le faia o ni galuega lelei—e tuputupu mālie aʻe ma e mafai ona aogā i se tasi.

Ua taʻua e Solomona e faapea: “O le faamoemoe ua tuai ona taunuu e faanoanoa ai le loto; a o le manaʻo ua taunuu, o le laau o le ola lea.” (Faataoto 13:12) O faamoemoega lē taunuu e oo mai ai faanoanoaga ma vaivai ai le loto. O loo tupu lenei mea i aso uma. Peitaʻi, e lē o le tulaga lenā i faamoemoega ua faavae mausali i le Afioga a le Atua. E atoatoa lo tatou mautinoa o le a faataunuuina. E tusa lava pe tatou te manatu ua tuai ona taunuu e lē ono faanoanoa ai.

O se faaaʻoaʻoga, tatou te iloa ua lata mai le lalolagi fou a le Atua. (2 Peteru 3:13) E tatou te faatalitali ma le olioli ma le naunau tele i le faataunuuga o folafolaga a le Atua. O le ā e tupu pe afai tatou te faaaogāina le taimi nei a o leʻi oo mai le lalolagi fou a le Atua tatou te pisi ai “i le galuega a le Alii,” ia faamalosiau i le ʻauuso talitonu ma ia ati aʻe atili se faiā vavalalata ma Ieova? Na i lo le ‘faanoanoa o le loto,’ e tatou te olioli ai. (1 Korinito 15:58; Eperu 10:24, 25; Iakopo 4:8) Pe a taunuu se faamoemoega ua leva ona faatalitali i ai, o le laau lea o le ola—e faamalosia ma faafouina ai.

Tulafono a le Atua—Le Puna o le Ola

O le faaalia o le manaʻoga e usiusitai i le Atua, ua faapea mai le Faataoto 13:13: “O lē ʻinoʻino i le upu, e fano o ia iā te ia; a o lē mataʻu i le poloaʻiga, e filemu lava o ia.” Pe afai e inoino se tagata nofo aitalafu i ana upu e ala i le lē toe totogiina o tupe na ia nonōina, o le a fano pe aveesea ana mea totino. I se tulaga foʻi faapena, o le a maumau atu a tatou mea pe afai tatou te lē usiusitai i tulafono a le Atua. O le ā o le a maumau atu?

“O le tulafono a lē ua poto, o le puna o le ola lea, e ʻalo ese ai i mailei e oti ai.” (Faataoto 13:14) O le ola e aunoa ma tulafono a le Atua atamai o Ieova, o lona uiga o le lē maua lea o le taʻitaʻiga e mafai ona taʻitaʻiina i tatou i se olaga sili ona lelei ma umi. Pagā se telē o se mea o le a maumau atu! O le ala atamai mo i tatou, o le uaʻi atu lea i Afioga a le Atua ma ia mafaufau, talanoa ma gaoioi e tusa ma lea Afioga.—2 Korinito 10:5; Kolose 1:10.

[Ata i le itulau 23]

O le tali atu i fautuaga a le Tusi Paia, o se auala sili lenā e aʻoaʻia ai e le tagata o ia lava

[Ata i le itulau 24, 25]

“E manatunatu le loto o lē amiotonu, ina ia fai se tali”

[Ata i le itulau 24, 25]

O le pisi i le “galuega a le Alii” tatou te olioli ai