Pe a Oo i le Taimi e Faataunuu ai Folafolaga

UA TUMU le talafaasolopito i folafolaga lē taulau. E masani i malo ona lē tausia maliega ua uma ona sainia e lē toe faia ni taua ae iʻu ai i le pa mai o taua mataʻutia. Na mātauina e Napoleone e faapea: “Na pau le taimi e tausia ai e malo a latou folafolaga pe afai e faamalosia i latou e faia, po o le mauaina ai foʻi o ni o latou manuia.”

Ae ā folafolaga o loo faia e tagata taʻitoʻatasi? Pagā se lē fiafia pe afai e lē savali se tasi i ana upu aemaise lava, pe afai o se tasi e te iloaina ma maufaatuatuaina. O le mea moni, e ono mafai e tagata ona lē faataunuuina a latou folafolaga pe mumusu foʻi.

E telē se eseesega i le va o folafolaga a tagata ma folafolaga a le Atua! E maufaatuatuaina folafolaga a le Atua. E mautinoa le faataunuuina o so o se folafolaga e faia e Ieova. Ua faapea mai le Isaia 55:11 e tusa ai ma fetalaiga lē masuia a le Atua: “E faapea foi laʻu upu e alu atu ai loʻu gutu, e le foʻi mai fua iā te au; a e peitaʻi e faia le mea ou te loto i ai, e manuia foʻi i le mea ou te auina atu ai.”

O lea la, e faapefea ona tatou vaai i folafolaga a le Atua o loo i le Tusi Paia? E mautinoa e mafai ona tatou faalagolago i ai. O se faaaʻoaʻoga, na tusi le aposetolo o Ioane e faapea: “Faauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava. E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:3, 4) E mafai ona e olioli i na faamanuiaga pe afai e te gaoioi e tusa ma fetalaiga a Iesu: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”—Ioane 17:3.