Fesili Mai le ʻAufaitau

O le ā le papatisoga mo ē ua maliliu?

A o tusi Paulo e uiga i le toetū i le lagi, na ia tusiaina ai se faamatalaga faaosonaunau. O loo faapea mai le Tusi Paia: “A faapea, pe faapefea ē ua papatisoina ma sui o ē ua oti? Afai e moni, e lē toe tutu ē ua oti, ona o le ā ea ua papatisoina ai i latou ma sui o ē ua oti?”—1 Korinito 15:29.

Po o le uiga o le faamatalaga a Paulo, e tatau ona papatisoina tagata o loo soifua e fai ma sui o i latou ua maliliu ae e leʻi papatisoina? E foliga mai o le manatu lenā pe a fua i le mau o le Tusi Paia. Peitaʻi, e lē o le faaiʻuga lenā tatou te faia pe a tatou iloiloina totoʻa le Tusi Paia ma le uluaʻi gagana Eleni lea na faaaogāina e Paulo. O le uiga o le faamatalaga a Paulo, e papatisoina pe faatofuina Kerisiano faauuina i se olaga e oo ina maliliu ai ma le faamaoni e pei o Keriso. Mulimuli ane, ona faatutūina aʻe lea o i latou i se soifuaga agaga e pei o Keriso.

E lagolagoina e le Tusi Paia le manatu lenei. I lana tusi i Kerisiano i Roma, na tusi Paulo e faapea: “Tou te leʻi iloa ea, o i tatou nei uma na papatisoina ia Keriso Iesu, na papatisoina i tatou i lona maliu?” (Roma 6:3) I lana tusi i Kerisiano i Filipi, na tusi Paulo e faapea: “Ia faatasi aʻu i ona [Keriso] tigā, ona ua faatusaina aʻu iā te ia i lona maliu, pe mafai lava iā te aʻu ona oo atu i le toe tū mai o ē ua oti.” (Filipi 3:10, 11) O le uiga o le faamatalaga a Paulo, o le soifuaga o se soo faauuina a Keriso e aofia ai le tumau i le faamaoni i lalo o tofotofoga, o le fesagaʻia o le oti i aso faisoo ma mulimuli ane maliu ma le faamaoni, ona toe faatūina aʻe lea i le lagi.

O se manatu tāua e ao ona mātauina, o mau nei atoa foʻi ma isi mau ia o loo taʻua faatasi ai le oti ma ē ua papatisoina, o loo faasino atu i tagata o loo soifua ua uma ona papatisoina, ae e lē o faasino atu i tagata ua maliliu. Na faapea atu foʻi Paulo i uso Kerisiano faauuina: “Na tanumia outou faatasi ma ia i le papatisoga, o lea foʻi ua outou toe tutū mai ai faatasi ma ia i le faatuatua i le mana o le Atua, o lē na faatū mai iā te ia i ē ua oti.”—Kolose 2:12.

O le faasinonauna Eleni o le hy·perʹ lea o loo faaliliuina “ma sui o” i le Tusi Paia Samoa ma isi faaliliuga i le 1 Korinito 15:29, o le isi ona uiga o le “mo le fuafuaga ina ia.” Ina ia ōgatusa la ma isi mau o le Tusi Paia, ua faaliliu saʻo ai e le Tusi Paia New World Translation of the Holy Scriptures lenei fuaiupu e faapea: “O le ā o le a faia e i latou ua papatisoina mo le fuafuaga ina ia maliliu? Afai e moni e lē faatūina aʻe ē ua maliliu, aiseā ua papatisoina ai foʻi i latou mo lenā fuafuaga?”